O na Vakaraitaka Vakacava ni o ‘Waraka’ Tiko na Siga i Jiova?

“A cava nai valavala sa kilikili kei kemudou, e nai valavala savasava kei na daulotu [se, “yalo ni qaravi Kalou,” NW], ni dou sa dauwaraka ka daugadreva sara na kena yaco mai na siga ni Kalou.”​—2 PITA 3:​11, 12.

1, 2. E rawa nida vakatauvatana kei na cava na noda ‘waraka’ tiko na siga i Jiova?

VAKASAMATAKA mada e dua na vuvale eratou namaka tiko mera mai vakayakavi e nodratou e so na vulagi. Sa voleka sara na gauna me na yaco mai kina nodratou vulagi. E ogaoga o radinivale ena nona raica me vakarau kece na ivakayakavi. Eratou ogaoga tale ga na nona veitamani me ratou vakadeitaka ni sa tu vinaka na ka kece. Eratou maqusa taucoko. Eratou vakanamata kece ena dua na ivakayakavi totoka, kei na veilasamaki.

² O keda na lotu Vakarisito eda waraka tiko e dua na ka e bibi cake sara. Na cava oya? Eda waraka kece tiko na ‘siga i Jiova’! Se bera tiko mai na siga oya, o koya gona, e bibi meda ucui koya na parofita o Maika ni a kaya: “Ka’u na rai ga vei Jiova; ka’u na waraki koya na Kalou, na noqui vakabula.” (Maika 7:7) Oqo beka na wawa sara ga ni vakacegu? Sega. Dua na ka na cakacaka e tu me caka.

3. Na ivakarau ni bula vakacava me laurai vua na lotu Vakarisito me vaka eda raica ena 2 Pita 3:​11, 12?

³ Eda na wawa vakacava? Oqori na ka ena vukei keda kina na yapositolo o Pita. E kaya o koya: “A cava nai valavala sa kilikili kei kemudou, e nai valavala savasava kei na daulotu, ni dou sa dauwaraka ka daugadreva sara na kena yaco mai na siga ni Kalou.” (2 Pita 3:​11, 12) E sega ni lomatarotaro se taroga tiko i ke o Pita se me vakaevei na noda ivalavala na lotu Vakarisito. A via vakabibitaka tiko ga o koya ena rua na nona ivola uqeti vakalou na ivakarau ni bula e dodonu me laurai vua na lotu Vakarisito. E vakauqeti ira tale ga mera gumatua “e nai valavala savasava kei na daulotu.” Sa sivi e rauta ni 30 na yabaki mai na gauna a vakamacalataka kina o Jisu na ivakatakilakila ni “i vakataotioti kei vuravura,” sega ni kena ibalebale oya mera sa vakasavuliga na lotu Vakarisito. (Maciu 24:​3, VV) Se bibi tiko ga mera “dauwaraka ka daugadreva sara” me yaco mai na siga i Jiova.

4. Na cava e okati ena noda ‘dau gadreva na kena yaco mai na siga i Jiova’?

⁴ Na vosa vakirisi e vakadewataki e ke me “daugadreva” e kena ibalebale na “vakatotolotaka.” E macala tu ga ni sega ni rawa nida “vakatotolotaka” na yaco mai ni siga i Jiova. Vakauasivi nida “sega ni kila na siga, se na tiki-ni-siga” ena lako mai kina o Jisu Karisito me mai tauca na kedra itotogi na meca i Tamana. (Maciu 24:36; 25:13) Ia, e vakamacalataka e dua na ivolavosa ni vosa “vakatotolotaka” e vu mai ena dua na vosa e kena ibalebale na “ ‘vakusakusa,’ qai veiwekani voleka na vosa oqo kei na ‘gumatua, ogaoga, kei na nomu kauaitaka tiko e dua na ka.’ ” O koya gona, a uqeti ira tiko na tacina vakayalo o Pita mera vinakata sara ga na kena yaco mai na siga i Jiova. Dua na sala era cakava kina oqo ena nodra vakasamataka tiko ena veigauna kece. (2 Pita 3:​12) Oqo e sa qai bibi sara vei keda ena gauna oqo ni sa qai voleka ga “na siga i Jiova, e levu ka rerevaki.”​—Joeli 2:​31.

