Soqoni Vata Mai na Veika Mai Lomalagi Kei na Veika e Vuravura

“Sa vakatakila vei keda na nona lewa . . . me soqona vata na ka kecega vei Karisito, na veika mai lomalagi, kei na veika e vuravura.”​​—EFESO 1:​9, 10.

1. Na cava sa “lewa” o Jiova me baleti lomalagi kei vuravura?

VAKACEGU E LOMALAGI KEI VURAVURA! Oqo na inaki lagilagi i Jiova, “na Kalou ni veivakacegui.” (Iperiu 13:20) E uqeti Paula na yapositolo me vola na Nona “lewa” me “soqona vata na ka kecega vei Karisito, na veika mai lomalagi, kei na veika e vuravura.” (Efeso 1:​9, 10) Na cava sara mada e ibalebale ni vosa “soqona vata” ena tikinivolatabu oqo? E kaya na dauvakadidike ni iVolatabu o J. B. Lightfoot: “Na vosa oqori e vakaibalebaletaka na kena vakaduavatataki na lomalagi kei na vuravura, sa na sega kina na vulagi qai sega kina na veisei baleta ni sa na vakaduavatataki na ka kece ga vei Karisito. Sa na oti tale ga na ivalavala ca, rarawa, kei na mate.”

“Veika Mai Lomalagi”

2. O cei o ira “na veika mai lomalagi” e gadrevi mera soqoni mai?

² E vakaraitaka na yapositolo o Pita na nodra inuinui totoka na lotu Vakarisito dina ena nona vola: “Me vaka na nona vosa ni yalayala, eda sa waraka na lomalagi vou kei na vuravura vou, sa tiko kina nai valavala dodonu.” (2 Pita 3:​13) Na “lomalagi vou” e vakatakarakarataka e dua na veiliutaki vou, oya na Matanitu i koya na Mesaia. “Na veika mai lomalagi” e cavuta o Paula ena nona ivola vei ira mai Efeso era na soqoni mai “vei Karisito.” Oqo e dua na iwiliwili lailai era digitaki mera veiliutaki kei Karisito mai lomalagi. (1 Pita 1:​3, 4) O ira na le 144,000 na lotu Vakarisito lumuti oqo era “voli oti mai vuravura,” io era “voli mai vei ira na tamata,” mera lai veiliutaki vata kei Karisito ena nona Matanitu vakalomalagi.​​—Vakatakila 5:​9, 10; 14:​3, 4, VV; 2 Korinica 1:​21; Efeso 1:​11; 3:6.

3. E rawa ni kainaki vakacava nira sa ‘vakatikori ena veiyasana vakalomalagi’ o ira na lumuti ena gauna mada ga era se tiko kina e vuravura?

³ O ira na lotu Vakarisito lumuti oqo era sucu tale ena kaukaua ni yalo tabu mera luvena vakayalo o Jiova. (Joni 1:​12, 13; 3:​5-7) Ni vakatokai ira o Jiova me “luvena,” era sa yaco mera taci Jisu. (Roma 8:​15; Efeso 1:5) Oya na vuna e kainaki kina ni vaka era sa ‘vakaturi qai vakatikori vata kei Karisito Jisu ena veiyasana vakalomalagi’ ena gauna mada ga era se tiko kina e vuravura. (Efeso 1:3; 2:6) Era sa tu ena itutu cecere vakayalo oqo baleta nira sa dregati ena ‘yalo tabu me ivakadei taumada ni nodra ivotavota’ sa maroroi tu mai lomalagi. (Efeso 1:​13, 14, VV; Kolosa 1:​5, VV) O ira gona oqo “na veika mai lomalagi” sa lesia o Jiova na kedra iwiliwili e dodonu mera soqoni mai.

Ra Tekivu Soqoni Mai

4. E tekivu vakacava, qai tekivu ena gauna cava na nodra soqoni “na veika mai lomalagi?”

⁴ Me salavata kei na “lewa” i Jiova, se na ivakarau ni nona cakacaka, era tekivu soqoni mai ‘na veika mai lomalagi’ ena “gauna sa lokuci.” (Efeso 1:​10) E tekivu na gauna e lokuci oqori ena Penitiko 33 S.K. Ena siga oya e sovaraki kina na yalo tabu vei iratou na yapositolo kei na dua na ilala tisaipeli tagane kei na yalewa. (Cakacaka 1:​13-​15; 2:​1-4) Oqo e ivakadei ni kena sa tekivutaki na veiyalayalati vou, sa tauyavutaki tale ga kina na ivavakoso vakarisito kei na matanitu vou era lewena na Isireli vakayalo, “na Isireli ni Kalou.”​​—Kalatia 6:​16; Iperiu 9:​15; 12:​23, 24.

