Kemuni na iVakatawa, Vakatotomuri Rau na iVakatawa Levu

“A vakararawataki o Karisito ena vukumuni, e qai laiva vei kemuni na ivakarau moni muria na weniyavana.”​—1 PITA 2:21.

O NA SAUMA VAKACAVA?

Nira ivakatawa na qase, era na vakatotomuri Jiova vakacava?

Era na vakatotomuri Jisu Karisito vakacava na qase?

Na cava na inaki ni nodra veivakatawani na qase?

1, 2. (a) Na cava ena yaco ke ra qaravi vinaka na sipi? (b) Na cava era vaka kina na sipi e sega na kedra ivakatawa e levu ena gauna i Jisu?

ERA na bulabula vinaka na sipi ke kauaitaki ira na ivakatawa. E tukuna e dua na ivola me baleta na nodra susugi na sipi, “ke dua e kauti ira ga na sipi ina vanua veico qai sega ni kauaitaki ira se nanumi ira, ena tauvi ira e levu na mate, ena sega tale ga ni rawa ilavo kina na ivakatawa.” Ia nira qaravi vinaka na sipi yadua, era na bulabula vinaka na sipi taucoko.

² E dina tale ga qori ena ivavakoso. Ena tara na nodra bula vakayalo na lewe ni ivavakoso na ivakarau ni nodra veiqaravi kei na nodra veikauaitaki na ivakatawa vei ira na sipi yadua era lesi mera qarava. O na rairai nanuma lesu na nona lomani ira na ilala levu o Jisu “nira vakaloloma ra qai sega ni kauaitaki tu me vaka na sipi e sega na kena ivakatawa.” (Maciu 9:36) Na cava e vakaloloma kina na kedra ituvaki? O ira era lesi mera vakavulica na Lawa ni Kalou era dau voravora, era dau lavaka na ka ra qai veivakaisini. O ira na iliuliu ni lotu kei Isireli era sega ni vukei ira se tuberi ira na sipi, era vakataqara ga vei ira na “icolacola bibi.”​—Maciu 23:4.

3. Na cava mera nanuma tiko na qase ni ivavakoso nira qaravi ira tiko na sipi?

³ O ira tale ga na ivakatawa lotu vaKarisito nikua​—ira era lesi mera qase​—era vakacolati ena dua na itavi bibi. Na sipi kece era qarava tiko e nei Jiova kei Jisu, na “ivakatawa vinaka.” (Joni 10:11) Era ‘voli na sipi ena isau levu sara,’ ena “dra talei” i Jisu. (1 Kor. 6:20; 1 Pita 1:​18, 19) Na levu mada ga ni nona lomani ira na sipi o Jisu, e yalorawarawa kina ni cabora nona bula ena vukudra. Mera nanuma tiko na qase nira lesi ga mera ivakatawa, koya gona era se vakarurugi tiko ena nona veiliutaki na Luvena lomani na Kalou, o Jisu Karisito, “na ivakatawanisipi levu.”​—Iper. 13:20.

4. Na cava ena dikevi ena ulutaga qo?

⁴ Na cava gona e namaki vei ira na ivakatawa vaKarisito nira qaravi ira tiko na sipi? Era uqeti na lewe ni ivavakoso mera ‘talairawarawa vei ira era liutaki ira tiko.’ Ena yasana adua, era vakadreti na qase vaKarisito mera kua ni “vakacolasau vei ira e taukeni ira na Kalou.” (Iper. 13:17; wilika 1 Pita 5:​2, 3.) E rawa gona vakacava vei ira na qase mera liu tiko, ena gauna vata qori mera kua ni vakacolasau vei ira na qelenisipi? Se rawa vakacava vei ira na qase mera vakarautaka na veika era gadreva na sipi, ra qai kua ni vakatanitaka na lewa e solia vei ira na Kalou?

“KAUTI IRA VOLI E NA LOMASERENA”

5. Na cava e vakavotuya na Aisea 40:11 me baleti Jiova?

⁵ E tukuna na parofita o Aisea me baleti Jiova: “Ena vakani ira na nona qele ni sipi me vaka nai vakatawa; ena keveti ira na luve ni sipi e na ligana, ka kauti ira voli e na lomaserena; ko ira era vakasucuma tiko na luvedra ena tubera voli vakamalua ko koya.” (Aisea 40:11) Na vosa qori e vakavotuya ni o Jiova e kauaitaka na veika era gadreva na malumalumu kei ira era rawa ni vakaleqai ena ivavakoso. Me vaka nona kauaitaka na ivakatawa na veika era gadreva yadua na sipi qai tu vakarau me vukei ira, o Jiova tale ga e kauaitaka na veika era gadreva yadua na lewe ni ivavakoso, e marautaka tale ga me vakarautaka na veivuke e gadrevi. Me vaka ga nona keveta na luve ni sipi e dua na ivakatawa ena ilobi ni nona isulu, ena vukei keda tale ga o Jiova​—“na Tama ni yalololoma”​—nida sotava na ituvaki dredre. Ena vakacegui keda nida sotava na veivakatovolei kaukaua se na gauna eda gadreva kina na veivuke.​—2 Kor. 1:​3, 4.