Wawa “e Nai Valavala Savasava”

5. Eda na vakaraitaka vakacava nida vinakata sara ga meda raica na ‘siga i Jiova’?

⁵ Ke da vinakata sara ga meda bula ena siga i Jiova, eda na vakaraitaka na noda gagadre oqori “e nai valavala savasava kei na daulotu.” Na matavosa, “nai valavala savasava” eda lai nanuma kina na vakamamasu i Pita: “Me vaka na gone e dautalairawarawa, dou kakua ni vakatauvatani kemudou kei na gagadre ca eliu ni dou a lialia: ia ni sa yalosavasava ko koya sa kacivi kemudou, dou yalosavasava talega koi kemudou e nai valavala kecega; ni sa volai, Dou yalosavasava; ni’u sa yalosavasava koi au.”​—1 Pita 1:​14-​16.

6. Na cava meda cakava me rawa kina nida savasava?

⁶ Eda na yalosavasava ga ke da savasava vakayago, savasava noda vakasama, noda bula, eda savasava tale ga vakayalo. Nida vakatokayacataki vei Jiova, eda sa vakarautaki keda tiko beka ena ‘siga i Jiova’ ena noda qarauna meda savasava tiko ga? Sa torosobu nikua na bula e vuravura, e sega ni rawarawa kina noda saga meda savasava tiko ga. (1 Korinica 7:​31; 2 Timoci 3:​13) Sega li nida vakadinadinataka ni sa duidui sara ga na noda ivakarau ni bula savasava kei na ivakarau ni bula kei vuravura? Ke da nanuma ni sega, e dodonu meda qarauna. De dua e vaka e sa kania vakamalua tiko na yavato na noda ivalavala savasava. Ke vaka kina, e bibi meda saga sara ga ena gauna oqo meda vakavinakataka na keda ituvaki, me rawa kina nida vakamarautaka na Kalou.

7, 8. (a) E bibi meda vakaitovotaki keda tiko ga “e nai valavala savasava,” ia na cava e rawa ni yaco ke da sega ni qaqarauni? (b) Na cava e rawa ni cakava e dua me vakadodonutaki koya tale kina?

⁷ Sa tu vakarawarawa nikua na iyaloyalo ca ena kompiuta e sema ena sala ni vakauitukutuku e vakatokai na Internet. E kaya e dua na vuniwai ni so era se sega ni bau sarava na iyaloyalo ca era sa kunea nikua “e dua na ivurevure sega ni yalani ni ka e vauca na veiyacovi.” Ke dua e via lai vaqara na iyaloyalo vakasisila vaka oqo ena Internet, e sa beca sara tiko ga na ivakasala ena iVolatabu meda “kakua ni tara na ka sa sega ni savasava.” (Aisea 52:11) Eda sa na sega tale ga ni vakaraitaka nida “dauwaraka ka daugadreva sara na kena yaco mai na siga ni Kalou” o Jiova! Se da vakacalai keda tiko ga ena noda nanuma ni se vo levu na gauna, se rawa nida vakaduka mada noda vakasama, oti ga eda na qai vakasavasavataka tale! Ke sa via vaka tiko oqo na ka e yacovi keda, e bibi meda masuti Jiova me ‘tarova na matada meda kua ni raica na ka lasu,’ me qai vakabulai keda ena sala e vinakata o koya.​—Same 119:37.

⁸ E levu ga na iVakadinadina i Jiova, qase kei na gone, era dei tiko ga ena ivakatagedegede cecere ni Kalou, ra qai sega ni vinakata me vakacalai ira na ka ni veitemaki velavela ni vuravura oqo. Era saga mera vakaitovotaki ira tiko ga “e nai valavala savasava” nira kila ni sa lekaleka na gauna, vaka kina ena nona kaya o Pita ni “siga ni Turaga [o Jiova] ena lako mai me vaka na daubutako.” (2 Pita 3:​10) Era vakaraitaka ena nodra ivalavala nira “dauwaraka ka daugadreva sara na kena yaco mai na siga ni Kalou” o Jiova.a

Wawa me Salavata “kei na Daulotu”

9. Na cava ena cakava na tamata daulotu?

⁹ Ena kilai tale ga na tamata e gadreva tiko me yaco mai na siga i Jiova kevaka e “daulotu.” Na tamata “daulotu” e doka na Kalou, qai vakaraitaka oqo ena nona cakava na ka e vakadonuya. Ia, oqo ena qai cakava rawa ga e dua kevaka erau veivolekati sara kei Jiova. E inaki i Jiova “me bula na tamata kecega, ka mai kila sara nai vakavuvuli dina.” (1 Timoci 2:4) E ‘sega ni vinakata na Kalou me dua e rusa, ia me veivutuni ga na tamata kece.’ (2 Pita 3:9) Kevaka gona eda daulotu, e dodonu me laurai nida solia tiko ga noda vinaka kece ena nodra vukei na lewenivanua mera mai kilai Jiova, mera vakatotomuri koya tale ga?​—Efeso 5:1.

