Vakaraitaka ni o Vakavinavinakataka na “iSolisoli Tamata”

1. Na cava eso na ka e vakarautaka vei keda o Jisu?

E SEGA ni dua vei keda e lomasavu vakalevu me vakataki Jisu. Ni tiko e vuravura, e dau vukea e levu ni cakamana. (Luke 9:​12-17) Nona iloloma levu duadua ya ni solia nona bula ena vukuda. (Joni 15:13) Ni sa vakaturi mada ga, e lomasavu tiko ga. Me vaka e yalataka, e kerei Jiova me sovaraka na yalona tabu me vakavulici keda, me vakacegui keda tale ga. (Joni 14:​16, 17, vmr.; 16:13) E vukei keda tiko ga o Jisu ena noda soqoni ni ivavakoso me rawa nida vukea e levu mera tisaipeli e veiyasa i vuravura.​—Maciu 28:​18-20.

2. O cei e wili ena “isolisoli tamata” e tukuni ena Efeso 4:​7, 8?

² E tiko e dua tale na ka e vakarautaka vei keda o Jisu. E vola na yapositolo o Paula ni lesu i lomalagi o Jisu, “e solia na isolisoli tamata.” (Wilika Efeso 4:​7, 8.) E tukuna ni vakarautaka o Jisu na isolisoli qori me veitokoni ena ivavakoso ena levu na sala. (Efeso 1:​22, 23; 4:​11-13) Nikua “na isolisoli tamata” qori era wili kina na dauveiqaravi ni ivavakoso, ira na qase, kei ira na ivakatawa ni tabacakacaka.a Nira sega ni uasivi na tagane qo, e macala nira dau cala. (Jeme. 3:2) Ia e lesi ira o Jisu mera vukei keda, e nona iloloma vei keda.

3. Vakatauvatana na sala eda tokona kina “na isolisoli tamata.”

³ E lesia o Jisu “na isolisoli tamata” qo me vakayaloqaqataki ira na lewe ni ivavakoso. (Efeso 4:12) Ia eda rawa ni veivuke mera qarava vinaka na itavi bibi qori. Kena ivakatautauvata: Eso era vakaitavi ena tara Vale ni Soqoni. Eso tale era veitokoni ena vakarautaki ni kakana, nodra vakavodoki, kei na so tale na ka. Eda va tale ga qori nida tokona na nodra sasaga na dauveiqaravi, ira na qase, kei ira na ivakatawa ni tabacakacaka ena ka eda cakava, kei na ka eda tukuna me vakayaloqaqataki kina na ivavakoso. Meda dikeva mada na sala e yaga kina vei keda nodra cakacaka vakaukaua, kei na sala eda na vakaraitaka kina vei ira, vaka kina vei Jisu noda vakavinavinakataka “na isolisoli tamata” e vakarautaka mai.

ERA DAU “VEIVUKEI” NA DAUVEIQARAVI NI IVAVAKOSO

4. Na cava eso na itavi bibi era ‘veivuke’ kina na dauveiqaravi ni ivavakoso ena imatai ni senitiuri?

⁴ Ena imatai ni senitiuri, era lesi eso na tacida tagane mera dauveiqaravi ni ivavakoso. (1 Tim. 3:8) Kena irairai ni o ira ga qori e vola o Paula nira dau “veivukei.” (1 Kor. 12:28) Era qarava na dauveiqaravi eso na itavi bibi me rawa nira veivakavulici na qase, mera veivakatawani tale ga. Kena ivakaraitaki, era rairai veivuke ena kena lavetaki na Vosa ni Kalou, se volia na kena iyaya.

5. Na cava eso na itavi bibi era qarava nikua na dauveiqaravi ni ivavakoso?

⁵ Dikeva mada eso na itavi bibi era qarava na dauveiqaravi ena nomu ivavakoso. (1 Pita 4:10) Era na rairai lesi mera qarava na akaude, na mape, ota ni ivola, misini, dauveivukei, se veivuke ena kena vakavinakataki na Vale ni Soqoni. E bibi kece na itavi qori me marautaki kina na soqoni, me tuvanaki vinaka tale ga na cakacaka vakavunau. (1 Kor. 14:40) Kena ikuri, era lesi eso na dauveiqaravi ena itavi ni soqoni ena lomanimacawa kei na ivunau soqovi levu. Ena rairai lesi tale ga na dauveiqaravi me veivuke vua na ivakatawa ni iwasewase lailai. Eso na gauna era na veitomani na dauveiqaravi matua kei ira na qase ena veivakatawani.

