Voleka ni Oti na Leqa ni Kawatamata!

“ERA tawayaga na cakacaka ni veivukei ke sega ni tiki ni dua na lalawa rabailevu, qai sega tale ga kina na veitokoni vakapolitiki e vakamuai sara ga ina kena wali na ka e vakavuna tiko. E sa vakadinadinataki vakavuqa ni na sega ni walia rawa ga na cakacaka ni veivukei na leqa e ka vakapolitiki vakatabakidua.”​—The State of the World’s Refugees 2000.

Sa levu na cakacaka ni veivukei, ia e sa qai rewailagi ga na leqa ni kawatamata. Ena rawa beka ni walia vakadua na leqa na veika vakapolitiki? Kena dina, ni na dredre toka. E vei tale meda rai kina? Ena vinaka meda vakasamataka na idola ni nona ivola na yapositolo o Paula vei ira na lotu Vakarisito mai Efeso, e vakamacalataka tiko na sala ena vakaotia kina na Kalou na leqa kece ni kawatamata. E vakatakila tale ga na ituvatuva ena vakayagataka na Kalou me cakava kina​—na ituvatuva oqo ena cavuraka kece na vu ni leqa e tarai keda tu nikua. Vakacava mo dikeva mada na ka e kaya o Paula? Na tikina oqo e kune ena Efeso 1:​3-​10.

“Me Soqona Vata Tale Kina na Ka Kece ga Vei Karisito”

Na yapositolo e vakatoka na inaki ni Kalou me “ituvatuva [se veiliutaki] me yaco kina na ka sa lewa ko koya ni sa oti kecega na gauna sa lokuci.” Na cava e vakaibalebaletaka oya? E kena ibalebale ga ni sa lokuca tu na Kalou na gauna me na yavala kina “me soqona vata tale kina na ka kece ga vei Karisito, na veika mai lomalagi, kei na veika e vuravura.” (Efeso 1:​10, NW) Io, sa vakayagataka tiko na Kalou e dua na ituvatuva me rau duavata tale kina ena ruku ni nona veiliutaki na veika kece mai lomalagi kei na veika e vuravura. Me baleta na matavosa “me soqona vata tale,” e vakavure vakasama kina na ka e kaya e dua na vuku ni iVolatabu o J. H. Thayer: “Ena kumuna kece tale vua . . . na veika buli e wili kina na tamata (era sega ni duavata tu ena vuku ni ivalavala ca) mera vauci vata vei Karisito.”

E vakaraitaka oya ni gadrevi vua na Kalou me vakayacora oqo ena vuku ni kena basika na duidui ena imatai ni gauna. Ena itekitekivu ni bula ni kawatamata, erau a tomani Setani na Tevoro na vuda, o Atama kei Ivi, ena talaidredre vua na Kalou. Rau via liutaka na nodrau bula ena nodrau vakatulewataka ga na ka vinaka kei na ka e ca. (Vakatekivu 3:​1-5) Me vaka na nona lewadodonu na Kalou, rau a sega wale ga ni vakatalai tani mai na vuvale ni Kalou, rau a vakayalia tale ga nodratou veiwekani. Mai kedra kina na isamu ni dawa na kawatamata, yaco mera ivalavala ca ra qai sotava na veituvaki ca kece ga ena gauna oqo.​—Roma 5:​12.

Vakatarai Vakalekaleka na iTovo Ca

Rairai era na taroga e so: ‘Na cava a vakalaiva kina na Kalou me rau cakava na ka oya?’ ‘Cava a sega ni vakayagataka ga kina na Kalou na nona kaukaua levu me vakayacora nona inaki, meda kua ni sotava kece kina na mosi kei na rarawa?’ Ena rairai vaka oya na noda vakasama. Ia, na cava sara mada ena rawati ke a vakayagataki na kaukaua levu oya? O na qoroya se vakadonuya beka e dua e siqema na vakaduiduile qai buturaki ira sobu era veitusaqati baleta ni tu vua na kaukaua? Ena sega ni vaka kina.

Eratou a sega ni bolea tiko na talaidredre oya na kaukaua levu e tu vua na Kalou. Ia, eratou bolea ga na dodonu ni nona veiliutaki. Me wali vakadua na ile oqo, a vakatara o Jiova mera lewa ga na nodra bula na nona ibulibuli, ena sega ni liutaki ira ena dua na gauna lekaleka. (Dauvunau 3:1; Luke 21:24) Oti oqori, ena qai yavala na Kalou me lewa taucoko tale kina na vuravura. Ena gauna oya e sa na matata vakasigalevu kina ni nona veiliutaki ga ena rawati kina na bula sautu dina, marau, kei na nodra tiko vinaka na lewe i vuravura. Sa ra na qai muduki tani vakadua na dauveivakasaurarataki e vuravura.​—Same 72:​12-​14; Taniela 2:​44.

