O Cei na Dauveiqaravi Yalodina e Vuku?

Ni bera ni mate o Jisu, a vosa vei ratou e va na nona tisaipeli, o Pita, Jemesa, Joni kei Adriu. Ni vakamacalataka na ivakatakilakila ni nona tiko ena iotioti ni veisiga, a taroga e dua na taro bibi: “O cei mada na dauveiqaravi yalodina e vuku, e lesia na nona turaga me qaravi ira na nona lewenivuvale, me solia vei ira na kedra kakana ena kena gauna donu?” (Maciu 24:3, 45; Marika 13:3, 4) Me vaka ni nodratou “turaga,” a vakadeitaka o Jisu vei ratou na nona tisaipeli ni na lesia eso mera vakarautaka na kakana vakayalo vei ira na nona imuri ena ivakataotioti ni veika vakavuravura. O cei na dauveiqaravi qori?

Dua na ilawalawa lailai era lewena na imuri lumuti i Jisu. E kilai na “dauveiqaravi” me iLawalawa Dauvakatulewa ni iVakadinadina i Jiova. E vakarautaka na kakana vakayalo ena kena gauna donu vei ira na nodra itokani era sokaloutaki Jiova. Keimami vakararavi vua na dauveiqaravi yalodina qo me vakarautaka tiko ga na keimami “ivakarau kakana ena kena gauna dodonu.”​—Luke 12:42.

E qarava na vuvale ni Kalou. (1 Timoci 3:15) E solia o Jisu vua na dauveiqaravi na ilesilesi bibi me qarava na veika e vauca na isoqosoqo i Jiova e vuravura. Qori e wili kina na veika kece e taukena, e veidusimaki tale ga ena vunautaki ni itukutuku vinaka kei na neimami vakavulici ena ivavakoso. Me rawa ni vakarautaka na ka keimami gadreva ena kena gauna, e vakarautaka na “dauveiqaravi yalodina e vuku” na kakana vakayalo, qori na ivola keimami vakayagataka ena cakacaka vakavunau wili kina na porokaramu e vakarautaki ena soqoni kei na neimami soqo lelevu.

E yalodina na dauveiqaravi ina ka dina vakaivolatabu kei na nona itavi me vunautaka na itukutuku vinaka. E vuku tale ga na dauveiqaravi, ni qarava vinaka na ka e taukena o Karisito e vuravura. (Cakacaka 10:42) Sa vakalougatataka tiko o Jiova na nona cakacaka na dauveiqaravi ena nona vakalevutaka tiko ga na isolisoli vakayalo qai vakayarayarataki ira mai e levu ina sokalou dina.​—Aisea 60:22; 65:13.

• O cei e lesia o Jisu me vakani ira vakayalo na nona tisaipeli?

• Na cava e tukuni kina ni yalodina qai vuku na dauveiqaravi?