6. Nira ivakatawa vakayalo, e rawa vakacava nira vakatotomuri Jiova na qase?

⁶ Dua na lesoni totoka eda rawa ni vulica e dua na ivakatawa vakayalo vua na Tamada vakalomalagi! Me vakataki Jiova ga, e dodonu me yadrava na veika era gadreva na sipi. Ni kila na ituvaki dredre era sotava tiko kei na veivuke e rawa ni vakarautaki vei ira, sa na qai rawa vua na qase me veivakayaloqaqataki qai veitokoni ke veiganiti. (Vkai. 27:23) Koya gona, e dodonu vua na qase me dau veivosaki qai vakarogoci ira na tacina vakayalo. Ena sega ni siova na veika e baleti ira na tacina, ia ena kauaitaka na veika e raica kei na ka e rogoca ena ivavakoso qai tu vakarau ni ‘vukei ira na malumalumu.’​—Caka. 20:35; 1 Ces. 4:11.

7. (a) Era qaravi vakacava na sipi ni Kalou ena gauna i Isikeli kei Jeremaia? (b) Na cava eda vulica ena nona cudruvi ira na ivakatawa vakayalo tawayalodina o Jiova?

⁷ Dikeva mada na nodra ivakarau ni rai na ivakatawa ena gauna i Isikeli kei Jeremaia. O Jiova a cudruvi ira era lesi mera qaravi ira na sipi, nira sega ni vakayacora vinaka na nodra itavi. Ni sega ni dua e yadrava na qelenisipi, era vakaleqai na sipi ra qai veiseyaki. O ira na ivakatawa qori era ‘vakani ira ga,’ era sega ni vakani ira na sipi ra qai veivakalolomataki. (Isik. 34:​7-10; Jere. 23:1) E cudruvi ira tale ga na iliuliu ni Veivanua Vakarisito na Kalou ena nodra sega ni qarava na nodra itavi. Ia e vakabibitaka tale ga ni gadrevi vei ira na qase ni ivavakoso mera qaravi ira vinaka na qelenisipi ra qai kauaitaki ira vakayalololoma.

“NA KA AU CAKAVA QO E IVAKARAITAKI VEI KEMUDOU”

8. Era na vakatotomuria vakacava na qase na ivakaraitaki vinaka i Jisu ena nona dau vakasalataki ira na tacina?

⁸ Nida ivalavala ca, ena rairai sega ni matata vei ira eso na sipi na ka e namaka vei ira o Jiova. De dua era na sega ni vakayacora na veika e salavata kei na ivakasala vakaivolatabu, se ra na rairai vakayacora eso na ka e vakaraitaka nira sega ni matua vakayalo. Na cava gona mera cakava na qase? E dodonu mera vakatotomuria na nona vosovoso o Jisu vei ratou na nona tisaipeli. Eratou veibataka se o cei vei ratou e uasivi duadua ena Matanitu ni Kalou, ia e sega vakadua ni cudruvi ratou o Jisu. E vakavulici ratou tiko ga qai vakasalataki ratou vakayalololoma me ratou vakaraitaka na yalomalumalumu. (Luke 9:​46-48; 22:​24-27) Ena nona vuya na yavadratou na nona tisaipeli, e vakaraitaka kina o Jisu na lesoni bibi ni yalomalumalumu, na itovo e gadrevi vei ira na ivakatawa lotu vaKarisito.​—Wilika Joni 13:​12-15; 1 Pita 2:21.

9. Na rai cava e uqeta o Jisu vei ratou nona tisaipeli?

⁹ Ni vakatauvatani kei Jemesa kei Joni, e duidui na rai i Jisu me baleta na itavi era qarava na ivakatawa vakayalo. Rau vinakata na yapositolo qori me dua na nodrau itutu ena Matanitu ni Kalou. Ia a vakadodonutaka o Jisu na nodrau rai ena nona kaya: “Dou kila ni o ira na iliuliu ni veimatanitu era dau vinakata mera vakayacora na tamata na veika era vinakata. Ra qai lewai ira era vakarurugi ena nodra veiliutaki. Ia mo dou kua sara ni va ya. Ke o via turaga, e dodonu mo nodra dauveiqaravi na kena vo.” (Maciu 20:​25, 26, Contemporary English Version) E gadrevi vei ratou na yapositolo me ratou vorata na rai ni via “vakacolasau” vei ira na tacidratou se me ratou lewai ira ‘na tamata mera vakayacora na veika eratou vinakata.’

