“Moni Nanumi Ira na Liutaki Kemuni Tiko”

NA KA e tukuna qori na yapositolo o Paula e volatukutukutaki ena Iperiu 13:7, e rawa tale ga ni vakadewataki: “Nanumi ira na nomuni iliuliu.” Me tekivu mai na 33 G.V., eratou qarava na itavi qori na yapositolo yalodina i Jisu Karisito me ratou ilawalawa dauvakatulewa, me ratou dusimaka na ivavakoso vaKarisito se qai tauyavu vou. (Caka. 6:2-4) Rauta na yabaki 49 G.V., sa tubu tale na kedratou iwiliwili na ilawalawa dauvakatulewa, sega ni o ratou ga na yapositolo i Jisu. Ni vakatulewataki na ka e baleta na cili, e okati ena ilawalawa dauvakatulewa qori o ratou na ‘yapositolo kei ira na qase e Jerusalemi.’ (Caka. 15:1, 2) E itavi ni ilawalawa dauvakatulewa me bosea na veika bibi me baleti ira kece na lotu vaKarisito. Eratou vakarautaka na ivola kei na idusidusi mera vakayaloqaqataki kece kina na ivavakoso, me uqeti ira tale ga na tisaipeli mera duavata ena vakasama kei na ka era cakava. Nira muria ra qai vakamalumalumu na ivavakoso kece ena veidusimaki ni ilawalawa dauvakatulewa, e vakalougatataki ira kina o Jiova, e vua tale ga na nodra sasaga.—Caka. 8:1, 14, 15; 15:22-31; 16:4, 5; Iper. 13:17.

² Nira sa takali na yapositolo, e basika na vukitani. (2 Ces. 2:3-12) Me vaka a parofisaitaka o Jisu ena vosa vakatautauvata ni witi kei na co ca, na witi (o ira na lotu vaKarisito lumuti) ena kaburaki kei na co ca (o ira era kaya nira lotu vaKarisito). E vica na senitiuri nodrau tubu vata tiko me yacova na gauna ni tatamusuki, na “ivakataotioti ni veika vakavuravura.” (Maciu 13:24-30, 36-43) Era marautaka na lotu vaKarisito lumuti me vakadonui ira o Jisu ena gauna qori, ia se sega na ilawalawa dauvakatulewa, se dua na ituvatuva matata e vakayagataka o Jisu e vuravura me dusimaki ira kina nona imuri. (Maciu 28:20) Ia e parofisaitaka o Jisu ni na yaco na veisau ena gauna ni tatamusuki.

³ “O cei mada na dauveiqaravi yalodina e vuku?” Ni taroga oti qori o Jisu, e tukuna sara e dua na vosa vakatautauvata, qo e okati ena “ivakatakilakila” e cavuta me baleta na “ivakataotioti ni veika vakavuravura.” (Maciu 24:3, 42-47) E tukuna o Jisu ni na gumatua na dauveiqaravi qo me vakarautaka na kakana vakayalo “ena kena gauna donu” vei ira na dauveiqaravi ni Kalou. O Jisu e vakayagataka e vica na tagane—sega ni dua ga—me liutaka na cakacaka ena imatai ni senitiuri. E vakayagataka tale ga na dauveiqaravi yalodina ena ivakataotioti ni veika vakavuravura, sega ni dua ga na tamata.

NA “DAUVEIQARAVI YALODINA E VUKU”

⁴ O cei e lesia o Jisu me vakani ira nona imuri? E veiganiti me vakayagataki ira na lotu vaKarisito lumuti e vuravura. Na iVolatabu e vakatokai ira mera “matabete vakatui,” nira lesi mera “‘tukuna yani na lagilagi’ i koya e kacivi [ira] mai na butobuto ina nona rarama uasivi.” (1 Pita 2:9; Mala. 2:7; Vkta. 12:17) Ia vakacava era dauveiqaravi yalodina kece na lumuti e vuravura? Sega. Ni vakani ira vakacakamana o Jisu e 5,000 na tagane, sega ni wili kina o ira na yalewa kei na gone, e vakayagataki ratou na tisaipeli me ratou vota na kakana vei ira na ilala levu. (Maciu 14:19) E vakayagataki ratou na le vica ga me vakani ira kina e levu. Qori tale ga na sala e vakarautaka kina na kakana vakayalo nikua.

