O Na Digitaka Beka na Cakacaka Uasivi Oqo?

NI O dua na lotu Vakarisito papitaiso oti, na nomu lomana na Kalou ena uqeti iko mo vakayacora kina na lomana. Sa macala ga ni na okati e ke na nomu lako ena cakacaka vakaitalatala. Me vaka ga a vakaroti ira kece kina na nona imuri o Jisu Karisito mera dau vakayaco tisaipeli. (Maciu 28:​19, 20) Io, ena gauna oqo o na cakacaka saumi tiko beka mo qaravi iko kina. Ia ni o imuri i Jisu qai dua tale ga na iVakadinadina i Jiova, e ka bibi duadua ni o italatala lotu Vakarisito​—⁠e dua e dau vakaliuca ena nona bula na kena vunautaki na Matanitu ni Kalou.​—⁠Maciu 24:⁠14.

De dua o sa volekata tiko yani na yabaki 20, se o sa yabaki 20 vakacaca. Rairai o sa na vakasamataka oti vakabibi se cakacaka cava o na cakava. Ni o vakalewa se cakacaka cava mo digia, kena irairai ni o na vakasamataka vakabibi na kena vinaka vei iko.

Dikeva mada oqo na ka e kaya o Jørgen, mai Denmark me baleta na cakacaka e digia. Kaya o Jørgen ni cakacaka a digia e “veiganiti dina ni rawa kina meu vakaliuca na noqu cakava na cakacaka bibi duadua e tu me caka.” O Eva, e dua na marama mai Kirisi, e yabaki 31, a kaya: “Niu vakatauvatana na noqu bula kei ira keimami itaba vata, au rawa ni kaya ni vakainaki dina na noqu bula, e vakayagataki vinaka, qai marautaki dina vakalevu.” Na cakacaka cava oqo e solia na vakacegu? O na rawata vakacava me vaka oya na ivakarau ni nomu bula?

E Veidusimaki li na Kalou?

E dua dina na ka dredre nida digia e dua na cakacaka. E so sara mada ga era diva me tukuna vei ira na Kalou na ka mera cakava.

Ena gauna a tiko voli kina o Mosese mai Mitiani, a tukuna vua o Jiova me lesu i Ijipita me liutaki ira na Isireli ena nodra sereki mai na nodra vakabobulataki tu. (Lako Yani 3:​1-10) A rairai na agilosi ni Kalou vei Kitioni, o koya a digitaki me vakabulai ira na Isireli mai na nodra vakasaurarataki tu. (Dauveilewai 6:​11-14) O Tevita a vakatawa sipi voli ena gauna a tukuna kina na Kalou vei Samuela me lumuti koya me nodra tui tarava na Isireli. (1 Samuela 16:​1-13) Ena gauna oqo eda sega ni dusimaki vaka oya. Ia, ena gadrevi ga meda vakasamataka vinaka na ka, da qai vakatulewataka se meda na vakayagataka vakacava na isolisoli vakalou e tu vei keda.

E dolava tu o Jiova vei ira na itabagone lotu Vakarisito nikua “e dua na katuba levu ni cakacaka yaga.” (1 Korinica 16:​9, VV) Ena sala cava? Ena loma ni tini na yabaki sa oti, e tubu na iwiliwili ni dautukutuku ni Matanitu ni Kalou ena sivia na 2,125,000 me lai yacova oqo ni sa sivia na 6,000,000 ena vuravura raraba. O cei e veivuke tiko ena kena vakarautaki e vica vata na milioni na iVolatabu, ivola, brochure, ivoladraudrau, kei na ivolacebaceba e vakani keda vakayalo qai vakayagataki tale ga ena kena vunautaki na itukutuku vinaka ena vuravura taucoko? Na itavi dokai qai veivakalougatataki oqo era cakava tiko na lewenivuvale e Peceli ena vuravura raraba.

Na Bula e Veivakalougatataki Dina

O Peceli, e kena ibalebale na “Vale ni Kalou,” ra qai vakaitikotiko tale ga e kea na lotu Vakarisito era bolecakacaka mera veiqaravi ena itikotiko liu kei na valenivolavola kece ni tabana ni Watch Tower Society. (Vakatekivu 28:​19, raica na ivakamacala e ra ni NW) E rawa ni vakatauvatani na vuvale e Peceli nikua me ‘matavuvale e tarai cake ena vuku,’ e lewai vakamatau qai yavutaki ena nodra lomani Jiova.​—⁠Vosa Vakaibalebale 24:⁠3.

