Vakavulica na Luvemu
A Vulica o Jisu na Talairawarawa
E DAU dredre vei iko ena so na gauna na talairawarawa?—a E sega ni kurabuitaki ke vaka kina, baleta e dau dredre vei keda kece ena so na gauna na talairawarawa. O bau kila ni o Jisu mada ga a vulica na talairawarawa?—
O kila se o cei e dodonu moni talairawarawa kece kina na gone?— Io, vei rau o ta kei na. E kaya na iVolatabu: “Ni talairawarawa vei ira nomuni itubutubu me salavata kei na loma ni Kalou.” (Efeso 6:1) O cei na tamai Jisu?— Na Kalou o Jiova, e Tamada tale ga. (Maciu 6:9, 10) E donu tale ga ke o tukuna ni tamai Jisu o Josefa, e tinana o Meri. O kila se a rawa vakacava ni rau nona itubutubu?—
A se sega ni taratagane o Meri, ia a tukuna vua na agilosi o Keperieli ni na vakasucuma e dua na gone. Ena yaco qori ena cakamana veivakurabuitaki i Jiova. A tukuna vei Meri o Keperieli: “Ena vakaruguti iko na kaukaua i koya e Cecere Duadua. Oya na vuna ena vakatokai kina o koya o na vakasucuma me yalosavasava, na Luve ni Kalou.”—Luke 1:30-35.
A tokitaka na Kalou ina katonigone i Meri na bula vakalomalagi i luvena. Sa qai tubu tiko e ketei tinana me vakataki ira ga na vo ni gone. A sucu o Jisu rauta na ciwa na vula e tarava. Ni a vakamautaki Meri o Josefa donuya na gauna qori, era nanuma kina e levu ni tamai Jisu dina o Josefa. Ia o Josefa e tamana vakacabecabe ga. E rawa gona ni tukuni ni rua na tamai Jisu!
Dua na ka a cakava o Jisu ni se yabaki 12 e vakaraitaka na levu ni nona lomani Jiova na Tamana vakalomalagi. A yaco qori ena gauna eratou gole vakayawa kina i Jerusalemi na vuvale i Jisu, meratou lai tiko ena kanavata ni Lakosivia me vaka ga e kena ivalavala vei ratou. Ena nodratou ilakolako lesu i vale, e Nasareci, rau sega ni kidava o Josefa kei Meri ni yali tiko o Jisu. O kila se rau guilecavi koya vakacava?—
Ena nodratou gole i Jerusalemi, sa tiko eso tale na taci Jisu. (Maciu 13:55, 56) Era rairai gole tale tiko ga eso na wekadratou, me vakataki rau o Jemesa kei Joni, na tamadrau o Sepete, kei na tinadrau o Salome e kena irairai ni taci Meri. A rairai nanuma gona o Meri ni tiko vata kei ratou na vo ni wekana o Jisu.—Maciu 27:56; Marika 15:40; Joni 19:25.
Erau lesu totolo i Jerusalemi o Josefa kei Meri ni rau liaca ni yali o Jisu. Dua na ka nodrau vaqaqara, rau qai kunei koya ena valenisoro ena ikatolu ni siga. A tukuna vei Jisu o Meri: “Na cava o cakava kina qo vei keirau? Keirau sa mate na vaqarai iko.” A sauma o Jisu: “Cava drau vaqarai au kina? Drau sega ni kila ni dodonu meu tiko ena vale nei Tamaqu?”—Luke 2:45-50.
O nanuma ni cala nona vosa va ya o Jisu vei tinana?— Erau kila nona itubutubu ni dau guta o Jisu na sokalou ena vale ni Kalou. (Same 122:1) Sa rauta me nanuma o Jisu ni imatai ni vanua me rau vaqaqara kina na valenisoro ni Kalou. Oti na ka e yaco ya, e lai vakasamataka tiko ga o Meri na ka e tukuna o Jisu.
Na cava na rai i Jisu me baleti rau o Josefa kei Meri?— E kaya na iVolatabu: “Eratou sa qai lako vata i Nasareci, e lai talairawarawa tiko ga vei rau [o Jisu].” (Luke 2:51, 52) Na cava eda vulica vei Jisu?— Io, meda dau talairawarawa vei ira noda itubutubu.
A sega ni dau rawarawa vei Jisu na talairawarawa—vua mada ga na Tamana vakalomalagi.
Ena bogi ni bera nona mate, a kerea o Jisu me veisautaka o Jiova nona vakatulewa me baleta na ka e vinakata me cakava. (Luke 22:42) A sega ni rawarawa vei Jisu na talairawarawa, ia a talairawarawa ga vua na Kalou. E tukuni ena iVolatabu ni “vulica na talairawarawa ena veika rarawa e sotava.” (Iperiu 5:8) O nanuma nida rawa tale ga ni cakava ya?—
[iVakamacala e ra]
a Ke o wiliwili tiko kei na dua na gone, mo cegu ni o raica na itoqa balavu o qai uqeti gone me tukuna na nona nanuma.
TARO:
▪ A rawa vakacava me tinai Jisu o Meri, sala cava e rawa ni tukuni kina ni rua na tamai Jisu?
▪ Na cava erau sega ni kidava kina na itubutubu i Jisu nona yali?
▪ E vei a namaka o Jisu me rau vaqarai koya kina nona itubutubu?
▪ Cava o rawa ni vulica vei Jisu?
[iYaloyalo ena tabana 31]
Cava o nanuma kina ni imatai ni vanua me rau vaqarai Jisu kina o Josefa kei Meri na valenisoro?