10. Na cava meda qarauna kina na “veitemaki ni i yau”?

¹⁰ Ena laurai ena noda bula na ivalavala ni tamata daulotu kevaka eda dau vakaliuca na Matanitu ni Kalou. (Maciu 6:​33) Oqo e okati kina noda sega ni vakabibitaka na kumuni ni iyau vakayago. A veivakasalataki o Jisu: “Ni yadra tiko ka qarauni kemuni mai na veivalavala kocokoco kece ga, ni sa sega ni vakatau na bula ni tamata e na levu ni ka e tu vua.” (Luke 12:​15, VV) Kevaka eda nanuma ni sega ni rawa ni vakaleqai keda na domoni ni ilavo, meda qarauna! Baleta na “lomaocaoca ni vuravura oqo” kei na “veitemaki ni i yau” e rawa ni “vakaruguta na vosa” ni Kalou. (Maciu 13:​22, VV) E rawa ni dredre na bula vei ira e so ena so na matanitu. Era nanuma beka kina ni dodonu mera toki ina dua tale na matanitu vutuniyau cake, so na gauna e rawa ni vakayabaki sara kina nodra veibiu tu kei ira nodra lewenivuvale. Yaco sara mada ga oqo vei ira e so na lotu Vakarisito. Era vakau iyau beka ina nodra matavuvale nira lako ina dua tale na matanitu, ia na cava e rawa ni yacova nodra vuvale e sa tu tani mai? Me vaka ni sa na sega na veiliutaki dina vakatama ena loma ni vuvale, eratou sa na vakarautaki vinaka beka vakayalo na lewenivuvale me ratou bula rawa kina ena siga i Jiova?

11. E vakaraitaka vakacava e dua a lai cakacaka tu i vanua tani ni bibi cake na daulotu mai na iyau?

¹¹ A lai qara cakacaka i Japani e dua na turaga ni Yatu Filipaini, vuli iVolatabu sara kei ira na iVakadinadina i Jiova. Ni vulica oti ena iVolatabu na itavi ni ulunivale, sa qai kila ni dodonu me tuberi iratou nona veitinani me ratou qaravi Jiova. (1 Korinica 11:3) Ia, e cata o watina nona vakabauta vou, e sega ni vinakata me lesu yani o tamadratou me lai vakavulica vei iratou na iVolatabu, e vinakata ga me tu yani i Japani me vakau ilavo tiko mai vei iratou. E kila o tamadratou ni sa lekaleka na gauna, e uqeti koya tale ga nona lomani iratou nona veitinani, sa qai lesu vei iratou. E qai vakalougatataki nona vosoti iratou voli nona veitinani. Yaco na gauna me ratou tomani koya ena sokalou dina, mai vakaitavi tale ga yani ena cakacaka vakatabakidua na watina.

12. Na cava meda vakaliuca kina ena noda bula na veika vakayalo?

¹² Na keda ituvaki e rawa ni vaka e dua e tiko ena loma ni dua na vale e sa kama tiko. E kena gauna beka oya me veiciciyaki kina e lomanivale me vaqara iyau ni sa voleka tiko ni kasura na vale? Sega, oya e gauna ni vaqara bula​—me bula o koya kei ira tale e so era tiko e lomanivale? Sa vovoleka sara tiko ga ni kasura na vuravura oqo, e dodonu mera vakabulai na lewena. Oya na vuna e bibi kina meda vakaliuca ena gauna oqo na ka vakayalo, da qai gumatua ga ena noda vunautaka na itukutuku vinaka ni Matanitu ni Kalou, ni oqo e cakacaka ni veivakabulai.​—1 Timoci 4:​16.

Dodonu Meda ‘Kua ni Tauvi Duka’

13. Na ituvaki cava eda na vinakata meda laurai kina ni sa yaco na siga i Jiova?

¹³ E rui bibi me laurai vei keda nida waraka tiko na siga i Jiova, baleta ni a kaya o Pita: “Kemudou sa lomani, ni dou sa waraka na veika vakaoqo, dou gumatua kina me kunei kemudou ko koya e na vakacegu [se, “veiyaloni,” VV], ni dou sa sega ni tauvi-duka, ka sega ni cala.” (2 Pita 3:​14) Ni vakaraitaka oti o Pita na bibi ni ivalavala savasava kei na daulotu, sa qai vakaraitaka ni bibi tale ga me raica o Jiova nida sa savai ena dra talei i Jisu. (Vakatakila 7:​9, 14) Oqo e okati kina noda vakabauta na isoro i Karisito, noda yalataki keda meda qaravi Jiova, da papitaiso sara.