5. Na cava e tauyavutaka kina o Jiova e dua na “matanitu” vou me sosomitaki Isireli vakayago?

⁵ Na veiyalayalati ni Lawa a soli vei ira na Isireli vakayago e sega ni vakarautaka rawa e dua na ‘matanitu bete kei na vanua tabu’ me lai veiqaravi me tawamudu i lomalagi. (Lako Yani 19:​5, 6) A tukuna o Jisu vei ira na iliuliu ni lotu Vakajiu: “Ena kau tani vei kemudou na matanitu ni Kalou, me soli vei ira na lewe-ni-vanua era na vuataka mai na vuana.” (Maciu 21:43) Era lewe ni matanitu oya, na Isireli vakayalo, o ira na lotu Vakarisito lumuti e caka vei ira na veiyalayalati vou. E vola vei ira na yapositolo o Pita: “Koi kemudou nai tabatamata digitaki, a matabete vakaturaga, a matanitu yalosavasava, a tamata sa taukena na Kalou, mo dou vakaraitaka kina na nona vinaka sara o koya ka kacivi kemudou mai na butobuto ki nona rarama e veivakurabuitaki: oi kemudou ka sega ni tamata taukeni eliu, ia dou sa qai tamata ni Kalou.” (1 Pita 2:​9, 10) Era sa sega ni tamata i Jiova o ira na Isireli vakayago. (Iperiu 8:​7-​13) Me vaka e parofisaitaka o Jisu, na dodonu a soli taumada vei ira mera lewe ni Matanitu i koya na Mesaia sa kau laivi qai soli vei ira na le 144,000 na Isireli vakayalo.​​—Vakatakila 7:​4-8.

Vakacurumi ina Veiyalayalati me Baleta na Matanitu

6, 7. Na veiyalayalati uasivi cava e cakava o Jisu kei ira na tacina era vakasucumi ena yalo tabu, na cava e kena ibalebale oqo vei ira?

⁶ E tukuna o Jisu vei ira na nona yapositolo yalodina ena bogi a tauyavutaka kina na iVakananumi ni nona mate: “Oi kemudou ga, dou sa dautiko vata kei au e na noqu vosota na dauveivakatovolei. Ia ka’u sa solia vei kemudou e dua na matanitu me vaka sa solia mai vei au ko Tamaqu; mo dou kana ka gunu e na noqu tepeli e na noqu matanitu, ka tiko talega e nai tikotiko vakaturaga, me lewai ira na mataqali nei Isireli e tinikarua.” (Luke 22:​28-​30) E tukuna tiko o Jisu e dua na veiyalayalati uasivi e cakava kei ira na le 144,000 na tacina era vakasucumi ena yalo tabu mera ‘gumatua tiko me yacova na mate.’​​—Vakatakila 2:​10; 3:21.

⁷ O ira kece na lewe lailai oqo era sa vakuai ira ena bula tawamudu ena vuravura oqo me vaka na tamata era vakalewe ra qai vakadra. Era na lai veiliutaki vata kei Karisito mai lomalagi ena itikotiko vakaturaga mera lewai ira na kawatamata. (Vakatakila 20:​4, 6) Meda raica mada e so tale na tikinivolatabu e baleti ira ga na lumuti e vakaraitaka tale ga na vuna ena sega kina ni rawa vei ira na ‘so tani tale na sipi’ mera vakayagataka na madrai kei na waini ena gauna ni iVakananumi.​​—Joni 10:16.

8. Na cava era bolea na lumuti nira kania na madrai? (Raica na kato ena tabana e 23.)

⁸ Era na sotava na lumuti na rarawa e vosota na Karisito ra qai tu vakarau mera vakataki koya ena nona mate. Ni a dua vei ira na ilawalawa oqori, e tukuna o Paula ni bolea na veika kece ga me rawa kina ni ‘nona na Karisito me kilai koya kina kei na kaukaua ni nona tucake tale mai na mate qai vakaivotavota ena nona rarawa.’ Io, e tu vakarau o Paula me “vakataki koya e na nona mate.” (Filipai 3:​8, 10, VV) E levu vei ira na lotu Vakarisito lumuti era sa vosota tale ga ena nodra bula “na bula e sotava o Jisu e vakavuna nona mate.”​​—2 Korinica 4:​10, NW.

