Vunikau Kaukaua Qai Bula Dede
Na barinivatu ena rairai sega ni vanua vinaka mo tara kina nomu vale, vakauasivi ke tiko ena veiulunivanua cecere. E dina ni ririkotaki, ia e so na vunikau era bula ga ena veiulunivanua, e ti sobu na wakadra ena barinivatu vaka oqo, ra qai duri vinaka tu ga e dina ni kani ira na drakini vulaililiwa kei na vulaikatakata.
IA, NA vunikau kaukaua oqo e sega ni lelevu sara me vakataki ira na kena era bula ena vanua bucabuca. Era lalai tu ga, na tolodra era varovaroa qai veiveveyaki. E qaseqase toka ga na kedra ibulicaki, ni kedra tu ga na draki ca qai mamare na qele era bula kina.
Nira bula ena vanua e sega ni vakabauti me bula rawa kina e dua na ka, o na rairai nanuma ni na sega ni bula dede na vunikau vaka oqo. Ia e yaco na kena veibasai. E so era kaya ni sa yabaki 4,700 na vunipaini na Mecusela, e bula ena vanua e 3,000 na mita na kena cere, ena White Mountains, mai Kalifonia. E kaya na ivola na Guinness Book of Records 1997, ni oqo na kau bula dede duadua e vuravura. E kaya o Edmund Schulman, e vulici ira na kau qase vaka oqo: “E rairai bula dede na vunipaini oqo baleta . . . ni dredre na vanua e bula kina. Na [vunipaini] bula dede kece ena White Mountains era kune volekata ni 3,000 na mita ni vanua cere mamaca qai veivatuvatu.” E dikeva rawa tale ga o Schulman ni paini bula dede kece era bula ena vanua dredre.
E dina nira na vorata na dredre ni vanua era bula kina, nodra bula dede e vakatau vakalevu ena rua na ka era vinaka kina. Na nodra bula ena vanua era veituyaki kina na kau, e taqomaki ira mai na kama ni veikau, e dua vei ira na leqa levu e tarai ira na kau era tubu veivolekati. Dua tale ni ti sobu na wakadra ena barinivatu, ena qai yavalati ga ena uneune.
Ena iVolatabu, era vakatauvatani na dauveiqaravi yalodina ni Kalou kei na kau. (Same 1:1-3; Jeremaia 17:7, 8) Era na rairai sotava tale ga na dredre ena ituvaki era tu kina. Na veivakacacani, tautauvimate, se bula vakaloloma e rawa ni yavalata nodra vakabauta, vakauasivi ke sega ni cegu na ka era sotava tiko. Ia na nodra Dauveibuli, o koya e bulia tale ga na kau me vorata na dredre ni vanua era bula kina, e vakadeitaka vei ira era sokalou vua ni na tokoni ira. Na iVolatabu e yalataka vei ira era tudei tiko ga: “[Ena] vakataudeitaki kemuni, ka vakaukauwataki kemuni.”—1 Pita 5:9, 10, VV.
Na vakasama ni ‘tudei tiko ga, se gumatua tiko ga’ e tiko ena vu (verb) vakirisi e vakadewataki vakalevu ena iVolatabu me “vosota.” Me vaka na vunikau era bula ga ena veiulunivanua, e tudei ni kaukaua vinaka na wakana. Vei ira na lotu Vakarisito, e gadrevi me tei sobu sara na wakadra vei Jisu Karisito me rawa nira tudei. E vola o Paula: “Ni ko ni sa vakabauti Karisito Jisu me Turaga, mo ni bula vata kaya tiko. Me tei sobu sara vua na wakamuni, ka tara cake tiko mai vua na nomuni bula, ka me kaukauwa cake tiko ga na nomuni vakabauta, me vaka ko ni a vakatavulici kina. Ka mo ni sinai tiko ga e na vakavinavinaka.”—Kolosa 2:6, 7, VV.
E kila o Paula ni vinakati na waka vakayalo e kaukaua. E vosota “na voto ni kau sa vakalauti kina na lewe[na],” kei na veivakacacani ca sara ena nona cakacaka vakaitalatala. (2 Korinica 11:23-27; 12:7) Ia e raica rawa o koya ni na toso tiko ga ena kaukaua ni Kalou. E kaya: “Au sa rawata na ka kecega e na vuku i Karisito o koya sa vakaukauwataki au.”—Filipai 4:13.
E dusia na ivakaraitaki i Paula, ni sega ni vakatau na vosota ni lotu Vakarisito ena veika vinaka e sotava. Me vaka ni vorata rawa na vunikau era bula ga ena veiulunivanua na draki ca me vica vata na senitiuri, e rawa tale ga nida tudei tiko ga ena vakabauta kevaka eda tea sobu sara na wakada vei Jisu Karisito da qai vakararavi ena kaukaua e solia na Kalou. Me kena ikuri, kevaka eda vosota me yacova na ivakataotioti, eda na sotava tale ga na vakayacori ni dua na yalayala ni Kalou: “Me vaka na kena dede e dua na kau ena vakakina na nodra gauna na noqu tamata.”—Aisea 65:22; Maciu 24:13.