Vaqaqacotaka Nomu Nuitaki Jiova

Sa tekivu buki na vere ni laba. Era bose vata na turaga lelevu ni vanua ra qai vakatura e dua na lawa vou. Era vinakata me totogi mate e dua ke vakaitavi ena sokalou e sega ni vakatara na matanitu.

SEGA li ni dau yaco vakalevu na ka oqo? E bini ena itukutuku makawa na kedra italanoa o ira era dauveibeitaki vakailasu. Na ka e tukuni toka mai cake e yaco ena matanitu o Perisia ena gauna i Taniela na parofita. E kaya na lawa e qai vakadonuya o Tui Taraiase: “O koya sa na kerea e dua na ka vua e dua na kalou se vua e dua na tamata ka bogi tolusagavulu, [ka sega] vei kemuni duaduaga, na tui, me sa biu ki na qara ni laioni.”​—⁠Taniela 6:​7-9.

Na cava ena cakava o Taniela ni sagai me labati? Ena nuitaka tiko ga nona Kalou, o Jiova, se na tu vakasuka qai muria na ka e vakarota na tui? E kaya vei keda na kena itukutuku: “Ni sa kila ko Taniela sa volai oti nai vola, sa curu ki na nona vale; ka ni sa dola tu na katuba ni nona loqi me donui Jerusalemi, sa tekiduru e duruna vakatolu e na veisiga, me masu, ka vakavinavinaka vua na nona Kalou, me vaka sa daucakava eliu ko koya.” (Taniela 6:​10) E kilai vinaka na ka e qai yaco tarava. E kolotaki ina qara ni laione o Taniela ena vuku ni nona vakabauta, ia e “tabonaka na gusu ni laioni” o Jiova qai vakabula nona dauveiqaravi yalodina.​—⁠Iperiu 11:33; Taniela 6:​16-​22.

Meda Dui Dikevi Keda

Nikua, era bula na dauveiqaravi i Jiova ena vuravura ca, e leqataki kina nodra bula vakayago vaka kina vakayalo. Me kena ivakaraitaki, e levu na iVakadinadina era lai mate wale ena katakata ni veivala e vu mai na veicati vakamatatamata ena so na vanua. Ena so tale na vanua, era sotava na dauveiqaravi i Jiova na leqa ni kakana, dredre vakailavo, leqa tubukoso, tauvimate bibi, kei na so tale na leqa lelevu. Kena ikuri, mera vosota na veitusaqati, veika dredre e vanua ni cakacaka, kei na so tale na veitemaki mera cala kina, e rawa ni vakaleqa nodra bula vakayalo. Io, na Meca levu, o Setani, e saga na iwalewale cava ga me vakamalumalumutaki ira kina na dauveiqaravi i Jiova.​—⁠1 Pita 5:⁠8.

Na cava e rawa nida cakava ni sotavi na ituvaki vaka oqo? E dina ni na rere e dua ke sotava na ka ena vakaleqai kina na nona bula, ia e rawa nida vakasamataka na vosa ni veivakadreti i koya na yapositolo o Paula: “Sa kaya oti na Kalou, ‘Au na sega sara ni biuti iko se laivi iko.’ E rawa kina nida kaya ena doudou, ‘Sa dau vukei au na Turaga ka’u na sega ni rere! A cava li era rawa ni kitaka vei au na tamata?’” (Iperiu 13:​5, 6, VV) E rawa nida nuidei ni o Jiova e raici ira vakatale ga oqo nona dauveiqaravi nikua. Ia, na kilai ni vosa ni yalayala i Jiova e duidui mai na noda vakadinata ni na cakava dina na ka vei keda. E yaga kina meda dikeva se yavutaki e vei noda nuitaki Jiova, da cakava tale ga na ka kece e rawa ni vaqaqacotaka qai dei kina na vakanuinui oya. Kevaka eda cakava oqo, “na vakacegu ni Kalou, sa uasivia na ka kecega e kilai rawa, ena vakataudeitaka na yalomudou [se, yaloda] kei na lomamudou [se, lomada] e na vuku i Karisito Jisu.” (Filipai 4:⁠7) Nida sotava na veivakatovolei, sa rawa nida tauri keda vinaka da qai yalomatuataka na ka meda cakava.