9. Na yago cava e vakatakarakarataki ena madrai ena gauna ni iVakananumi?

⁹ Ni tauyavutaka na iVakayakavi ni Turaga, a kaya o Jisu: “Oqo na yagoqu.” (Marika 14:22) E vakaibalebaletaka tiko na yagona vakayago e vakarau mokulaki me tauvi dra. E vakatakarakarataka vinaka na yago oya na madrai e sega ni vakaleveni. Baleta e vakaraitaka na iVolatabu ni rawa ni vakatakarakarataka na leveni na ivalavala ca se ivakarau ca. (Maciu 16:​4, 11, 12; 1 Korinica 5:​6-8) O Jisu e tamata uasivi, e sega ni tauvi ivalavala ca na yagona. E cabora na yagona e sega ni ivalavala ca oya me keda ivoli. (Iperiu 7:​26; 1 Joni 2:2) Oqo ena yaga vei ira na lotu Vakarisito yalodina kece, se e nodra inuinui na bula i lomalagi se bula tawamudu ena parataisi e vuravura.​​— Joni 6:​51.

10. Ena sala cava e rawa kina vei ira na vakayagataka na waini ena gauna ni iVakananumi me ‘nodra vata na dra i Karisito’?

¹⁰ E vola o Paula me baleta na waini era vakayagataka na lotu Vakarisito lumuti ena gauna ni iVakananumi: “A bilo ni vakavinavinaka keitou sa vatonaka, sa sega li ni ka sa noda vata kina na dra i Karisito?” (1 Korinica 10:16) Ena sala cava e rawa kina vei ira na vakayagataka na waini me ‘nodra vata na dra i Karisito’? Era sega ni vakaitavi ena kena soli na ivoli baleta ni gadrevi mada ga mera sereki o ira. Ena vuku ni nodra vakabauta na dra i Karisito e veisereki, sa vosoti kina na nodra ivalavala ca me rawa kina nira vakadonui mera lai bula i lomalagi. (Roma 5:​8, 9; Taito 3:​4-7) Ena vuku ni dra i Karisito e liviraki, e rawa kina vei ira na le 144,000 era na lai veiliutaki vata kei Karisito mera “vakasavasavataki,” ra wasei tani, qai bokoci nodra ivalavala ca, me rawa kina nira vakatokai mera “yalosavasava.” (Iperiu 10:29; Taniela 7:​18, 27; Efeso 2:​19) Io, ena nona vakadavea na nona dra a rawa kina vei Karisito me ‘volia na tamata mera nona na Kalou mai na veiyavusa, na duivosavosa, kei na veimatanitu, qai qisi ira mera lewe ni dua na matanitu vakabete mera qarava na nodra Kalou, ka ra na veiliutaki e vuravura.’​​—Vakatakila 5:​9, 10, VV.

11. Na cava era vakaraitaka na lumuti nira gunuva na waini ena gauna ni iVakananumi?

¹¹ Ni tauyavutaka na iVakananumi ni nona mate, a solia na bilo waini vei iratou na nona yapositolo yalodina qai kaya: “Dou gunu kece kina; oqo na noqu dra ni veiyalayalati vou sa liviraki e na vukudra e lewe vuqa, me bokoci nai valavala ca.” (Maciu 26:​27, 28) Me vaka ga na kena vakadeitaki ena dra ni bulumakau kei na dra ni me na veiyalayalati ni Lawa e cakava na Kalou kei na matanitu o Isireli, e vakadeitaki tale ga ena dra i Jisu na veiyalayalati vou e cakava o Jiova kei Isireli vakayalo e tekivutaki ena siga ni Penitiko 33 S.K. (Lako Yani 24:​5-8; Luke 22:20; Iperiu 9:​14, 15) Nira gunuva gona na waini e vakatakarakarataka na “dra ni veiyalayalati,” era sa vakaraitaka tiko na lumuti nira vauci ena veiyalayalati vou ra qai vakila tale ga na kena yaga.

