‘E Vosavakatautauvata Tiko Ga’

“Na ka kecega oqo sa tukuna ko Jisu kivei ira na lewe vuqa e na vosa vakatautauvata; a sa sega ni vosa walega vei ira, sa vosavakatautauvata tikoga.”​—MACIU 13:34.

1, 2. (a) Na cava e dredre kina ni dau guilecavi na vosavakatautauvata e laulau? (b) Na mataqali vosavakatautauvata cava e vakayagataka o Jisu? Na taro cava e tarogi me baleta nona vakayagataka na vosavakatautauvata? (Raica tale ga na ivakamacala e ra.)

O SE nanuma tiko e dua na vosavakatautauvata o rogoca ena dua na ivunau ena vica na yabaki sa oti? E dredre me guilecavi na vosavakatautauvata e laulau. E kaya e dua na dauvolaivola ni vosavakatautauvata e “veisautaka na daliga me mata me rawa kina vua e vakarorogo tiko me vakasamataka tiko na iyaloyalo.” Ni rawarawa cake meda kila na ka ni raitayaloyalotaki, ena matata ke vakayagataki na vosavakatautauvata. Na vosavakatautauvata e vakamatatataka na vosa e tauci, e vukea tale ga me kabi dei ina noda vakasama.

² E sega ni bau dua na qasenivuli e vuravura me bau rorovi Jisu Karisito ena nona vakayagataka na vosavakatautauvata. E se nanumi tiko ga na vosavakatautauvata i Jisu a vakayagataka ena voleka ni ruanaudolu na yabaki sa oti.a Na cava e vakayagataka vakalevu kina o Jisu na iwalewale ni veivakavulici oqo? Na cava e laulau kina na nona vosavakatautauvata?

Vu ni Nona Vosavakatautauvata o Jisu

3. (a) Me vaka na Maciu 13:​34, 35, na cava e dua na vu ni nona vosavakatautauvata o Jisu? (b) Na cava e vakaraitaka ni kila o Jiova ni yaga na iwalewale ni veivakavulici oqo?

³ E vakaraitaka na iVolatabu e rua na vuna e vosavakatautauvata kina o Jisu. Kena imatai, me vakayacori kina na parofisai. E vola na yapositolo o Maciu: “Na ka kecega oqo sa tukuna ko Jisu kivei ira na lewe vuqa e na vosa vakatautauvata; a sa sega ni vosa walega vei ira, sa vosavakatautauvata tikoga: o koya oqo sa vakayacori kina na vosa sa tukuna na parofita, ni sa kaya, Au na vosa ga e na vosa vakatautauvata.” (Maciu 13:​34, 35) Na “parofita” e cavuta o Maciu e vola tale ga na Same 78:2. E volavola na daunisame e uqeti ena yalo tabu ni Kalou oqo ni se vo e vica na senitiuri me qai sucu o Jisu. Eda sega li ni qoroya nona sa tukuna tu mai o Jiova ena vica na drau na yabaki sa oti ni na vakayagataka o Luvena na vosavakatautauvata? E kila o Jiova ni yaga na iwalewale ni veivakavulici oqo!

4. E vakamacalataka vakacava o Jisu na vu ni nona vakayagataka na vosavakatautauvata?

⁴ Kena ikarua, e tukuna o Jisu ni vakayagataka na vosavakatautauvata me wasei ira tani na sega ni taleitaka na nona itukutuku. Ni oti nona vakaraitaka vei ira na “lewe vuqa” na vosavakatautauvata e baleta na dau kakaburaki, eratou tarogi koya sara na nona tisaipeli: “Na cava mada ko ni vosa tiko ga kina vei ira e na vosa vakatautauvata?” Sauma o Jisu: “Sa soli vei kemudou ga mo dou kila na veika vuni ni matanitu vakalomalagi, ia e sa sega ga ni soli vei ira. Sa i koya oqo au vosa tiko kina vei ira e na vosa vakatautauvata, me ra rai tu ka sega ni kunea, ka rogo tu ka sega ga ni kila. Sa vakayacori dina vei ira na vosa ni Kalou ka a parofisaitaka ko Aisea ka vaka: ‘Dou na rogoca vakaidina ka lecava tu ga, ka dou na raica vakaidina ka sega ga ni kunea. Ni sa moce na lomadra na tamata oqo.’”​—Maciu 13:​2, 10, 11, 13-​15, VV; Aisea 6:​9, 10.

