Ni Sega ni Dau Yaco na ka e Namaki

E RAWA ni kune na yalolailai ena bula vakawati, veitalia sara mada ga ke nanumi ni rau sa bau veiganiti dina e dua na tagane kei na dua na yalewa ena gauna rau se veivosaki tiko kina. Ke nanumi ni rau sa veiganiti vinaka e rua ena gauna erau se veivosaki tiko kina, e yaco vakacava me rau sa duidui ni oti na vakamau?

E kaya na iVolatabu nira na ‘rarawa’ o ira na vakamau. (1 Korinica 7:​28) Levu na gauna, ena vakavuna ga na noda sucu ivalavala ca. (Roma 3:​23) Kena ikuri, ena rawa ni dua vei rau se o rau ruarua sara ga erau sega ni muria tiko na ivakavuvuli vakaivolatabu. (Aisea 48:​17, 18) So gona na gauna, e sa sivia tale beka na ka e namaka o tagane se o yalewa ena gauna e vakamau kina. Ni dau yaco oqori, na nanuma cala ena rawa ni tini sara ina leqa lelevu.

Levu na Ka e Namaki

Kevaka o tagane se yalewa vakawati, rairai o a vakamau qai so na ka o namaka me yaco; levu tale ga era dau vaka oqori. Ia, vakasamataka mada na bula o a nuitaka. E lekata beka na nomu bula vakamau na veika o a nuitaka? Ke vaka kina, kua ni nanuma ni sega na iwali ni leqa oqori. Nomu muria na ivakavuvuli vakaivolatabu ena vakadodonutaka na nomu ilakolako.a (2 Timoci 3:​16) E ka vakayalomatua mo vakadeuca tale mada e so na ka o a rairai namaka me baleta na bula vakamau.

Kena ivakaraitaki, so era dau nanuma ni bula vakamau e baleta ga vakatabakidua na veidomoni, me vaka ga e dau vakamacalataki ena so na italanoa ucumaiduru. Se o na rairai nanuma ni levu na gauna drau na tiko taurua ga kina vakaveiwatini, ni basika na leqa ena wali vakayalomatua qai caka ena sala malumu. Levu era vakabauta ni gauna era sa vakamau kina e sa solia oqori vei ira na galala ni veiyacovi. Ni sega ni dau yaco na ka era namaka tu vaka oqori, e dau vakatubu rarawa tale vei ira.​—Vakatekivu 3:​16.

Dua tale ga na ka e dau namaki vakasivia, oya ni vakamau ena vakavuna na nona bula marau e dua. Io, e rawa ni vu ni marau levu vua e dua ni sa kunea na watina vinaka. (Vosa Vakaibalebale 18:22; 31:10; Dauvunau 4:9) Kena ibalebale beka oqo ni sa na wali kece kina na duiyaloyalo e dau basika? O ira e vaka oqori na nodra rai era dau kidroataka tale na ka era sotava!

Sega ni Tukuni na Ka e Namaki

Meda kua ni nanuma ni veika kece e namaki e tawayaga. E so e vauci kina na gagadre e yaga. So na ka e dau namaki e rawa ni vakavuna na leqa. Kaya e dua na daunivakasala ena bula vakawati: “Era dau veicudruvi na veiwatini ni namaka tiko e dua vei rau me caka na ka e gadreva, ia o kena isa e lecava sara tu ga na gagadre oya.” Me matata vei iko na vuna e dau yaco kina, dikeva mada na ivakaraitaki oqo.

Rau vakamau o Mere kei Tevita, ia e vica na drau na kilomita na yawa ni vanua e tiko sara mai kina o Tevita. Ni bera ni rau vakamau sa raica rawa o Mere ni na ka ni bolebole vua na toki ina dua na vanua vou​—vakauasivi ni dau mamadua. E nuidei ni na vukei koya kina o Tevita. Me kena ivakaraitaki, a namaka o Mere me na tiko ga e yasana o watina me rawa ni veikilaitaki koya kina vei ira na nona itokani. Ia, a sega. E talanoa tiko ga vakalevu kei ira na nona itokani o Tevita​—sa guilecavi o Mere e vulagi yani. A vakila o Mere ni sa biu taudua tu, sa sega tale ga ni bau kauaitaki. ‘Cava e sega ni nanumi au kina o Tevita?’ e vaqaqa lo.

