Era Qarava Vakacava na iVavakoso na Qase?

E sega ni saumi na neimami italatala. Keimami muria ga na veika a caka ni se qai tauyavu na ivavakoso vaKarisito, era lesi na ivakatawa era rawata na ivakatagedegede mera “vakatawa na ivavakoso ni Kalou.” (Cakacaka 20:28) Qo o ira na tagane matua vakayalo era liutaki keda ena ivavakoso. Era sega ni veivakatawani ‘ena voraki, ena yalo ga e vinakata; sega ena yalo kocokoco, ena yalo ga e marautaka.’ (1 Pita 5:1-3) Na itavi cava era qarava?

Era karoni keimami, taqomaki keimami tale ga. Era dau veidusimaki qai taqomaka vakayalo na ivavakoso na qase. Era kila ni vakacolati ira ena itavi bibi qo na Kalou, era sega gona ni vakacolasau vei ira na nona tamata. Ia era taqomaka neimami bula vakayalo ra qai vinakata me keimami marau. (2 Korinica 1:24) Me vaka na ivakatawa ni sipi e solia nona vinaka me karona nona sipi, era saga na qase mera kilai ira yadua na lewe ni ivavakoso.​—Vosa Vakaibalebale 27:23.

Era vakavulici keimami ena sala me caka kina na loma ni Kalou. Era veivakavulici ena soqoni e veimacawa na qase me vakaukauataka neimami vakabauta. (Cakacaka 15:32) Era liu tale ga ena cakacaka vakavunau na tagane yalodina qo, keimami cakacaka vata ra qai vukei keimami ena veibasoga kece ni cakacaka vakaitalatala.

Era dau veivakayaloqaqataki. Nira kauaitaka neimami bula vakayalo na qase, era dau sikovi keimami e vale se neimami Vale ni Soqoni mera veivukei ra qai veivakacegui ena nodra vakayagataka na iVolatabu.​—Jemesa 5:14, 15.

Eso na qase ni ivavakoso era cakacaka saumi qai tu na nodra icolacola vakavuvale. Qori ena vinakati tale ga kina nodra gauna. E dodonu mera rokovi na tagane gugumatua qo.​—1 Cesalonaika 5:12, 13.

• Na cava na nodra itavi na qase ni ivavakoso?

• Era vakaraitaka vakacava na qase nira kauaitaki keimami?