E vakacava na veimaliwai vakavuvale e kunei e Peceli? E kaya e dua na lewenivuvale e Peceli mai Estonia, e yabaki 25: “Au dau marautaka vakalevu na noqu maliwai ira na itokani i Jiova ena veigauna kece. Oqori na ka au dau vakamareqeta ena noqu veiqaravi voli e Peceli.”​—⁠Same 15:​1, 2.

Ena vuravura raraba, e rauta nira le 19,500 era veiqaravi voli e Peceli ena gauna oqo. (Same 110:⁠3) Mai Mereke mada ga, e 46 na pasede vei ira na tiko e Peceli e tiko nodra yabaki ni bula mai na 19 ina 29. Me vakataki Aisea ga, era a kaya: “Koi au oqo; mo ni talai au.” (Aisea 6:⁠8) O Aisea​—⁠a sa yalayala oti vei Jiova​—⁠a bolea me vakaikuritaki tale vua na itavi dokai ni veiqaravi. E kena ibalebale oqo ni vakuai koya ena so na ka e yaga ga vua. O ira gona era veiqaravi e Peceli era biuta mai na nodra vale kei na veika era matau kina, vakatale ga kina na tinadra, tamadra, ganedra, kei na nodra itokani. Era tu vakarau mera vakuai ira mai na veika kece oya “[e]na vuku ni tukutuku-vinaka.”​—⁠Marika 10:​29, 30.

Ia, e kunei dina na veivakalougatataki vakayalo e Peceli! E vakamacalataka e dua na lewenivuvale gone e Peceli mai Rusia: “Noda vakuai keda ena veika eda dau taleitaka, eda vulica rawa kina e levu sara na ka ena vukei keda meda bula kina ena vuravura vou. Vei au mada ga au sotava e levu cake sara na veivakalougatataki i Jiova niu vakatauvatana kei na veika au vakuai au kina.”​—⁠Malakai 3:​10.

Na Bula e Peceli

E vakacava sara tu mada na bula e Peceli? Era duavata na lewenivuvale e Peceli ni dua dina na bula e maucokona qai veivakacegui, e marautaki sara tale ga. O Jens, e yabaki 43, e marautaka dina nona veiqaravi e Peceli. Na cava na vuna? E tukuna o koya: “Niu kila ni keimami vakaitavi tiko ena kena sagai me vakayacori e dua na cakacaka bibi. Au kila rawa tale ga kina na rabailevu kei na bibi ni cakacaka i Jiova.”

Mai na Moniti ina Vakarauwai, era dau tekivu e Peceli ena nodra sokalou vakamataka. Era dau veivosakitaka na iVolatabu, e dau liutaka e dua na qase ni ivavakoso matua. Ena veiyakavi ni Moniti e dau dua na aua na kena vulici vakavuvale na iVolatabu nira vulica vata kina Na Vale ni Vakatawa, ena so na gauna e dau tarava oya e dua na ivunau e yavutaki ena dua na usutu vakaivolatabu e ganiti ira sara ga na vuvale e Peceli.

Na cava ena cakava e dua e se qai yaco vou mai e Peceli? Mera vukei na yaco vou mai ina bula e Peceli, era na veivakaroti ena veibasoga ni cakacaka ni veiqaravi e Peceli e so na tacida matua ena vuvale. Ena vica vata na macawa ena imatai ni yabaki, ena tiko e veimacawa ena dua na vuli e vakarautaki me vakarabailevutaki kina na nona kila vinaka na ka dina mai na iVolatabu o koya na lewenivuvale vou e Peceli. Era marautaka tale ga na yaco vou mai e dua na porokaramu lavotaki ni wili iVolatabu. Ena imatai ni yabaki ni nodra veiqaravi e Peceli, era na wilika tasevu kina na iVolatabu o ira na lewenivuvale vou.

