Cava e Rawa ni Vakaduavatataka na Tamata?

SE MANI cava nomu vakabauta, o na rairai vakadinata nira tiko ena veilotu kece o ira era lomana na ka dina. E tiko ena lotu Idu, Katolika, lotu Vakajiu, kei na so tale o ira era kauaitaka mera kila na ka e dina ra qai saga mera kunea. Ia, e vaka me dau vakavuna na veisei ni kawatamata na lotu. E so era taurivaka na lotu mera cakava kina na ka e ca. E rawa beka nira duavata na tamata lomadina mai na veilotu era lomana na ka dodonu kei na ka dina? E rawa beka nira vakaduavatataki ina dua na inaki?

E vakatuburarawa dina me laurai ni vakavuna tiko vakalevu na veisei na lotu! Dikeva mada e so na veilecalecavi oqo. Era vala na lotu Idu kei ira na lotu Buddha mai Sri Lanka. Sa ra vakadavedra ena vica vata na veilecalecavi na lotu Tawase, Katolika kei ira na lotu Vakajiu. Era vala o ira era kaya nira “lotu Vakarisito” kei ira na Musilimi mai Bosnia, Chechnya, Idonisia, kei Kosovo. Ena Maji 2000, e rua na siga ni vala e vauci kina na lotu era mate kina e 300 mai Nigeria. Io, e vakavuna dina na vakadomobula ni veivala oqo na nodra veicati na lotu.

Era dau rarawa na tamata lomadina ni caka na ka ca ena yaca ni lotu. Me kena ivakaraitaki, era kidroa e levu era daulotu nira vosoti na italatala era vakacacani ira na gone. E so tale era madualaka nira sega ni duavata e levu na matalotu era kaya nira lotu vakarisito ena ulutaga me vaka na veiyacovi vakatagane se vakayalewa kei na vakalutu. Macala, ni sega ni vakaduavatataka na kawatamata na lotu. Ia, ena levu na vakabauta, era tu kina o ira era lomana na ka dina me vaka e laurai ena vica na ivakaraitaki oqo.

Era Tagica na Ka Dina

O Fidelia e dau yalodina ni lai lotu ena valenilotu na Catholic Church of San Francisco e La Paz, mai Bolivia. E dau cuva ena ivakatakarakara kei Meri, qai biuta na kadrala vinaka duadua e volia rawa ena kauveilatai. E cautaka e levu na kakana vua na bete me veisoliyaka vei ira na dravudravua. Ia, e mate e lima na luvena ni bera ni ratou papitaiso. Ni kaya na bete vua ni ratou vakararawataki kece ena butobuto mai Libo na luvena, e vaqaqa sara o Fidelia, ‘Ke vinaka na Kalou, e rawa vakacava ni yaco na ka oya?’

E dua na vuniwai o Tara, e susu ena lotu Idu e Kathmandu, mai Nepal. Ni muria na ivakarau makawa ni nona qase, e qarava nona kalou ena valenilotu Idu qai tu e nona vale na matakau. Ia e vaqaqa o Tara e so na taro me vaka: Na cava sa rui sivia kina na rarawa? Na cava e mate kina na tamata? E sega ni bau kunea na isaunitaro veivakacegui ena nona lotu.

O Panya, ena dua tale na yasana, e susu ena lotu Buddha e toka nodratou vale ena yasa ni dua na ikelimusu e Bangkok, mai Taeladi. E vulica ni veika ca e sotava e vu mai na ka e dau cakava tu e liu ni bera ni sucu, ena vinakati me vakuai koya mai na veigagadre kece me rawa ni bula vinaka kina. Me vakataki ira na vo ni lotu Buddha, e dodonu me dokai ira na bete vuku era dau mai kumuni cau e veisiga ni se qai kida ga na mataka. E dau vakanananu matua (meditation) qai vakumuna na itaba ni Buddha ni vakabauta nira dau veitaqomaki. Ni sotava e dua na vakacalaka qai paralasi na tolona me lako sobu, e gole sara ina nodra monastiri na lotu Buddha o Panya, ena vakanuinui me vakabulai kina vakacakamana. E sega ni vakabulai rawa se vakacegui vakayalo. Ia, e vakavotui ga vua na ka vakatevoro, mani vakaitavi sara kina.

E sucu mai Mereke o Virgil qai tomani ira na Musilimi yago loaloa ena koliji. E veisoliyaka ena yalodina na nodra ivola e vakamacalataki kina nira Tevoro na tamata yago vulavula. Era nanuma ni oya na vuna era dau vakararawataki ira kina na tamata loaloa o ira na tamata vulavula. E dina ni yalodina ena nona vakabauta, e dau vakacaraki Virgil na taro: E rawa vakacava nira ca kece na tamata yago vulavula? Na cava e vakabibitaki tiko ga kina na ilavo nira vunau na italatala ni lotu?

Dina ni bula o Charo ena kedra maliwa e levu na lotu Katolika mai Sauca Amerika, ia e lotu Tawase. E marau ni sega ni vakataki ira na qaravi matakau era tu yavokiti koya. E dau taleitaka me lai lotu ena veisigatabu ni dau talaucaka kina na lomana ni “vakaaleluya!” qai lagalagasere e lai tini ena danisi. E vakabauta o Charo ni sa sucu tale qai bokoci nona ivalavala ca. E solia e dua na ikatini ni kena isau ina lotu, ia ni kere cau mai ena retioyaloyalo na dauvunau e dau taleitaka, e vakau ilavo sara vua me baleti ira na gone mai Aferika. Ni tarogi nona italatala, ke dau loloma na Kalou na cava ga na vuna e vakararawataki ira kina na tamata mai eli, e qai liaca ni sega ni vakacegui koya nona isaunitaro na italatala. E muri, e qai kila ni sega ni vakayagataki nona cau mera vukei kina na gone mai Aferika.

E duidui na vakabauta eratou susu mai kina na lewe lima eratou cavuti e ke, ia eratou lomana kece na ka dina, eratou vakasaqara tale ga na isau dodonu ni nodratou taro. Ia e rawa beka ni ratou duavata ena sokalou dina? Na ulutaga e tarava ena saumi kina na taro oqo.

[iYaloyalo ena tabana e 4]

Rawa beka nira duavata na tamata e duidui na ivakatagedegede ni nodra bula?

[iTaba ni Credit Line ena tabana e 3]

G.P.O., Jerusalemi