iTuvatuva Maqosa ni Kalou me Vakayacori Kina Nona iNaki

“Sa cakava [“vakamaqosa,” NW] na ka kecega [na Kalou] me vaka na nona lewa.”​—EFESO 1:​11.

1. Na cava era na soqoni vata kece kina na ivavakoso ni iVakadinadina i Jiova ena 12 Epereli, 2006?

ENA yakavi ni Vukelulu, 12 Epereli, 2006, era na soqoni vata kina e rauta ni 16 na milioni mera vakananuma na iVakayakavi ni Turaga. Ena vanua kece e vakayacori kina na soqoni oqo, ena vakarautaki e dua na teveli me biu kina na madrai sega ni vakaleveni e vakatakarakarataka na yago i Karisito, kei na waini damudamu e vakatakarakarataka na nona dra a vakadavei. Ni vakarau cava na vunau e vakamacalataki kina na ibalebale ni iVakananumi ni mate i Jisu, sa na qai veisoliyaki na ivakatakarakara oqo​—na madrai kei na waini​—vei ira kece era tiko. Ena vica ga na ivavakoso ni iVakadinadina i Jiova, ena dua beka se vica wale ena vakayagataka na madrai kei na waini. Ia, ena levu ga na vanua, e sega ni dua ena vakayagataka. Na cava era vakayagataka ga kina na madrai kei na waini e vica wale na lotu Vakarisito, o ira era nuitaka mera lai bula i lomalagi, ra qai sega ni vakayagataka na iwiliwili levu era nuitaka mera bula tawamudu ena dela i vuravura?

2, 3. (a) E bulibuli vakacava o Jiova me salavata kei na nona inaki? (b) iNaki cava a bulia kina o Jiova na vuravura kei na kawatamata?

² E dau vakainaki na ka e cakava o Jiova. Ena nona vakayacora nona inaki, e ‘cakava vakamaqosa na ka kece ga me vaka na nona lewa.’ (Efeso 1:​11) Taumada, a bulia na luvena e dua bauga sa vakatubura. (Joni 1:​1, 14; Vakatakila 3:​14) Sa qai vakayagataki Luvena o Jiova ena buli ni dua na vuvale era lewena na luvena vakayalo, tarava oya na buli ni veika e rairai, wili kina na vuravura kei na tamata.​​—Jope 38:​4, 7; Same 103:​19-​21; Joni 1:​2, 3; Kolosa 1:​15, 16.

³ Era vakavulica e so na lotu ni Veivanua Vakarisito ni Kalou e bulia na vuravura me vanua ni nona vakatovotovo. Me vakatovolei keda kina na tamata, o koya ga e yalodina sa na lai tomani ira sara na agilosi i lomalagi. Ia, sega ni o koya oya na inaki i Jiova. E bulia na vuravura na Kalou ena dua na inaki dei, “me tawa.” (Aisea 45:18) A bulia na vuravura na Kalou me baleta na tamata, na tamata me baleta na vuravura. (Same 115:16) A nona inaki me parataisi na vuravura taucoko, ra qai tawana na tamata talairawarawa, ra teivaka tale ga. A sega vakadua ni tukuna vei rau na imatai ni veiwatini ni rau na qai lai bula i lomalagi.​​—Vakatekivu 1:​26-​28; 2:​7, 8, 15.

Saqati na iNaki i Jiova

4. E tekivu vakalewai vakacava mai na itekitekivu ni bula ni kawatamata na ivakarau ni veiliutaki i Jiova?

⁴ E vukitani e dua na luve vakayalo ni Kalou qai saga me vakaseva na inaki i Jiova, ena sala oqo e sa vakayagataka kina vakatani na galala a solia vua na Kalou. E mai vakaleqa o koya na bula veimaliwai vinaka era vakila o ira era marautaka na nodra vakamalumalumutaki ira ena veiliutaki i Jiova. E liutaki rau na imatai ni veiwatini o Setani me rau kua ni vakarorogo vua na Kalou. (Vakatekivu 3:​1-6) E sega ni bolea o koya na kaukaua i Jiova, e vakalewa ga na ivakarau ni nona veiliutaki, kena ibalebale e nona ile tiko ni sega ni dodonu me liutaka na tamata na Kalou. O koya gona, sa tekivu basika e vuravura ena itekitekivu sara ga ni bula ni kawatamata na kena vakalewai na veiliutaki cecere i Jiova.

