“Dou Lako Mai Vei Au, . . . Ka’u na Vakacegui Kemudou”

“Vakatawa na Qele ni Sipi ni Kalou”

“Dou dau tu vakarau e veigauna kece mo dou vakatudaliga ena neimami leqa, qai dau veivakauqeti na vosa ni Kalou dou dau wasea mai.”​—Pamela.

“Vinaka vakalevu na veika kece dou vakayacora ena vuku i keimami. Sa dau yaga dina vakalevu.”​—Ropate.

RAU a vola oqori o Pamela kei Ropate, ni vuabale na lomadrau ena levu ni vakavinavinaka ena vukudra na qase ena nodrau dui ivavakoso. Era duavata tale ga kina na tamata ni Kalou mai na veiyasa i vuravura ena vuku ni nodra veitokoni kei na veikaroni na ‘ivakatawa ni qelenisipi ni Kalou.’ (1 Pita 5:2) Io, e levu sara na ka era vakavinavinakataka na tamata i Jiova me baleta na nodra veiqaravi na qase ena vukudra kei na ivalavala ni nodra veiqaravi.

“Vakaogai Kemuni Tiko Ga”

Levu na itavi e lesi vei ira na qase ni ivavakoso vakarisito. (Luke 12:48) Era dau vakarautaka e so na ulutaga mera vunau kina ena soqoni ni ivavakoso, ra qai vunautaka tale ga e matanalevu na itukutuku vinaka ni Matanitu ni Kalou. Okati ena nodra itavi nodra sikovi ira na tacidra vakayalo mera vakatawani ira. Era solia nodra gauna na qase mera sikovi o ira era gadreva vakalevu na veivuke​—me vakataki ira na sa qase kei na so tale​—ia era sega ni vakawaletaka na veika vakayalo kei na veika vakayago e gadreva na nodra dui vuvale. (Jope 29:​12-​15; 1 Timoci 3:​4, 5; 5:8) So na qase era veivuke ena tara vale ni soqoni. So tale era veiqaravi ena Komiti e Veitaratara kei na Valenibula, se ra lewena na ilawalawa qase era lesi mera sikovi ira na curu tu e valenibula. Qai levu vei ira era dau bolecakacaka mera veiqaravi ena soqo lelevu. Sa dina sara, era ‘vakaogai ira tiko ga ena cakacaka ni Turaga’ na qase. (1 Korinica 15:58) Sa rauta mera taleitaki vakalevu na qase dau cakacaka vagumatua vaka oya mai vei ira na tataunaki tu vei ira!​—1 Cesalonaika 5:​12, 13.

Era dau vu ni veivakauqeti dina na qase ni ivavakoso era sikova wasoma na tacidra vakarisito e nodra vale se vanua cava tale mera vakaukauataki ira vakayalo. Kaya kina o Tomasi, e dua a susugi ga vei tinana: “Au sega ni vakabauta niu na rawa ni qaravi Jiova tu edai ena cakacaka vakaitalatala vakatabakidua ke ra sega ni tokoni au ra qai vakayaloqaqataki au na qase.” Era kaya e levu na itabagone era susugi ena vuvale itubutubu ledua ni vukei ira vakalevu ena nodra veiwekani kei na Kalou na nodra dau veikauaitaki na qase.

Era dau taleitaka tale ga vakalevu na cakacaka ni veivakatawani na itabaqase ena ivavakoso. Dua na veiwatini qase erau daukaulotu, erau sa yabaki 80 vakacaca erau vola oqo ni sa sikovi rau oti e rua na qase ni ivavakoso: “Keirau via vakavinavinakataka ga na nomudrau veisiko. Ni drau sa biubiu oti, keirau wilika tale na tikinivolatabu kece tou a veivosaki kina. Keirau na sega ni guilecava vakadua nomudrau vosa ni veivakayaloqaqataki.” E volavola e dua na yada yabaki 70 vei rau na qase erau sikovi koya: “Au a masuti Jiova me vukei au qai talai kemudrau mai na taciqu. E vakalougatataki au sara ga o Jiova ena nomudrau veisiko!” Vakacava o iko, era se qai sikovi iko ga oqo na qase ni nomu ivavakoso? Sa dua dina na ka marautaki nida raica na nodra sasaga mera vakatawa na qelenisipi e tataunaki vei ira!

iVakatawa Era Vakatotomuria na Kalou kei Karisito

O Jiova na ivakatawa dau loloma. (Same 23:​1-4; Jeremaia 31:10; 1 Pita 2:​25) O Jisu Karisito tale ga e dua na iVakatawa vakayalo maqosa. E vakatokai sara ga me ‘ivakatawa vinaka,’ ‘na ivakatawa levu.’ (Joni 10:11; Iperiu 13:20; 1 Pita 5:4) E vakacava beka na ivalavala i Jisu vei ira na via muri koya mera nona tisaipeli? A sureti ira vakayalololoma ena vosa oqo: “Dou lako mai vei au, koi kemudou vakaaduaga sa oca ka colata nai colacola bibi, ia ka’u na vakacegui kemudou.”​—Maciu 11:28.