Sa rui sivia tale beka na ka e namaka o Mere? Sega. E vinakata ga me vukei koya o watina me veikilai kei ira na tiko e kea. Ni mamadua o Mere, e rere ni veikilai kei na levu na mata vou. Ia, na kena dina, a sega mada ga ni bau tukuna vei Tevita o Mere na lomana. E lecava tu gona o Tevita na ka e sotava tiko o watina. Cava ena yaco ke sega ni wali na leqa oqo? Sa na tekivu me cati watina o Mere, toso na gauna sa na rairai nanuma ni sega sara ga ni kauaitaki koya.

De dua e vakayalolailaitaki iko se o rarawataka ni lecava o watimu na nomu gagadre. Ke dina oqori, cava o rawa ni cakava?

Drau Dau Veivosaki

Rawa ni vakamosiyalo ni sega ni dau yaco na ka o namaka. (Vosa Vakaibalebale 13:12) Ia, e tiko na ka o rawa ni cakava. E kaya na iVolatabu. “A lomana na vuku sa vakavukuya na gusuna, ka sa kuria [“veiuqeti,” NW] nai vakavuvuli ni tebenigusuna.” (Vosa Vakaibalebale 16:23) Kevaka gona e tiko e so na ka o namaka e yaga dina me caka qai sega, saga mo drau veivosakitaka vakaveiwatini.

Digia e dua na gauna veiganiti, vanua vinaka, vakayagataka tale ga na vosa taudonu ni o talaucaka na lomamu. (Vosa Vakaibalebale 25:11) Vosa vakamalua, me tau tale ga ena veidokai. Nanuma na inaki ni ka o cakava​—o via talaucaka tiko na lomamu kei na veika o namaka, o sega ni via veibeitaki.​—Vosa Vakaibalebale 15:1.

Cava mo lai cakava kina oqori? Sega li ni dodonu vua na watimu dauloloma me kila na veika o gadreva? De duidui na rai i watimu, ia ena marau o koya ni kauaitaka na veika o gadreva ke o talaucaka vua. Na nomu tukuna na ka o vinakata se gadreva e sega ni kena ibalebale ni leqa nomu vakamau se tawaveikauaitaki o watimu.

Kua gona ni tu vakasuka mo drau veivosakitaka na ka vakaveiwatini. Kena ivakaraitaki, ena ituvaki sa cavuti oti, a rawa sara ga ni kaya o Mere vei Tevita: “Meu tukuna vakadodonu, e dau dredre vei au meu veikilai kei ira na mata vou. Ena vinaka meu vakamatauni au mada, ni bera ni o qai veikilaitaki au vei ira kece nomu itokani.”

“Dou Kusarawa Yadua me Vakarorogo”

Ena dua tale na basoga ni vakasama, kaya mada ke tukuna o watimu ni rarawataka ni o sega ni cakava tiko na ka yaga e namaka. Ni yaco oqo, saga mo vakarogoci koya mada! Kua ni via vakadonui iko ga. Ia, “mo dou kusarawa yadua me vakarorogo, mo dou berabera ga ni vosa, mo dou berabera ni cudru.” (Jemesa 1:​19; Vosa Vakaibalebale 18:13) Uqeti ira na lotu Vakarisito na yapositolo o Paula: “Me kakua e dua me qara na ka sa yaga duaduaga vei koya, a ka talega sa yaga vei koya na tani.”​—1 Korinica 10:24.

O na rawa ga ni cakava oqo ke o saga mo kila na loma i watimu. E kaya na iVolatabu: “Oi kemudou talega na tagane, dou tiko vata kei na watimudou me vaka na tiko vakavuku,” se, me vaka e tukuna na ivakavakadewa vou ni iVolatabu, Na Veiyalayalati Vou: “Kemuni na tagane, ni dau nanuma na watimuni.” (1 Pita 3:7) E ka vakayalomatua tale ga vei ira na yalewa vakawati mera muria na ivakasala oqo.

