Vakarautaki Vinaka Meda Qasenivuli ni Vosa ni Kalou
“Sa vakarautaki keitou [na Kalou] me keitou sai talatala.”—2 KORINICA 3:5, 6.
1, 2. Na cava era dau tovolea e so, ia na cava e dau tini botoilevu kina na sasaga vaka oya?
O NA taleitaka beka ke tukuni vei iko mo cakava e dua na ka o sega sara tu ga ni kila na kena icakacaka? Kaya mada ni sa tu e matamu na ka mo cakava kei na iyaya ni cakacaka. Ia o sega sara tu ga ni kila se mo tekivu vakacava. Sa qai kuria ga na leqa ni vinakati me caka totolo oqori. O sa nuitaki sara tu ga kina. Sa na wacava na nomu vuturi!
2 Ia na ituvaki vaka oqo e sega ni ka ni vatavatairalago wale ga. Meda raica mada e dua na kena ivakaraitaki. So na gauna, era tovolea e so na lotu ni Veivanua Vakarisito mera kauta na itukutuku vinaka ina veimatanikatuba. Ia e dau tini botoilevu na sasaga vaka oya, mai malumu tale yani ena loma ga ni vica na macawa se vula. Baleta? Nira sega ga ni vakarautaki kina na lewenilotu. O ira mada ga na kena italatala era sega ni rawata na cakacaka vakavunau, veitalia sara na nodra vuli vinaka, wili kina nodra vuli ena koronivuli ni lotu. Na cava eda kaya kina oya?
3. Na vosa cava e vakayagataki tiko ena 2 Korinica 3:5, 6, ia na cava na kena ibalebale?
3 Na Vosa ni Kalou e vakamacalataka se vakarautaki vakacava e dua na lotu Vakarisito e kenadau ena vunautaki ni itukutuku vinaka. A uqeti vakalou na yapositolo o Paula me vola oqo: “Keitou sa sega ni rawata vakai keitou me vakasamataka ni rawa vakai keitou e dua na ka; ia sa vu mai vua na Kalou ga na neitou kaukauwa; o koya sa vakarautaki keitou me keitou sai talatala.” (2 Korinica 3:5, 6) E vakayagataki tiko e ke na vosa, “vakarautaki.” Na cava beka na kena ibalebale? E kaya na ivolavosa na Vine’s Expository Dictionary of Biblical Words: “Ni vakayagataki me dusia e dua na ka [ena vosa taumada vakirisi], e tiko kina na vakasama oqo, ‘sa rauta’. . . ; ni vakayagataki me baleta na tamata, e kena ibalebale, ‘rauti ira vinaka,’ ‘ganiti ira vinaka.’ ” O koya gona, ni dua e “vakarautaki,” e kena ibalebale ni itavi sa lesi vua e rauti koya vinaka se ganiti koya vinaka me colata. Io, era rawata vinaka na italatala dina ni itukutuku vinaka mera colata na itavi oqo. E rauti ira se ganiti ira vinaka mera lako ena cakacaka vakavunau.
4. (a) E kilai vakacava mai na noda raici Paula ni sega wale ga ni le vica era vakarautaki me nodra vakatabakidua na cakacaka vakaitalatala vakarisito? (b) Na cava na tolu na ka e vakayagataka o Jiova me vakarautaki keda meda italatala?
4 Na nona vakarautaki vinaka e dua e vu mai vei? Sa nona mesamesa beka ga oya? E tamata vuku beka? A goleva beka vakatabakidua e dua na tabanivuli ena dua na koronivuli rogo? Kena irairai ni taro kece oqo a rawa ni vakaio kina na yapositolo o Paula. (Cakacaka 22:3; Filipai 3:4, 5) Ia, a vakadinata ena yalomalumalumu ni Kalou ga o Jiova a vakarautaki koya me italatala, sega ni dua na koronivuli ni vuli torocake. Era na rawata beka oqo e le vica ga era digitaki? Na nona vola o Paula na vosa, “vakarautaki keitou,” vei ira na lewe ni ivavakoso mai Korinica, e dusia oya ni a okati ira tiko e so tale vata kei koya. Kena ibalebale ga oqo ni loma i Jiova mera vakarautaki vinaka o ira kece na nona tamata yalodina, sega ni so ga, mera colata rawa na itavi sa lesia vei ira. E vakarautaki ira vakacava na lotu Vakarisito dina nikua o Jiova? Meda raica mada na tolu na ka e vakayagataka: (1) na nona Vosa, (2) na yalona tabu, kei na (3) nona isoqosoqo e vuravura.
