O Nanuma ni Sega ni Ganiti iKo mo Vunau?

1. Na cava meda kua kina ni nanuma ni sega ni ganiti keda meda vunau?

¹ Meda kua sara ni nanuma ni sega ni ganiti keda meda vunau! E sega ni tukuni meda vuli vinaka sara da qai rawa ni vunau, e sega tale ga ni vakatau ena taledi eda rairai sucukaya mai. Eso mada ga na tisaipeli taumada era ‘sega ni vuli vinaka sara ra qai tauvanua ga.’ Ia e laulau nodra vunautaka na itukutuku vinaka nira nakita dei mera vakatotomuria na ivakaraitaki i Jisu.​​—⁠Caka. 4:​13; 1 Pita 2:​21.

2. Na cava eso na ka e kilai kina na veivakavulici i Jisu?

² iWalewale ni Veivakavulici i Jisu: “E kilai rawarawa na veivakavulici i Jisu, era bau vakila tale ga na tauvanua na kena yaga. E dreta nodra vakasama na vakarorogo na nona taro, vosa vakatautauvata, kei na rawarawa ni nona ikaunivosa. (Maciu 6:​26) E vu sara ga mai lomana nona loloma. (Maciu 14:14) Ni kila e lesi koya o Jiova qai vakaukauataki koya me vakayacora nona ilesilesi, e dau vosa kina ena nuidei, qai vakaraitaka ni tu vua na lewa.​​—⁠Luke 4:​18.

3. E vukei keda vakacava o Jiova meda vakayacora vinaka kina noda cakacaka vakaitalatala?

³ Vukei Keda o Jiova: E veivakavulici ena nona Vosa kei na nona isoqosoqo na Dauniveivakavulici Levu o Jiova me laulau kina noda vunautaka na itukutuku vinaka. (Aisea 54:13) E yaga nona maroroya na volaitukutuku ni iwalewale ni veivakavulici i Jisu, eda kila kina na ka e cakava da vakatotomuria sara. E dau dusimaki keda o Jiova ena yalona tabu, qai vakavulici keda ena soqoni e tuvanaka. (Joni 14:26) E vakayagataki ira tale ga na dautukutuku matua mera vukei keda me laulau noda vunau.

4. Na cava meda nuidei kina ni ganiti keda meda vunautaka na itukutuku vinaka?

⁴ Meda nuidei ni ganiti keda meda vunau baleta ‘na Kalou ga e vakarautaki keda kina vakavinaka.’ (2 Kor. 3:⁠5) Ke da nuitaki Jiova da vakayagataka vinaka tale ga na isolisoli e vakarautaka vakayalololoma ena vukuda, eda na ‘vakarautaki vinaka, da tu vakarau meda vakayacora na cakacaka vinaka kece.’​​—⁠2 Tim. 3:​17.