Yavu me Nuitaki Kina o Jiova

E levu tu na vuna meda nuitaka kina na noda Dauveibuli, o Jiova. Kena imatai ni o Jiova e Kalou yalololoma, e kauaitaki ira dina nona dauveiqaravi. E sega ni wiliki rawa na levu ni itukutuku ena iVolatabu e vakaraitaka ni dau lomani ira nona dauveiqaravi o Jiova. Ni vakamacalataka na ka e dau cakava o Jiova vei ira nona tamata digitaki, na Isireli, e vola kina o Mosese: “Sa kunei ira ko koya e na vanua sa lala, e na vanua liwa sa levu kina na tagi; sa kauti ira voli, sa vakavulici ira, sa maroroi ira me vaka na loa ni matana.” (Vakarua 32:10) Ena gauna oqo, se kauaitaki ira tiko ga na nona dauveiqaravi o Jiova, vakaiwasewase vaka kina o ira yadudua. Me kena ivakaraitaki, ni tarai ira vakaca e so na iVakadinadina na leqa ni kakana donuya na veivaluvaluti vakalewenivanua mai Bosnia, e raica o Jiova mera vukei ena ka mera bula kina ena nodra sasaga kaukaua na tacidra mai Croatia kei Austria, era bolemate mera kosova e so na vanua vakarerevaki me kau rawa ga na ka ni veivuke vei ira na tacidra.a

Ni Cecere Duadua na Kalou o Jiova, e rawa ni taqomaki ira nona dauveiqaravi veitalia se ituvaki cava era sotava. (Aisea 33:22; Vakatakila 4:⁠8) Ke mani vakatara o Jiova e so nona dauveiqaravi mera vakaraitaka nira yalodina me yacova na nodra mate, ena vakaukauataki ira, ena vukei ira mera yalodina tiko ga, mera tudei, mera marau ra qai lomavakacegu me yacova na icavacava. E rawa kina nida nuidei me vaka na daunisame: “A nodai drodro kei na noda kaukauwa na Kalou, sa voleka sara me vukei keda ni da sa rarawa. O koya oqo eda na sega kina ni rere, kevaka sa kau tani ko vuravura, ka sa kau yani ki na loma ni wasa liwa na veiulu-ni-vanua.”​—⁠Same 46:​1, 2.

E vakaraitaka tale ga na iVolatabu ni o Jiova e Kalou ni dina. Kena ibalebale ni dau cakava na ka kece ga e yalataka. E vakamacalataki koya na iVolatabu ni Kalou “sa sega ni lasu rawa.” (Taito 1:⁠2) Ni kaya vakavica vata o Jiova ni tu vakarau me taqomaka qai karoni ira nona dauveiqaravi, eda vakadinata ni sega wale ga ni rawata, ena vakayacora dina sara ga na ka e yalataka.​—⁠Jope 42:⁠2.

Me Qaqaco Vakacava Noda Vakanuinui?

E dina ni dodonu ga meda nuitaki Jiova, ia meda kua ni taura vakamamada. Baleta na vuravura e lailai sara na nodra vakabauta na Kalou. Na rai vaka oqo e rawa tale ga ni vakamalumalumutaka noda nuitaki Jiova. Oya na vuna meda saga vagumatua kina me qaqaco qai dei tiko ga noda vakanuinui. E kila vinaka o Jiova na ka oqo, e vakarautaka kina e so na ivukevuke.

Kena imatai, e vakarautaka nona Vosa volai, na iVolatabu, e volaitukutukutaki kina e levu na cakacaka veivakurabuitaki e cakava ena vukudra nona dauveiqaravi. Vakasamataka mada, o na nuitaka vakacava e dua ke o kila wale ga na yacana? Ena sega ni rauta ga oya. E gadrevi mo kila nona ivalavala kei na veika e sa bau rawata mo nuitaki koya kina, se vakaevei? Nida wilika da qai vakananuma na itukutuku vaka oqo ena iVolatabu, ena titobu noda kilai Jiova kei na nona itovo vakasakiti, eda na kila tale ga ni daudina. Ena vaqaqacotaka noda nuitaki koya. E ivakaraitaki vinaka e ke na daunisame ni masu vua na Kalou: “Au na nanuma na cakacaka i Jiova: au na nanuma na nomuni cakacaka mana mailiu. Au na veinanuyaka talega ki na nomuni cakacaka kecega, ka veivosakitaka na nomuni valavala.”​—⁠Same 77:​11, 12.

