Na Cava me Vakarauta ga Kina na Ka Eda Namaka?

EDA dau marau ni yaco na ka eda nuitaka se da rawata na ka eda nakita. Ia e levu na ka eda diva se namaka e sega ni dau yaco. Eda na yalolailai sara beka se cudruvi ira na tani ke sega ni dau yaco na ka eda nuitaka. E kaya kina e dua na turaga vuku: “Ni vakaberaberataki na ka sa nuitaki tiko sa dau oca kina na yaloda.”​—Vosa Vakaibalebale 13:12.

Na cava e so na ka e rawa ni vakavuna meda yalolailai? E rawa vakacava me vakarauta ga na ka eda namaka? Ena yaga tale ga vakacava vei keda?

Nanamaki Kei na Yalolailai

Ni rui totolo na ivakarau ni bula nikua, eda na bera ga ke da tovolea meda toso vata kaya. E sega ni oti rawa noda vakayagataki gauna kei na noda kaukaua, ia ni qai sega tale ni yaco na ka eda sasagataka, ena vakavuna ga vei keda na rarawa. E rawa sara ga meda nanuma nida sa vakaleqai ira tiko na tani. E kaya o Siteri, e dua na yalewa vakawati e tina qai kila na dredre ni susu gone: “Au rarawataka niu sega ni dei ena noqu vakadodonutaki iratou na luvequ kei na noqu vakila niu sega ni vakavulici iratou vinaka.” E kaya me baleta nona vuli o Sainimere, e dua na itabagone: “E sega vei au na gauna meu cakava kina na ka kece au via cakava, oqo e via kauta laivi sara ga vei au na yalovosota.”

Noda namaka vakasivia na ka e rawa ni vakavuna meda vinakata me vinaka vakaoti kece ga na ka e caka, ia oqo ena vakatuburarawa ga. E tusanaka o Peni, e dua na cauravou sa vakawati: “Niu raica lesu na ka au cakava, na ka au vakasamataka, se ka e tu e lomaqu, au kila ni a rawa me vinaka cake. Au dau vinakata me vinaka vakaoti na ka au cakava, ia oqo e lai vakavuna ga vei au na yalototolo, na rarawa, kei na yalolailai.” E kaya o Kalesi, e dua na marama vakawati lotu Vakarisito: “Ke da dau via vinaka vakaoti, eda na sega ni vinakata meda druka. Eda na vinakata meda tina vinaka duadua se radinivale vinaka duadua. Eda na via rawaka da qai marau, eda na cudru ke sega ni rawa na ka eda saga.”

E rawa tale ga ni vakamosi yalo na tautauvimate kei na noda sa qase. Ena yaco tale ga oqo ke da sa malumu sobu da qai sega ni rawata e levu na ka. “Au rarawa niu sa sega ni rawata na ka au dau rawata niu se bera ni tautauvimate,” e kaya o Ilisapeci.

Oya e so na ivakaraitaki ni ka e rawa ni vakavuna meda yalolailai. Ke da sega ni qarauna, ena rawa ni vakavuna meda vakabauta nira sa sega ni taleitaki keda na tani. O koya gona, na cava e so na ka eda rawa ni cakava meda walia kina na yalolailai me qai vakarauta ga na ka eda namaka?

Sala me Vakarauta ga Kina na Ka Eda Namaka

Meda nanuma taumada ni o Jiova e yalorawarawa qai dauveinanumi. E tukuna vei keda na Same 103:14: “Ni sa kila ko koya na nodai bulibuli; sa nanuma ga ni da sa kuvu-ni-soso.” E namaka ga vei keda o Jiova na ka e rawa nida solia baleta ni kila na ka eda rawata kei na ka eda sega ni rawata. E dua na ka e namaka oya meda ‘yalomalumalumu nida lako vata kaya na noda Kalou.’​—Maika 6:8.