12. Era papitaisotaki vakacava ina mate i Karisito o ira na lumuti?

¹² Era vakadreti tale ga na lumuti ena dua tale na ka. A tukuna o Jisu vei iratou na nona tisaipeli yalodina: ‘Dou na gunu ena bilo au na gunu kina, ka papitaisotaki ena papitaiso au na papitaisotaki kina.’ (Marika 10:​38, 39) E qai tukuna tale ga na yapositolo o Paula nira na “papitaisotaki ki na nona mate” na Karisito o ira na lotu Vakarisito. (Roma 6:3) O ira na lumuti era vakuai ira ena nodra bula. E vaka kina ena nodra mate baleta nira sa vakuai ira ena bula tawamudu e vuravura. Ena qai vakacavari na nodra papitaiso ina nona mate na Karisito nira mate ena yalodina ra qai vakaturi ena yago vakayalo mera “lewa vata” kei Karisito mai lomalagi.​​—2 Timoci 2:​10-​12; Roma 6:5; 1 Korinica 15:​42-​44, 50.

Vakayagataki ni iVakatakarakara

13. Na cava era sega ni vakayagataka kina na madrai kei na waini o ira e nodra inuinui na bula e vuravura, ia na cava era tiko kina ena gauna ni iVakananumi?

¹³ Ni okati na veika kece oqori ena kena vakayagataki na madrai kei na waini ena gauna ni iVakananumi, ena sega kina ni dodonu vei ira e nodra inuinui na bula e vuravura mera vakayagataka na ivakatakarakara oqori. Era kila o ira e nodra inuinui na bula e vuravura nira sega ni lumuti mera lewe ni yago i Karisito, era sega ni okati tale ga ena veiyalayalati e caka vei ira na lai lewa se veiliutaki kei Jisu Karisito. Ni vakatakarakarataka na veiyalayalati vou “na bilo,” era na vakayagataka ga na ivakatakarakara oqo o ira e caka vei ira na veiyalayalati vou. O ira na namaka tiko na bula tawamudu e vuravura era sega ni papitaisotaki ina mate i Jisu se ra kacivi mera lai veiliutaki kei koya mai lomalagi. Kevaka era na vakayagataka na ivakatakarakara, ena sega ni vakaibalebale vei ira. Era na sega gona ni vakayagataka na ivakatakarakara dina ga nira tiko ena gauna ni iVakananumi mera vakaraitaka kina na nodra doka na kena soqo. Era vakavinavinakataka tale ga na veika e cakava o Jiova me baleti ira ena nona vakayagataka na Luvena, okati kina na nodra vosoti e yavutaki ena dra i Karisito.

14. Era vakaukauataki vakayalo vakacava na lumuti nira vakayagataka na madrai kei na waini?

¹⁴ Sa qai voleka ni cava na nodra vakatakilakilataki vakaoti na vovo ni lotu Vakarisito era digitaki mera lai veiliutaki vata kei Karisito e lomalagi. Me yacova na gauna era vakacavara kina na nodra bula ni vakuai ira e vuravura, era na vakaukauataki tiko ga na lumuti ena nodra vakayagataka tiko na madrai kei na waini ena gauna ni iVakananumi. Era vakila kina na isema ni duavata kei ira na tacidra kei na ganedra era lewe ni yago i Karisito. E vukei ira mera nanuma tiko mera yalodina me yacova nira mate na nodra vakayagataka tiko na madrai kei na waini ivakatakarakara.​​—2 Pita 1:​10, 11.

Soqoni na “Veika e Vuravura”

15. O cei era sa soqoni tiko mai mera lako vata kei ira na lotu Vakarisito lumuti?

¹⁵ Me tekivu mai na loma ni veiyabaki ni 1930, era sa mai lako vata tiko kei ira na lumuti o ira na ‘so tani tale na sipi’ e tubucake tiko ga na kedra iwiliwili, e nodra inuinui na bula tawamudu e vuravura, ra qai sega tale ga ni okati mera “qele-ni-sipi lailai.” (Joni 10:16; Luke 12:32; Sakaraia 8:​23) Era sa mai veitokani kei ira na taci Karisito ena nodra veivuke tiko ena kena vunautaki ‘na itukutuku vinaka ni matanitu’ me ivakadinadina ina veivanua kece ga. (Maciu 24:14; 25:​40, VV) Oqo ena vakarawarawataka me vakadonui ira o Karisito mera nona “sipi,” ena vakatikori ira ena “ligana i matau” ena gauna ena lewai ira kina na veimatanitu. (Maciu 25:​33-​36, 46) Nira vakabauta na dra i Karisito, era na okati mera “[i]soqosoqo levu” era na vakabulai ena “veivakararawataki levu.”​​—Vakatakila 7:​9-​14.