Eda Vakarautaki ena Vosa i Jiova
5, 6. E yaga vakacava vei ira na lotu Vakarisito dina na iVolatabu?
5 Taumada, e vakarautaki keda vakacava na Vosa ni Kalou meda italatala? A vola o Paula: “Ni sa ceguva na i vola Tabu kece ga na Kalou ka sa yaga me i vakavuvuli, me veivunauci, me veivakadodonutaki ka me veituberi e na ka dodonu. Me rawa kina vua na tamata ni Kalou me cakava na veicakacaka vinaka kece ni sa vakarautaki oti.” (2 Timoci 3:16, 17, VV) Na iVolatabu gona e “vakarautaki” keda meda vakayacora kina “na veicakacaka vinaka,” oya meda veivakavulici ena Vosa ni Kalou. Ia e sega li nira vakaivolatabu tale ga na lewe ni lotu ni Veivanua Vakarisito? E mai yaga tu gona vakacava na dua na ivola oqo, mera italatala gugumatua kina e so, e so tale e sega? Na kena isau, me dikevi ga se dau raici vakacava na iVolatabu.
6 Ka ni rarawa ni levu era dau lai lotu sa vaka mera lomalomaruataka ni iVolatabu e “vosa dina ga ni Kalou.” (1 Cesalonaika 2:13, VV) Na ka vakamadua oqo sa vakadinadinataki vei lotu ni Veivanua Vakarisito ena veigauna sa sivi yani. Na cava e raici vei ira na kena italatala e yabaki vica vata nodra vuli tiko ena koronivuli ni lotu, era sa vakarautaki beka vakavinaka mera qasenivuli ni Vosa ni Kalou? Sega sara. E so vei ira era vakabauta tiko na dina ni iVolatabu ni se qai tekivu nodra vuli lotu, ia ni sa cava, sa vuki tale na vakabauta oya me vakatitiqa! Nira suka mai na nodra vuli, sa sega ni qai wewenigusudra na ivakavuvuli ni Vosa ni Kalou—ni levu gona era sa sega ni vakadinata—e laurai ga ni dua tani na mua sa gole kina na nodra cakacaka vakaitalatala, era sa lai veitovaki ena veileti vakapolitiki, ra vunautaka ni sa kena gauna sara ga oqo me vakavinakataki kina na bula raraba, ra qai dau vakabibitaka ena nodra ivunau na vakasama vakatamata. (2 Timoci 4:3) Na kena veibasai e laurai vei ira na lotu Vakarisito dina, nira muria ga na ivakaraitaki i Jisu Karisito.
7, 8. A duidui vakacava na rai i Jisu me baleta na Vosa ni Kalou mai vei ira na iliuliu ni lotu ena nona gauna?
7 A qarauna o Jisu mera kua ni lewa na nona vakasama na iliuliu ni lotu ena nona gauna. Se vakavulica tiko e dua na ilawalawa lailai ga, me vakataki iratou na nona yapositolo, se dua na ilawalawa vakaitamera, a dau vakayagataka vakavinaka o Jisu na iVolatabu. (Maciu 13:10-17; 15:1-11) Na ka oqo a vakaduiduitaki koya mai vei ira na iliuliu ni lotu ena nona gauna. Era sega sara ga ni taleitaka na iliuliu oya ke ra via vaqaqa na veika titobu ni Kalou o ira na lewenilotu. Dau kena ivakarau vei ira na qasenivuli ena gauna oya mera vakabibitaka ni so na tikinivolatabu titobu sa kilikili ga me veivosakitaki kei ira na nodra gonevuli nuitaki duadua—ia ke rau cakava oya o qasenivuli kei gonevuli, me rau veivosaki sara e ra, qai ubi na uludrau. Era rere sara ga o ira na iliuliu ni lotu oya mera veivosakitaka e so na iwase ni iVolatabu, me vaka ga na nodra rere ni cavuta na yaca ni Kalou!