Me ikuri ni iVolatabu, e binikasauru tale tu ga na kakana vakayalo ena ivola vakaivolatabu e tabaka na isoqosoqo i Jiova. Me ikuri ni veika e sinai ena ivola vaka oqo, e lewena tale ga na italanoa ni nodra bula na dauveiqaravi ni Kalou nikua, e vakaraitaka na veivuke, kei na veivakacegui e cakava o Jiova nira sotava na ituvaki leqataki. Me kena ivakaraitaki, o Martin Poetzinger, e qai yaco me lewe ni iLawalawa Dauvakatulewa ni iVakadinadina i Jiova, a tauvimate bibi ni veiqaravi tiko vakapainia e Urope, e yawa mai nona vanua. E sega nona ilavo qai sega tale ga ni dua na vuniwai e via raici koya. Ia e sega ni guilecavi koya o Jiova. Caka sara na veitaratara vua na vuniwai levu ni valenibula ena koro e tiko kina. Ni vakabauta dei na iVolatabu na vuniwai oya, e qaravi Brother Poetzinger vinaka sara me vaka e luvena na turaga yalololoma oqo, qai sega ni saumi kina. Ni wiliki na italanoa vaka oqo e rawa sara ga ni vaqaqacotaka noda niutaka na Tamada vakalomalagi.

Na isolisoli vakasakiti ni masu e dua tale na ivukevuke yaga e vakarautaka o Jiova me qaqaco kina noda nuitaki koya. E vakamasuti keda na yapositolo o Paula: “Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka.” (Filipai 4:⁠6) “Na ka kecega” e okati kina na ka e lomada, da gadreva, na ka eda lomaleqataka, kei na ka eda lomaocaocataka. Na levu ga ni noda masu me vu mai lomada, ena qaqaco tale ga kina noda nuitaki Jiova.

Ni se bula e vuravura o Jisu Karisito, so na gauna e dau lai masu duadua ena yasana lala me kua ni vakasosataki. (Maciu 14:23; Marika 1:​35) Ni bera ni tauca e so na vakatulewa bibi, e masu ena lomanibogi taucoko vei Tamana. (Luke 6:​12, 13) Sega ni vakabekataki ni qaqaco vinaka nona nuitaki Jiova o Jisu ni vosota rawa kina na veivakatovolei mosimosi duadua me bau sotava e dua. Na iotioti ni vosa e cavuta ena kaunirarawa: “I Tamaqu, au sa solia na yaloqu ki na ligamuni.” E vakaraitaka na ka e kaya ni sega ni luluqa vakadua me yacova na iotioti nona nuitaki Tamana, dina ni sega ni curu takoso mai o Jiova me vakabulai koya.​—⁠Luke 23:⁠46.

Dua tale na sala me taravaki kina noda nuitaki Jiova oya na noda dau soqoni kei ira era nuitaki koya mai vu ni lomadra. E vakaroti ira nona tamata o Jiova mera soqoni wasoma, mera vulici koya kina ra qai veivakayaloqaqataki. (Vakarua 31:12; Iperiu 10:​24, 25, VV) Na veimaliwai vaka oya e vaqaqacotaka nodra vakabauti Jiova, era tutaka rawa kina na kena vakatovolei vakaca na nodra vakabauta. Ena dua na vanua mai Aferika e vakatabui kina na vunau, era sega ni veitaqomaki vei ira na iVakadinadina i Jiova na ovisa, e sega ni soli vei ira na ivolatara ni veilakoyaki, ivola ni vakamau, vakatabui mera qaravi e valenibula, qai sega ni soli vei ira na cakacaka. Ni kacabote na veivaluvaluti vakalewenivanua ena dua na yasana, era toki e 39 na lewe ni ivavakoso voleka, bau kina o ira na gone, ina ruku ni dua na wavu ena vanua dravuisiga me rauta e va na vula nira drotaka na vakalutugasaukuro ena nodra tauni. Ena ituvaki dredre sara oya, e vakaukauataki ira vakalevu nodra dau veivosakitaka na dikevi ni tikinivolatabu e veisiga kei na soqoni tale e so. E rawa kina nira vosota na dredre nira dei ena ka vakayalo. Na veika oqo e vakaraitaka na bibi ni sosoqoni wasoma kei ira na tamata i Jiova.