5. Na cava e dua tale na vakalelewa i Setani, o cei e okati ena vakalelewa oqo?

⁵ E salavata mai kei na vakalewai ni veiliutaki cecere i Jiova e dua tale na vakalelewa i Setani, e yaco na vakalelewa oqo ena gauna i Jope. E vakalewa o Setani na nodra inaki na ibulibuli i Jiova ena nodra vakamalumalumutaki ira, kei na nodra talairawarawa vua na Kalou. Vaka e kaya tiko o Setani nira vakamalumalumu tiko na tamata vua na Kalou baleta ga nira rawaka tiko mai vua, ke ra vakatovolei era na vakanadakuya na Kalou. (Jope 1:​7-​11; 2:​4, 5) E dina ni oqo na nona vakalelewa vua na tamata, ia era okati tale ga kina na luve vakayalo ni Kalou, wili sara mada ga kina o koya na Luve ni Kalou e duabau ga a vakatuburi.

6. E vakaraitaka vakacava o Jiova na nona dina tiko ena nona inaki kei na yacana?

⁶ Ena nona dina tiko o Jiova ena nona inaki kei na ibalebale ni yacana, e vakayacora kina na cakacaka ni Parofita kei na iVakabula.a E kaya vei Setani: “Ka’u na vakaveimecakitaki kemudrau kei na yalewa, kei na nomu kawa kei na nona kawa; ena butuqaqia na ulumu ko koya, ia ko na qaqia na bukubukuni-yavana.” (Vakatekivu 3:​15) Ena taurivaka o Jiova na Kawa ni “yalewa” e vaka voli na watina, se nona isoqosoqo vakalomalagi, me sauma kina na vakalelewa i Setani, me vakarautaka tale ga vei ira na kawa i Atama na inuinui ni veisereki kei na veivakabulai.​​—Roma 5:​21; Kalatia 4:​26, 31.

‘Na iNaki Vuni ni Kalou’

7. Na cava a vakatakila na Kalou me baleta na nona inaki ena veika a cavuta na yapositolo o Paula?

⁷ Ena nona ivola vei ira na lotu Vakarisito mai Efeso, e vakamacalataka vakavinaka kina na yapositolo o Paula na ituvatuva maqosa e taurivaka o Jiova me vakayacori kina nona inaki. E vola o Paula: “Sa vakatakila vei keda na nona lewa sa vuni tu, me vaka na ka e vinaka vua, ka sa nakita vakai koya ga: me yaco kina na ka sa lewa [se “tuvanaka vakamaqosa,” NW] ko koya ni sa oti kecega na gauna sa lokuci me soqona vata na ka kecega vei Karisito, na veika mai lomalagi, kei na veika e vuravura.” (Efeso 1:​9, 10) Na inaki lagilagi ni Kalou o Jiova oya me soqoni ira se vakaduavatataki ira na nona ibulibuli mai lomalagi kei vuravura, o ira era marautaka mera vakamalumalumutaki ira ena nona veiliutaki cecere. (Vakatakila 4:11) Sa na qai vakalagilagi na yaca i Jiova, vakavotui na lasulasu i Setani, vakayacori tale ga na loma ni Kalou “e vuravura me vaka sa caka mai lomalagi.”​​—Maciu 6:​10.

8. Na cava na ibalebale ni vosa e vakadewataki tiko oqo me ‘ituvatuva maqosa’?

⁸ Ena qai vakarautaka o Jiova e dua na ‘ituvatuva maqosa’ me vakavatukanataka kina na “ka e vinaka vua,” se lomana. E vakayagataka e ke o Paula e dua na vosa e dau vakaibalebaletaki vakalevu ena “ituvatuva ni kena qaravi na veika vakavuvale.” E sega ni vakaibalebaletaki ena dua na matanitu, me vaka beka na Matanitu Vakamesaia, ia e vakaibalebaletaki ena ituvatuva ni kena qaravi se cicivaki e dua na ka.b Na sala vakatubuqoroqoro ena vakarautaka na Kalou me vakayacori kina na nona inaki e okati me dua na ‘ka vuni.’ Na ‘ka vuni’ oqo ena qai vakatakilai tiko vakamalua ni toso na gauna.​​—Efeso 1:​10; 3:​9, ivakamacala e ra ni NW.