8 A duatani na nona rai na Karisito. A vakabauta o koya ni tamata kece, sega ni le vica ga era digitaki, e dodonu mera rogoca “na vosa kecega sa lako mai na gusu ni Kalou.” A sega ni inaki i Jisu me wasea vei ira e so ga na tamata nuitaki na usutu bibi ni iVolatabu. A kaya vei ira na nona tisaipeli: “A ka ka’u tukuna vei kemudou e na butobuto, dou tukuna e na rarama: kei na ka dou rogoca lo e na daligamudou, vunautaka e na dela ni vale.” (Maciu 4:4; 10:27) A gu dina na loma i Jisu me vota na itukutuku me baleti koya na Kalou vei ira na tamata kece ga a vosa rawa vei ira.
9. Era dau vakayagataka vakacava na iVolatabu na lotu Vakarisito dina?
9 Na Vosa ni Kalou e dodonu me yavu sara tiko ga ni noda veivakavulici. Kaya mada, ke dua na noda itavi ena soqoni, meda kua ni wilika wale tu ga na tikinivolatabu eda vakarautaka. De vinaka meda vakamacalataka, vakamatatataka, da qai dusia sara ga na kena ivakavakayagataki. Me noda inaki me tara sara ga na loma i koya e rogoci keda tiko na itukutuku ni iVolatabu. (Niemaia 8:8, 12) Meda dau vakayagataka tale ga na iVolatabu nida veivakasalataki se veivunauci. Dina ga nira cavutu na iVakadinadina i Jiova mai na dui vanua kei na duivosa, ia era rokova kece na iVola uasivi—na iVolatabu.
10. Eda na veisau vakacava kevaka eda rokova na vosa ni Kalou, na iVolatabu?
10 E dau mana vakalevu na iVolatabu ke rokovi vaka oya qai vakayagataki vakadodonu. (Iperiu 4:12) E dau veisautaka sara ga na bula, me biu laivi kina na itovo e veicoqacoqa kei na iVolatabu me vaka na veidauci, veibutakoci, qaravi matakau, mateni, kei na butako. E levu gona era biuta rawa na nodra itovo makawa, ra qai vakaisosomitaka ena itovo vou. (Efeso 4:20-24) Io, kevaka eda rokova na iVolatabu da qai vakaliuca na kena ivakavuvuli mai na rai se vakasama ga vakatamata, e keri sa vakarautaki keda tiko na iVolatabu meda qasenivuli maqosa ni Vosa ni Kalou.
Vakarautaki Keda na Yalo Tabu i Jiova
11. Na cava e veiganiti kina me tukuni ni “Dauveivuke” na yalo tabu i Jiova?
11 Kena ikarua, meda veivosakitaka mada se dau vakarautaki keda vakacava na yalo tabu se igu yavavala i Jiova. Meda kua ni guilecava ni yalo tabu i Jiova na ivurevure ni kaukaua levu duadua e tiko. O Jiova e sa vakadonuya me vakayagataka na Luvena lomani na igu vakaitamera oya ena vukudra kece na lotu Vakarisito dina. Sa rauta me kaya o Jisu ni yalo tabu “na Dauveivuke.” (Joni 16:7, VV) A uqeti ira na nona imuri mera kerea na yalo tabu oya vei Jiova, qai kaya ni na solia vakalevu vei ira o koya.—Luke 11:10-13; Jemesa 1:17.
12, 13. (a) Na cava e bibi kina meda masuta na veivuke ni yalo tabu ena noda cakacaka vakavunau? (b) E kilai vakacava ni sega ni uqeti ira na Farisi na yalo tabu?
