Sala me Bucini Kina na Loloma Dina

“Na loloma e wai ni bula; na loloma na bula.”​—Living to Purpose, e vola o Joseph Johnson, 1871.

E RAWA vakacava vua na tamata me vulica na loloma? Me vulica na ivakarau ni bula ni tamata? Me wilika beka na ivola idusidusi era sa tabaki tu? Me sarava na iyaloyalo ni veidomoni? Sega. Era vulica taumada na tamata na loloma mai na ivakaraitaki kei na veituberi ni nodra itubutubu. Era na vulica na gone na ibalebale ni loloma ke ra susugi ena vanua era kauaitaki kina, era raica ni vakani ira qai taqomaki ira na nodra itubutubu, veitalanoa kei ira, qai kauaitaki ira dina. Era vulica tale ga na loloma ni vakavulici ira o nodra itubutubu mera muria na ivakavuvuli dodonu me baleta na ka vinaka kei na ka ca.

E titobu na loloma dina. E dau cakava na ka vinaka vei ira tale na so kevaka mada ga era sega ni marautaka ena gauna oya, vakabibi oqo vei ira na gone ena gauna era dau vakavulici kina. E dua e ivakaraitaki vinaka ni loloma dina na Dauveibuli. E vola na yapositolo o Paula: “Na luvequ, mo kakua ni beca ni sa cudruvi iko ko Jiova, se yalowai ni sa vunauci iko ko koya: O koya sa lomana ko Jiova, sa cudruva.”​—Iperiu 12:​5, 6.

Ra itubutubu, e rawa vakacava mo ni vakadamurimuri Jiova ena nomuni vakaraitaka na loloma vei ira nomuni vuvale? E vakacava na bibi ni nomudrau ivakaraitaki ena nomudrau bula vakaveiwatini?

Mo iVakaraitaki Sara Ga

Kevaka o tagane, o dau doka qai rokovi watimu? Ke o yalewa, o dau lomana qai tokoni watimu? E kaya na iVolatabu ni dodonu me rau veilomani rau qai veidokai o tagane kei watina. (Efeso 5:​28; Taito 2:4) Ni rau cakava vaka kina, era na vakadinadinataka kina na gone na loloma vakarisito. Sa dua dina na lesoni bibi!

Era na vakabibitaka tale ga na itubutubu na loloma vakavuvale ke ra muria dei na ivakatagedegede dodonu ena vuvale me vaka na ka ni veivakalasai, na ivalavala savasava, na isausau kei na veika me vakaliuci. Era raica e vuqa na tamata e vuravura raraba ni ivukevuke yaga dina na iVolatabu ena kena tuvanaki na ivakatagedegede vakavuvale, e vakadinadinataki kina ni iVolatabu e ‘vakavuna na Kalou, e yaga me ivakavuvuli, me vunauca na ca, me veivakadodonutaki, me vakatavulica na ka e dodonu.’ (2 Timoci 3:​16) E vakasakiti dina kina na ivakavuvuli savasava kei na idusidusi ni bula e kune ena iVunau ena Ulunivanua.​—Maciu, wase 5 ina 7.

Kevaka era muria na ivakatagedegede ni Kalou na lewenivuvale kece, era na vakila yadudua nira taqomaki, era na tubucake tale ga na gone mera lomana ra qai rokovi ira na nodra itubutubu. Ena yasana adua, na vuvale e levu tu na kena ivakavuvuli qai sega ni vinaka se luluqa na kena ivakatagedegede, era na vuturi kina na gone, cudru ra qai be.​—Roma 2:​21; Kolosa 3:​21.

Ia, vakacava ga o ira na itubutubu ledua? E rawa beka mera vakavulica na loloma vei ira na luvedra? E vaka kina. Dina ga ni sega ni rawa ni sosomitaki na vinaka ni nodrau cakacaka vata o tina kei na tama, ia e sa vakadinadinataki ke vinaka na nodratou veimaliwai o itubutubu ledua kei iratou na gone ena vinaka na bula ni vuvale oqori. Kevaka o itubutubu ledua, saga mo muria na ivakavuvuli vakaivolatabu ena nomu vuvale. Io, e kaya e dua na vosa vakaibalebale: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya”​—okati kina na nona ilakolako na itubutubu.​—Vosa Vakaibalebale 3:​5, 6; Jemesa 1:5.

E vuqa na itabagone ivakaraitaki vinaka era susugi ena vuvale itubutubu ledua era sa qarava tiko na Kalou ena yalodina ena vica na udolu na ivavakoso vakarisito ni iVakadinadina i Jiova e vuravura raraba. Oqo e ivakadinadina levu ni o ira tale ga na itubutubu ledua e rawa nira vakavulici ira vinaka na luvedra ena loloma.

