Ena Kune e Vei na Tikovinaka?

Ena dua na korolailai ena ra kei Aferika, a vakamoce tiko o Josua vei iratou na nona vuvale kei ira na nona itokani.a A mani lako yani me lai qara ilavo ena korolevu me tikovinaka kina. Ia, dede vakalailai nona tiko, a vakila ni a vakanuinui ga ina bilo cicila, ni dredre na qara ilavo.

A YALOLAILAI o Josua ena nona saga voli me matau ina bula ena korolevu. A sega ni tautauvata na bula e kea kei na ka a namaka. Dua na ka na levu ni nona galili o Josua, e gu na lomana me lesu tale ina nona vuvale kei ira na nona itokani mai nakoro. Ia a nuiqawaqawataka ni so mai nakoro era na vakalialiai koya. A leqataka ‘nira na kaya niu dadatuvu, niu sega ni rawata e dua na ka.’

Sa qai tarai koya sara vakabibi na nodrau a vakanuinuikara vua na nona itubutubu. Ni rau a nuitaki koya me vukei rau vakailavo. Ni valuta tiko na nona lomabibi o Josua, a lai rawata tu kina e dua na cakacaka beci, e balavu na gauna ni nona cakacaka, qai isau lailai wale sara mai na ka a namaka. Sa vakaocai koya na levu ni nona cakacaka. Ni toso na gauna sa lailai tiko ga mai na gauna e vo vua me cakava kina na cakacaka vakarisito e dau mareqeta. E rarawa qai galili ni sa yawaka mai na nodratou veikauaitaki na nona vuvale kei ira na nona itokani. A vakila ni bula ena korolevu e sega ni kune kina na tikovinaka a gadreva vakalevu.

Na italanoa vakaciriloloma i Josua era sotava e vica vata e veivanua nira cakava na ka vata a vakayacora o koya. Ia a sega ni nanumi koya ga o Josua me toki kina​—a qara ga na tikovinaka. E nanuma kina ni vinaka cake na bula ena korolevu mai na nona korolailai. Io, so na gauna ena lai tosoya cake beka na ivakatagedegede ni nona bula e dua me tu vinaka kina vakayago, ia e sega ni kena ibalebale ni oya na tikovinaka dina. A sega ni sotava o Josua na tikovinaka, era na rairai sega tale ga ni sotava e levu era tovolea mera toki ina dua na korolevu. Eda na taroga gona kina, ‘Na cava na tikovinaka?’

E duidui na rai me baleta na tikovinaka. E dua na ivolavosa e kaya ni oya na “galala mai na ka e vakarerevaki” se “galala mai na rere se lomaocaoca.” Edaidai, e levu era kila ni sega ni rawa ni na taucoko na noda “galala mai na ka e vakarerevaki.” Era lomavakacegu gona nira vakila na tikovinaka, dina ga ni rerevaki na ituvaki e yaco yavoliti ira tu.

Vakacava o iko? O na kunea e vei na tikovinaka? O na kunea beka ena korolevu, sega ena nomu korolailai me vaka a nanuma o Josua? Se o na kunea ena ilavo, veitalia ga na vanua se sala cava o rawata kina? O na kunea beka ni o saga na rogo? Ia, se mani e vei na vanua o vakabauta ni o na rawata kina na tikovinaka, ena vakacava na kena dede vei iko kei na nomu vuvale?

Meda dikeva sara mada e tolu na sala era qara kina e levu na tikovinaka​—vanua era vakaitikotiko kina, ilavo, itutu se qara rogo. Oti meda qai raica sara mada se e vei na vanua e kune dina kina na tikovinaka e dei.

[iVakamacala e ra]