14. E bibi meda ‘kua ni tauvi duka.’ Ia, na cava na kena ibalebale?

¹⁴ E uqeti keda o Pita meda saga sara meda ‘kua ni tauvi duka.’ Vakaevei, eda saga tiko me kua ni tauvi duka noda isulu vakarisito? Oya me kua ni takavi keda na itovo kei na ivalavala vakavuravura? Ni duka noda isulu, e kena ivakarau meda dau savata. Ke qai duka li noda isulu vakamareqeti, eda dau solia sara ga noda vinaka kece ena noda saga me savasava vuka tale. E dau vaka tale beka ga oqo noda qarauna noda isulu vakarisito kevaka e vakadukai ena dua beka na noda itovo se ivalavala?

15. (a) Na cava mera cakava kina na Isireli na ka vakaiukuuku ena bele ni nodra isulu? (b) Na cava era duatani ga kina na iVakadinadina i Jiova ena gauna oqo?

¹⁵ A tukuni vei ira na Isireli “me ra kitaka na ka vakaiukuuku e na bele ni nodrai sulu . . . ka me ra cula ki nai ukuuku ni bele ni sulu, e dua na wa pelu.” Ena vuku ni cava? Mera nanuma kina na ivunau i Jiova, ra muria, me ivakaraitaki ni nodra ‘vakatabui’ ira mera savasava ena mata ni nodra Kalou. (Tiko Voli Mai na Lekutu 15:​38-​40) Eda duatani tale ga mai vuravura na tamata i Jiova ena gauna oqo baleta nida muria ga na ivunau ni Kalou kei na nona ivakavuvuli. Me kena ivakaraitaki, eda guta me savasava tiko ga noda ivalavala, eda doka na vakatatabutaki ni dra, eda cata tale ga na ivalavala kece ga ni qaravi matakau. (Cakacaka 15:​28, 29) Era dokai keda e levu ena noda sa vakadeitaka tu ga meda kua ni tauvi duka.​—Jemesa 1:​27.

Meda ‘Kua ni Cala’

16. Na cava e okati ena noda saga meda ‘kua ni cala’?

¹⁶ Kaya tale ga o Pita ni dodonu meda ‘kua ni cala.’ Ena rawa vakacava oqo? Na duka e rawa ni sava tani, ia e duatani na cala. Na cala e vakaraitaka ni dua na ka mai loma e leqa tiko. A vakamasuti ira na lotu Vakarisito mai Filipai na yapositolo o Paula: “Me kakua sara na dau didi kei na veileti e na nomudou cakacaka kecega: mo dou kakua ni vunauci rawa, ka tawa cala mo dou luve ni Kalou ka sega ni beitaki me ca, e na kedra maliwa nai tabatamata takelo ka lomavakatani, mo dou sa cila e na kedra maliwa me vaka na veicina e vuravura.” (Filipai 2:​14, 15) Ke da rogoca na ivakasala oqo, eda na sega ni dau didi se veileti. Eda na qarava ga na Kalou ena yalo savasava. Ena uqeti keda noda lomani Jiova kei na noda lomani ira na wekada meda vunautaka yani kina “na i Tukutuku Vinaka ni matanitu” ni Kalou. (Maciu 22:​35-​40; 24:​14, VV) Kena ikuri, eda na kacivaka tiko ga yani na itukutuku vinaka veitalia mada ga ke ra sega ni kila na lewenivanua na vuna eda solia wale kina noda gauna meda vukei ira mera kila na Kalou, kei na nona Vosa na iVolatabu.

17. Na cava e dodonu me noda inaki nida tadolova e so na itavi ena ivavakoso vakarisito?

¹⁷ Eda vinakata dina meda ‘kua ni cala,’ oya na vuna e bibi kina meda dikeva na inaki ni lomada ena veika eda dau cakava. Sa da vakanadakuya na nodra ivakarau kocokoco na tamata ni vuravura, ni dau vakasuina tu na ka era cakava​—nodra qara beka na iyau se itutu. Ke da tadolova e so na itavi ena ivavakoso vakarisito, me savasava mada ga na noda inaki qai yavutaki ga ena noda lomani Jiova kei ira na wekada. E ka vinaka nida raici ira na tagane vakayalo nira vakaraitaka ena marau nodra “gadreva na cakacaka vakaitalatala qase” nira vinakata dina mera isuwai ni cakacaka i Jiova, mera qaravi ira tale ga na tacidra vakayalo. (1 Timoci 3:1; 2 Korinica 1:​24) Io, o ira era lesi ena itavi vaqase era ‘vakatawa na qelenisipi ni Kalou . . . ena yalo makutu; era sega ni vaqara isau ga, ia ena yalo ga e taleitaka na veiqaravi. Era sega ni viavia turaga vei ira era qaravi ira tiko, ia era ivakarau ga vei ira na qelenisipi.’​—1 Pita 5:​1-4, VV.