“Bera ni Tauyavutaki ko Vuravura”

A nakita taumada o Jiova me cakava kece oqo ena dua na gauna makawa. A kaya o Paula ni “bera ni tauyavutaki ko vuravura.” (Efeso 1:4, VV) Oqori ni bera ni buli na vuravura se o Atama kei Ivi. E “vinaka sara” na vuravura oya, ni bera ni basika na talaidredre. (Vakatekivu 1:​31) Ia, na “vuravura” cava ga a vakaibalebaletaka na yapositolo o Paula? Na vuravura era bula kina na nodrau kawa o Atama kei Ivi​—na vuravura ni kawatamata ivalavala ca ena gadrevi me vueti. Ni bera ni sucu e dua na luvedrau, e sa kila tu vakailiu o Jiova na sala mera na vueti kina na kawa i Atama.​—Roma 8:​20.

E sega ni kena ibalebale oqo, ni na walia na leqa na Turaga Sau ni lomalagi kei vuravura me vaka era dau cakava na tamata. Nodra kila na tamata ni na yaco e so na leqa tawanamaki, era lalawataka kina vakamatailalai e so na kena iwali. E tuvanaka na Kalou cecere duadua na nona inaki qai vakayacora. Ia, e vakamacalataka o Paula na sala ena taurivaka o Jiova me walia vakadua kina na leqa ni kawatamata. Na sala cava soti oya?

O Cei ena Veivakabulai?

E vakamacalataka o Paula ni tiko na nodra itavi lavotaki na tisaipeli i Karisito era lumuti ena yalo tabu, ena kena wali na leqa e vu mai na ivalavala ca i Atama. E kaya o Paula ni o Jiova a ‘digitaki ira e liu ena vuku i Karisito,’ mera veiliutaki vata kei Jisu ena nona Matanitu vakalomalagi. Kuria oya, a kaya tale o Paula ni o Jiova ‘sa lesi ira e liu mera vakabau mera luvena ena vuku i Jisu Karisito.’ (Efeso 1:​4, 5) Io, a sega ni digitaki ira se lesi ira yadudua o Jiova. Ia, a lesia e dua na ilawalawa tamata yalodina qai vu mai lomadra na nodra veiqaravi mera vakaitavi vata kei Karisito ena kena wali na leqa a vakavuna o Setani na Tevoro, vaka kina o Atama kei Ivi, vua na kawatamata.​—Luke 12:32; Iperiu 2:​14-​18.

Sa vakasakiti dina! Nona bolea taumada o Setani na veiliutaki cecere ni Kalou, a tukuna ni tiko na leqa ena nona buli ira na kawatamata na Kalou​—nira vakaukauataki se ra bacani, era na talaidredre ina lawa ni Kalou. (Jope 1:​7-​12; 2:​2-5) Ena sala veivakurabuitaki a vakaraitaka kina “na kena vinaka ni nona loloma,” na Kalou o Jiova, a yaco na gauna me nuitaka e so na nona ibulibuli e vuravura era lewenivuvale ivalavala ca i Atama mera luvena vakayalo. Era na kau na lewe ni ilawalawa lailai oqo mera lai veiqaravi i lomalagi. Ena inaki cava?​—Efeso 1:​3-6; Joni 14:​2, 3; 1 Cesalonaika 4:​15-​17; 1 Pita 1:​3, 4.

O ira na luve ni Kalou oqo, e kaya na yapositolo o Paula, era “[i]taukei vata kei Karisito” ena nona Matanitu vakalomalagi. (Roma 8:​14-​17) Nira lai veiqaravi vakatui kei na bete, era na vakaitavi ena nodra sereki na kawatamata mai na vutugu kei na rarawa era sotava tu ena gauna oqo. (Vakatakila 5:​10) Io, “sa vutugu vata ko vuravura taucoko, ka sa yaluma e na rarawa, ka yacova na siga oqo.” Sa voleka oqo, mera yavala vata kei Jisu Karisito na luve ni Kalou digitaki oya, ia o ira kece na tamata talairawarawa era na “sereki  . . . mai na kena vakabobulataki ki na rusa, ka me lalaga tu ka vakaiukuukutaki vata kei ira na luve ni Kalou” vakadua tale.​—Roma 8:​18-​22.