10. Na cava e namaka vei ira na qase o Jisu nira qarava na qelenisipi, e ivakaraitaki vinaka vakacava o Paula ena tikina qori?

¹⁰ E namaka o Jisu mera qarava na qelenisipi na qase me vaka ga e cakava o koya. E dodonu mera tu vakarau mera nodra dauveiqaravi na tacidra, sega ni nodra turaga. A yalomalumalumu va qori na yapositolo o Paula, e kaya kina vei ira na qase ni ivavakoso e Efeso: “Oni kila vinaka na imatai ni siga au butuka kina na yasana o Esia, au a tiko ga vei kemuni ena gauna kece qori, au solia noqu igu taucoko ena noqu qarava na Turaga ena dela ni yalomalumalumu.” E vinakata na yapositolo o Paula mera yalomalumalumu qai gumatua na qase qori ni vukei ira na tacidra. E tukuna: “Au sa vakaraitaka vei kemuni ena ka kece ga ni dodonu moni cakacaka vakaukaua moni vukei ira kina na malumalumu.” (Caka. 20:​18, 19, 35) E tukuna o Paula vei ira e Korinica ni sega ni lewa na nodra vakabauta. Ia e dua ga na itokani vakacakacaka yalomalumalumu qai vinakata mera marau. (2 Kor. 1:24) E ivakaraitaki vinaka o Paula vei ira na qase nikua ena nona yalomalumalumu kei na nona gugumatua.

‘TAURIVAKA NA VOSA DINA’

11, 12. E rawa vakacava vua na qase me vukea e dua na tacina me vakatulewa?

¹¹ E dodonu vua na qase ni ivavakoso me ‘taurivaka na vosa dina ena nona veivakavulici.’ (Taito 1:9) Ia me cakava qori “ena yalomalua.” (Kala. 6:1) Na ivakatawa vinaka ena sega ni vakasaurarataki ira na lewe ni ivavakoso mera muria na nona ivakasala. Ia ena vukei ira na tacina mera yavutaka nodra vakatulewa ena nodra lomani Jiova kei na nona Vosa. Ena rairai vakamacalataka na qase na ivakavuvuli vakaivolatabu vua e dua na tacina me dikeva ni bera ni vakayacora e dua na vakatulewa bibi. De dua ena vakaraitaka vua e dua na ulutaga mai na noda ivola e salavata sara ga kei na ituvaki e sotava tiko. Ena rairai uqeti koya me vakasamataka se na tara vakacava na nona veiwekani kei Jiova na nona vakatulewa. Ena rawa ni uqeti koya me kerea na veidusimaki ni Kalou ena masu ni bera ni vakatulewa. (Vkai. 3:​5, 6) Ni rau sa veitalanoataka oti na veitikina qori, sa na qai laiva me vakatulewa ga na tacina.​—Roma 14:​1-4.

¹² Na lewa era na tauca na ivakatawa ena yavutaki ga ena iVolatabu. E bibi gona vei ira na qase mera vakayagataka vinaka na iVolatabu ra qai muria. Nira cakava qori ena vukei ira mera kua ni vakatanitaka na nodra lewa. E nodra itavi ga na qase mera ivakatawa, nira na saumi taro yadua vei Jiova kei Jisu na lewe ni ivavakoso ena vakatulewa era cakava.​—Kala. 6:​5, 7, 8.

‘MERA IVAKARAITAKI VEI IRA NA QELENISIPI’

13, 14. Na cava eso na ituvaki mera ivakaraitaki vinaka kina na qase vei ira na lewe ni ivavakoso?

¹³ Ni vakasalataki ira oti na qase ni ivavakoso mera ‘kua ni vakacolasau vei ira era lesi mera qarava,’ sa qai vakadreti ira na yapositolo o Pita ‘mera ivakaraitaki ga vei ira na qelenisipi.’ (1 Pita 5:3) Na cava mera cakava na qase mera ivakaraitaki vinaka vei ira na qelenisipi? Dikeva mada e rua na ivakatagedegede me sauva e dua e “via qarava na itavi vakaivakatawa.” Kena imatai, ena gadrevi “me yalomatua.” Kena ikarua, ena vinakati me “lewa vinaka nona vuvale.” Ke vakavuvale o koya e via sauva na isausau qori, e dodonu me dua na ulunivuvale ivakaraitaki vinaka, baleta “ke dua e sega ni qarava rawa nona vuvale, ena qai qarava vakacava na ivavakoso ni Kalou?” (1 Tim. 3:​1, 2, 4, 5) Ni dua e via sauva na itavi vakaivakatawa, e dodonu me yalomatua, qori na nona kila vinaka na ivakavuvuli vakalou, me kila tale ga na sala me bulataka kina. Ena dau lewai koya vakamatau qai sega ni dau vakatulewa vakariri. Ni laurai vua na qase na itovo kece qori, era na nuitaki koya na lewe ni ivavakoso.

