LESONI 29

Na Cava e Yaco Nida Mate?

iLavelave e Tabaki

Sa bau takali e dua drau dau veivolekati? Ena gauna dredre va qori, de dua o na vaqaqa: ‘Na cava e yaco nida mate? Eda rawa ni raici ira tale?’ Ena lesoni qo kei na kena e tarava, e veivakacegui na ka e tukuna na iVolatabu.

1. Na cava e yaco nida mate?

O Jisu e vakatauvatana na mate me vaka ga ni mocelutu e dua. O koya e mocelutu e sega ni kila na ka e yaco wavoliti koya tiko. E tautauvata vakacava na mate kei na moce? Ni dua e mate, e sega ni vakila na rarawa, e sega ni galili, se mani vakacava sara na nona volekati ratou nona vuvale se itokani. E kaya na iVolatabu ni “o ira na mate era sega sara ga ni kila e dua na ka.”—Wilika Dauvunau 9:5.

2. E yaga vakacava nida kila na ka dina me baleta na mate?

Levu era rerevaka mera mate, era rerevaki ira mada ga na mate. Ia e rawa ni vakacegui iko na ka e kaya na iVolatabu me baleta na mate. E kaya o Jisu: “Na ka dina ena qai sereki kemuni.” (Joni 8:32) Levu na lotu era vakavuvulitaka ni bula tale tiko e dua na ka nida mate. Ia e duatani na ka e tukuna na iVolatabu. Ni dua e mate, e sega ni rarawa tale tiko. Era sega tale ga ni vakila e dua na ka. E sega ni rawa nira vakaleqai keda. E sega ni dodonu gona meda vakalomavinakataki ira se qaravi ira na mate, se meda masulaki ira.

Eso era kaya ni rawa nira veivosaki kei ira na mate. Ia e sega ni rawa qori. Me vaka eda sa vulica mai, “era sega ni kila e dua na ka na mate.” O ira era nanuma nira veivosaki tiko kei ira na wekadra era sa mate, era veivosaki tiko kei ira na timoni, era vukici ira mera vaka ga na wekadra era sa mate. Na noda kila gona na ka dina me baleti ira na mate, eda na sega ni vakacalai vei ira na timoni. E vakasalataki keda o Jiova meda kua ni veivosaki kei ira na mate, ni rawa nira vakaleqai keda na timoni.—Wilika Vakarua 18:10-12.

VAKEKELI

Vulica e levu tale na ka e tukuna na iVolatabu me baleta na mate, qai vaqaqacotaka nomu vakabauta na Kalou dauloloma ni sega ni dau vakararawataki ira na mate.

E dabe tiko e dua na tama kei na dua na luvena ena veibulu nei watina, era tiko tale ga na itokani kei na vuvale mera veivakacegui.

3. Vulica na kedra ituvaki dina na mate

E veiyasa i vuravura, e levu e duidui na nodra rai ena ka e dau yaco nida mate. Ia e sega ni dina kece na vakabauta qori.

Na vakabauta cava me baleti ira na mate e takalevu ena vanua o tiko kina?

Mo raica na ka e vakavulica na iVolatabu, sarava na VIDIO.

VIDIO: Na Cava na Kedra iTuvaki na Mate?—Vidio Lekaleka (1:19)

iYaloyalo: iTaba mai na vidio ‘Na Cava na Kedra iTuvaki na Mate?—Vidio Lekaleka.’ iYaloyalo: 1. Davo tiko e valenibula e dua sa mate. 2. Mocelutu e dua na tagane ena sitima.

Wilika Dauvunau 3:20, qai veivosakitaka na taro qo:

Ena tikinivolatabu qori, na cava e yaco ni mate e dua?
Vakacava e bula tale tiko e dua na ka nida sa mate?

E tukuna na iVolatabu na nona mate o Lasarusa, na itokani voleka i Jisu. Ni o wilika na Joni 11:11-14, dikeva na ka e tukuna o Jisu me baleta na kena ituvaki o Lasarusa. Qai veivosakitaka na taro qo:

O Jisu e vakatauvatana na mate ena cava?
Na cava e tukuna qori me baleta na kedra ituvaki na mate?
O nanuma ni donu na ka e tukuna na iVolatabu me baleta na kedra ituvaki na mate?

4. E yaga vakacava na ka dina me baleti ira na mate?

Nida kila na ka dina me baleti ira na mate, eda na sega ni rerevaki ira. Wilika Dauvunau 9:10, qai veivosakitaka na taro qo:

E rawa nira vakaleqai keda na mate?

Nida kila na ka dina vakaivolatabu, eda na sega ni vakalomavinakataki ira na mate, se sokaloutaki ira. Wilika Aisea 8:19 kei na Vakatakila 4:11, qai veivosakitaka na taro qo:

Cava o nanuma, na cava na rai i Jiova ke dua e sokaloutaki ira na mate, se kerea na nodra veivuke?

iYaloyalo: iTovo vakavanua ena nodra rokovi na mate 1. E tekiduru e dua na turaga qai masu ena yasa ni dua na bulubulu, qai cabora na kakana. 2. Ratou meke tiko e tolu na tagane ni ratou dara tiko na nodratou isulu ni vanua. 3. Era yabe e dua na ilala levu era vakamatavulo, era qai taura tiko na ivakatakilakila ni qavokavoka ena nodra Siga na Mate. — Na ka dina me baleti ira na mate, e sereki keda mai na itovo vakavanua e cata o Jiova

5. E vakacegui keda na ka dina me baleti ira na mate

Levu era vakabauta ni gauna era mate kina, era na vakararawataki ena vuku ni nodra itovo ca. Ia e veivakacegui nida kila ni sega ni dua e vakararawataki ena gauna e mate kina, o ira mada ga e ca sara na nodra itovo. Wilika Roma 6:7, qai veivosakitaka na taro qo:

Ke tukuni ena iVolatabu ni bokoci se sereki na nona ivalavala ca e dua ena gauna e mate kina, cava o nanuma ena vakararawataki tale ena nona cala makawa?

Na levu ga ni noda kilai Jiova, ena matata vei keda ni sega ni dau vakararawataki ira na mate. Wilika Vakarua 32:4 kei na 1 Joni 4:8, qai veivosakitaka na taro qo:

Vakacava na Kalou e tukuni tiko ena tikinivolatabu qo na nona itovo, ena vakadonuya mera vakararawataki na mate?
O nanuma ni veivakacegui na ka dina me baleti ira na mate? Na vuna?

KA ERA KAYA ESO: “Au rere niu sega ni kila na ka ena yacovi au niu mate.”