Taro na Dauwiliwili
E sa kila tu beka o Epeli ni na gadrevi na isoro manumanu me qai vakadonui koya kina na Kalou?
E vakamacalataka ga vakalekaleka na iVolatabu na nodrau vakacaboisoro o Keni kei Epeli. Eda wilika ena Vakatekivu 4:3-5: “Sa oti bogi vica, sa kauta mai ko Keni eso na vuata ni vanua mei madrali vei Jiova. Ko Epeli talega, sa kauta mai eso na ulumatua ni nona sipi, ka so na kedra uro. A sa vakadonui Epeli ko Jiova, kei na nonai madrali: ia ka sa sega ni vakadonui Keni ko koya, se na nonai madrali.”
E sega ni tukuna na iVolatabu, ni se bera ni yaco oya, na mataqali isoro vakacava e kaya o Jiova ni na vakadonuya se na isoro cava me vakacabori vua. Oya gona na vuna erau lewa ga kina o Keni kei Epeli na isoro me rau vakacabora. A sega ni vakadonui me rau tiko ena Parataisi na vanua rau a tiko kina e liu na nodrau itubutubu, rau qai vakila ni sa cakayaco vei rau na ivalavala ca, kei na nodrau sa yawaka tu na Kalou. Erau gadreva vakalevu na veivuke ni Kalou ena vuku ni ivalavala ca kei na ituvaki vakaloloma erau sa mai tu kina. Nodrau lomasoli me rau solia e dua na iloloma vua na Kalou e vakaraitaka na nodrau gadreva na nona veivakadonui.
A qai yaco me vakadonuya na isoro i Epeli na Kalou, sega ni vaka kina na nei Keni. Na cava na vuna? Baleta beka ni o Epeli e vakacabora na isoro e dodonu, e sega o Keni? Eda sega ni vakadeitaka rawa se a vakatau na veivakadonui oya ena nodrau isoro ni a sega ni tukuna na Kalou na isoro cava e vakadonuya. Ia, e kena irairai ni a vinaka ruarua na nodrau isoro. Na Lawa a qai solia ina matanitu o Isireli o Jiova, e sega wale ga ni vakadonuya na isoro manumanu se na tikitiki ni manumanu, e vakadonuya tale ga na sila tavu, ivau sila, madrai droka vinaka, kakana vavi kei na waini. (Vunau ni Soro 6:19-23; 7:11-13; 23:10-13) O koya gona, e tiko tale e dua na vuna e vakadonuya ga kina na Kalou e dua na isoro. E sega ni baleta na ka erau dui vakarautaka o Keni kei Epeli me nodrau isoro.—Vakatauvatana Aisea 1:11; Emosi 5:22.
Ni oti tale e vanaudolu na yabaki, a kaya na yapositolo o Paula: “Ni sa vakabauta sa vakacabora ko Epeli nai soro sa vinaka vua na Kalou ka ca na nei Keni, ka sa rawata kina nai vakadinadina ni sa yalododonu, ni sa vakatakila na Kalou ni sa vinakata na nonai madrali.” (Iperiu 11:4) Io, na nona vakabauta o Epeli e vakadonui koya kina na Kalou. Vakabauta na cava? E vakabauta na vosa ni yalayala i Jiova ni na vakarautaka e dua na Kawa me na ‘butuqaqia na ulu ni gata’ qai vakalesuya mai na bula veisaututaki kei na bula uasivi vua na kawatamata. Ena ivakamacala ni na ‘qaqi na bukubuku ni yava’ ni Kawa, e nanuma beka kina o Epeli ni na gadrevi me vakadavei na dra ena vakacaboisoro. (Vakatekivu 3:15) Ia, e macala ga ni nona vakabauta o Epeli, e yaco kina na nona ‘isoro me vinaka cake ka ca na nei Keni.’
E vaka tale ga kina o Keni, e sega ni vakadonui na nona isoro ni laurai mai na nona ivalavala na lailai ni nona vakabauta, e sega ni baleta na veika e vakacabora. E dusia sara ga vakamatata o Jiova vei Keni: “Kevaka ko sa caka vinaka, ko na sega li ni vinakati?” (Vakatekivu 4:7) E sega ni cati Keni na Kalou ena vuku ni isoro e vakacabora. E baleta ga “ni sa ca na nonai valavala”—oqo e laurai ena nona vuvu, yalo ca qai tini sara ena laba—e sega ni vakadonui koya kina na Kalou.—1 Joni 3:12.