6. Na cava eso na vuna meda vakavinavinakataki ira kina na dauveiqaravi gugumatua?

⁶ E yaga vakacava ena ivavakoso na nodra itavi na dauveiqaravi? E kaya e dua na tacida yalewa o Beberlyb mai Bolivia: “Au vakavinavinakataki ira na dauveiqaravi ni ivavakoso, au marautaka na soqoni. Nira qarava vinaka nodra itavi, au rawa ni lagasere, saumitaro, vakarorogo ena ivunau, au vuli tale ga ena vidio kei na iyaloyalo. Era raica mera taqomaki vinaka na tiko ena soqoni, era vukei ira tale ga na sega ni rawa ni tiko mera sema ena vidio. Ni oti na soqoni era veivuke ena sasamaki, ena qaravi ni akaude, era vakadeitaka tale ga me tiko na ivola e vinakati. Au vakavinavinakataki ira vakalevu!” E kaya o Leslie mai Colombia, e qase ni ivavakoso o watina: “E vakanuinui sara ga o watiqu vei ira na dauveiqaravi mera qarava eso tale na itavi. Ke sega na nodra veivuke, ena osooso vakalevu o watiqu, au vakavinakavinakataka gona nodra gumatua kei na yalorawarawa na dauveiqaravi mera veivuke.” E macala ni na va tale ga qori nomu rai.​—1 Tim. 3:13.

7. Sala cava eda na vakaraitaka kina noda vakavinavinakataki ira na dauveiqaravi? (Raica tale ga na iyaloyalo.)

⁷ De dua eda na via vakavinavinakataki ira na dauveiqaravi ni ivavakoso, ia e uqeti keda na iVolatabu: “Me laurai na nomuni vakavinavinaka.” (Kolo. 3:15) Kena ivakaraitaki o Kristofer, e dua na qase ni ivavakoso mai Finiladi, e vakaraitaka va qo nona vakavinavinaka: “Au vola e dua na tikinivolatabu ena card se talevoni qai vakauta vua e dua na dauveiqaravi, au tukuna vua na sala e uqeti au kina nona ivakaraitaki kei na vuna au taleitaka kina.” Dua na veiwatini mai Niu Kaledonia o Pascal kei Jael, rau dau masulaki ira na dauveiqaravi ni ivavakoso. E kaya o Pascal: “Dua na gauna qo e wasoma neirau masulaki ira na dauveiqaravi, keirau vakavinavinakataki Jiova ni soli ira mai, keirau kerei koya me tiko vata kei ira, me vukei ira tale ga.” E rogoca o Jiova na masu va qori, e yaga tale ga vei ira kece ena ivavakoso.​—2 Kor. 1:11.

ERA “CAKACAKA VAKAUKAUA” NA QASE NI IVAVAKOSO

8. Na cava e tukuna kina o Paula nira “cakacaka vakaukaua” na qase ena imatai ni senitiuri? (1 Cesalonaika 5:​12, 13)

⁸ Era cakacaka vakaukaua na qase ni ivavakoso ena imatai ni senitiuri mera vukei na lewe ni ivavakoso. (Wilika 1 Cesalonaika 5:​12, 13; 1 Tim. 5:17) Era “vakatawai” ira na lewe ni ivavakoso nira liutaka na soqoni, e vakatulewataka tale ga na ilawalawa qase na ka e vauca na ivavakoso. Era dau “vakasalataki” ira na mataveitacini ena yalololoma me taqomaki kina na ivavakoso. (1 Ces. 2:​11, 12; 2 Tim. 4:2) E macala nira cakacaka vakaukaua na tagane qo mera qarava nodra vuvale, me dei tale ga nodra veiwekani kei Jiova.​—1 Tim. 3:​2, 4; Taito 1:​6-9.

9. Na cava eso na itavi era qarava na qase ni ivavakoso nikua?

⁹ Era osooso na qase ni ivavakoso nikua. Era vakayacora na cakacaka ni italatala. (2 Tim. 4:5) Era ivakaraitaki vinaka nira gumatua ena cakacaka vakavunau, era tuvanaka na vunau ena noda yalava, ra qai vakavulici keda meda matau ena vunau kei na veivakavulici. Era veiqaravi tale ga mera turaganilewa dauloloma. Ni valavala ca bibi e dua na lotu vaKarisito, era na saga na qase mera vukei koya me vinaka tale nona veiwekani kei Jiova. Ena gauna vata qori, era na qarauna me savasava tiko ga na ivavakoso. (1 Kor. 5:​12, 13; Kala. 6:1) Koya e bibi duadua, era kilai na qase nira ivakatawa. (1 Pita 5:​1-3) Era vakarautaka vinaka nodra ivunau vakaivolatabu, era saga mera kilai ira kece na lewe ni ivavakoso, ra qai veivakatawani. Kena ikuri, eso na qase era veivuke ena tara Vale ni Soqoni kei na kena vakavinakataki, tuvanaki na soqo ni veiwasewase, era lewe ni Komiti Veitaratara kei na Valenibula, vaka kina na iLawalawa Dauveisiko e Valenibula. Era cakacaka vakaukaua na qase ena vukuda!

