Vakarorogo tu ga o Jisu

Vakacava e dau rawarawa mo vakarorogo vei rau nomu itubutubu?— De dua ena dredre qori ena so na gauna. O bau kila ni a vakarorogo o Jisu vei Jiova kei rau nona itubutubu?— Ena vukei iko nona ivakaraitaki mo vakarorogo vei rau nomu itubutubu ke dredre mada ga ena so na gauna. Meda dikeva mada qori.

Ni bera ni mai bula e vuravura o Jisu, a bula tu mai lomalagi kei na Tamana o Jiova. Ia rau tiko tale ga na itubutubu i Jisu e vuravura, o Josefa kei Meri. O kila na ka e yaco e rawa kina me rau nona itubutubu?—

A tokitaka vakacakamana o Jiova ina katonigone i Meri na bula vakalomalagi i Jisu me rawa ni sucu qai bula e vuravura. A tubu tiko ena ketei Meri o Jisu me vakataki ira ga na vo ni gone, sa qai sucu ni oti e vula ciwa. Na ka e yaco qori e rawa kina vei rau o Meri kei Josefa me rau itubutubu i Jisu e vuravura.

Dua na ka e cakava o Jisu ni se qai yabaki 12 e laurai kina na levu ni nona lomani Tamana, o Jiova. A yaco qori ni ratou gole vakavuvale i Jerusalemi me ratou lai tiko ena kanavata ni Lakosivia. Ena nodratou ilakolako lesu i vale, rau sega ni raici Jisu o Josefa kei Meri. O kila a tiko e vei?—

Erau lesu totolo i Jerusalemi o Josefa kei Meri rau qai vaqarai Jisu e veivanua. Dua na ka nodrau lomaleqa ni rau sega ni raici koya. Ia rau qai kunei koya ena valenisoro ni sa oti e tolu na siga! O kila na vuna a tiko kina ena valenisoro o Jisu?— Qori na vanua ena vulica kina na veika me baleti Tamana, o Jiova. E lomani Jiova qai via kila na sala me vakamarautaki koya kina. Ni tubu cake tiko me uabula, a dau vakarorogo vei Jiova o Jisu. Ke dredre mada ga se sotava kina na rarawa, e vakarorogo tiko ga. Vakacava e vakarorogo tale ga o Jisu vei rau o Josefa kei Meri?— Io, e tukuni qori ena iVolatabu.

Cava o vulica vei Jisu?— Ke dredre mada ga ena so na gauna, e bibi mo vakarorogo vei rau nomu itubutubu. Vakacava o na cakava qori?—