5. E wasei ira vakacava na yalomalumalumu mai vei ira na dokadoka na vosavakatautauvata nei Jisu?

⁵ E wasei ira tani vakacava na tamata na vosavakatautauvata nei Jisu? So na gauna, era vakasama titobu na vakarorogo mera qai kila na ibalebale ni nona vosa. Era dau vakatataro tale e so na yalomalumalumu. (Maciu 13:36; Marika 4:​34) O koya gona na vosavakatautauvata nei Jisu e vakatakila na ka dina vei ira na gadreva; ia e vunitaka vei ira na dokadoka. E qasenivuli uasivi dina o Jisu! Meda raica mada e so na ka e vakavuna me laulau na vosavakatautauvata nei Jisu.

Digia Vinaka na iVakamacala Matailalai

6-8. (a) Na cava e sega ni tu vei ira na rogoci Jisu ena imatai ni senitiuri? (b) Na cava e kena ivakaraitaki ni nona digitaka vinaka o Jisu na veika matailalai e cavuta?

⁶ O sa bau vakasamataka na dredre era sotava na tisaipeli ena imatai ni senitiuri nira rogoci Jisu ni veivakavulici? Dina nira rogoca sara ga na domo i Jisu, ia era sega ni wilika na veika e tukuna. Era katona voli ga ena nodra vakasama kei na lomadra na nona vosa. E vukei ira gona o Jisu mera katona nona ivakavuvuli ni vakayagataka na vosavakatautauvata. E vukei ira vakacava?

⁷ E digia vinaka na ivakamacala matailalai ni vosavakatautauvata o Jisu. Ena gauna e vinakati kina, e solia na ivakamacala matailalai ni italanoa. Oya na vuna e tukuna sara ga kina ni vo tu e vica na sipi ni lai vaqara na ivakatawanisipi e dua na sipi e yali, na levu ni aua era cakacaka kina ena veiwerenivaini na tamata cakacaka, kei na vica na taledi e soli me cakacakataki.​—Maciu 18:​12-​14; 20:​1-​16; 25:​14-​30.

⁸ Ia, e sega ni dau vakaraitaka o Jisu e so na veika matailalai e sega ni yaga ina kena kilai na ibalebale ni so na vosavakatautauvata. Me kena ivakaraitaki, ena vosavakatautauvata me baleta na bobula sega ni dau loloma, e sega ni vakamacalataka se a dinautaka vakacava na bobula oya e sivia e milioni na dola. E vakabibitaka tiko ga o Jisu na veivosoti. E sega ni ka bibi se a dinau vakacava, ia a vakabibitaka ga na kena vosoti se bokoci na nona dinau kei na ka e cakava vei koya e dinautaka vua e dua ga na ilavo lailai. (Maciu 18:​23-​35,VV) E vaka kina na vosavakatautauvata me baleta na gone cidroi, a sega ni vakamacalataka o Jisu na vu ni nona vinakata vakasauri na nona ivotavota na gonetagane oya kei na vu ni nona vakasabusabutaka. Ia a vakamacalataka vinaka ga na nona ciqomi koya tale o tamana ni sa veivutuni o gone qai via lesu mai vale. Na itukutuku matailalai me baleta na veiciqomi nei tamana e rui bibi ina ka e vakamacalataka tiko o Jisu, oya ni dau veivosoti “vakalevu” o Jiova.​—Aisea 55:​7, NW; Luke 15:​11-​32.

9, 10. (a) Ni vakamacalataki ira e cavuta ena nona vosavakatautauvata, na cava e vakabibitaka o Jisu? (b) E vakarawarawataka vakacava o Jisu me nanumi na nona vosavakatautauvata?

⁹ E qarauna tale ga o Jisu nona vakamacalataki ira e cavuta ena nona vosavakatautauvata. E sega ni vakamacalataka vakamatailalai na kedra irairai, ia e vakabibitaka ga o Jisu na ka era cakava se era vakaitavi vakacava ena italanoa e vakamacalataka. Oya na vuna e sega ni vakamacalataka kina na kena irairai na kai Samaria dau loloma, ia e vakaraitaka ga o Jisu na ka e bibi cake, oya na nona veikauaitaki na kai Samaria ni vukea na Jiu e davo no e gaunisala. E vakaraitaka ga o Jisu na veika e vinakati me vukea nona vakavuvulitaka ni dodonu meda lomani ira tale ga eda sega ni matatamata vata.​—Luke 10:​29, 33-​37.

