Na Cava na Nodra iTavi na Dauveiqaravi ni iVavakoso?

Na iVolatabu e cavuta e rua na ilawalawa tagane era veiqaravi ena ivavakoso, ira na “ivakatawa kei na dauveiqaravi ni ivavakoso.” (Filipai 1:1) Era tiko ena ivavakoso e vica vei ira na tagane era lewe ni ilawalawa e rua qori. Ia na cava na nodra itavi na dauveiqaravi ni ivavakoso?

Era tokoni ira na ilawalawa qase. O ira na dauveiqaravi ni ivavakoso era tamata vakayalo, era nuitaki, era tagane gugumatua ke ra mani gone se dua sara na itaba. Era qarava eso tale na itavi bibi e vauca na ivavakoso kei na Vale ni Soqoni. Qori e rawa kina vei ira na qase ni ivavakoso mera qarava vakatabakidua na veivakatawani kei na veivakavulici.

Era veivuke sara vakalevu. Eso na dauveiqaravi ni ivavakoso era lesi mera kidavaki ira kece na gole mai ena soqoni. Eso tale e rawa nira qarava na misini ni vosa, na veisoliyaki ni ivola, na veika vakailavo ni ivavakoso, kei na nodra lesi na lewe ni ivavakoso ena yalava ni vunau. Era veivuke tale ga ena kena vakavinakataki na Vale ni Soqoni. De dua era na kerei mera vukei ira na itabaqase. Se mani itavi cava era lesi kina na dauveiqaravi ni ivavakoso, era vakacaucautaki ena nodra tu vakarau ni cola itavi.—1 Timoci 3:13.

Era tagane ivakaraitaki vinaka. Era digitaki na dauveiqaravi ni ivavakoso ena vuku ni nodra itovo vinaka vakayalo. Nira qarava na itavi ena soqoni, e dei kina na neimami vakabauta. Na nodra dau gugumatua ena cakacaka vakavunau, keimami gugumatua tale ga kina. Na yalo ni veitokoni e tu vei ira e vakaduavatataki keimami, e vakavu marau tale ga. (Efeso 4:16) Ni toso na gauna, sa rawa nira lesi mera qase ni ivavakoso.

• Na cava e kilai me baleti ira na dauveiqaravi ni ivavakoso?

• Era veivuke vakacava na dauveiqaravi ena kena cicivaki vinaka na ivavakoso?