Sala Eda Rawa ni Bucina Kece Kina na Loloma

E sa tukuna oti tu na iVolatabu ni “iotioti ni veisiga” ena vakatakilakilataki ena lailai ni “loloma,” oya na luluqa ni nodra veimaliwai na lewenivuvale. (2 Timoci 3:​1, 3, NW) Ia, o ira na susugi ena vuvale era sega ni dau lomani e rawa nira vulica mera bucina na loloma. Ena sala cava? Nodra vuli vei Jiova, o koya na iVurevure ni loloma, e lomana qai kauaitaki ira na vakararavi vua mai vu ni lomadra. (1 Joni 4:​7, 8) E kaya e dua na daunisame: “Ni sa laivi au na tamaqu kei na tinaqu, ena qai keveti au cake ko Jiova.”​—Same 27:10.

E lomani keda ena vuqa na sala o Jiova. Oqo e okati kina na ivakasala vakatama mai na iVolatabu, na veivuke ni yalo tabu, kei na nodra veitokoni na tacida vakarisito. (Same 119:​97-​105; Luke 11:13; Iperiu 10:​24, 25) Dikeva mada e tolu na sala e rawa ni vukei iko mo lomana kina na Kalou kei na wekamu.

Veiuqeti na iVakasala Vakatama

Noda via bucina na veiwekani voleka kei na dua, e dodonu meda kilai koya vinaka na tamata oya. Nona vakaraitaki koya ena taqaniveva ni iVolatabu, e sureti keda kina o Jiova meda toro voleka vua. Ia, e sega ni yaga ke wiliki ga na iVolatabu. Meda muria na kena ivakavuvuli da qai raica kina na kena yaga vei keda. (Same 19:​7-​10) E kaya na Aisea 48:17: “Koi au ko Jiova na nomu Kalou, ka’u sa vakavulici iko mo vinaka kina, ka’u sa tuberi iko e na sala mo lakova.” Io, o Jiova na vatuka ni loloma, e vakavulici keda meda vinaka kina​—e sega ni baleta na nona via tarova na noda galala ena levu ni lawa se na nona ivakaro.

Na kilaka dina mai na iVolatabu e vukei keda tale ga meda dau veilomani. Na vuna ni ka dina ena iVolatabu e vakavulica na rai i Jiova me baleti keda na tamata, qai vakaraitaka na ivakavuvuli ena vukei keda nida veitaratara kei ira na so. Na itukutuku vaka oya e yavu dei ni noda bucina na loloma vei ira na wekada. E kaya na yapositolo o Paula: “Au masulaka me na tubu cake tiko ga na nomuni loloma ka me maucokona vinaka kina na nomuni kila ka kei na nomuni rai.” (Neitou na matanivola kala.)​—Filipai 1:​9, VV.

Me vakaraitaka vei keda na sala e rawa ni dusimaki kina na loloma ena “kila ka,” dikeva na ka dina e tukuni tiko ena Cakacaka 10:​34, 35 (VV): “[Sa] sega ni dau vakaduiduitaka na tamata na Kalou. Ia sa dau vinakati ira kece ga era dau vakarokorokotaki koya ka dau cakava na ka e dodonu.” Kevaka e dikeva ga na Kalou na vinaka era cakava na tamata kei na nodra rerevaki koya, qai sega ni raica na vanua era gole mai kina se na roka ni yagodra, e sega li ni dodonu me vaka tale ga oya na noda rai?​—Cakacaka 17:​26, 27; 1 Joni 4:​7-​11, 20, 21.

Loloma​—Vua ni Yalo Tabu

Me vaka ga ni na vinaka na tatamusuki ke taudonu na uca, na yalo tabu ni Kalou e rawa ni vakatubura vua e dua e veiciqomi na itovo e tukuni ena iVolatabu me “vua ni Yalo Tabu.” (Kalatia 5:​22, 23) Na vua e bibi duadua na loloma. (1 Korinica 13:13) Eda rawata vakacava na yalo tabu ni Kalou? Na sala bibi duadua oya ena masu. Kevaka eda kerea ena masu na yalo tabu ni Kalou ena soli vei keda. (Luke 11:​9-​13) O dau ‘kerea’ tiko ga na yalo tabu? Ke o dau cakava vaka kina, na vua ni yalo tabu kece, okati kina na loloma, ena laurai sara ga ena ivakarau ni nomu bula.

Ia, e dua tale na yalo e veibasai mai na yalo tabu ni Kalou. E vakatoka na iVolatabu me “yalo ni vuravura.” (1 Korinica 2:​12; Efeso 2:2) Na yalo oqo e vakatetea na ivakarau ca, qai kena iliuliu sara ga o Setani na Tevoro, “na iliuliu kei vuravura” e liutaki ira na kawatamata era vakayawaki ira mai vua na Kalou. (Joni 12:31) Me vaka ga na cagi e yavalata na kuvu kei na duka, na “yalo ni vuravura” e vakavurea na gagadre cala e vakacacana na loloma qai vakaceguya na gagadre ni yago.​—Kalatia 5:​19-​21.

