Veivakaduavatataki na Sokalou Dina

DINA ni vakavuna na veisei ni kawatamata na lotu, na sokaloutaki ni Kalou dina duadua ga e rawa ni veivakaduavatataki. Ni se matanitu digitaki ni Kalou o Isireli, e levu na kai Matanitu Tani yalomalumalumu era tabili mai ina sokalou dina. Kena ivakaraitaki, o Ruci e biuta na veikalou ni nona vanua o Moapi qai kaya vei Neomai: “Na kai nomu era na kai noqu, na nomu Kalou talega ena noqu Kalou.” (Ruci 1:16) Ena imatai ni senitiuri S.K., levu sara na kai Matanitu Tani era mai sokaloutaka na Kalou dina. (Cakacaka 13:48; 17:4) E muri nira kacivaka na yapositolo i Jisu na itukutuku vinaka ena veivanua yawa, e so tale na tamata yalomalumalumu era mai duavata ni sokaloutaka na Kalou dina. E vola na yapositolo o Paula: “Dou sa saumaki mai na veimatakau vua na Kalou, mo dou qarava na Kalou bula ka dina.” (1 Cesalonaika 1:9) E vaka tale beka ga oqo na duavata e kune ni sokaloutaki na Kalou dina nikua?

Era kaya na dauvakatitiqa ni cala me tukuni ni tiko na “dausokalou dina” se “na Kalou dina.” Ena rairai vaka oya nodra rai nira lecava ni tiko na vanua e rawa ni vulici kina na ka dina. Ia o ira era dau vakasaqara na ka dina era susu mai ena duidui ituvaki ni bula era kila ni sega ni dodonu me vakatau ga vei keda yadua se o cei meda sokaloutaka. E dodonu ga me sokaloutaki na Dauveibuli, e bulia na ka kece—⁠o Jiova na Kalou. (Vakatakila 4:11) E Kalou dina, e tu tale ga vua na dodonu me lewa se me sokaloutaki vakacava.

Me vukea noda kila na ka e gadreva, e vakarautaka kina o Jiova nona Vosa, na iVolatabu. Voleka ni tamata kece nikua e tiko nodra iVolatabu taucoko se vakatikina. Kuria ni kaya na Luve ni Kalou: “Kevaka dou sa muria tikoga na noqu vosa, . . . dou na kila na ka dina.” (Joni 8:31, 32) Koya gona e rawa ni kilai na ka dina. Vica vata tale ga na milioni na tamata lomadina era susu mai ena duidui vakabauta sa ra ciqoma na ka dina oqo ra qai vakaduavatataki ena sokalou dina.​—Maciu 28:19, 20; Vakatakila 7:9, 10.

Duavata Ena Vuravura Taucoko Nikua!

Na parofisai totoka ena ivola i Sefanaia e tukuna nodra duavata na tamata e duidui nodra isususu. E kaya: “Ni’u [na Kalou o Jiova] na qai vukica na nodra vosa na veimataqali me vosa savasava, me ra masu kecega ki na yaca i Jiova, ka me ra qaravi koya e na lomavata.” (Sefanaia 3:9) E ka talei dina mera mai qaravi Jiova ena duavata o ira na tamata era sa veisau mai oqo!

Gauna cava me yaco kina na veisau oqo? Na Sefanaia 3:8 e kaya: “Mo dou waraki au ga, sa kaya ko Jiova, me yaco mada na siga ka’u na tu cake kina me ia na veitokitaki: ni sa noqu lewa me’u vakasoqoni ira na lewe ni veivanua, me’u soqoni ira vata na lewe ni veimatanitu, me’u sovaraka vei ira na noqu cudru, me oti kece na noqu cudru katakata: ni na vakayavuni ko vuravura taucoko e na bukawaqa ni noqu vuvu.” Io, e solia o Jiova vei ira na tamata yalomalumalumu e vuravura na vosa savasava ni se vakasoqoni ira tiko na leweniveivanua ni bera ni sovaraka nona cudru. Oqo sara ga na kena gauna, ni sa vakacagau tiko nodra kumuni na leweniveivanua ina siga levu ni Kalou Kaukaua Duadua na Amaketoni.​—Vakatakila 16:14, 16.

O Jiova e solia na vosa savasava vei ira nona tamata mera duavata kina. E okati ena vosa savasava nodra kila na ka dina ena iVolatabu me baleta na Kalou kei na nona inaki. Na vosataki ni vosa savasava e okati tale ga kina na vakabauti ni ka dina, me vakavulici vei ira na so tale, kei na bulataki ni lawa kei na ivakavuvuli ni Kalou. Me cati matua na veika vakapolitiki e vakavu veisei qai cavuraki tani na yaloqaciqacia, na veivakaduiduitaki vakamatatamata kei na dui boletaki vanua e kilai kina na vuravura oqo. (Joni 17:14; Cakacaka 10:34, 35) E rawa nira vulica na vosa oqo na tamata lomadina kece era lomana na ka dina. Dikeva mada se rawa vakacava vei iratou na le lima eratou cavuti ena ulutaga sa oti, e duidui nodratou vakabauta me ratou mai duavata ni sokaloutaki Jiova na Kalou dina duadua ga.