E uqeti keda tale ga o Jiova meda masuti koya. (Roma 12:12; 1 Cesalonaika 5:​17) E yaga vakacava oqo vei keda? Na masu e vakadeitaki keda, e vukei keda tale ga me veiraurau na noda rai. Nida masu vagumatua eda vakaraitaka nida qara veivuke​—e vakaraitaka nida lokomi da qai yalomalumalumu. E rogoca noda masu o Jiova ena nona solia vei keda na yalona tabu, qai so vei ira na vua ni yalo tabu na loloma, yalomalua, yalololoma, kei na ivalavala malua. (Luke 11:13; Kalatia 5:​22, 23) E vakaseavutaka tale ga na lomaocaoca kei na rarawa na masu. Ni o masu, “o vakila na vakacegu o sega ni rawata mai na dua tale na vanua,” e kaya o Ilisapeci. E kaya tale ga o Kaveni: “Au dau masuta meu lomavakacegu, me tu vinaka tale ga noqu vakasama niu walia e dua na leqa. E dau rogoci au o Jiova.” E kila na yapositolo o Paula na yaga ni masu. Oya na vuna e vakatura kina: “Na ka kece ga ko ni vinakata ni kerea vua na Kalou e na masu kei na vakavinavinaka. Ka me na maroroya tiko na yalomuni kei na nomuni vakasama na vakacegu ni Kalou, na vakacegu e uasivita na ka kece ga e kilai rawa, e na vuku i Karisito Jisu.” (Filipai 4:​6, 7, VV) Io, nida vosa vei Jiova ena vukei keda me vakarauta ga na ka eda namaka vei keda, vei ira tale ga na tani.

So na gauna e vinakati meda vakadeitaki. E yaga na vosa e taudonu. Noda veivosakitaka noda ka vuni kei na dua na noda itokani matua eda nuitaka ena rawa ni veisautaka na noda raica na ka e vakamosia tiko na yaloda se na ka eda rarawataka. (Vosa Vakaibalebale 15:23; 17:17; 27:9) Era kila na itabagone era veilecayaki voli ni na dei na yalodra ke ra qara ivakasala vei ira na nodra itubutubu. E vakadinadinataka o Kesaia: “Nodrau veidusimaki vakayalololoma na noqu itubutubu e vukei au meu yalorawarawa, me veiraurau noqu rai, qai vinaka tale ga kina noqu veimaliwai kei ira na tani.” Io, e veiganiti dina na ivakasala ena Vosa Vakaibalebale 1:​8, 9: “Na luvequ, mo vakarorogo ki nai vakavuvuli i tamamu, ka mo kakua ni biuta na vunau i tinamu: ni na dua na usu talei ki na ulumu, kei nai taube ki na domomu.”

Na ca ni nona nanuma e dua me vinaka vakaoti e umani vinaka ena vosa oqo: “Ena rarawa wale ga na tamata e nanuma me veisau na ivakarau ni bula me ganiti koya ga.” Ke da vinakata me kua ni yaco oya, meda veisautaka na noda rai. Nida yalomalumalumu da qai lokomi, da kila tale ga na ka ga eda rawa ni cakava, sa na qai veiraurau qai vakarauta tale ga na ka eda dau namaka. Sa rauta me vakasalataki keda na Roma 12:3 (VV): “Me kakua ni dua vei kemuni me sivia na nona nanuma me baleti koya vaka i koya.” E uqeti keda tale ga na Filipai 2:3 meda yalomalumalumu da qai okati ira na tani mera uasivi cake.