¹⁰ E lekaleka qai matata na vosavakatautauvata nei Jisu baleta ni digia vinaka na ka e vakamacalataka. Oya na vuna era nanuma vinaka kina na veika e vakavuvulitaka o ira na rogoci koya ena imatai ni senitiuri kei keda tale ga na wilika na Kosipeli.

Vakayagataka na Ka e Laurai e Veisiga

11. Cavuta e so na vosavakatautauvata i Jisu e vakaraitaka na veika e raica ni tubucake tiko e Kalili.

¹¹ E kenadau o Jisu ena vakayagataki ni veika e laurai e veisiga ena vosavakatautauvata. E levu nona vosavakatautauvata e tauri mai ena ka e raica ni tubucake tiko e Kalili. Vakasamataka mada nona bula ni se gone. E dau raici tinana wasoma ni buli madrai ni vakayagataka na valawa vakaleveni sa bali oti a vo tu me ivakatubu. (Maciu 13:33) E dau raici ira wasoma na gonedau nira balata nodra lawa ena wai karakarawa ni Wasawasa o Kalili. (Maciu 13:47) E dau raici ira wasoma na gone nira veiqitori toka ena makete. (Maciu 11:​16, VV) E kauaitaka tale ga o Jisu na veika e laurai vakalevu a vakayagataka ena nona vosavakatautauvata me vaka na kaburaki ni itei, marautaki ni soqo ni vakamau, kei na matua ni veiwere sila.​—Maciu 13:​3-8; 25:​1-​12; Marika 4:​26-​29.

12, 13. E vakaraitaka vakacava nona vakayagataka na vosavakatautauvata me baleta na witi kei na kau ca ni kila vinaka o Jisu na ituvaki ni vanua oya?

¹² Sa rauta me laurai ena vosavakatautauvata nei Jisu e levu na ituvaki se veika e yaco sara tu ga e veisiga. Meda kila vinaka na vu ni nona vakayagataka na iwalewale ni veivakavulici oqo, ena vukei keda nida raica se cava e kena ibalebale vei ira na Jiu era rogoca na nona vosa. Meda raica mada e rua na kena ivakaraitaki.

¹³ Kena imatai, na vosavakatautauvata me baleta na witi kei na kau ca. A vakaraitaka o Jisu ni dua na tamata e tea na witi ena nona iteitei ia e qai mai tea na “nona meca” ena iteitei oya na kau ca. Na cava beka e digitaka kina o Jisu na cakacaka ca oya? E tukuna na vosavakatautauvata oqo ena dua na vanua e volekata na Wasawasa o Kalili, e levu ga vei ira na kai Kalili era dauteitei. Ena sega beka ni ca vua e dua na dauteitei nona lako lo mai nona meca me tea na kau ca ena nona iteitei? E vakaraitaka na lawa ni gauna oya ni dau yaco na vakacaca vaka oya. E vakayagataka gona o Jisu e dua na ituvaki era kila vinaka na vakarogoci koya tiko.​—Maciu 13:​1, 2, 24-​30, VV.

14. Ena vosavakatautauvata me baleta na kai Samaria dau loloma, na cava e vakayagataka kina o Jisu na gaunisala “mai Jerusalemi ki Jeriko” me vakamatatataka na ka e tukuna?

¹⁴ Kena ikarua, vakasamataka na vosavakatautauvata e baleta na kai Samaria dau loloma. E kaya o Jisu: “E a lako sobu e dua na tamata mai Jerusalemi ki Jeriko, ka ra mani vesuki koya vakasauri na daubutako; era a qai luvata na nona i sulu, ka mokuta, ka lako tani ka biuti koya tu, ni sa voleka tu ni mate.” (Luke 10:​30, VV) E nakita nona cavuta na gaunisala “mai Jerusalemi ki Jeriko,” me matata kina na ka e tukuna. A tiko e Jutia, na koro e volekati Jerusalemi ena gauna e tukuna kina na vosavakatautauvata oya. Era kila vinaka na rogoci Jisu na gaunisala oya. E gaunisala vakarerevaki dina ni lakovi duadua. E veiveveyaki qai so na vanua e lala e dau nodra ivunivuni vinaka na daubutako.

15. Na cava e sega ni rawa ni vakadonui kina na ka erau cakava na bete kei na Livai ena vosavakatautauvata me baleta na kai Samaria dau loloma?