10. Na cava eso na vuna eda vakavinavinakataki ira kina na qase ni ivavakoso gugumatua?

¹⁰ Sa tukuna oti tu o Jiova nira na karoni keda vinaka na ivakatawa, eda na “sega tale ni rere, se . . . domobula.” (Jere. 23:4) Qori na ka e vakadinadinataka o Johanna, e dua na tacida mai Finiladi ni tauvimate bibi o tinana. E kaya: “E sega ni rawarawa meu talaucaka na lomaqu vei ira eso tale. Ia e vosovoso me rogoci au e dua na qase keirau sega ni veikilai vinaka, e masu vata kei au, e vakadeitaka tale ga ni lomani au o Jiova. Au sa guilecava na ka e tukuna, ia au vakila niu taqomaki. Au kila ni talai koya mai o Jiova me vukei au ena gauna donu.” Sala cava era vukei iko kina na qase ena nomu ivavakoso?

11. Sala cava eda na vakavinavinakataki ira kina na qase ni ivavakoso? (Raica tale ga na iyaloyalo.)

¹¹ E vinakata o Jiova me vu mai lomada noda vakavinavinakataki ira na qase “ena vuku ni nodra cakacaka.” (1 Ces. 5:​12, 13) E kaya o Henrietta mai Finiladi: “Era yalorawarawa na qase mera veivuke, ia sega ni kena ibalebale qori ni levu tu na nodra gauna kei na kaukaua, se sega tale ga na nodra leqa. Eso na gauna au tukuna vei ira: ‘Kila na cava? O dua na qase ni ivavakoso vinaka. Au vinakata mo kila tiko qori.’” E kaya e dua na tacida mai Taki o Sera: “E vinakati mera vakayaloqaqataki na qase me rawa nira qarava tiko ga nodra itavi. E rawa gona ni dua noda ivola ni vakavinavinaka vei ira, sureti ira meda kana vata, se tomani ira ena vunau.” Vakacava e tiko e dua na qase ni ivavakoso o vinakata mo vakavinavinakataka nona gumatua? E bibi gona meda vakasamataka na sala meda vakaraitaka kina noda vakavinavinaka.​—1 Kor. 16:18.

ERA VEIVAKAYALOQAQATAKI NA IVAKATAWA NI TABACAKACAKA

12. O cei tale e lesia o Jisu mera veivakayaloqaqataki ena imatai ni senitiuri? (1 Cesalonaika 2:​7, 8)

¹² Qo e dua tale na vuna e lesia kina o Karisito Jisu “na isolisoli tamata” ena ivavakoso. Ena veidusimaki i Jisu, o ira na qase e Jerusalemi era talai Paula, Panapasa kei na so tale, mera ivakatawa ni tabacakacaka. (Caka. 11:22) Na vuna? Mera vakayaloqaqataki ira na lewe ni ivavakoso, me vaka ga era lesi kina na dauveiqaravi kei na qase ni ivavakoso. (Caka. 15:​40, 41) Levu na ka era vakuai ira kina na tagane qo, eso na gauna era bolemate sara ga mera veivakavulici, mera veivakayaloqaqataki tale ga.​—Wilika 1 Cesalonaika 2:​7, 8.

13. Na cava eso na itavi e qarava na ivakatawa ni tabacakacaka?

¹³ Era veitosoyaki tu ga na ivakatawa ni tabacakacaka. Eso vei ira e yawa sara na vanua era lakova mera veisiko kina ena ivavakoso. E veimacawa, ena vica nona ivunau, ena veivakatawani, ena liutaka na bose ni painia, na bose ni qase kei na dauveiqaravi, kei na sota ni cakacaka vakavunau. E vakarautaka na ivunau, tuvanaka na soqo ni tabacakacaka kei na soqo ni veiwasewase. E veivakavulici ena vuli ni painia, e tuvanaka na nodra bose namaki na painia ena tabacakacaka, e qarava eso tale na ka e lesia vua na valenivolavola ni tabana, vaka kina eso na ka e vakatotolotaki.