Eratou Duavata Ena Sokalou Dina

O Fidelia, e lotu Katolika kaukaua, a volia na iVolatabu i luvena yalewa me nona ivola ni vuli, e taroga sara na bete me vakamacalataka vua mai na iVolatabu na ka sa yacovi iratou na luvena e lima eratou sa mate. “Dua na ka noqu rarawa!” e kaya. Nira sikovi koya yani na iVakadinadina i Jiova, e taroga sara vei ira na taro vata ga oya. E qai liaca ni lasutaki ena nona lotu ni wilika sara ga ena nona iVolatabu na ituvaki dina ni mate. E vulica nira sega ni vakila e dua na ka na mate, era sega ni vakararawataki mai Libo se dua tale na vanua. (Same 146:4; Dauvunau 9:⁠5) E biuta na lotu kei na kena ivakatakarakara kece o Fidelia, qai vulica na iVolatabu. (1 Joni 5:21) Sa tini oqo na yabaki na nona marautaka tiko ni vakavulica na ka dina ena iVolatabu vei ira tale e so.

O Tara mai Kathmandu e toki ena vanua e lailai kina na valenilotu ni lotu Idu. E mani sikova na valenilotu ni lotu Wesele ni nuitaka me na vakaceguya nona gagadre vakayalo. Ia e sega ni saumi nona taro me baleta na rarawa ni kawatamata. Era sikovi koya na iVakadinadina i Jiova ra qai sureti koya me vulica na iVolatabu. E kaya o Tara: “Au qai kila ni Kalou dau loloma e sega ni rawa ni beitaki ni vakavuna na rarawa e vuravura . . . au marau ena vakanuinui ina vuravura vou ni vakacegu kei na veiyaloni.” (Vakatakila 21:3, 4) E vakarusa o Tara nona matakau ni lotu Idu, sega tale ni qai muria na ivakarau ni lotu ni nona vanua, qai kunea na marau dina ni vakaceguya nodra gagadre vakayalo na so tale ni sa iVakadinadina i Jiova.

O Panya, e lotu Buddha, a dua tu na daurairai nira sikovi koya yani ena imatai ni gauna na iVakadinadina i Jiova mai Bangkok, mani vakauqeti koya na parofisai ena iVolatabu. Kaya o Panya: “Sa qai rai na mataqu niu vulica na vuna e duidui kina na ituvaki ena gauna oqo kei na kena a nakita taumada na Dauveibuli, na veika tale ga sa tuvanaka tu me kau laivi kina na ka ca era vakavuna o ira era saqati koya kei na nona lewa cecere. Era veisemati kece na itukutuku ena iVolatabu. Sa tekivu meu lomani Jiova me vaka sara ga noqu lomana e dua na tamata; qai uqeti au oqo meu vakatovotovotaka na ka au kila ni dodonu. Au via vukei ira e so tale mera kila na duidui ni vuku vakatamata kei na vuku vakalou. E veisautaka dina noqu bula na vuku dina.”

Sa tekivu lomatarotarotaka vakalevu na nona vakabauta vakalotu o Virgil. E sega ni masu vua na Kalou me vukei ira na tamata yago loaloa, se me vukea na isoqosoqo e kaya ni dauveivakaduiduitaki qai vakavuna nodra cati na tamata vulavula, ia e masulaka ga me bau vakaraitaki vua se cava na ka dina, kei na vanua e rawa ni kunea kina. E kaya o Virgil: “Niu yadra ena mataka e tarava ni oti noqu masu vagumatua, au kunea sara e dua na ivoladraudrau Na Vale ni Vakatawa e vale. . . . E rairai curumaki mai ena ruku ni katuba.” Dede ga vakalailai sa gumatua sara na vuli iVolatabu kei ira na iVakadinadina i Jiova. E tomana: “Sa qai imatai ni gauna meu lomavakacegu kina. . . . E imatai tale ga ni gauna meu bau lomanuidei kina.” Sega ni bera sa duavata o Virgil kei ira era dau vakaraitaka vei ira na tamata na inuinui dina e volai tu ena Vosa ni Kalou na iVolatabu.

O Charo mai Sauca Amerika e drukataka dina ni dua na iVakadinadina na yacana o Gladys e mai vukei koya me lako rawa ina makete ni sa rui dredre vua ni ratou se gone na luvena. Toso na gauna, e vakadonuya sara o Charo na veisureti i Gladys—⁠na vuli iVolatabu sega ni saumi e vale. E kurabui o Charo ni vulica mai na nona iVolatabu ni sega ni tamata vinaka kece era lako i lomalagi, ia o Jiova ena vakalougatataki ira tale ga na kawatamata e vuravura mera bula tawamudu. (Same 37:11, 29) Sa oti oqo e 15 na yabaki nona vota tiko o Charo na inuinui oqo vei ira tale na so.

Vakasamataka mada nira sa na tawana na vuravura taucoko na tamata yalomalumalumu era duavata ni sokaloutaki Jiova, na Kalou dina! Oqo e sega ni tadra wale ga. Oqo na ka sa yalataka o Jiova. Ena vuku i nona parofita o Sefanaia, e kaya na Kalou: “Au na vakavoca ga vei iko e dua na mataqali yalomalumalumu ka dravudravua, ka ra na vakararavi e na yaca i Jiova. . . . Era na sega ni cakava nai valavala e sega ni dodonu, se vosataka na ka lasu; ena sega talega ni kune e na gusudra na yame dauveivakaisini; . . . ka na sega e dua me vakarerei ira.” (Sefanaia 3:12, 13) Ke uqeti iko na vosa ni yalayala oqo, muria na ivakasala ena iVolatabu: “Dou vakasaqarai Jiova, oi kemudou kece sa yalomalumalumu e na vanua, oi kemudou sa cakava na nona lewa; dou qara mada na yalododonu, vakasaqara na yalomalumalumu: dou na vuni beka kina e na siga ni cudru i Jiova.”​—Sefanaia 2:3.