Yaga na Veinuitaki Meda Bula Marau Kina
SO NA kakana eda kania e rawa ni vakaleqa dina na keteda. Ke yacovi keda wasoma oqori, e bibi meda qarauna na ka eda kania. Ia kevaka eda nanuma meda sa kua sara ga ni kana baleta me kua ni vakaleqai kina na keteda, oqori e sa sega tale ni ka vakayalomatua. Ena qai kuria ga na leqa oqori. O koya e sega ni kana ena mate.
E via vaka oqori na ka e yaco ni sega ni dina o koya e nuitaki. Ni dua e sega ni dina wasoma vei keda ena vakavuna meda vakasamataka sara vakavinaka na noda ilala. Ia, e sega ni iwali ni leqa kevaka eda nanuma meda sa tu duadua ga, baleta ni na sega ni dua ena dabui keda kina. Cava na vuna? Ena kauta laivi sara ga nomu marau ena nomu sa sega ni nuitaka e dua. Meda bula marau gona, eda gadreva na veiwekani e yavutaki ena veinuitaki.
“E yaga na veinuitaki ena noda veimaliwai kei ira na so tale ena veisiga,” e kaya na ivola Jugend 2002. “Era gadreva kece na tamata na veinuitaki,” e ripotetaka na niusiveva Neue Zürcher Zeitung. “Na veinuitaki e vakavinakataka na bula” qai “bibi ena nona bula e dua.” E tomana na niusiveva, ke sega na veinuitaki “ena sega ni dua e vosota na bula rarawa.”
Eda dau gadreva na veinuitaki, ia o cei beka e rawa ni nuitaki qai sega dabuitaki keda tale?
Vakararavi Vei Jiova ena Vu ni Yalomu Taucoko
“Mo vakararavi vei Jiova e na vu ni yalomu,” e kaya na iVolatabu. (Vosa Vakaibalebale 3:5) Io, e uqeti keda vakalevu na Vosa ni Kalou meda nuitaka na Dauveibuli, na Kalou o Jiova.
Cava meda nuitaka kina na Kalou? Kena imatai, ni savasava na Kalou o Jiova. E vola na parofita o Aisea: “E savasava, e savasava, e savasava o Jiova.” (Aisea 6:3, NW) E sega beka ni dreti iko na savasava oqori? E dodonu me dreti iko baleta ni savasava i Jiova e kena ibalebale ni sega nona cala qai dau nuitaki vakaoti. E dei o koya, e sega ni dau veivakararawataki qai sega ni rawa vakadua ni dabui keda.
E rawa tale ga nida nuitaka na Kalou ni tu vua na kaukaua kei na igu me vukei ira kina era qaravi koya tiko. Kena ivakaraitaki, na nona kaukaua levu e cakava rawa kina na ka. E dusimaki koya na nona lewadodonu kei na vuku ena ka me cakava. E uqeti koya na nona loloma me cakava na ka. E vola na yapositolo o Joni: “Sa loloma na Kalou.” (1 Joni 4:8) E uqeti koya nona loloma ena ka kece e cakava. Na savasava i Jiova kei na so tale na itovo e kilaitani kina e vakavuna me Tama taleitaki qai nuitaka vakaoti. E sega tale ni dua e rawa ni vakatauvatani kei Jiova ena nona dau nuitaki.
Nuitaki Jiova Mo Marau Kina
Dua tale na vuna e nuitaki kina o Jiova oya ni o koya duadua ga e kilai keda vakavinaka. E kila nira gadreva na tamata yadudua me tawamudu, dei, qai nuitaki na nodra veiwekani kei na Dauveibuli. E dau dei na lomadra na tamata era marautaka na veiwekani vaka oqori. E kaya kina na Tui o Tevita: “Sa kalougata na tamata sa dauvakararavi vei Jiova.” (Same 40:4) Nikua era sa duavata mai vu ni lomadra e milioni vakacaca ena vakasama i Tevita.