Na cava na yaga ni veika e vulici oqo? O Joshua, e yabaki 33 qai dua tale ga na lewenivuvale e Peceli mai Hong Kong, e sauma: “O Peceli e vakatitobutaka sara ga na noqu lomani Jiova. Au rawa tale ga ni veimaliwai kei ira e vuqa na tacida matua era sa vakayagataka e dua na iwase vinaka ni nodra bula ena nodra qaravi Jiova. Au dau marautaka sara ga vakalevu na veiporokaramu vakayalo, me vaka na sokalou vakamataka kei na Vuli Vale ni Vakatawa vakavuvale. Kena ikuri, au dau vinakata na bula e lewai vakamatau qai rawarawa. Au sega kina ni lomaocaoca wale. Au vulica sara tale ga na sala vakarisito meu walia kina e so na ituvaki au dau sotava, au vakadinadinataka ni yaga sara ga vakalevu.”

O ira na lewenivuvale e Peceli era vakayagataka vakalevu na nodra gauna kei na nodra igu mera cakava kina na cakacaka cava ga e soli vei ira. Oya, na nodra vakayagataka na nodra kaukaua vakayago kei na nodra vakasama mera cakava kina na itavi era lesi kina e Peceli. E levu sara na ka e gadrevi me caka. E so era qarava na misini ni tabaivola se ra dabani ivola, era tabaka na ivola me vakau ina veivavakoso. E so tale era veiqaravi e valenikuro, ena valenikana, se ena vanua ni savasava. E okati tale ga ena ilesilesi oqo na sasamaki, teitei, tarataravaki, kei na so tale. E so era lesi mera qarava na misini ena veitabana kece oqori. E so tale era qarava na tabana vakavuniwai se so era cakacaka ena valenivolavola. Na ilesilesi kece e Peceli e marautaki qai yaga, dina ga ni ka ni bolebole toka na sasaga kece oqori. Na cakacaka e vakayacori e Peceli e veivakacegui dina baleta e vakaliuci kina na veika e vauca na Matanitu ni Kalou qai caka ni yavutaki ena nodra lomana na Kalou.

O ira na lewenivuvale e Peceli era lesi tale ga ina veivavakoso, era na rawa ni vakila sara ga kina vakailiu na vua ni nodra cakacaka. Era marautaka na tiko ena veisoqoni ra qai lako tale ga ena cakacaka vakavunau. Yaco kina mera veimaliwai vinaka sara o ira na lewenivuvale e Peceli kei ira na tacida tagane kei na tacida yalewa ena veivavakoso era lewena.​—⁠Marika 10:​29, 30.

E kaya o Rita, e dua na lewenivuvale e Peceli mai Peritania: “Au vakavinavinaka dina ni tiko na ivavakoso! Niu lako ena soqoni kei na cakacaka vakaitalatala, e vaqaqacotaka noqu vakabauta niu raici ira kina na taciqu tagane, yalewa, gone, kei ira era sa kena turaga se kena marama! Veitalia ga na ituvaki cava era sotava, era na lako ga yani. E vukei au sara tale ga meu gumatuataka sara na noqu veiqaravi e Peceli.”

E sega nira sa cakacaka tu ga e Peceli, se mera cakava tu ga na itavi vakayalo me vaka na lako ina soqoni, cakacaka vakavunau, kei na nodra vuli vakataki ira. E dau tiko tale ga na gauna ni nodra vakacegu. E dau tiko na porokaramu ni veivakalasai qai yaga sara tale ga vakayalo e vakatokai na “Bogi ni Vuvale,” na gauna tale ga oqo era dau rekitaka vata kina na veika era dui matai kina, ra dau rogoca tale ga kina na nodra vakasavuirogorogo veivakauqeti o ira na so era veiqaravi vata tu e Peceli. E marautaki tale ga, e maucokona qai veitarai cake na nodra dau veisikovi vakataki ira. E dau vakarautaki tale ga kina e so na ka ni veivakabulabulataki, vaka kina na valeniwilivola mera dau lai wilivola ra qai vakekeli tale ga kina. Qai sega ni guilecavi na veitalanoa vinaka e rawa ni dau caka ena gauna ni kana.

O Tom, e dua na lewenivuvale e Peceli mai Estonia, e kaya: “E voleka sara ga e Peceli na matasawa, qai mai toka voleka yani e dua na veikau rairai totoka keirau dau taleitaka na taubale kina vakaveiwatini. Ena so na gauna au dau qito golf, hockey, kei na tenisi kei ira na noqu itokani ena ivavakoso vakatale ga kina e Peceli. Ke draki vinaka, keirau dau vodo basikeli wavoki.”

