Taro na Dauwiliwili
A rogoca o Saula, na kai Tarisu, e dua na domo ni vosa tiko vua ena gauna a vakamatabokotaki kina ena rarama mai lomalagi. Eratou rogoca tale beka ga na domo oya o iratou nona lewenisala?
Kevaka eda rogoca e dua na ka da qai taura na kena ibalebale, e duidui oqo mai na noda rogoca wale ga. Ena laurai na duidui oqo ke rau vakatauvatani na itukutuku ni nona saumaki mai o Saula, ena Cakacaka wase e 9, kei na ka e vakamacalataka o koya me baleta na siga oya, ena wase e 22. (Cakacaka 9:3-8; 22:6-11) E tukuni ena Cakacaka 9:7 (VV) ni ratou “rogoca na domo” o iratou na salavata kei Saula. Ia, ena ivakamacala i Paula (Saula) ena Cakacaka 22:9, e kaya o koya ni ratou a sega ni rogoca na domo. Kena irairai ni veicalati na rua na itukutuku oqo, ia ni dikevi vinaka e macala ni sega ni vaka kina. Na vosa vakirisi ni “domo,” na pho·ne’, e vakayagataki ena Cakacaka 9:7 e dusia ni sa rogoci e dua na domo, a sega ga ni macala vei iratou na vakarorogo na ka e tukuna. Ia ni tukuni ena Cakacaka 22:9 ni ratou “sega . . . ni rogoca na domo,” na vosa vakirisi na pho·nen’ e vakayagataki kina me tukuna ga vakadodonu ni sega ni macala vei iratou na ka e tukuna o koya e vosa tiko. Eratou kila ni vosa tiko e dua, ia o Saula ga e rogoca na vosa qai taura na kena ibalebale. (Cakacaka 9:4) Ke laurai nira via veicoqacoqa e so na tikinivolatabu, ena yaga sara ke da kila ni vosa ‘rogoca’ e dau rua na kena ibalebale.
A vakaroti o Mosese ena siga ni nodra buli na matabete ni Isireli, me boroya na vuso ni daliga i matau i Eroni kei ira na luvena ena dra ni sipi tagane ni veibuli. Sega ni daligadra wale ga, na ligadra kei na yavadra i matau tale ga, mera nanuma kina ni itavi bibi e lesi vei ira ena siga oya e dodonu me tara na basoga ni nodra bula kece, na ka era rogoca, nodra cakacaka, kei na vanua era lakova. (Vunau ni Soro 8:22-24) E via tautauvata kei na ivakaro oqo na ivakaro ena Lawa me baleti ira na vukavuka era sa vakasavasavataki. A vakaroti kina na bete me boroya na vuso ni daligana i matau na vukavuka ena dra ni sipi tagane a vakamatei me isoro ni cakacala, me lumuta tale ga na daligana i matau ena waiwai. (Vunau ni Soro 14:14, 17, 25, 28) Vei koya tale ga na bobula e Isireli, ke a lomana me qarava tiko ga na nona itaukei, me kua vakadua ni sereki, ena vaqarai na daligana. Ena vakaravica na daligana o nona itaukei ena katuba qai cula basikata. Kena irairai ni ivakatakilakila oqo e dau caka ena daligana na bobula, sega ni dua tale na tiki ni yagona, me ivakaraitaki ni nona via vakarorogo tiko ga vua na nona itaukei.—Lako Yani 21:5, 6.
E bibi vei keda meda vakarorogo vua na Kalou, e kena ibalebale oya meda rogoca qai muria na veika e dusimaki keda kina na nona vosa volai, na iVolatabu. Ia era kaya e so ni bibi cake meda raica na Kalou. Wilika mada na nona rai ena tikina oqo o R. C. Dentan. E kaya: “Ena iVolatabu, era sega ni dau vakadreti na tamata mera ‘raici’ koya na Kalou, mera ‘rogoci’ koya ga . . . Ena so na lotu butobuto a dau nodra isausau na yalodina mera ‘raica’ na nodra kalou; ia ena iVolatabu era uqeti na tamata lotu mera dau ‘rogoca’ na vosa ni Kalou mera vakaraitaka kina nira talairawarawa vua. E dau kena ivalavala me tekivu vaka oqo na vosa bibi a tauci vei ira na Isireli: ‘Mo ni rogoca, na Isireli.’ ‘O koya sa nona na Kalou’ e sega ni dua na dauraivotu, ia o koya ga ‘sa rogoca na vosa ni Kalou.’ (Joni 8:47).”—The Interpreter’s Dictionary of the Bible, edited by G. Buttrick, 1962, Vol. 2, p. 1.