Raica mada e so na kena ivakaraitaki. A sa vakaitikotiko taumada e Dominican Republic, Jamani, Kirisi, kei na matanitu o Mereke o Doris. E kaya: “Au marau vakalevu niu dau vakararavi vei Jiova. E dau kauaitaka na lomaqu, e kila tale ga na sala meu vukei kina vakayago, vakayalo. E dua na itokani dredre o koya.” E vakamacalataka o Wolfgang, e dua na dau veivakasalataki ena lawa: “E marautaki na vakararavi vua e dua e kauaitaki iko dina, qai rawa ni vakavinakataka nomu bula!” E kaya o Ham, a sucu mai Esia, ia sa tiko mai Urope edaidai: “Au kila ni tu vei Jiova na kaukaua kece, qai sega ni dau cala, au marautaka gona na nuitaki koya.”
E gadrevi meda bau nuitaki ira tale ga na tamata, sega wale ga ni o koya na Dauveibuli. Ia, ni Kalou vuku qai itokani vinaka o Jiova, e sa vakarautaka tu na ivakasala me baleti ira na tamata nuitaki. Noda wilika vakavinaka gona na iVolatabu, eda na kunea kina na ivakasala oqori.
O Ira Meda Nuitaka
“Dou kakua ni vakararavi vei ira na turaga, se vua na luve ni tamata, ni sa sega vua na ka mo dou bula kina,” e vola na daunisame. (Same 146:3) Eda kila mai na tikinivolatabu oqori ni levu na tamata e sega ni yaga mera nuitaki. O ira mada ga na tamata dokai, era “turaga” ni vuravura oqo, ra qai kenadau ena dua na cakacaka, eda na sega ni nuitaki ira tu vakaveitalia. E dau veivakacalai vakalevu na nodra ivakasala, qai rawa ni veivakararawataki na noda nuitaki ira.
Ia, na veika oqori me kua ni vakavuna noda sa sega ni nuitaki ira kece kina na tamata. E gadrevi ga meda digitaki ira vakavinaka. Eda na digi ira vakacava? E rawa ni vukei keda e dua na ivakaraitaki a kune e Isireli makawa. Ena gauna me lesi kina e so ena itavi bibi e Isireli, a vakasalataki o Mosese me “lesia mada eso na tamata era kilikili yaga maivei ira na tamata kecega, na tamata sa rerevaka na Kalou, na tamata vosa dina, ka sa cata na kocokoco.” (Lako Yani 18:21) Na cava eda rawa ni vulica e ke?
Ni o ira na lesi ena itutu nuitaki oqo era sa vakaitovotaka oti tu mai na itovo vakalou. Era vakaraitaka nira rerevaka na Kalou, ra doka na Dauveibuli mai vu ni lomadra ra qai rere tale ga ni vakacudrui koya. E matata tale ga vei ira na lewe i Isireli nira saga ena nodra vinaka taucoko o ira oqo mera muria na ivakatagedegede ni Kalou. Era cata na kocokoco, qai dei kina na lomadra mera kua kina ni vakayagataka cala nodra kaukaua. Era dau dina ena ka era nuitaki kina, ra qai sega ni qara na ka me nodra ga, se nodra na wekadra se o ira nodra itokani.
E sega beka ni ka vakayalomatua meda vakamuria tale ga oqori nikua ena noda digia e dua me nuitaki? Eda kilai ira beka na dau rerevaka na Kalou? Era muria dei tiko beka na nona ivakatagedegede? Era tamata yalodina beka ra qai dau goletani mai na caka ca? Era dau dina beka ra qai sega ni vakayagataka e dua na ituvaki mera rawaka kina se me yaco ga kina na lomadra? O ira na ivakaraitaki vinaka ena itovo oqori e dodonu mera nuitaki.
Kua ni Yalolailai Ke Sega ni Dina o Koya o Nuitaka
Nida saga tiko meda digi ira na tamata nuitaki e dodonu me tiko vei keda na yalovosovoso, baleta ni na via taura toka na gauna nodra kune na tamata nuitaki vakaoti. E ka vakayalomatua me kua ni vakusakusataki nomu sa lai nuitaki koya. O na cakava vakacava? Eda na rawa ni vakaraica tu mada na nona itovo ena dua na gauna, dikeva na veika e cakava ena so na ituvaki. E nuitaki beka ena veika lalai? Kena ivakaraitaki e dau vakasuka beka na iyaya e kerea qai dau totolo nona tiko ena gauna e lokuci? Ke vaka kina e rawa sara ga nida nuitaki koya ena veika lelevu tale e so. Oqo e salavata kei na ivakavuvuli: “O koya sa dina e na ka lailai, ena dina talega e na ka levu.” (Luke 16:10) Eda na sega ni rarawa vakalevu ke da digidigi vinaka, me kua tale ga nida cakava vakariri.