12 Meda masuta e veisiga na veivuke ni yalo tabu, vakabibi ena noda cakacaka vakavunau. Ena tokoni keda vakacava na igu oya? Ena uqeta na noda vakasama kei na lomada meda veisau, meda tubu vakayalo, meda veisautaka me vou na noda itovo makawa. (Kolosa 3:9, 10) Ena vukei keda na yalo tabu meda vakaitovotaka na itovo talei vakarisito. Levu vei keda eda rawa ni cavuqaqataka na Kalatia 5:22, 23. E volai ena rua na tikina oqori na vua ni yalo tabu ni Kalou. Na kena imatai na loloma. E yaga dina na itovo oqori ena noda cakacaka vakavunau. Baleta?
13 E dau veivakauqeti na loloma. Na vuna ga era vunautaka kina na itukutuku vinaka na lotu Vakarisito dina baleta ni uqeti ira na nodra lomani Jiova kei ira na tamata kece ga. (Marika 12:28-31) Ke sega vei keda na loloma vaka oya, ena sega ga nida rawata meda na qasenivuli ni Vosa ni Kalou. Raici Jisu mada kei ira na Farisi. E kaya na Maciu 9:36: “Ia ni sa raici ira na lewe vuqa ko koya, sa lomani ira, ni ra sa malumalumu, ka biu wale tu, me vaka na sipi sa sega na nodrai vakatawa.” Ia vakacava o ira na Farisi, era raici ira vakacava na tauvanua? Era kaya: “O ira na lewe vuqa era tu ko ya era sega ni kila na Lawa i Mosese, o koya gona e sa na yaco kina vei ira na cudru ni Kalou.” (Joni 7:49, VV) E sega vei ira na Farisi oya na loloma, na veibeci ga. Macala vinaka ni sega ni uqeti ira tiko na yalo tabu i Jiova.
14. Me uqeti keda vakacava na loloma a dau vakaraitaka o Jisu ena nona cakacaka vakavunau?
14 Dau nanumi ira vakalevu na lewenivanua o Jisu. A kila vinaka na nodra rarawa. A kila nira vakacacani ra qai biu wale tu me vaka na sipi e sega na kedra ivakatawa. E tukuni vei keda ena Joni 2:25 ni o Jisu e kila “na ka sa tu e na loma ni tamata.” E kila vinaka sara tu ga na itovo ni tamata, ni a Matai Daucakacaka i Jiova ena gauna ni bulibuli. (Vosa Vakaibalebale 8:30, 31) Sa rauta ga me titobu na nona lomani keda. Me dau uqeti keda mada ga na loloma vaka oya meda gutaka kina na noda cakacaka vakavunau! Kevaka eda nanuma ni rawa nida vakavinakataka cake na tikina oqo, meda masuta na yalo tabu i Jiova da qai cakava sara na ka eda masulaka. Ena rogoci keda o koya. Ena solia mai na igu dau veivakauqeti oqo me vukei keda meda ucui Karisito, o koya a rawata me vunautaka na itukutuku vinaka ena kena ivakarau e vinaka duadua.
15. E dusi Jisu vakacava na veika e volai ena Aisea 61:1-3, qai vakavotui ira vakacava na vunivola kei na Farisi?
15 A vakarautaki vakacava o Jisu me italatala ni itukutuku vinaka? “Sa tu vei au na Yalo i Jiova,” e kaya. (Luke 4:17-21) Io, o Jiova sara ga a lesi Jisu ena yalo tabu. Sega ni qai gadrevi e dua tani tale na veivakadonui. Vakaevei ga o ira na iliuliu ni lotu ena nona gauna, era lesi tale ga ena yalo tabu? Sega. A sega tale ga nira rawata mera vakayacora na parofisai ena Aisea 61:1-3, a wilika vakadomoilevu o Jisu qai kaya ni dusi koya sara ga. Wilika mada mo raica kina vakataki iko ni sega sara ga ni ganiti ira na vunivola kei na Farisi dauveivakaisini na veitikina oqori. A sega ni dua na nodra itukutuku vinaka mera vunautaka vei ira na dravudravua. Mera qai vunautaka li vakacava na veisereki vei ira na bobula kei na rai vei ira na mataboko? Ena rai vakayalo, o ira mada ga era mataboko tu ra qai bobula ina ivakavuvuli e bulia na tamata! Ia vakaevei o keda, eda sa rawata beka meda qasenivuli ni Vosa ni Kalou?