¹⁵ E talei tale ga nona cavuta o Jisu na gaunisala e ‘lako sobu mai Jerusalemi ki Jeriko.’ E vakaraitaka na vosavakatautauvata ni a liu e dua na bete qai muri yani e dua na Livai, ia erau sega ni bau vukei koya e vakaleqai. (Luke 10:​31, 32) Era dau veiqaravi ena valenisoro e Jerusalemi na bete, o ira na Livai era dau vukei ira. Nira sega ni dau vakaitavi e valenisoro, e levu na bete kei na Livai era vakaitikotiko e Jeriko, ni 23 ga na kilomita na kedrau veiyawaki o Jeriko kei Jerusalemi. Era dau vakayagataka vakalevu na gaunisala oya. Dikeva tale ga ni o rau na bete kei na Livai oqo erau lako tiko “mai Jerusalemi,” se erau sa biuta na valenisoro. (Neitou na matanivola kala.)b E sega ni rawa me vakadonui na ka erau cakava ena noda rairai kaya beka, ‘Erau sega ni vukea na turaga e mavoa oya baleta ni vaka e sa mate, kevaka erau tara na yago mate ena sega ni rawa me rau vakaitavi ena valenisoro ena loma ni dua na gauna.’ (Vunau ni Soro 21:1; Tiko Voli mai na Lekutu 19:​11, 16) E matata vinaka vei ira na rogoci Jisu na nona vosavakatautauvata.

Vakayagataka na Veika e Buli

16. Na cava e sega ni kurabuitaki kina na nona kila vinaka o Jisu na veika e buli?

¹⁶ E levu na vosavakatautauvata nei Jisu e vakaraitaka ni kila vinaka na kau, na manumanu, kei na draki. (Maciu 6:​26, 28-​30; 16:​2, 3) E kila vakacava na veika oya? E raica na veika e bulia o Jiova ena gauna e tubucake tiko kina mai Kalili. O Jisu e “vakatuburi eliu ka qai muri na ka kecega ka caka,” a vakayagataki koya tale ga o Jiova me nona “matai daucakacaka.” (Kolosa 1:​15, 16; Vosa Vakaibalebale 8:​30, 31) Sa rauta me kila vinaka o Jisu na veika e buli. Raica mada na nona vakayagataka vinaka na kila oqo ena nona veivakavulici.

17, 18. (a) E vakaraitaka vakacava na vosa i Jisu ena Joni wase 10 ni kilai ira vinaka na sipi? (b) Na cava era vakila na gade ina so na vanua e cavuti ena iVolatabu me baleta nodra veivolekati na sipi kei na kedra ivakatawa?

¹⁷ E dua na vosa vakatautauvata vinaka ni veikauaitaki e laurai ena Joni wase 10, ni vakatauvatana kina na nona veivolekati kei ira na nona imuri ina nodrau veivolekati na ivakatawanisipi kei na nona sipi. E laurai ena vosa i Jisu ni kilai ira vinaka na sipi o koya. E tukuna nira dau muria vinaka na ivakatawa na sipi. (Joni 10:​2-4) Era vakila na gade ina so na vanua e cavuti ena iVolatabu na nodra veivolekati na ivakatawanisipi kei ira na sipi. Kaya na dauvakadidike ni ika19 ni senitiuri o H. B. Tristram: “Au raica nira veiqitori toka na ivakatawanisipi kei na nona qelenisipi. Ni cici o koya; era cicimuri koya na sipi. . . . Era sosovi koya ra qai ladelade nira yavokiti koya.”

¹⁸ Na cava era muria kina na kedra ivakatawa na sipi? “Ni ra sa kila na domona,” e kaya o Jisu. (Joni 10:4) Era kila dina beka na irorogo ni domona na ivakatawanisipi? Ni oti nona vakasaravi ira, e vola o George A. Smith ena nona ivola The Historical Geography of the Holy Land: “So na gauna keitou lai vakacegu volekata e so na toevu e Jutia, na vanua eratou kauti ira tale ga mai kina nodratou qelenisipi e tolu se va na ivakatawanisipi. Era veicurumaki na qelenisipi. Keitou vaqaqa se eratou na wasei ira vakacava na nodratou qelenisipi na ivakatawa. Ia ni oti nodra gunu kei na nodra veiqitori na sipi, ratou sa dui gole sara na ivakatawa. Ni ratou dui vakayagataka na ikacivi ni nodratou sipi, era sa tawase sara na sipi mera muria galugalu na kedra ivakatawa, me vaka ga na ivalavala ni nodra tadu mai.” Oqo e dua na vosavakatautauvata veiganiti e vakayagataka o Jisu me vakamatatataka kina na ka e tukuna tiko. Kevaka eda vakabauta da qai muria na nona ivakavuvuli da qai muri koya, ena karoni keda ena nona loloma “nai vakatawa vinaka.”​—Joni 10:11.