16. O cei era okati mera “veika e vuravura,” ena rawa vakacava mera qai vakatokai mera “luve ni Kalou”?

¹⁶ Nira sa vakatakilakilataki vakaoti na lewe 144,000, sa na qai sereki na “cagi” ni veivakarusai ena vakarusa na vuravura se ituvaki ca i Setani e tiko ena gauna oqo. (Vakatakila 7:​1-4) Ena gauna ni veiliutaki i Karisito kei ira na nona ivukevuke era tui ra bete tale ga ena duanaudolu na yabaki ni veiliutaki vakatui, era na mai tomani ira na isoqosoqo levu e dua na iwiliwili vakaitamera era na vakaturi mai na mate. (Vakatakila 20:​12, 13) Ena soli vei ira oqori na galala mera digia se era vinakata mera lewenivanua tudei nei koya na Tui e Mesaia o Karisito Jisu se sega. Ni sa cava na duanaudolu na yabaki ni veiliutaki, era na qai vakatovolei ena iotioti ni gauna o ira kece na “veika e vuravura.” O ira ga era yalodina era na qai vakatokai mera “luve ni Kalou” e vuravura.​​—Efeso 1:​10; Roma 8:​21; Vakatakila 20:​7, 8.

17. Ena qai vakayacori vakacava na inaki i Jiova?

¹⁷ O koya gona, me salavata kei na nona “lewa” vuku, se na ivakarau ni nona cakacaka, ena vakayacora o Jiova na nona inaki “me soqona vata na ka kecega vei Karisito, na veika mai lomalagi, kei na veika e vuravura.” O ira kece na ibulibuli vuku mai lomalagi kei vuravura era sa na soqoni vata mai mera veisaututaki ra qai vakarorogo ena marau ina veiliutaki ni Kalou vakainaki, o Jiova.

18. Ena yaga vakacava vei ira na lumuti kei ira na nodra itokani na nodra tiko ena soqo ni iVakananumi?

¹⁸ Sa na bau vakaukauataki dina na nodra vakabauta na iwiliwili lailai era lumuti kei ira na nodra itokani so tani tale na sipi era vica na milioni na nodra na soqo vata ena 12 Epereli, 2006! Oqo mera vakananuma kina na mate i Karisito, me vaka e vakarota o Jisu: “Dou cakava oqo mo dou vakananumi au kina.” (Luke 22:19) Mera nanuma o ira na tiko ena soqo oqori na veika e cakava ena vukudra o Jiova ena nona vakayagataki Luvena lomani o Karisito Jisu.

Railesuvi

• Na cava e nakita o Jiova me baleta na veika mai lomalagi kei na veika e vuravura?

• O cei o ira “na veika mai lomalagi,” era soqoni mai vakacava?

• O cei o ira “na veika e vuravura,” na cava e nodra inuinui?

[Kato ena tabana e 23]

“Na Yago i Karisito”

Ni vakamacalataka o Paula ena 1 Korinica 10:​16, 17 e dua na ka e bibi kina na madrai vei ira na taci Karisito era lumuti ena yalo tabu, e duatani na ibalebale ni nona vakayagataka na vosa na “yago.” E kaya: “Ai buli madrai eda sa dovia, sa sega li ni ka sa noda vata kina na yago i Karisito? Ni sa dua bauga na madrai, sa qai yagona e dua bauga koi keda e lewe vuqa, ni sa noda nai votavota ni madrai ko ya e dua bauga.” Nira vakayagataka na lotu Vakarisito lumuti na madrai ena gauna ni iVakananumi, era vakaraitaka kina na nodra duavata kei na nodra ivavakoso na lumuti, e vaka na yago i Karisito, o koya e kena iliuliu.​​—Maciu 23:10; 1 Korinica 12:​12, 13, 18.

[iYaloyalo ena tabana e 23]

Na cava era vakayagataka ga kina na madrai kei na waini o ira na lumuti?

[iYaloyalo ena tabana e 25]

E lewa i Jiova mera vakaduavatataki na veika buli e lomalagi kei vuravura