16. Na cava mera nuidei kina na tamata i Jiova edaidai ni ganiti ira mera italatala?
16 Io e dina, eda a sega ni vakarautaki mai na koronivuli lelevu ni lotu meda italatala. Eda sega tale ga ni vakarautaki ena dua na koronivuli ni lotu meda qasenivuli kina ni Vosa ni Kalou. Kena ibalebale beka nida sega ni rawata na cakacaka oqo? Sega! O Jiova sara ga e lesi keda meda nona iVakadinadina. (Aisea 43:10-12) Eda rawata na itavi oqori mai na noda masuta na veivuke ni yalona tabu kei na noda cakava na ka eda masulaka. Sa macala tu nida tamata ivalavala ca da qai dau sega ni yacova sara na ivakarau a kotora vei keda o Jisu, na Qasenivuli Levu. Ia, meda marau ga ni vakayagataka tiko o Jiova na yalona tabu me vakarautaki keda meda qasenivuli maqosa kina ni nona Vosa!
Vakarautaki Keda na iSoqosoqo i Jiova
17-19. E vakarautaki keda vakacava ena noda cakacaka vakaitalatala na soqoni limalima e tuva e veimacawa na isoqosoqo i Jiova?
17 Meda raica sara oqo na ikatolu ni sala e vakarautaki keda kina o Jiova meda qasenivuli ni nona Vosa—na nona ivavakoso se isoqosoqo e vuravura, e vakavulici keda meda italatala. Ena sala cava? Vakasamataka mada na ituvatuva e vakarautaki meda vakavulici kina! Ena dua na macawa, eda dau lakova e lima na soqoni vakarisito. (Iperiu 10:24, 25) Eda dau soqoni vakaiwasewase lalai ena Vulivola ni iVavakoso, meda vulica kina vakatitobu na iVolatabu ena vakayagataki ni dua na kena ivoladusidusi e vakarautaka na isoqosoqo i Jiova. Eda na vuli kece da qai veivakayaloqaqataki tale ga kevaka eda dau vakarorogo, da qai dau vakamacala. O koya na qasenivuli ni vulivola ena vakamua tale ga na nona veivakavulici kei na veidusimaki me ganiti keda yadua. Qai ikuri tu ni kakana uro vakayalo na ivunau eda dau rogoca ena Sigatabu kei na vulici ni Vale ni Vakatawa.
18 E vakarautaki na noda Koronivuli ni Vuli Vunau meda tuberi ena iwalewale ni veivakavulici. Nida vakarautaka na itavi e soli vei keda ena koronivuli, eda sa vulica tiko e keri meda vakayagataka vakamaqosa na iVolatabu ena kena sereki e levu sara na usutu. (1 Pita 3:15) O sa bau lesi mada mo vosa ena dua na usutu e vaka me sa matata tu vei iko, ia o qai kurabui ni so tale na ka vou o vulica ni o vakavakarau tiko kina? Na ka oqori eda dau sotava kece. E dau qai matata ga vakalevu e dua na usutu nida sa seresereka tiko vei ira tale e so. Kevaka mada ga eda sega ni vakaitavi, e se rawa ga nida vakavulici keda meda qasenivuli maqosa cake. Oqori mai na noda dau vakaraica matua na veika era vinaka kina e so na gonevuli, da qai vakasamataka se da na vakatotomuri ira vakacava.
19 E vakarautaki tale ga na Soqoni ni Cakacaka meda qasenivuli maqosa kina ni Vosa ni Kalou. Eda dau rogoca gona e veimacawa na itavi bulabula mai na buturara, na ivakamacala e so, kei na vakatovotovo, e vakarautaki sara ga me baleta na noda cakacaka vakavunau. Na ivakamacala cava eda na vakayagataka? Eda na walia vakacava e so na ituvaki dredre e dau basika ena noda cakacaka vakavunau? Na iwalewale ni vunau cava tale e se vo meda vakamatauni keda kina? Na cava meda cakava me na laulau cake kina na noda veisikovi lesu se na noda veivakavulici ena iVolatabu? (1 Korinica 9:19-22) Na taro vaka oqori kei na kedra isau e dau lewe ni Soqoni ni Cakacaka. Levu sara na itavi ena Soqoni ni Cakacaka e dau yavutaki ena ulutaga era tabaki ena Noda Cakacaka Vakaitalatala ni Matanitu, e dua tale na ivukevuke yaga ena noda cakacaka bibi oqo.