Era tovolea vaka kina na qase edaidai mera vu ni vakacegu vei ira na qelenisipi, mera taqomaka tale ga. O ira na tagane oqo era “vaka nai vunivuni mai na cagi, kei nai vakaruru mai na cava; ena vaka na uciwai e na vanua dravuisiga, ka vaka na yaloyalo ni vatu levu e na vanua dauveivakaocataki.” (Aisea 32:2) Era vu ni veivakacegui o ira vaka oqo era dau veitaqomaki, era na dokai kina mai vei ira na sipi, ena vakadonui ira tale ga na Kalou.​—Filipai 2:​29; 1 Timoci 5:​17.

Yaga na Veitokoni ni Watidra

Era marau na tamata ni Kalou nira tiko na qase ni ivavakoso, era marautaka tale ga nodra dau tokoni ira na qase na dui watidra. Ia e sega ni ka rawarawa oqori vei ira na wati ni qase. So na gauna, era na tiko ga mai vale nira qarava tiko na watidra na veika me baleta na ivavakoso, se ra veivakatawani voli. So na gauna, sa biu mada vakatikitiki e so na ka sa lalawataki oti vakavinaka me baleti rau ga, baleta ni basika e dua na leqa ena ivavakoso e gadrevi me qaravi totolo. “Keu raica na nona osooso o watiqu ena kena vakarautaki na itavi ena soqoni se me baleta na cakacaka ni veivakatawani, dau votu ga mai noqu vakasama ni oya e cakacaka i Jiova, au qai dau tovolea meu tokoni koya kina,” e kaya o Michelle.

E kaya o Cheryl, e dua tale ga e wati ni qase: “Au kila nira gadreva na mataveitacini ena ivavakoso mera raici ira na qase, ia au vinakata mera kila ni rawa nira raici watiqu ena gauna cava ga era gadreva kina.” Era lomasoli na yalewa me vakataki Michelle kei Cheryl, me rawarawa kina vei ira na watidra mera karona na sipi ni Kalou. Era vakavinavinakataki na wati ni qase ena vuku ni yalo ni veitokoni era dau vakaraitaka.

Ia na qase mada ga ni ivavakoso e osooso me na qarauna me kua ni vakawaletaki na veika me ratou bula kina vakayalo na watina kei na luvena, kei na so tale na ka e ganiti iratou. Na qase e vakawati me “dua ga na watina me ra tamata vakabauta va-Karisito na luvena, me ra i tovo vinaka ka kakua ni beitaki rawa e na dua na ka.” (Taito 1:​6, VV) Sa dodonu vua me karona na nona vuvale ena sala vakalou e vakaroti vakaivolatabu vei ira na ivakatawa lotu Vakarisito.​—1 Timoci 3:​1-7.

E vaka e dua na iyau talei vua na qase osooso na watina e dau veitokoni! Nodra nanuma kece ga na qase vakawati dau veinanumi e vaka oqori. Dina kina na ka e kaya na iVolatabu: “O sa kunea beka e dua na watimu [vinaka]? O sa kunea na ka vinaka.” (Vosa Vakaibalebale 18:​22, NW) Era na vakaraitaka na qase ena nodra vosa kei na nodra ivalavala nira vakamareqeti watidra dina. Era na sega wale ga ni dau masu vata vagumatua, se mera taleitaka na vuli iVolatabu vata o ira na lotu Vakarisito vakawati oqo, ia era navuca tale ga mera marautaka vata na gade ena baravi se dua tale na vanua, se mera lai sarasara ena dua na lomaniba ni senikau. Io, era marautaka na qase mera dau karoni watidra.​—1 Pita 3:7.

Era vu ni veivakabulabulataki vakayalo vei ira na tamata i Jiova na qase era vakatawa na qelenisipi ni Kalou ena lomasavu. Era ‘isolisoli tamata’ dina ra qai yaga vakalevu ena ivavakoso!​—Efeso 4:​8, 11-​13.