Kena iotioti, me qaqaco noda nuitaki Jiova, meda gumatua ena cakacaka ni vunautaki ni Matanitu ni Kalou, meda tu vakarau ni wasea na itukutuku vinaka vei ira tale e so. E laurai oqo ena ivakaraitaki vakaciriloloma ni dua na dautukutuku gugumatua gone mai Canada, e tauvi koya tu na kenisa ni dra. E dina ni tauvimate bibi, ia e via painia tudei, oya me italatala vakatabakidua. Ni via vinaka vakalailai nona bula, e vakaitavi sara ena cakacaka vakaitalatala me painia veivuke me dua na vula. Ia e lutu sobu tiko ga nona bula, mani mate ni oti e vica tale na vula. Ia, e kaukaua tiko ga vakayalo me yacova na iotioti, e sega vakadua ni luluqa nona nuitaki Jiova. E kaya o tinana: “E kauaitaki ira tiko ga na so tale, e sega ni bau kauaitaki koya me yacova nona mate. E dau vakauqeti ira mera vulica na iVolatabu, qai kaya, ‘Eda na sota tale ena Parataisi.’”

Vakaraitaka Nida Nuitaki Jiova

“Me vaka sa mate na yago ni sa takali na yalo, sa mate vakakina na vakabauta ni sa takali na cakacaka.” (Jemesa 2:​26) Na ka e kaya o Jemesa ena vakabauti ni Kalou e rawa ni tukuni tale ga ena noda nuitaki koya. Se vakacava na levu ni noda kaya nida nuitaka na Kalou, ena sega na betena vakavo keda cakava kina e dua na ka. E nuitaki Jiova dei o Eparama ni talairawarawa ena nona ivakaro kece, me yacova sara nona via cabori luvena tagane, o Aisake. Na vakanuinui uasivi vaka oqo kei na talairawarawa i Eparama, e vakatokai kina me itokani i Jiova.​—⁠Iperiu 11:​8-​10, 17-​19; Jemesa 2:​23, VV.

Eda na sega ni waraka na veivakatovolei lelevu meda vakaraitaki kina nida nuitaki Jiova. E kaya vei ira nona tisaipeli o Jisu: “O koya sa dina e na ka lailai, ena dina talega e na ka levu; ia ko koya sa sega ni dodonu e na ka lailai, ena sega talega ni dodonu e na ka levu.” (Luke 16:10) Meda vulica meda nuitaki Jiova ena ka kece eda cakava e veisiga, meda talairawarawa vua ena veika mada ga eda nanuma ni sega soti ni bibi. Nida raica na vua ni noda talairawarawa, ena qaqaco noda nuitaka na Tamada vakalomalagi da qai tutaka rawa kina na veivakatovolei lelevu.

Ni sa voleka ni vakarusai na vuravura oqo, e namaki mera na sotava na tamata i Jiova e levu na veivakatovolei kei na veika rerevaki. (Cakacaka 14:22; 2 Timoci 3:​12) Nida taravaka me qaqaco qai vakatabakidua noda nuitaki Jiova nikua, sa rawa nida vakanamata meda bula yani ina vuravura vou sa yalataki tu​—⁠nida bula sivia na veivakararawataki levu se da vakaturi. (2 Pita 3:​13) Me kua mada ga ni seavu noda vakanuinui me tagutuva noda veiwekani totoka kei Jiova. Ena tukuni vei keda na ka vata ga a tukuni vei Taniela ni bula mai ena qara ni laione: “Sa sega ni kune vua e dua na tikina e ca, ka ni sa vakabauta na nona Kalou.”​—⁠Taniela 6:​23.

[iVakamacala e ra]

[iYaloyalo ena tabana e 9]

E vaqaqacotaka na vakabauta na wiliki ni kedra italanoa na dauveiqaravi yalodina i Jiova, me vakataki Martin Poetzinger