Vakayagataka na Veika Era Kila na Rogoci Koya

19. E vakayagataka vakacava o Jisu e dua na leqa ena nona gauna me vakacala kina e dua na nanuma cala?

¹⁹ Na vosavakatautauvata yaga e okati kina na veika e yaco e rawa nida vuli kina. Dua na gauna a vakayagataka o Jisu e dua na ka e se qai yaco ga me vakalasuya kina na nanuma cala ni veiganiti na ka e yacovi ira e so. E kaya: “Se ko ni nanuma beka ni ko ira na lewe tinikawalu ka a lutuki ira na doka ni vale cecere mai Sailoama ka vakamatei ira, era tamata ca cake sara mai vei ira kece na tani ka ra tiko e Jerusalemi e na gauna ko ya?” (Luke 13:​4, VV) E vakacala o Jisu na nanuma cala ni kena sa lewai oti tu na veika e yacovi keda. Era sega ni leqa na le18 oya baleta ni cudruvi ira na Kalou ena vuku ni nodra ivalavala ca. Sega, era sotava na mate vakaloloma oya ena vuku ni gauna kei na ka e sega ni namaki. (Dauvunau 9:​11, NW) E vakacala o Jisu e dua na ivakavuvuli lasu ni vakayagataka e dua na ka era kila vinaka na vakarogoci koya tiko.

20, 21. (a) Na cava era vakacalai ira kina na tisaipeli i Jisu na Farisi? (b) Na ivakaraitaki vakaivolatabu cava e vakayagataka o Jisu me vakaraitaka ni sega ni nakita o Jiova me vakatabui vakasivia na lawa ni Siga ni Vakacecegu? (c) Na cava ena vakamacalataki ena ulutaga e tarava?

²⁰ E vakayagataka tale ga o Jisu na ivakaraitaki ena iVolatabu ena nona veivakavulici. Vakasamataka na gauna era vakacalai ira kina nona tisaipeli na Farisi baleta nira doloka na sila ra qai kania ena Siga ni Vakacecegu. Eratou sega ni beca na Lawa ni Kalou na tisaipeli, eratou beca ga na nodra ivakavuvuli na Farisi me baleta na ka era kaya e vakatabui ena Siga ni Vakacecegu. Me vakaraitaka ni a sega ni nakita na Kalou me vakatabui vakasivia vaka oya na lawa ni Siga ni Vakacecegu, e qai dusia o Jisu na ka e vakamacalataki ena 1 Samuela 21:​3-6. Nira viakana o Tevita kei na nona tamata era kania na madrai tabu sa sega ni vakayagataki ena valenisoro. Era dau kania ga na madrai oya na bete. Nira sotava na ituvaki oya, era sega ni totogitaki o Tevita kei na nona tamata nira kania na madrai. Oya tale ga na itukutuku duadua ena iVolatabu e vakaraitaka nira kania o ira na sega ni bete na madrai sa sega ni vakayagataki. E lewa vinaka o Jisu na ivakaraitaki me vakayagataka ni sega ni vakabekataki nira kila vinaka na Jiu era rogoci koya tiko.​—Maciu 12:​1-8.

²¹ E Qasenivuli Levu dina o Jisu! Eda qoroya na nona vakamacalataka na veika dina bibi vei ira na vakarogoci koya. Eda na vakatotomuria vakacava na nona veivakavulici? Ena vakamacalataki oqori ena ulutaga e tarava.

[iVakamacala e ra]

O se Nanuma?

• Na cava e vakayagataka kina na vosavakatautauvata o Jisu ni veivakavulici?

• Na cava na ivakaraitaki ni nona vakayagataka o Jisu na vosavakatautauvata era kila na rogoci koya ena imatai ni senitiuri?

• E vakayagataka vakacava o Jisu na nona kila na veika e buli ena nona vosavakatautauvata?

• E vakayagataka vakacava o Jisu na veika era kila na rogoci koya?

[iYaloyalo ena tabana e 15]

E vakamacalataki rau o Jisu na bobula e sega ni vosota na dinau lailai sara kei na tama e vosoti luvena dina ga ni vakasabusabutaka na nona ivotavota kece

[iYaloyalo ena tabana e 16]

Na cava e vakamacalataka o Jisu ena nona vosavakatautauvata me baleta na kai Samaria dau loloma?

[iYaloyalo ena tabana e 17]

Era kila dina beka na sipi na irorogo ni domodra na kedra ivakatawa?