20. Na cava meda cakava me yaga kina vei keda na soqoni lalai kei na soqoni lelevu?
20 Mai na noda vakavakarau kei na noda dau tiko ena soqoni, vaka kina na noda muria sara ena noda veivakavulici na veika eda tautauri mai kina, sa tosoi sara tiko ga e keri na noda vuli. Ia e sega ni yala ga e keri. E tiko e so tale na noda soqoni lelevu—na soqo ni tabacakacaka kei na soqo ni tikina—erau dau vakarautaki meda dusimaki kina ena iwalewale maqosa ni veivakavulici ena Vosa ni Kalou. Meda dau vakanamata mada ga meda vakarorogo vinaka ena soqo vaka oqori da qai muria sara na ivakasala eda rogoca mai kina!—Luke 8:18, VV.
21. E vakadinadinataki vakacava ni sa yaga na noda vakavulici, ia o cei me vakavinavinakataki kina?
21 Sa bau yaga beka na veivakavulici e vakarautaka o Jiova? Me raici ga na kena ivakadinadina. Sa ra vukei tiko e veiyabaki e udolu vakaudolu mera vulica na yavu ni ivakavuvuli vakaivolatabu ra qai bulataka na veika e vinakata vei ira na Kalou. Sa toso cake tiko ga na keda iwiliwili, ia e sega ni dua vei keda e rawa ni kaya ni o koya e vakavuna. E dodonu me tiko vei keda na rai vata ga a tiko vei Jisu, ni a kaya: “E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu sa talai au mai.” Me vakataki iratou ga na yapositolo, levu tale ga vei keda eda sega so ni vuku se vuli. (Joni 6:44; Cakacaka 4:13) Na levu ni ka eda rawata e vakatau vei Jiova, ni o koya ga e vakayarayarataki ira mai na tamata yalomalumalumu mera mai kila na ka dina. Donu vinaka kina na ka a kaya o Paula: “Au sa tea koi au, sa vakasuasuataka ko Apolosa; ia na Kalou ga sa vakatubura.”—1 Korinica 3:6.
22. Na cava meda kua ni yalolailai kina meda nanuma nida na sega ni rawata vinaka sara na veika e gadrevi ena cakacaka vakavunau vakarisito?
22 Io, na Kalou tale ga o Jiova e vakaitavi tiko ena noda cakacaka meda lai veivakavulici ena nona Vosa. De dua eda na nanuma ena so na gauna nida sega ni rawata meda qasenivuli ni nona Vosa. Ia nanuma tiko, ni o Jiova ga e dau vakayarayarataki ira mai na tamata vei koya vaka kina vei Luvena. O Jiova ga e vakarautaki keda ena nona Vosa, na yalona tabu, kei na nona isoqosoqo e vuravura meda qaravi ira rawa kina na ka vou oqo. Meda ciqoma mada ga na nona veivakavulici ena noda muria sara na veika totoka e tuberi keda tiko kina, meda vakarautaki vinaka ena noda itavi vaqasenivuli ni Vosa ni Kalou!
O na Sauma Vakacava?
• E vakarautaki keda vakacava na iVolatabu ena cakacaka vakavunau?
• E vakaitavi vakacava na yalo tabu ena noda vakarautaki meda italatala?
• E vukei iko vakacava na isoqosoqo i Jiova e vuravura mo rawa ni vunautaka kina na itukutuku vinaka?
• Na cava meda nuidei kina nida vakaitavi voli ena cakacaka vakaitalatala?
[iYaloyalo ena tabana e 25]
O Jisu, na qasenivuli ni Vosa ni Kalou, a dau lomani ira na tamata