9. E vakatakila tiko vakamalua vakacava o Jiova na ka vuni me baleta na nona inaki?

⁹ E taurivaka o Jiova e vica toka na veiyalayalati me vakatakila kina vakamalua na sala ena vakayacora kina na ka a yalataka mai Iteni me baleta na Kawa. E vakatakila ena nona veiyalayalati kei Eparama ni na basika e vuravura na Kawa yalataki mai na vuvale i Eparama, me ra qai vakalougatataki tale ga kina na “veimatanitu kecega e vuravura.” E macala tale ga mai na veiyalayalati oya ni kawa e sega ni vakaibalebaletaki ga vakatabakidua vua e dua. (Vakatekivu 22:​17, 18) E macala mai na veiyalayalati ni Lawa e vakayacora na Kalou kei ira na Isireli ni inaki i Jiova me vakarautaka e dua na “matanitu bete.” (Lako Yani 19:​5, 6) Nona veiyalayalati kei Tevita e dusia ni o koya na Kawa ena veiliutaki ena dua na Matanitu e sega ni oti rawa. (2 Samuela 7:​12, 13; Same 89:​3, 4) Ni sa vakamuai ira rawa na Jiu vua na Mesaia na veiyalayalati ni Lawa, sa qai vakaraitaka o Jiova e so tale na ka e baleta na vakayacori ni nona inaki. (Kalatia 3:​19, 24) O ira mera na lai veitomani kei Karisito mera kawa vata kei koya era na lewe ni “matanitu bete” a parofisaitaki, era na okati tale ga ina dua na “veiyalayalati vou” mera wili kina mera “Isireli” vakayalo.​​—Jeremaia 31:​31-​34; Iperiu 8:​7-9.c

10, 11. (a) E vakatakilai koya vakacava na Kawa yalataki o Jiova? (b) Na cava e mai bula kina e vuravura na Luve ni Kalou e duabau ga e vakatuburi?

¹⁰ Sa qai yaco na gauna me basika kina e vuravura na Kawa yalataki me salavata kei na ituvatuva maqosa ni Kalou me vakayacori kina nona inaki. O Jiova e talai Keperieli na agilosi me mai tukuna vei Meri ni na vakasucuma e dua na gonetagane, ena vakatokai o Jisu. E kaya vei Meri na agilosi: “Ena levu ko koya, ka na vakatokai na Luve i Koya sa cecere sara; ia na Turaga na Kalou [“o Jiova,” NW] ena solia vua nai tikotiko vakaturaga nei tamana ko Tevita: ia ena lewa ko koya na mataqali i Jekope ka sega ni mudu; ena sega talega ni oti na nona matanitu.” (Luke 1:​32, 33) O koya gona, sa qai matata vakasigalevu se o cei na Kawa yalataki.​​—Kalatia 3:​16; 4:4.

¹¹ E inaki i Jiova me lako mai vuravura na Luvena e duabau ga e vakatubura, me qai mai vakatovolei ena kena iyacoyaco sara i cake. Na dina se lasu ni vakalelewa i Setani e sa na vakatau sara ga ena ivakarau ni bula ena vakaraitaka o Jisu. Ena yalodina tiko beka ga vei Tamana? Oqo e tiki ni ka vuni. E muri, sa qai vakamacalataka na yapositolo o Paula na itavi i Jisu: “Sa levu ka sega ni veiletitaki rawa na ka vuni ni noda lotu: O koya sa vakaraitaki koya e na yago vakatamata, sa vakadinadinataka e na Yalo Tabu, ka laurai mai vei ira na agilosi. Sa vunautaki ko koya vei ira na veimatanitu, ka sa vakabauti e vuravura taucoko, ia sa qai kau cake e na lagilagi ki lomalagi.” (1 Timoci 3:​16, VV) Na yalodina i Jisu me yacova nona mate e sogota sara ga na gusu i Setani, e vakalasuya vakadua na nona vakalelewa. Ia, se vo me vakatakilai e so tale na ka e vauca na ka vuni ni Kalou.