O na Vakadonui Vakacava?

Sa macala tu ga ni o Peceli e vanua era veiqaravi tabu kina vei Jiova o ira na lotu Vakarisito matua ra qai cakacaka ena vukudra na tacidra vakayalo ena vuravura taucoko. O ira mera lewenivuvale e Peceli mera rawata na kena ivakatagedegede. O na vakadonui vakacava mo na lai veiqaravi kina?

Me vakataki Timoci ga a veiqaravi voli kei na yapositolo o Paula, e dodonu tale ga vei ira era lai veiqaravi e Peceli mera ivakaraitaki vinaka ena ivavakoso. (1 Timoci 1:⁠1) O Timoci a “rogo vinaka . . . vei ira na vakabauta mai Lisitira kei Ikoniumi.” (Cakacaka 16:​2, VV) Dina ga ni se gone, a kila vinaka tu o Timoci na iVolatabu qai tudei tale ga ena ka dina. (2 Timoci 3:​14, 15) O koya gona, o ira era vakadonui mera lai veiqaravi e Peceli ena gadrevi tale ga vei ira mera kila vinaka na iVolatabu.

E dodonu me tiko vei ira na lewenivuvale e Peceli na yalo ni cabori ira. E laurai votu sara ga vei Timoci na yalo ni cabori koya kei na nona dau vakaliuca na veika e vauca na Matanitu ni Kalou, e rawa gona kina vei Paula me tukuni koya: “Ni sa sega e dua sa tiko vei au sa yalovata kaya, me daunanuma na nomudou ka e na lomana dina. Ni ra sa vakasaqara na nodra ka ko ira kecega, ka segai na ka nei Jisu Karisito. Ia dou sa kilai koya ni sa vakatovolei, ni sa vaka na gone vei tamana, sa daucakacaka vata kei au e nai tukutuku-vinaka.”​—⁠Filipai 2:​20-​22.

Era veiqaravi e Peceli o ira ga na tagane kei na yalewa matua vakayalo. E vakarautaki e so na ituvatuva baleti ira na lewenivuvale e Peceli mera toso tiko ga kina vakayalo me vaka na nodra vuli iVolatabu, tiko wasoma ena veisoqoni vakarisito, cakacaka vakaitalatala, kei na nodra dau veimaliwai kei ira na lotu Vakarisito matua. Era vukei gona na tiko e Peceli mera muria na ivakasala i Paula: “Mo dou ia tiko nai valavala sa vinaka vua [vei Karisito Jisu]: dou tauyavutaki ka tara cake vua, ka vakataudeitaki e na nomudou vakabauta, me vaka dou sa vakatavulici, mo dou uasivi cake kina ka vakavinavinaka.”​—⁠Kolosa 2:​6, 7.

Ena vuku ni cakacaka e tu e Peceli ena gadrevi vei ira sa vakadonui mera veiqaravi ena itavi dokai oqo mera kaukaua vakayago ra qai bulabula vinaka. Kevaka o rawata na ivakatagedegede sa vakaraitaki oti, o yabaki 19 se sivia, qai sa oti tale ga e dua na yabaki na nomu papitaiso, o uqeti de rawa mo vakasamataka na lai veiqaravi e Peceli.

Eda Vakaitavi Kece

Me vaka nida lotu Vakarisito, e sega ni vakabekataki nida na vinakata meda vakaliuca ena noda bula na veika e vauca na Matanitu ni Kalou kei na noda qaravi Jiova me vu mai lomada. (Maciu 6:​33; Kolosa 3:​23) Ena rawa tale ga nida vakauqeti ira na veiqaravi tiko e Peceli mera tomana tiko ga na nodra veiqaravi tabu e kea. Vakatale ga kina na nodra uqeti na cauravou era rawata na ivakatagedegede ni lai veiqaravi e Peceli mera tadolova na itavi dokai qai veivakalougatataki oqo.

Na veiqaravi e Peceli e dua na bula e veivakacegui dina vakayalo​—⁠e rawa ni o digitaka na cakacaka uasivi oqo. E cakacaka vinaka dina vei Nick, a tekivu veiqaravi e Peceli ni se qai yabaki 20. Ni oti e tini na yabaki na nona veiqaravi e kea, a kaya: “Au dau masu vakavuqa vei Jiova niu vakavinavinakataka vua na nona yalovinaka. Na cava tale au se vinakata? Keimami maliwai ira kina na lotu Vakarisito yalodina, era qaravi Jiova tiko ena nodra igu taucoko.”