Ia mo nanuma vinaka na tikina oqo, se mani vakacava sara na nomudrau veiganiti vinaka kei watimu, ena duidui tiko ga na nomudrau rai. (Raica na kato “Vanua Vata ga, Duidui na Rai.”) Ena yaga tale ga oqori baleta e vinaka meda dau raica na ka mai na nodra rai e so tale. Na gauna drau vakamau kina, e duidui na ka drau namaka me na yaco ni yavutaki tiko oqori ena nomudrau isususu kei na itovo vakavanua. Rawa gona ni drau veilomani sara vakalevu, ia e sega ga ni tautauvata na ka drau namaka.

Kena ivakaraitaki, era kila vinaka tu na veiwatini lotu Vakarisito na ivakavuvuli vakaivolatabu me baleta na itutu vakaulunivuvale. (Efeso 5:​22, 23) Ia, ena vakayacori vakacava na veiliutaki vakaulunivuvale ena nomu vuvale, qai vakaraitaki vakacava na yalomalumalumu? Dau dusimaki kemudrau beka na ivakavuvuli vakaivolatabu, drau gumatua tale ga ni muria?

De dua ena duidui beka na nomudrau rai me baleta na veika e vauca na bula ni veisiga. O cei me qarava na cakacaka ni vale? Gauna cava me vakayagataki vei ira na dui wekamudrau, vakacava tale ga na kena dede? Era na vakaraitaka vakacava na veiwatini lotu Vakarisito nira dau vakaliuca na Matanitu ni Kalou? (Maciu 6:​33) Me baleta na ilavo, e rawarawa sara na bula dinau, yaga kina na maninitaki ni ilavo qai kua na vakasabusabu. Ia, cava sara mada na kedrau ibalebale? Na ituvaki gona vaka oqo e dodonu mo drau dau veivosakitaka qai caka ena veidokai ni na yaga sara vakalevu.

Ni vakayacori na veivosaki vaka oqori ena kunei na bula vakacegu ena bula vakawati, kevaka mada ga e sega ni yaco e so na ka a namaki tu. Ena rawarawa sara kina ni o muria na ivakasala i yapositolo o Paula: “Dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua.”​—Kolosa 3:​13.

[iVakamacala e ra]

[Kato/​iYaloyalo ena tabana e 10]

VANUA VATA GA, DUIDUI NA RAI

“Vakasamataka mada nodra sarava toka e dua na ilawalawa saravanua e dua na vanua totoka. Dina nira sarava kece tiko na vanua vata ga, ia e duidui na ka era kauai kina. Na vuna? Ni duidui na yasana era sarava yani kina na tamata yadua. Erau sega tale ga ni duri vata tu e le rua ena dua ga na vanua. Kena ikuri, ena duidui na yasa ni vanua era vakaraica. E tiko ga na ka e rairai totoka vei ira yadua. Vaka sara tale oqori na bula vakawati. De rau sa na veiganiti dina e dua na veiwatini, ia ena duidui tiko ga nodrau rai. . . . Kevaka gona erau dau veivosaki, ena rawa ni vakaduavatataki na duidui ni rai oqori me rau veiyaloni. E gadrevi gona me tiko na gauna ni veivosaki.”​—The Watchtower, 1 Okosita, 1993, tabana e 4.

[Kato ena tabana e 11]

KA MO CAKAVA

• Dikeva tale mada na veika o dau namaka. Era yaga beka? Sa rui sivia tale beka na ka o namaka vei watimu?​—Filipai 2:4; 4:5.

• Ke sega ni yaga na ka o namaka, de vinaka mo veisautaka. Kena ivakaraitaki, kua ni kaya, “Keirau na sega ni veileti,” saga ga mo drau walia na nomudrau duiyaloyalo ena sala malumu.​—Efeso 4:​32.

• Tukuna na ka o namaka. Ni drau veivosaki, drau sa vakaraitaka tiko kina ni drau veilomani, drau qai dau veidokai.​—Efeso 5:​33.

[iYaloyalo ena tabana e 9]

Dau ‘kusarawa ni rogoca’ na ka e vinakata o watimu