“Ka Vuni ni Matanitu ni Kalou”

12, 13. (a) Na cava e dua na tiki ni “ka vuni ni matanitu ni Kalou”? (b) Na cava e okati ena nona digia o Jiova e dua na iwiliwili lailai mera lako i lomalagi?

¹² Ena dua na ilakolako ni vunau i Jisu i Kalili, e vakaraitaka kina ni ka vuni ni Kalou e tiko na kena isema voleka sara kei na nona Matanitu Vakamesaia. E tukuna o koya vei iratou na nona tisaipeli: “Sa soli vei kemudou mo dou kila na veika vuni ni matanitu vakalomalagi [“matanitu ni Kalou,” Marika 4:​11].” (Maciu 13:11) E dua na tiki ni ka vuni oya na nona digitaka o Jiova e dua na “qele-ni-sipi lailai” e lewena e 144,000 na tamata mera wili mera kawa vata kei Luvena, ena nodra veiliutaki vata kei koya mai lomalagi.​​—Luke 12:32; Vakatakila 14:​1, 4.

¹³ A buli na tamata me bula ga e vuravura, o koya gona, e ganita me vakarautaka o Jiova e so mera “buli vou” me rawa kina nira lako i lomalagi. (2 Korinica 5:​17) E vola o Pita, e dua e digitaki me vakaivotavota ena bula totoka oqo: “Me da ia na vakavinavinaka vua na Kalou na Tama ni noda Turaga ko Jisu Karisito! Sa vakasucumi keda vou ko koya e na vuku ni nona loloma levu, me noda kina na i nuinui bula, e na nona vakaturi Jisu Karisito cake tale mai na mate; ka me noda tale ga na i votavota sa sega ni rusa rawa, sa sega ni dukadukali ka sega ni malai rawa, sa maroroi tiko mai lomalagi e na vukumuni.”​​—1 Pita 1:​3, 4, VV.

14. (a) Era okati vakacava na sega ni Jiu ena “ka vuni ni matanitu ni Kalou”? (b) Eda kila rawa vakacava “na veika titobu ni Kalou”?

¹⁴ E dua tale na tiki ni ka vuni ni Kalou e vauca na nona Matanitu oya na nodra na okati tale ga na sega ni Jiu ena iwiliwili lailai mera na lai veiliutaki vata kei Karisito i lomalagi. E vakamacalataka o Paula na tiki ni ‘ituvatuva maqosa’ oqo i Jiova me vakayacori kina nona inaki, ena nona kaya: “[Na ka vuni] oqori sa sega ni vakatakilai vei ira na tamata e na gauna sa oti, me vaka sa qai vakatakilai e na Yalo Tabu vei ira na nonai apositolo yalosavasava kei na nona parofita; ni ra sai taukei vata na veimatanitu tani, ka sa mataveiwekani vata, ka sa rawata vata talega na ka sa yalataka ko koya, e na vuku i Karisito, me vaka nai tukutuku-vinaka.” (Efeso 3:​5, 6) E vakatakila na Kalou na tiki ni ka vuni oqo vei ira na “nonai apositolo yalosavasava.” Ke a sega tale ga na veivuke ni yalo tabu ni Kalou ena gauna oqo, ke a sega nida kila rawa “na veika titobu ni Kalou.”​​—1 Korinica 2:​10; 4:1; Kolosa 1:​26, 27.

15, 16. Na cava e digia kina o Jiova e so mai vuravura mera lai veiliutaki vata kei Karisito?

¹⁵ Na “lewe 144,000” e laurai nira tu vata kei “na Lami” ena Ulunivanua o Saioni mai lomalagi e tukuni nira “voli oti mai vuravura,” “era sa voli mai vei ira na tamata me ra i sevu vua na Kalou kei na Lami,” o Jisu Karisito. (Vakatakila 14:​1-4, VV) E digia o Jiova na imatai ni luvena vakayalo mai lomalagi me uto se tiki bibi sara ga ni kawa a yalataki mai Iteni, ia na cava e digia kina e so mai vuravura mera lai veiliutaki vata kei Karisito? E kaya na yapositolo o Paula ni iwiliwili lailai oqo e kacivi ‘me vaka sa nakita [na Kalou o Jiova],’ “me vaka na nona lewa vakayalovinaka.”​​—Roma 8:​17, 28-​30; Efeso 1:​5, 11; 2 Timoci 1:9.

