Mate kei na Vakaturi i Jisu​—Kena Yaga

Sega ni dodonu meda mate

“A sa kauta na tamata na Kalou ko Jiova, ka vakatikora ki na were ko Iteni me wereca ka vakatawa. A sa vakarota na tamata na Kalou ko Jiova, ka kaya, E tara mo kana mai na kau kecega sa tu e na were: ia mai na kau sa kilai kina na ka vinaka kei na ka ca, mo kakua ga ni kana kina: ni ko na mate vakaidina e na siga ko sa kana kina.”—Vakatekivu 2:15-17.

Ni bulia na Kalou na imatai ni tamata o Atama, a vakatikori koya ena dua na parataisi totoka e vuravura, o Iteni. Era tu kina na veika bula kei na kau totoka. Sega ni tukuni rawa na levu ni vuata e rawa ni kania o Atama. E dua ga na kau e vakarota na Kalou o Jiova me kua ni kania ni na mate kina.

Vakacava e matata vei Atama na ivakaro qori? E kila na ibalebale ni mate, ni sa dau raica nodra mate na manumanu ena gauna ya. Ke a buli o Atama me qai mate tale, ena sega ni vakaibalebale vua na ivakaro ni Kalou me kua ni kania na vuata. Ia ke talairawarawa me kua ni kania na vuata vakatabui qori, e kila ni na bula tiko ga.

Era vakabauta eso ni kau qori e vakatakarakarataka na veiyacovi, ia e sega ni dina. A vinakata o Jiova me rau “vakaluveni” o Atama kei Ivi “ka tubu me lewe vuqa” me rau “vakatawai vuravura, ka vakamalumalumutaka.” (Vakatekivu 1:28) Na vakatatabu qori e baleta sara tiko ga na vunikau. E vakatoka o Jiova me “kau sa kilai kina na ka vinaka kei na ka ca” baleta ni vakatakarakarataka tiko na nona dodonu me lewa na ka vinaka kei na ka ca vei keda. Ke sega ni kania na vuata vakatabui o Atama ena vakaraitaka nona talairawarawa, kei na nona vakavinavinakataki koya na dauveibuli e vakalougatataki koya tiko vakalevu.

Mate o Atama ni talaidredre vua na Kalou

“A sa kaya vei Atama, Ni ko a . . . kania na vua ni kau ka’u a vakarota vei iko, . . . e na buno ni matamu ko na kania kina na kemu kakana, ka yacova na siga ko na suka tale kina ki na qele; ni ko a buli maikina eliu: ni ko sa kuvu ni qele ga, ia ko na suka tale mo kuvu ni qele.”—Vakatekivu 3:17, 19.

Kania o Atama na kau a vakatabui vua. Sega ni dodonu me raici vakamamada nona talaidredre. E veivorati, e guilecava vakadua na veika vinaka kece e cakava vua o Jiova. Nona kania na kau qori e vakanadakui Jiova, e via lewai koya ga, ia ena sega ni dua na vanua vinaka e tini kina.

A qai mate o Atama me vaka ga a tukuna o Jiova. A buli Atama “mai na kuvu ni qele” na Kalou, tukuna tale ga vua ni na “suka tale kina ki na qele.” Sega ni lai bula tiko o Atama ena dua na vanua se me veisau ina dua tale na ka bula. Nona mate qori sa sega ni vakila e dua na ka me vaka ga na kuvu ni qele a buli mai kina.—Vakatekivu 2:7; Dauvunau 9:5, 10.

Eda mate nida kawa i Atama

“Ena vuku ni dua ga na tamata e curu kina i vuravura na ivalavala ca kei na mate ena vuku ni ivalavala ca, mani dewa na mate vei ira na tamata kece ga ni sa valavala ca na tamata kece ga.”—Roma 5:12.

Levu na leqa e basika ena nona talaidredre o Atama. Nona valavala ca e yalani ga kina nona bula me yabaki 70 se 80, sega tale ga ni rawata na bula tawamudu. Sa na sega ni bula uasivi, ia e vakadewa na ivalavala ca vei ira kece nona kawa.

Eda kawa kece i Atama. E sega noda cala, ena vukuna ga eda sega kina ni bula uasivi, eda dau valavala ca, da tini mate sara. Vakamacalataka vinaka o Paula na noda rarawa ni kaya: “O yau au vakayago ga, au volitaki meu bobula ina ivalavala ca. Au sa vakaloloma dina! O cei ena vakabulai au mai na yago e vakavuna tiko na noqu mate?” Sauma ga o Paula na nona taro: “Me vakavinavinakataki na Kalou ena vuku i Jisu Karisito na noda Turaga!”—Roma 7:14, 24, 25.