O Ilisapeci, e sa cavuti oti mai, e dau yalototolo baleta ni tautauvimate. E taura e dua na gauna me qai raica kina na itovo ni rai i Jiova, e lomavakacegu tale ga ni qai kila ni sega ni guilecava o Jiova na noda cakacaka. E sega ni veilakoyaki rawa o Kali ena vuku ni mate e tauvi koya. A dau nanuma voli ni sa tawayaga na nona cakacaka vakaitalatala ni vakatauvatana kei na ka e dau rawata ni se bulabula vinaka. Ni qai vakasamataka na veitikinivolatabu e so me vaka na 2 Korinica 8:​12, e veisau sara nona rai. E kaya na tikina oya: “Kevaka sa tu na via cakava, ena vinakati me vaka na ka sa tu vua e dua, ka sega ni vaka na ka sa sega ni tu vua.” “Dina ga ni lailai na ka au solia ena gauna oqo,” e kaya o Kali, “au se rawa tiko ga ni solia e so na ka, e vakadonuya o Jiova oya.” E tukuni vei keda ena Iperiu 6:10: “Ni sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana.”

Eda vakadeitaka vakacava ni vakarauta ga na ka eda namaka? Meda tarogi keda, ‘E tautauvata beka na ka au namaka kei na ka e namaka na Kalou?’ E kaya na Kalatia 6:4 (VV): “Me dui lewai koya vakavinaka na tamata yadua; kevaka e vinaka na nona lewa, e na qai rekitaka ga na ka e cakava, ka sega e na ka e cakava na tamata tani.” Nanuma na ka e kaya o Jisu: “Sa rawarawa na noqui vua, ka mamada na noqui colacola.” Io, nida lotu Vakarisito e tiko na ivua eda na colata, ia e “rawarawa” qai “mamada,” e yalataka tale ga o Jisu nida na vakacegu ke da vulica na kena icolacolati dodonu.​—Maciu 11:​28-​30.

iCovi ni Kena Namaki Vakarauta ga na Ka

Eda na vakaicovitaki ena gauna oqo kei na gauna tawamudu mai muri ke da rogoca da qai muria na ivakasala ni Vosa ni Kalou me baleta noda namaka vakarauta ga na ka. Ena yaga mada ga i yagoda. E kaya o Ruci, e dua sa bau vakila tale ga na yaga ni ivakasala i Jiova: “Au sa kaukaua cake mai, au sa taleitaka tale ga na bula.” Sa rauta me uqeti keda na Vosa Vakaibalebale 4:​21, 22 meda kauaitaka na vosa i Jiova nida vakayagataka na matada kei na lomada, ni “sa vu ni bula vei ira era sa kunea, ka sa ka-ni-bula ki na yagodra taucoko.”

E vinaka tale ga kina na noda vakasama kei na lomada. “Ni lewa noqu vakasama kei na lomaqu na Vosa ni Kalou, au dau mamarau dina,” e kaya o Salote. E dina, eda na sotava tiko ga e so na ka e vakamosi yalo. Ia ena rawarawa cake noda walia. E uqeti keda na Jemesa 4:8: “Toro voleka yani vua na Kalou, ka na toro voleka mai vei kemudou ko koya.” E yalataka tale ga o Jiova ni na vakaukauataki keda nida sotava na leqa ni bula oqo, ena vakacegui keda tale ga.​—Same 29:11.

Eda na dei vakayalo ke vakarauta ga na ka eda namaka. E icovi tale ga oya. Eda na vakaliuca tiko ga kina na veika e bibi cake. (Filipai 1:​10) Ena veiganiti qai rawarawa na noda sauva na noda isausau, na ka e dau vakavumarau kei na lomavakacegu dina. Eda na lomasoli meda soli keda vei Jiova, nida kila ni na vakarawarawataka vei keda na ka. “Mo ni vakayalomalumalumutaki kemuni gona kina e na ruku ni liga kaukauwa ni Kalou, ka me rawa ni vakacerecerei kemuni kina e na gauna sa lokuci,” e kaya o Pita. (1 Pita 5:​6, VV) E bau dua beka na ka e uasivia na nona dokai keda o Jiova?

[iYaloyalo ena tabana e 31]

Ni vakarauta ga na ka eda namaka, eda na sega ni rarawa se yalolailai