Dodonu Meda Dau “Veiyaloni”

18. Na cava eda dau kilai tani kina na iVakadinadina i Jiova?

¹⁸ Sa qai tinia o Pita ena nona vakaraitaka ni dodonu meda dau “veiyaloni.” Oqo ena vinakati kina meda veiyaloni kei Jiova, meda veiyaloni tale ga vakataki keda. A vakabibitaka o Pita na noda ‘veilomani vakataki keda’ kei na noda bula veiyaloni kei ira na tacida vakayalo. (1 Pita 2:​17; 3:​10, 11; 4:8; 2 Pita 1:​5-7) Dodonu meda dau veilomalomani ke da vinakata na bula veiyaloni. (Joni 13:​34, 35; Efeso 4:​1, 2) E dau vakilai sara ga na noda veilomalomani kei na veiyaloni ni dau yaco na soqo ni veimatanitu. Ena dua na soqo ni veimatanitu a caka mai Costa Rica ena 1999, a vakaraitaka kina e dua na dauvolivolitaki nona rarawa nira lai vakasugusugu ena nona vanua ni volivolitaki na iVakadinadina e kea ena nodra mai kidavaki ira na mata mai vanua tani. Ia ena ikarua ni siga, sa tekivu qoroya o koya na nodra veilomani kei na veiyaloni na iVakadinadina era mai veikidavaki kei ira na sobu mai. Era veimarautaki, e dina nira sega tu mada ga ni veikilai. Ena ikatolu ni siga, sa mai tomani ira na iVakadinadina ena veikidavaki, sa kerea tale ga me vulica na iVolatabu.

19. Na cava e bibi kina meda saga meda veiyaloni kei ira na tacida vakayalo?

¹⁹ Noda saga meda dau veiyaloni kei ira na tacida vakayalo e rawa ni kilai tale ga kina se vakacava tiko noda waraka na siga i Jiova kei na vuravura vou e yalataka. (Same 37:11; 2 Pita 3:​13) Kaya mada, ke sega ni rawa nida dau veiyaloni kei na dua na tacida vakayalo. Eda na qai lai veiyaloni vakacava ena Parataisi? Ke beitaki keda e dua na tacida ena dua na ka, e dodonu meda saga sara vakatotolo ‘meda veivinakati tale kei koya.’ (Maciu 5:​23, 24) E bibi dina oqo ke da vinakata meda veiyaloni se veivinakati kei Jiova.​—Same 35:27; 1 Joni 4:​20.

20. Sala cava soti e dodonu me laurai kina nida ‘waraki Jiova’?

²⁰ Eda ‘sa waraka tiko beka da qai gadreva sara me yaco mai na siga i Jiova’? Eda na vakaraitaka nida gadreva dina me vakacavari na vuravura ca oqo kevaka eda savasava tiko ga. Ena kilai tale ga nida vinakata dina sara ga me yaco mai na siga i Jiova, me sa veiliutaki tale ga na nona Matanitu, ke da vakaraitaka tiko ga nida tamata daulotu. Na noda nuitaka tale ga meda bula ena vuravura vou ni Kalou ena laurai ena noda saga meda veiyaloni tiko ga kei ira na tacida vakayalo ena gauna sara ga oqo. Na veika kece oqo ena vakaraitaka nida “waraki koya na Kalou,” da qai ‘gadreva sara me yaco mai na siga i Jiova.’

[iVakamacala e ra]

O se Nanuma?

• Ni tukuni meda “daugadreva sara na kena yaco mai na siga ni Kalou” o Jiova, na cava na kena ibalebale?

• Ena laurai vakacava ena noda ivalavala nida ‘waraki Jiova’ tiko?

• Na cava e bibi kina meda “daulotu”?

• Na cava meda cakava me kunei keda kina o Jiova nida ‘veiyaloni, sega ni tauvi duka, da qai sega ni cala’?

[iYaloyalo ena tabana e 11]

Ena kilai nida ‘waraki Jiova’ ke laurai vei keda na ivalavala savasava

[iYaloyalo ena tabana e 12]

Na kacivaki ni Matanitu ni Kalou e cakacaka ni veivakabulai

[iYaloyalo ena tabana e 14]

Meda saga mada ga meda veiyaloni nida waraka tiko na siga i Jiova