Ia, vakacava ke sega ni dina o koya eda nuitaka? Era nanuma lesu na gonevuli ni iVolatabu na bogi a vesu kina o Jisu, ni ratou vakararawataki koya na nona yapositolo. A lawakitaki koya o Jutasa Isikarioti, ra qai dro na kena vo nira rere. O Pita mada ga e cakitaki Jisu vakatolu. Ia e kila o Jisu ni o Jutasa duadua ga a nakita na ka e cakava. Nona vakararawataki ena tiki ni gauna bibi oya e sega ni vakayalolailaitaki koya me se baci nuitaki iratou na vo ni 11 na yapositolo ena vica na macawa e tarava. (Maciu 26:45-47, 56, 69-75; 28:16-20) E vaka tale ga kina nona veidabuitaki keda e dua eda nuitaka, ena vinaka meda vakasamataka mada ni ka e cakava, e sa ivakaraitaki tiko ni nona sega ni dau nuitaki ga se vakavotuya tiko na malumalumu vakatamata e dau kune ga ena so na gauna.
Au Nuitaki Beka?
Ni dua e vakasaqara tiko na tamata me na nuitaka, ena tarogi koya mada: ‘Au nuitaki beka? Na mataqali itovo ni veinuitaki cava meu vakaraitaka vaka kina na kena meu na namaka mai vei ira e so tale?’
Na tamata nuitaki e dau dina ena veigauna kece. (Efeso 4:25) Ena sega ni digia na vosa me ganiti ira na vakarorogo tiko me qai rawata kina na ka vei ira. Kevaka e veidinadinati ena saga ena nona igu taucoko me dina tiko ga kina. (Maciu 5:37) Kevaka e dua e dolava na lomana vua, ena sega ni lai talanoataka yavoki na tamata nuitaki, e sega tale ga ni dau kakase. Na tamata nuitaki ena yalodina vua na watina. Ena sega ni vakadigova na iyaloyalo vakasisila, se me malele nona vakasama ina veika e veivagarogaroi, qai sega ni dau matamatayalewa. (Maciu 5:27, 28) Na tamata nuitaki ena cakacaka vakaukaua me rawata kina nodratou bula vakavuvale, ena sega ni rawa ilavo ena nodra buno e so tale. (1 Timoci 5:8) Na kena kasa tiko vei keda na ivakatagedegede momona vakaivolatabu ena vukei keda meda kilai ira na tamata era rawa ni nuitaki. Kuria oya nida na rawa ni nuitaki tale ga ke da bulataka na ivakatagedegede ni itovo vata ga oqori.
Sa na dua dina na ka marautaki meda bula ena vuravura era tawana na tamata nuitaki qai sega kina o ira na dauveidabui! E ka wale beka ga ni tadra? E sega, vakauasivi vei ira na taura vakabibi na veika e yalataka na iVolatabu, ni sa tukuna rawa tu vakailiu na Vosa ni Kalou ni na dua na “vuravura vou” totoka, ena sega kina na veivakaisini, lasu, veivakacacani, ena sega kina na rarawa, tauvimate, kei na mate! (2 Pita 3:13; Same 37:11, 29; Vakatakila 21:3-5) Ena yaga nomu kila e levu tale na ka me baleta na inuinui oqori, se vakaevei? Era na marau na iVakadinadina i Jiova mera vukei iko kina kei na so tale na ulutaga bibi.
[iYaloyalo ena tabana e 4]
Ena kauta laivi sara ga na nomu marau na nomu sa sega ni nuitaka e dua
[iYaloyalo ena tabana e 5]
E yaga duadua meda nuitaki Jiova
[iYaloyalo ena tabana e 7]
Eda gadreva kece na veiwekani e yavutaki ena veinuitaki dina