⁵ Na “dauniyau yalodina e vuku” e dusia e dua na ilawalawa lailai era tagane lumuti, era vakaitavi sara ga ena kena vakarautaki kei na votai ni kakana vakayalo donuya nona tiko o Karisito. (Luke 12:42) Ena iotioti ni veisiga, eratou lewe ni “dauveiqaravi yalodina e vuku” na tacida tagane lumuti eratou veiqaravi tiko ena itikotiko liu. Nikua, eratou vakatokai me iLawalawa Dauvakatulewa ni iVakadinadina i Jiova.

⁶ E vakayagataka o Karisito na ilawalawa qori me tabaka na parofisai vakaivolatabu sa vakayacori tiko, me veidusimaki tale ga ena kena gauna donu ena sala me muri kina na ivakavuvuli vakaivolatabu e veisiga. E votai na kakana vakayalo qori ena ivavakoso kece ni iVakadinadina i Jiova. (Aisea 43:10; Kala. 6:16) Ena gauna vakaivolatabu, na dauveiqaravi se dauniyau nuitaki e dau qarava na ka kece ena dua na vale. E nona itavi gona na dauveiqaravi yalodina e vuku me qarava na lewenivuvale vakabauta. E okati tale ga ena nona itavi me qarava na iyau vakayago, na cakacaka vakavunau, porokaramu ni soqo ni tabacakacaka kei na soqo ni veiwasewase, nodra lesi na tacida tagane mera veiqaravi ena duidui tabana ena isoqosoqo, kei na tabaki ni ivola vakaivolatabu, ni yaga qori vei ira kece na “lewenivuvale.”—Maciu 24:45.

⁷ O cei gona na “lewenivuvale”? Kena isau rawarawa ga, o ira mera vakani. Dau kilai tu e liu mera lewenivuvale na lumuti. Ia ena gauna qo era sa okati tale ga kina na isoqosoqo levu ni ‘so tale na sipi.’ (Joni 10:16) Erau vakayagataka ruarua na ilawalawa qo na kakana vakayalo e vakarautaka na dauveiqaravi yalodina.

⁸ Ni lako mai o Jisu ena veivakararawataki levu me vakarogoya qai vakarusa na ituvaki ca qo, ena lesia na dauveiqaravi yalodina me “lewa na ka kece e taukena.” (Maciu 24:46, 47) Ena vakaicovitaki na dauveiqaravi yalodina ena bula i lomalagi. Eratou na tomani ira na vo ni 144,000 mera veiliutaki kei Karisito mai lomalagi. Sa na sega e vuravura na dauveiqaravi yalodina, ia erau na lesia o Jiova kei Jisu eso mera “turaga” mera dusimaki ira na bula e vuravura ni sa veiliutaki na Matanitu vakaMesaia.—Same 45:16.

VUNA MEDA ‘NANUMI IRA KINA NA LIUTAKI KEDA TIKO’

⁹ E levu na vuna meda ‘nanumi ira kina era liutaki keda,’ da qai nuitaki ira. Ena yaga vakacava qori? E tukuna na yapositolo o Paula: “Nira yadravi kemuni tiko ra qai saumitaro kina, me rawa nira veiqaravi ena marau sega ena rarawa, ni na sega ni yaga qo vei kemuni.” (Iper. 13:17) E bibi gona meda talairawarawa da qai vakamalumalumu vei ira era liutaki keda, nira yadrava tiko noda bula vakayalo.

¹⁰ E kaya o Paula ena 1 Korinica 16:14: “Na ka kece oni cakava me caka ena loloma.” Na ka e vakatulewataki ena vukuda na tamata ni Kalou e dau yavutaki ena itovo uasivi qo na loloma. E kaya na 1 Korinica 13:4-8: “Na loloma e vosovoso qai yalovinaka. Na loloma e sega ni vuvu, e sega ni tukutukuni koya, e sega ni dokadoka, e sega ni cakava na ka e sega ni rakorako, e sega ni kauaitaka ga na ka e baleti koya, e sega ni cudrucudru. E sega ni katona na ca. E sega ni marautaka na ka e sega ni dodonu, e marautaka ga na dina. E ubia na ka kece, e vakabauta na ka kece, e nuitaka na ka kece, e vosota na ka kece. E sega vakadua ni seavu na loloma.” Na loloma sara ga e yavutaki ena vakatulewa kece e caka meda vinaka kina na tamata i Jiova, meda kua gona ni leqataka na veika e dau vakatulewataki mai. Ni laurai tale ga kina na loloma i Jiova.

