Veivakabulai Vakacava O Jisu?
“Veivakabulai o Jisu!” “O Jisu na noda ivakabula!” Na itukutuku vaka oqo e dau volai tu ena so na lalaga ni vale se itikotiko ena levu na vanua e veiyasa i vuravura. Era vakabauta e vica vata na milioni ni o Jisu e nodra iVakabula. Ke o tarogi ira, “E vakabulai keda vakacava o Jisu?” era na rairai kaya, “E mate ena vukuda o Jisu,” se “a mate o Jisu ena vuku ni noda ivalavala ca.” Io, eda vakabulai ena mate i Jisu. Ia e rawa vakacava ni bokoca na ivalavala ca ni lewevuqa nona mate e le dua? O na sauma vakacava ke o tarogi, “E rawa vakacava nida vakabulai ena mate i Jisu?”
NA KENA isau vakaivolatabu e rawarawa, e matata, qai yaga vakalevu. Me kilai na kena yaga, e dodonu meda raica na bula kei na mate i Jisu me iwali ni dua na leqa levu. Na ka oqo eda na kila kina na bibi ni mate i Jisu.
Ni solia nona bula o Jisu, e walia kina na Kalou na ituvaki e basika ni valavala ca o Atama. E vakavuleqa sara ga na ivalavala ca oya! Erau uasivi na imatai ni tagane kei watina, o Ivi. E nodrau itikotiko na were o Iteni. E solia vei rau na Kalou nodrau itavi me rau karona nodrau itikotiko ena were. Me rau lewa na manumanu kece ga e dela i vuravura. Me na vakatetei tale ga na parataisi ena iyalayala kei vuravura ni sa tubu qai roboti vuravura e vica vata na milioni na tamata vakataki rau. (Vakatekivu 1:28) E totoka qai marautaki dina na itavi a soli vei rau! Kena ikuri, erau marautaka nodrau veimaliwai. (Vakatekivu 2:18) A tu vei rau na ka kece me rau marautaka kina na bula me tawamudu.
E dredre me vakasamataki ni rau na valavala ca o Atama kei Ivi. Ia erau vukitani na imatai ni veiwatini mai vei koya sara ga a buli rau, na Kalou o Jiova. Na kabula vakayalo, o Setani na Tevoro, e vakayagataka na gata me temaki Ivi me talaidredre vei Jiova, qai muri koya o Atama.—Vakatekivu 3:1-6.
E sega tale ni lomatarotarotaki na ka ena cakava na Dauveibuli vei Atama kei Ivi. Sa tukuna oti tu na isau ni talaidredre, ni kaya: “E tara mo kana mai na kau kecega sa tu e na were: ia mai na kau sa kilai kina na ka vinaka kei na ka ca, mo kakua ga ni kana kina: ni ko na mate vakaidina e na siga ko sa kana kina.” (Vakatekivu 2:16, 17) Sa qai gadrevi oqo me saumi na taro e bibi cake sara.
Sotava na Kawatamata na Leqa
Na talaidredre oya e kauta mai e dua na leqa levu ina kawatamata. A sucu uasivi o Atama. E rawa nira marautaka tale ga nona kawa na bula tawamudu. Ia, e valavala ca o Atama ni bera ni vakaluveni. E se bera ni sucu na kawatamata ni tau na kena itotogi: “E na buno ni matamu ko na kania kina na kemu kakana, ka yacova na siga ko na suka tale kina ki na qele; ni ko a buli maikina eliu: ni ko sa kuvu ni qele ga, ia ko na suka tale mo kuvu ni qele.” (Vakatekivu 3:19) Ni sa valavala ca o Atama qai dewa yani me lai mate me vaka sa tukuna oti tu na Kalou ni na yaco vua, sa totogi mate vata kei koya na kawatamata kece.
E qai vola vakavinaka e muri na yapositolo o Paula: “Sa curu ki vuravura nai valavala ca e na vuku ni tamata e lewe dua [Atama], kei na mate e na vuku ni valavala ca; a sa yaco vakakina na mate ki na tamata kecega, ni sa cala na tamata kecega.” (Roma 5:12) Io, ena vuku ni ivalavala ca oya, era qai tini tauvimate, ra qase, ra qai mate sara o ira e dodonu mera uasivi ra qai bula me tawamudu.
Ena rairai kaya e dua, “E sega ni dodonu me vaka oya, e talaidredre o Atama vua na Kalou—sega ni o keda. Na cava eda sega ni bula tawamudu kina da qai mamarau?” Eda kila vinaka ni kevaka e lewa na mataveilewai me bala i valeniveivesu e dua na gone ni butako motoka o tamana, ena rairai kudruvaka na gone: “Na cava meu vesu kina! Au sega ni cakava e dua na ka ca.”—Vakarua 24:16.
Ni rawai rau na imatai ni tagane kei na yalewa me rau valavala ca, e nanuma o Setani ni na biuti Jiova ena dua na ituvaki dredre. E kabakoro o Setani ena itekitekivu ni bula ni kawatamata—ni bera ni rau vakaluveni. Gauna ga e valavala ca kina o Atama, e votu sara na taro, Na cava ena cakava o Jiova vei ira na luve i Atama kei Ivi?