E rawai ira na tamata na yalo ca oya nira goleva na domodomoiyau, nodra vakaliuci ira ga, voravora nodra ivakarau, kei na rai cala ni loloma e kilai tu ena vuravura oqo. Ke o vinakata mo bucina na loloma dina, ena vinakati mada e liu mo biuta laivi na yalo ni vuravura. (Jemesa 4:7) Mo kua gona ni nuitaka na nomu kaukaua ga, kerea na veivuke i Jiova. Na yalona tabu​—na igu kaukaua duadua ena vuravura​—e rawa ni vakaukauataki iko qai vukei iko mo rawaka.​—Same 121:2.

Vulica na Loloma Vei Ira na Mataveitacini Vakarisito

Me vaka ga na nodra vulica na gone ena nodra vuvale na loloma, o keda kece​—gone se qase​—e rawa ni tubu na noda loloma nida vakasosoqoni vata kei ira na lotu Vakarisito. (Joni 13:​34, 35) Na ivavakoso vakarisito e dua na vanua e rawa nira “dui veivakauqeti kina e na loloma kei na cakacaka vinaka” na lewe ni ivavakoso yadua.​—Iperiu 10:​24, VV.

Era marautaka vakalevu na loloma vaka oya o ira na “biu wale tu” ena vuravura e sega kina na loloma eda bula tu kina oqo. (Maciu 9:​36) E kune ni nodra sa mai veilomani e so na uabula e rawa ni kauta laivi na vakasama ca ni nodra susugi mai ena vuvale era sega ni lomani kina. E bibi kina vei ira na lotu Vakarisito kece era yalataki ira me vu mai lomadra nodra kidavaki ira na ka vou era sa mai soqoni vata tiko!

“Sega ni Mudu na Loloma”

E kaya na iVolatabu ni “sega ni mudu na loloma.” (1 Korinica 13:8) Ena sala cava? E tukuna vei keda na yapositolo o Paula: “Sa dauvosota vakadede na loloma, sa yalovinaka; sa sega ni vuvu na loloma; sa sega ni vosa doudou na loloma, sa sega ni viavialevu, sa sega ni cakava na ka sa sega ni kilikili kaya, sa sega ni qara na ka me nona ga, sa sega ni cudrucudru, sa sega ni daulomaca.” (1 Korinica 13:​4, 5) E matata vakasigalevu ni loloma oqo e sega ni itukuni wale ga, se lasutaki. Kena veibasai​—o ira na vakaraitaka na loloma vaka oqo era kila na dredre kei na rarawa ni bula, ia era sega ni vakalaiva na veika oqori me vakamalumalumutaka na nodra lomani ira na tamata. Na loloma dina vaka oqo e “[i]vau vinaka sara.”​—Kolosa 3:​12-​14.

Dikeva mada na ivakaraitaki ni dua na goneyalewa lotu Vakarisito mai Korea, e yabaki 17. Na gauna e mai tekivu qarava kina na Kalou o Jiova ratou sega ni taleitaka na nona vuvale, a mani vagalala tani mai kina e vale. E sega ni cudru na goneyalewa oqo, e masulaka ga na leqa oqo, qai vakalaiva na Vosa ni Kalou kei na yalo tabu me veisautaka na nona rai. Oti, sa qai dau volavola vakalevu vei iratou nona matavuvale, e dau vola kina na nona lomani iratou dina. Rau tini vulica kina na iVolatabu o rau na ganena qase, rau sa yalataki rau tale ga me rau lotu Vakarisito. Erau sa ciqoma tale ga na ka dina mai na iVolatabu o tinana kei na ganena gone. Qai kena itinitini, o tamana a dau veitusaqati vakalevu, e veisau tale ga na nona rai. Sa qai vola na goneyalewa iVakadinadina oqo: “Eratou lotu Vakarisito kece na dui wati keitou, e sa 23 na iwiliwili ni lewenivuvale keitou mai sokalou ena duavata.” Sa dua dina na ivakaraitaki vinaka ni rawa ni qaqa na loloma!

O vinakata beka mo bucina na loloma dina, mo qai vukei ira tale ga kina e so mera cakava vaka kina? Mo vakararavi gona vei Jiova na iVurevure ni itovo talei oqo. Io, mo tugana e lomamu na nona Vosa, masuta na yalona tabu, qai vakasosoqoni wasoma kei ira na mataveitacini vakarisito. (Aisea 11:9; Maciu 5:5) E veivakacegui dina nida kila nira sa vakarau vakarusai na tamata ca, era na vo ga o ira na bulataka tiko na loloma dina vakarisito! Io, na loloma e ki ni marau kei na bula.​—Same 37:​10, 11; 1 Joni 3:​14.

[iYaloyalo ena tabana e 6]

Na masu kei na vulici ni Vosa ni Kalou ena vukei keda meda bucina na loloma dina