“Rawati na Bula ena iVoli”

E rawa wale ga oqori ni a vakaraitaka na Kalou vua na kawatamata ivalavala ca na nona loloma veivakadrukai duadua qai cecekia​—na isoro ni veivoli i Jisu Karisito. A vola o Paula: “Ni da sa sereki e na vuku ni nona [Jisu Karisito] mate ka sa bokoci na noda i valavala ca me vaka na levu ni nona loloma.”​—Efeso 1:7, VV.

E bibi duadua na nona itavi o Jisu Karisito ena kena vakayacori na inaki ni Kalou. (Iperiu 2:​10) Na nona isoro ni veivoli e yavu duadua ga ni nodra okati e so na kawa i Atama ina nona vuvale vakalomalagi o Jiova, kei na nodra sereki mai na ituvaki ni ivalavala ca i Atama na kawatamata, ia e sega ga ni vakalailaina na nodra nuitaka na nona lawa kei na nona ivakavuvuli. (Maciu 20:28; 1 Timoci 2:6) E dau vakayacora o Jiova na ka me tabei cake kina na nona yalododonu qai vakacegui tale ga kina na lewadodonu e gadrevi.​—Roma 3:​22-​26.

‘iNaki Vuni’ ni Kalou

Ena vica vata na udolu na yabaki, a sega ni vakatakila sara na Kalou na sala ena vakayacori rawa kina na nona inaki e vuravura. Ia ena imatai ni senitiuri S.K., a “vakatakila mai vei keda [na lotu Vakarisito] na Kalou na nona i naki vuni.” (Efeso 1:​9, VV) A matata vakasigalevu vei Paula kei ira na nona itokani lumuti lotu Vakarisito na itavi bibi a lesi kina o Jisu Karisito ena kena vakayacori na inaki ni Kalou. E matata vinaka tale ga vei ira na nodra itavi lavotaki, nira na lai veiliutaki vata kei Karisito ena nona Matanitu vakalomalagi. (Efeso 3:​5, 6, 8-​11) Io, na Matanitu ni Kalou ena veiliutaki kina o Jisu Karisito kei ira na nona itokani, e sa ituvatuva ena vakayagataka na Kalou me vakilai kina e lomalagi kei vuravura na bula sautu tawamudu. (Maciu 6:​9, 10) Ena sala oya, sa na qai vakalesuya tale mai o Jiova na ituvaki ni vuravura a nakita taumada kina.​—Aisea 45:18; 65:​21-​23; Cakacaka 3:​21.

Sa tu oqo e liu na nona gauna lokuci me kauta tani kece kina vakadua na veivakararawataki kei na veivakalaboci e vuravura. Ia a tekivuna o Jiova na veivakatikori ena Penitiko 33 S.K. Ena sala cava? A tekivutaki kina na nodra kumuni vata “na veika mai lomalagi,” nira na veiliutaki vata kei Karisito mai lomalagi. Era wili kina na lotu Vakarisito mai Efeso. (Efeso 2:​4-7) Ena noda gauna wale ga oqo, e sa kumuna tiko o Jiova “na veika e vuravura.” (Efeso 1:​10) Na vunau sa vakayacori tiko ena vuravura taucoko, e sa kacivaka tiko kina o Jiova vei ira na veimatanitu kece na itukutuku vinaka ni nona Matanitu ena veiliutaki kina o Jisu Karisito. Era kumuni sara tiko mada ga na sa vakabauta na itukutuku oya ina vanua era na taqomaki ra qai vakabulai kina vakayalo. (Joni 10:16) Sega ni dede, era na vakila sara na galala mai na bula rarawa kece kei na veivakalaboci nira sa na bula tu ena parataisi e vuravura.​—2 Pita 3:​13; Vakatakila 11:18.

“E vakasakiti na toso” e sa vakayacora na cakacaka ni veivukei vei ira na vakacacani tu. (The State of the World’s Children 2000) Ia, na toso vakasakiti levu duadua oya na nona yavala o Jisu Karisito kei ira na nona ivukevuke mera na veiliutaki vata ena Matanitu vakalomalagi. Era na walia kece sara na vu ni veileqaleqati kei na ca kece ga eda dau sotava. Era na vakaotia vakadua na leqa kece ni kawatamata.​—Vakatakila 21:​1-4.

[iYaloyalo ena tabana e 4]

E sega ni walia rawa na leqa ni kawatamata na cakacaka ni veivukei

[iYaloyalo ena tabana e 6]

Na isoro ni veivoli i Karisito e vakabulai ira na kawatamata mai na ivalavala ca i Atama

[iYaloyalo ena tabana e 7]

Sa rawa ni kune nikua na veitaqomaki kei na veivakabulai vakayalo

[iYaloyalo ena tabana e 7]

Sega ni dede, ena ruku ni Matanitu i koya na Mesaia, e sa na oti kina vakadua na leqa