[Kato/​iYaloyalo ena tabana e 24]

NA CAVA E RAWA NIRA CAKAVA NA QASE NI IVAVAKOSO KEI IRA NA ITUBUTUBU?

E dodonu vei ira na qase ni ivavakoso kei ira na ivakatawa dauveilakoyaki mera dau vakauqeti ira na cauravou mera lai cakacaka e Peceli. Wale tiko ga oqo, e kunei ena dua na vakatataro a vakayacori vei ira na itabagone era lewenivuvale e Peceli ni 34 na pasede vei ira era sauva na lai veiqaravi e Peceli ena nodra veivakauqeti na ivakatawa lotu Vakarisito. Io, ena vakilai beka ena ivavakoso na nodra sa na sega tale ni veiqaravi tiko e kea. Ia ena vinaka mera nanuma na ivakaraitaki i Timoci, dina ga e ivakaraitaki vinaka o koya vei ira na itabagone e Lisitira kei Ikoniona era a sega ga ni tarovi koya na qase ni ivavakoso me lai veiqaravi vata kei Paula. Era sega ni kaya ni nona lai tomani koya na yapositolo o Timoci me sa na lai tadre sara kina na itosotoso ni ivavakoso.​—⁠1 Timoci 4:​14.

Ena gadrevi tale ga vei ira na itubutubu lotu Vakarisito mera dau vakauqeti ira na luvedra mera lai veiqaravi e Peceli. Ena vakatataro vata ga e sa cavuti oti, e 40 na pasede vei ira na vakatarogi era kaya nira lai veiqaravi e Peceli ni a vakauqeti ira sara ga kina na nodra itubutubu. E kaya e dua na tacida yalewa sa vica vata na yabaki na nona veiqaravi voli e Peceli: “Nodrau qaravi Jiova ena nodrau bula taucoko na noqu itubutubu e uqeti au meu lai veiqaravi e Peceli. Ena noqu raica na nodrau ivakaraitaki ena cakacaka vakatabakidua, au vakadeitaka kina ni sega tale ni dua na bula e vinaka duadua qai marautaki me vaka na kena au sa digitaka oqo.”

[Kato ena tabana e 24]

ERA MARAUTAKA NA VEIQARAVI E PECELI

“Au dau vakamareqeta na noqu veiqaravi e Peceli. E dau vakacegui au dina niu kila niu a qaravi Jiova ena siga taucoko, au na cakava tale ga nimataka, na siga e tarava, kei na veigauna sa tu mai liu. E vinaka kina na noqu lewaeloma, e vinaka tale ga kina na noqu rai.”

“O Peceli na vanua o na rawa ni vakayagataka kina na nomu gauna kece kei na nomu igu kece ena veiqaravi vei Jiova ni sega ni dua na ka ena vakalatilati. Ena kauta mai na marau dina. O na raica tale ga kina na isoqosoqo i Jiova ena dua tale na yasana. O na vakila ni o tiko sara ga ena vanua e liutaki tiko kina na cakacaka ni isoqosoqo i Jiova, e veiuqeti dina.”

“Na ka vinaka duadua e se bau yacovi au oya na noqu mai veiqaravi e Peceli. E sega ni mudu e ke na vuli. Na ka au vulica e ke e sega ni baleta meu rawaka kina, ia meu vakayagataka vei Jiova. Noqu cakacaka tale ga e ke ena sega vakadua ni tawayaga.”

“Au lomavakacegu, au marau tale ga niu mai vakayagataka e Peceli na veika au kila me na yaga vei Jiova kei ira na mataveitacini.”

“Au sega ni kunea na lomavakacegu dina kei na marau ena noqu cakacaka e liu. Au dau tatadrataka tu ena vica vata na yabaki meu cakacaka vata kei ira na mataveitacini, meu qaravi ira tale ga. Oya na vu ni noqu mai veiqaravi e Peceli. E vakacegui au niu kila ni noqu sasaga ena yaga vakayalo vei ira na tani qai vakacerecerei tale ga kina o Jiova.”