E donu vinaka na ka e cakava na Kalou o Jiova. E kaya na turaga yalododonu o Ilaiu: “Me yawa vua na Kalou, me caka ca; me yawa talega vua sa Kaukauwa, me sega ni dodonu.” (Jope 34:10) Ena vuku i Jiova, e vola na parofita o Mosese: “A Uluvatu! sa sega ni cala na nona cakacaka: ni sa dodonu na nonai valavala kecega: a Kalou vosa dina, ka sega ni ca, sa yalododonu ka daucaka dodonu ko koya.” (Vakarua 32:4) Na iwali e vakarautaka na Kalou dina ina leqa e vu mai na valavala ca nei Atama e sega ni kauta laivi na noda na rawata na bula tawamudu ena vuravura parataisi.
Tuvanaka na Kalou na Kena iWali Dodonu
Dikeva mada na iwali e tuvanaka tu na Kalou ni tauca na itotogi i Setani na Tevoro. E kaya o Jiova vei Setani: “Ka’u na vakaveimecakitaki kemudrau kei na yalewa [isoqosoqo vakalomalagi i Jiova], kei na nomu kawa [na vuravura e lewa o Setani] kei na nona kawa [Jisu Karisito]; ena butuqaqia na ulumu [Setani] ko koya, ia ko na qaqia na bukubukuni-yavana [mate i Jisu].” (Vakatekivu 3:15) E vakaibalebaletaka o Jiova na imatai ni parofisai oqo ena iVolatabu ina nona inaki me mai bula uasivi e vuravura o Jisu, na Luvena vakalomalagi vakayalo, oti me qai mate, ni qaqi na bukubuku ni yavana.
Na cava e vinakata kina na Kalou me mate e dua e uasivi? Ia, na itotogi cava ena tauca o Jiova na Kalou vei Atama ke valavala ca? Sega beka ni mate? (Vakatekivu 2:16, 17) “Sa kenai sau ni valavala ca na mate,” e vola na yapositolo o Paula. (Roma 6:23) E sauma nona ivalavala ca o Atama ni mate. E dulaki vua na bula, e digia me valavala ca, qai kena itotogi na mate. (Vakatekivu 3:19) Vakacava na itotogi mera vosota na kawatamata kece ena vuku ni ivalavala ca oya? E gadrevi me mate e dua me bokoci kina nodra ivalavala ca. Ia na mate i cei ena bokoci vinaka kina na ivalavala ca ni kawatamata kece?
Ena lawa ni Kalou ina matanitu makawa o Isireli e vinakati na “mate e na mate [se bula ena bula].” (Lako Yani 21:23) Me salavata kei na ivakavuvuli vakalawa oqo, na mate me na bokoci kina na ivalavala ca ni kawatamata kece me tautauvata vinaka kei na ka sa vakayalia o Atama. Na mate ga ni dua tale na tamata uasivi ena bokoci kina na ivalavala ca. O Jisu sara ga me na mate. Io, o Jisu na “ivoli veirauti” me vakabulai kina na kawatamata kece era kawa i Atama.—1 Timoci 2:6, NW; Roma 5:16, 17.
E Yaga Vakalevu na Mate i Jisu
E sega ni yaga na mate i Atama; sa dodonu ga me mate ena vuku ni nona ivalavala ca. Ia na mate i Jisu e yaga vakalevu, ni a sega ni cala. E rawa ni ciqoma na Kalou o Jiova na yago uasivi i Jisu me kedra ivoli na tamata talairawarawa era kawa i Atama. E sega ni bokoca wale ga noda ivalavala ca sa oti na talei ni isoro i Jisu. Ke vaka kina, ena sega ni yaga. Nida sucukaya mai na ivalavala ca, eda na baci cala tale. (Same 51:5) E dodonu meda marau ni mate i Jisu eda na rawata tale kina na bula uasivi a nakita taumada o Jiova vei ira na kawa i Atama kei Ivi!
E rawa ni vakatauvatani o Atama kei na tama e mate qai binia tu e dua na dinau levu (ivalavala ca) eda na sega ni sauma rawa. Ena yasana kadua, o Jisu e vaka na tama vinaka e mate qai biuta tu vei keda na ivotavota ena vagalalataki keda mai na dinau vakaiyanaqa e laiva tu mai o Atama, qai taqomaki keda me tawamudu. Na mate i Jisu e sega wale ga ni bokoci kina noda cala makawa, ia e tuvanaki vinaka tale ga kina noda veigauna mai muri.
E ivakabula o Jisu ni mate ena vukuda. E yaga dina nona mai mate! Nida raica me tiki ni ka e vakarautaka na Kalou me wali kina na leqa e vu mai na ivalavala ca i Atama, ena vakaukauataka noda vakabauti Jiova kei na sala e dau cakava kina na ka. Io, na mate i Jisu e sala mera vueti kina o “ira yadua era sa vakabauti” koya mai na ivalavala ca, tauvimate, qase, kei na mate. (Joni 3:16) O vakavinavinaka vua na Kalou ni vakarautaka mai na isolisoli vakayalololoma oqo meda vakabulai kina?
[iYaloyalo ena tabana e 5]
Vakavuna o Atama na valavala ca kei na mate ni kawatamata
[iYaloyalo ena tabana e 6]
Vakarautaka o Jiova na kena iwali dodonu