¹⁶ Na inaki i Jiova me vakalagilagia na yacana tabu, me vakadinadinataka tale ga na dodonu ni nona veiliutaki. Ena nona raiyawa kei na nona dau tuva vakamaqosa na ka, e tala mai kina e vuravura na Luvena ulumatua. E mai vakatovolei sara ga e vuravura na Luvena oqo me yacova nona mate. Kena ikuri, e lewa o Jiova mera okati ena Matanitu Vakamesaia i Luvena e so tale era tutaka na nona veiliutaki cecere me yacova nodra mate.​​—Efeso 1:​8-​12; Vakatakila 2:​10, 11.

17. Na cava eda marau kina ni o Karisito kei ira era na veiliutaki vata kei koya era a bula tu vakatamata ena dua na gauna?

¹⁷ E vakaraitaka o Jiova na levu ni nona lomani ira na kawa i Atama ena nona talai Luvena me mai bula e vuravura kei na nona digia e so na tamata mera lai veiliutaki vata kei Luvena ena Matanitu vakalomalagi. Ena yaga vakacava oqo vei ira era a yalodina tu ga vei Jiova me tekivu mai vei Epeli? E vesuki tu na tamata ena ivalavala ca kei na mate ena gauna e sucu mai kina, o koya gona ena gadrevi me sereki vakayago, vakayalo tale ga me salavata kei na inaki taumada ni Kalou vua na kawatamata. (Roma 5:​12) Ena veivakacegui gona vei ira kece era vakanuinui mera bula tawamudu e vuravura mera kila ni nodra Tui ena lomani ira, ena kauaitaki ira tale ga me vaka ga na nona dau kauaitaki ira nona tisaipeli ena gauna e mai cakacaka vakaitalatala voli kina e vuravura! (Maciu 11:​28, 29; Iperiu 2:​17, 18; 4:​15; 7:​25, 26) Qai wacava na nodra marau ena nodra kila ni o ira era digitaki mera tui ra qai bete vata kei Karisito mai lomalagi era a turaga, ra marama ivakaraitaki ena vakabauta. Kena ikuri, era a sotava tale ga na veika dredre kei na malumalumu vakatamata me vakataki keda ga, nira se bula e vuravura!​​—Roma 7:​21-​25.

iNaki Dei i Jiova

18, 19. Na cava e sa qai matata kina vei keda na vosa i Paula e volai ena Efeso 1:​8-​11, ia na cava eda na dikeva ena ulutaga e tarava?

¹⁸ Eda sa qai kila vinaka oqo na ibalebale ni vosa i Paula vei ira na lotu Vakarisito lumuti e volai ena Efeso 1:​8-​11. E kaya o koya ni sa vakatakila vei ira o Jiova “na nona lewa ka vuni tu,” nira ‘sa caka mera vakaivotavota vata’ kei Karisito, vaka kina ‘nira sa lesi e liu me vaka sa nakita o koya sa cakava na ka kece ga me vaka na nona lewa.’ Eda dikeva ni oqo e salavata vinaka sara ga kei na ‘ituvatuva maqosa’ e vakarautaka o Jiova me vakayacori kina nona inaki. Oqo tale ga e vakarawarawataka na noda kila na vuna era vakayagataka ga kina na madrai kei na waini e vica wale na lotu Vakarisito ena iVakayakavi ni Turaga.

¹⁹ Eda na raica ena ulutaga e tarava se tara vakacava na nodra bula na lotu Vakarisito e nodra inuinui na bula vakalomalagi na iVakananumi ni mate i Karisito. Eda na raica tale ga na vuna e dodonu mera kauai kina ena iVakananumi na vica na milioni e veiyasa i vuravura e nodra inuinui mera bula tawamudu ena dela i vuravura.

[iVakamacala e ra]

O se Nanuma?

• Na cava e bulia kina na vuravura o Jiova qai vakatikora kina na tamata?

• Na cava e mai vakatovolei kina e vuravura na Luve ni Kalou e duabau ga e vakatuburi?

• Na cava e digia kina o Jiova e so mai vuravura mera lai veiliutaki kei Karisito?