Bolemate o Jisu meda bula tawamudu kina

“Tala mai na Luvena o Tamana me iVakabula kei vuravura.”—1 Joni 4:14.

E tala mai na Kalou o Jiova e dua me vakabulai keda mai na revurevu ni ivalavala ca kei na itotogi ni mate. Qori na Luvena lomani a tiko mai lomalagi qai mai bula uasivi vakatamata me vakataki Atama. A “sega ni valavala ca” me vakataki Atama. (1 Pita 2:22) Ni uasivi, e sega ni cola na itotogi mate me vakataki keda, a rawa tale ga ni bula tawamudu e vuravura.

Ia e vakalaiva o Jiova mera vakamatei Jisu na kena meca. Vakaturi koya me ka bula vakayalo ni oti e tolu na siga, me suka kina i lomalagi ena kena gauna lokuci. Lai cabora sara vua na Kalou na yagona uasivi me sosomitaka na bula a vakawalena o Atama, e mai keda tu kina na isamunidawa. Vakadonuya o Jiova na isoro qori, rawa kina vei ira na vakaraitaka nodra vakabauti Jisu mera rawata na bula tawamudu.—Roma 3:23, 24; 1 Joni 2:2.

Vakasuka mai o Jisu na bula uasivi a vakawalena o Atama. E mate meda rawata kina na bula tawamudu. E kaya na iVolatabu: “E mate [o Jisu] ena vukuda na tamata kece ena levu ni loloma soli wale ni Kalou.”—Iperiu 2:9.

Eda kila e levu na ka baleti Jiova ena ka e vakarautaka qo. Na cecere ni nona ivakatagedegede, e sega ni rawa kina vei keda na kawa ivalavala ca meda vakabulai keda ga. Na nona loloma ga e vosota kina me solia na Luvena me keda ivoli, me kua ni beci na nona ivakatagedegede cecere.—Roma 5:6-8.

Eso era na vakaturi me vakataki Jisu ga

“Sa vakaturi mai na mate na Karisito me kedra isevu na mate tu. E vakavuna na mate e dua na tamata, na nodra vakaturi tale ga na mate e rawati ena vuku ni dua na tamata. Era mate tiko na tamata kece ena vuku i Atama, ena bula vaka kina na tamata kece ena vuku i Karisito.”—1 Korinica 15:20-22.

Eda kila ni a mate o Jisu qai vakaturi, ia e rawa ni vakadinadinataki vakacava nona vakaturi? Qori nona rairai vei ira e levu ena duidui gauna kei na duidui vanua. A rairai mada ga vei ira e sivia na 500 ena dua na gauna. A vola qori na yapositolo o Paula ena nona ivola vei ira e Korinica nira se bula tiko eso era a vakadinadinataka nona vakaturi, era rawa ni tukuna na ka era raica kei na ka era rogoca.—1 Korinica 15:3-8.

Nona vola o Paula ni o Karisito e “kedra isevu” na vakaturi, a vakaibalebaletaka tiko ni so tale ga era na qai vakaturi. E kaya sara ga o Jisu ni na yaco na gauna era na “tucake” mai “o ira kece na tu ena ibulubulu.”—Joni 5:28, 29.

Bibi meda vakaraitaka nida vakabauti Jisu me rawa nida bula tawamudu

“Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa kina o ira na vakaraitaka nodra vakabauti koya, mera rawata ga na bula tawamudu.”—Joni 3:16, NW.

E tukuni taumada ena iVolatabu na vu ni noda mate kei na vakacacani ni Parataisi. E vakamacalataki ena iotioti ni ivola ni iVolatabu ni na vakamalumalumutaki o mate qai Parataisi tale o vuravura ena veivakalougatataki ni Kalou. Era na bula marau me tawamudu na lewena. E kaya na Vakatakila 21:4: “Sa na sega tale na mate.” Me nuitaki na vosa ni yalayala qori e vakadeitaka kina na tikina e 5: “E donu na vosa qo, e dina tale ga.” Ena vakayacora dina o Jiova na ka e yalataka.

O vakabauta ni “donu na vosa qo, e dina tale ga”? Vulica e levu tale na ka me baleti Jisu Karisito, vakaraitaka tale ga nomu vakabauti koya. Ena vakadonui iko kina o Jiova. Ena vakalougatataki iko ena gauna qo, o na nuitaka tale ga na bula tawamudu ena parataisi e vuravura ena “sega tale” kina na mate, “na lolosi, na tagiyaso, kei na mosi.”