¹¹ Me vaka ga ena imatai ni senitiuri, o Jiova e vakayagataki ira na tagane ivalavala ca mera liutaki keda nikua. A vakayagataki ira mada ga ena gauna makawa mera cakava na lomana. A ta waqa o Noa, e vunautaka tale ga na veivakarusai ena yaco ena nona gauna. (Vkte. 6:13, 14, 22; 2 Pita 2:5) A lesi o Mosese me liutaki ira na tamata i Jiova mai Ijipita. (Lako 3:10) Era uqeti vakalou na tagane ivalavala ca mera vola na iVolatabu. (2 Tim. 3:16; 2 Pita 1:21) E sega ni vakaleqa noda nuitaka na isoqosoqo ni Kalou ni vakayagataki ira na tagane ivalavala ca o Jiova nikua mera dusimaka na vunau kei na cakacaka ni veivakatisaipelitaki. E vakayaloqaqataki keda meda kila ni veivuke ga i Jiova e rawa ni cakava kina na isoqosoqo e levu na ka. E vosota voli mai na dauveiqaravi yalodina e levu sara na ka dredre, ia e vakaraitaka tiko ga ni dusimaki koya tiko na yalo tabu. Levu sara na ka ni veivakalougatataki e laurai ena isoqosoqo rairai i Jiova nikua. Eda na tokona gona qai solia kina noda vinaka taucoko.

EDA NA NUITAKA VAKACAVA NA DAUVEIQARAVI?

¹² O ira na lesi ena so na itavi ni veiqaravi ena ivavakoso, era vakaraitaka nira nuitaka na dauveiqaravi yalodina ena nodra ciqoma nodra ilesilesi kei na nodra qarava ena nodra vinaka taucoko. (Caka. 20:28) Nida dautukutuku ni Matanitu ni Kalou, eda na gumatua ena vunau e veivale, veisikovi lesu, kei na vuli iVolatabu. (Maciu 24:14; 28:19, 20) Eda na vakavakarau vinaka, eda na tiko tale ga ena soqoni kece, na soqo ni tabacakacaka kei na soqo ni veiwasewase me yaga vei keda na kakana bulabula vakayalo e vakarautaka na “dauveiqaravi yalodina.” Ena yaga dina na noda veivakayaloqaqataki nida veimaliwai kei ira na tacida ena soqo vaKarisito va qo.—Iper. 10:24, 25.

¹³ Eda vakaraitaka tale ga noda nuitaka na isoqosoqo nida tokona ena cau. (Vkai. 3:9, 10) Nira leqa na tacida, eda na sega tale ni tu suka. Eda na dodoliga ena kena gauna totolo duadua. (Kala. 6:10; 1 Tim. 6:18) Eda na vakayacora qo ena yalo ni veilomani vakaveitacini, da qai yadrava na sala eso meda vakaraitaka kina vei Jiova kei na nona isoqosoqo nida vakavinavinakataka na veika vinaka e caka vei keda.—Joni 13:35.

¹⁴ Eda vakaraitaka tale ga nida nuitaka na isoqosoqo ena noda tokona na vakatulewa e caka. E okati kina noda yalomalumalumu ni muria na nodra veidusimaki o ira na lesi mera liutaki keda, me vakataki ira na ivakatawa ni tabacakacaka kei na qase ni ivavakoso. O ira qori era wili mera ‘liutaki keda tiko,’ meda talairawarawa qai vakamalumalumu vei ira. (Iper. 13:7, 17) So na gauna ena sega ni matata na vuna e tau kina eso na lewa, ia eda na tokona ga nida kila ni na yaga tawamudu vei keda. E vakalougatataki keda kina o Jiova nida talairawarawa ina nona Vosa, kei na nona isoqosoqo. Qori e vakaraitaka nida vakamalumalumu vua na Turaga o Jisu Karisito.

¹⁵ Io, e levu na vuna meda nuitaka kina na “dauveiqaravi yalodina e vuku.” Na kalou ni vuravura qo o Setani e saga tiko ena nona igu kece me vakarogocataka na yaca i Jiova kei na nona isoqosoqo. (2 Kor. 4:4) Me kua sara ni rawai iko na nona ilawaki! (2 Kor. 2:11) E kila ni sa “lekaleka nona gauna” me qai biu ena qara sega ni vakabotona, e vinakata me vagolei ira tani e levu mera kua ni qarava na Kalou. (Vkta. 12:12) Ni kaukaua tiko ga na sasaga i Setani, meda toro voleka mada ga vei Jiova. Meda nuitaki koya kei na sala e vakayagataka tiko me dusimaki keda ena gauna qo. Ena vakaduavatataki keda vakamataveitacini nida cakava qori.