14. Na cava eso na vuna eda vakavinavinakataki ira kina na noda ivakatawa ni tabacakacaka gugumatua?

¹⁴ E yaga vakacava ena ivavakoso na itavi era qarava na ivakatawa ni tabacakacaka? E kaya e dua na tacida tagane mai Taki me baleta nodra veisiko na ivakatawa ni tabacakacaka: “Na gauna kece era veisiko mai kina, e uqeti au meu vakayagataka vakalevu noqu gauna meu vukei ira na mataveitacini. Au sa sotava e levu na ivakatawa ni tabacakacaka, e sega vakadua ni tiko ena noqu vakasama nira sa rui osooso se dredre meu vosa vei ira.” O Johanna sa tukuni oti mai, e veitomani kei na ivakatawa ni tabacakacaka ena vunau, ia rau sega ni sotava e dua e vale. E kaya: “Au na sega vakadua ni guilecava na siga ya. Rau sa toki na taciqu, dua na ka noqu nanumi rau. E vakayaloqaqataki au na ivakatawa ni tabacakacaka, e vukei au meu kila nida qaravi Jiova ena gauna qo ena rawa ni lekaleka ga noda tu veiyawaki kei ira na wekada, ia ena vuravura vou ena levu noda gauna ni veimaliwai kei ira.” Io, levu na ivakatawa ni tabacakacaka era veivolekati sara kei ira na mataveitacini.​—Caka. 20:37–21:1.

15. (a) Me salavata kei na 3 Joni 5-8, eda na vakaraitaka vakacava nida vakavinavinakataki ira na ivakatawa ni tabacakacaka? (Raica tale ga na iyaloyalo.) (b) Na cava meda vakavinavinakataki ira kina na watidra na tagane era lesi? Eda na cakava vakacava? (Raica na kato “Nanuma na Watidra.”)

¹⁵ E uqeti Keio na yapositolo o Joni me kauaitaki ira na mataveitacini era veisiko yani qai “talaci ira ena kena ivalavala e vakadonuya na Kalou.” (Wilika 3 Joni 5-8.) Dua na sala eda na vakaraitaka kina qori nida sureta na ivakatawa ni tabacakacaka meda kana vata. Dua tale, noda tokona na ituvatuva ni cakacaka vakavunau ena macawa ni veisiko. O Leslie sa tukuni oti mai, e vakaraitaka nona vakavinavinaka ena so tale na sala. E kaya: “Au masulaka me vakarautaka o Jiova na ka me baleti ira. Keirau dau volavola tale ga vakaveiwatini vei ira, keirau tukuna vei ira ni yaga vakalevu vei keirau na nodra veisiko.” Meda nanuma tiko nira vakataki keda ga na ivakatawa ni tabacakacaka. Eso na gauna era tauvimate, lomaocaoca, era yalolailai tale ga. De dua nomu vosa vakayalovinaka se dua nomu iloloma lailai, e rawa ni saumi kina nona masu ni kere veivuke na nomu ivakatawa ni tabacakacaka!​—Vkai. 12:25.

E VINAKATI “NA ISOLISOLI TAMATA”

16. Me salavata kei na Vosa Vakaibalebale 3:​27, na cava e rawa nira taroga na tacida tagane?

¹⁶ E veiyasa i vuravura e vinakati e levu tale na tacida tagane mera “isolisoli tamata.” Ke o dua na tacida tagane papitaiso, vakacava e “tu vei iko na kaukaua mo veivuke”? (Wilika Vosa Vakaibalebale 3:27.) O sasaga tiko mo dauveiqaravi ni ivavakoso? Ke o sa dauveiqaravi tiko, vakacava o rawa ni sasaga mo qase ni ivavakoso mo qaravi ira na mataveitacini?c O rawa ni cakava eso na veisau mo vakalewe fomu ena Koronivuli ni iTalatala ni Matanitu? Ena vakavulici iko na koronivuli qori me rawa ni vakayagataki iko o Jisu ena levu tale na sala. Ke o nanuma ni sega ni ganiti iko, masuti Jiova. Kerea na veivuke ni nona yalo tabu mo rawa ni qarava vinaka na itavi cava ga o lesi kina.​—Luke 11:13; Caka. 20:28.

17. Na cava eda kila me baleta noda Tui o Karisito Jisu ni vakarautaka na “isolisoli tamata”?

¹⁷ Na nodra gumatua na tacida era lesi mera “isolisoli tamata,” e ivakadinadina ni liutaki keda tiko o Jisu ena iotioti ni veisiga qo. (Maciu 28:20) Eda marau vakalevu ni dauloloma na noda Tui, e lomasavu, e kila vinaka tale ga na ka e yaga vei keda qai vakarautaki ira mai na tacida matua mera vukei keda. Koya gona, meda vakasamataka na sala meda vakaraitaka kina noda vakavinavinakataki ira na tagane gumatua qo. Kua ni guilecava meda vakavinavinakataki Jiova tale ga, na iVurevure ni “iloloma vinaka kece kei na isolisoli uasivi kece.”​—Jeme. 1:17.