¹⁴ Dua tale na sala mera ivakaraitaki vinaka kina na qase vei ira na tacidra vakayalo, oya na nodra liu sara tiko ga ena cakacaka vakavunau. E ivakaraitaki vinaka ena tikina qori o Jisu. Ni se bula voli e vuravura, e bibi vua na kena kacivaki na itukutuku vinaka ni Matanitu ni Kalou. E vakaraitaka vei ratou nona tisaipeli na sala me vakayacori kina na cakacaka qori. (Mari. 1:38; Luke 8:1) Nikua, era dau marautaka na dautukutuku mera cakacaka vakavunau kei ira na qase. Era raica na nodra gugumatua na qase ena cakacaka ni veivakabulai qori, ra qai vuli ena nodra iwalewale ni veivakavulici! Era dau osooso na ivakatawa, ia nira vakayagataka wasoma na nodra gauna kei na nodra kaukaua mera vunautaka kina na itukutuku vinaka, ena uqeti ira tale ga na lewe ni ivavakoso mera gugumatua. E rawa nira ivakaraitaki vinaka tale ga na qase vei ira na mataveitacini ena nodra dau vakavakarau vinaka ra qai vakaitavi ena soqoni kei na so tale, me vaka na sasamaki kei na nodra raica me tu vinaka na Vale ni Soqoni.​—Efeso 5:​15, 16; wilika Iperiu 13:7.

“VUKEI IRA NA MALUMALUMU”

15. Na cava era veivakatawani kina na qase?

¹⁵ Na ivakatawa vinaka ena totolo ni vukea e dua na sipi e mavoa se tauvimate. O ira tale ga na qase e dodonu mera totolo ni vukea e dua ena ivavakoso e malumalumu se gadreva na veivuke vakayalo. De dua era gadreva na veivuke vakayago na itabaqase kei ira era tauvimate, ia era gadreva vakalevu na veivuke vakayalo kei na veivakayaloqaqataki. (1 Ces. 5:14) Era na rairai sotava na itabagone ena ivavakoso eso na ituvaki dredre, me vaka na nodra saga mera vorata na “gagadre vakaitabagone.” (2 Tim. 2:22) E okati ena cakacaka ni veivakatawani nodra dau sikovi na lewe ni ivavakoso, me rawa nira kila na qase na kedra ituvaki na tacidra, ra qai vakarautaka eso na ivakasala vakaivolatabu veiganiti me vakayaloqaqataki ira. Ni vakayacori qori ena kena gauna donu, ena sega ni yaco kina na leqa lelevu.

16. Ni gadreva e dua ena ivavakoso na veivuke vakayalo, na cava e rawa nira cakava na qase?

¹⁶ Ia vakacava ke dua ena ivavakoso e sotava tiko e dua na leqa, e rawa sara ga ni vakaleqa nona veiwekani kei Jiova? E kaya na dau vola iVolatabu o Jemesa: “E dua vei kemuni e tauvimate tiko? Me kacivi ira na qase ni ivavakoso, mera masulaki koya, ra qai lumuti koya ena waiwai ena yaca i Jiova. Na masu ni vakabauta ena vakabulai koya e tauvimate, ena vakaukauataki koya o Jiova. Ke valavala ca ena vosoti.” (Jeme. 5:​14, 15) Ke sega ni “kacivi ira na qase ni ivavakoso” na tacida qori, e dodonu mera vukitotolo na qase mera raici koya ena gauna ga era kila kina e dua na ka me baleti koya. Ena gauna era masu vata kina ra qai tokoni ira na tacidra ena gauna era gadreva kina na veivuke, era sa vakaraitaka tiko na qase nira dau veivakabulabulataki vakayalo ra qai dau veivakayaloqaqataki.​—Wilika Aisea 32:​1, 2.

17. Na cava ena yaco nira vakatotomuria ‘na ivakatawa levu’ na qase?

¹⁷ Na veika kece era cakava na qase ena isoqosoqo i Jiova, era na saga mera vakatotomuria ‘na ivakatawa levu,’ o Jisu Karisito. Nira vakarautaka na veivuke vakayalo na tagane era lesi, ena yaga vei ira na qelenisipi, ra qai bulabula vinaka tiko ga. Io, eda vakavinavinaka vakalevu da qai vakacaucautaki Jiova na iVakatawa vinaka duadua.

[iYaloyalo ena tabana e 26]

[iYaloyalo ena tabana e 29]

Era na vukea na nodra vuvale na qase mera vakavakarau ena cakacaka vakaitalatala (Raica na parakaravu 13)

[iYaloyalo ena tabana e 30]

Era ivakaraitaki na ivakatawa ena cakacaka vakavunau (Raica na parakaravu 14)