“E Dodonu Moni Yalosavasava, Moni Qarava Tale Ga na Kalou!”
“Nira na vakawaicalataki na ka kece qo, e dodonu moni yalosavasava, moni qarava tale ga na Kalou!”—2 PITA 3:11.
1. Na cava a taudonu kina na veivakauqeti i Pita ena ikarua ni nona ivola vei ira na lotu vaKarisito ena nona gauna?
ENA gauna a vola kina na yapositolo o Pita na ikarua ni nona ivola uqeti vakalou, era a vosota tiko na ivavakoso vaKarisito e levu na veivakacacani, ia a sega ni vakayalolailaitaka qo na igu ni ivavakoso se vakaberaberataka na kena tubu. E qai vakayagataka na Tevoro e dua tale na iwalewale mera bacani kina, ni sa dau veirawai tiko qo ena veigauna sa oti. Me vaka e vakavotuya o Pita, e vinakata o Setani me vakacacani ira na tamata ni Kalou ena nona vakayagataki ira na qasenivuli lasu, e “sinai na matadra ena veibutakoci” qai “vakavulici na lomadra mera kocokoco.” (2 Pita 2:1-3, 14; Juta 4) O koya gona, e uqeti keda na ikarua ni ivola i Pita me vu mai lomada noda yalodina.
2. Na cava e vakabibitaki ena 2 Pita wase 3, na taro cava meda tarogi keda kina?
2 E vola o Pita: “Au raica ni dodonu meu vakayadrati kemuni ena noqu taleva qori ena gauna kece au tiko kina ena valeniveitavaki qo, niu sega ni lecava ni sa vakarau biu laivi na noqu valeniveitavaki . . . Au na sasaga gona vagumatua ena gauna qo, niu vinakata moni nanuma tiko ga na ka kece qo ni oti noqu biubiu.” (2 Pita 1:13-15) Io, e kila tiko o Pita ni na vakarau mate, ia a vinakata me nanumi tiko na nona ivakasala taudonu ya. A yaco sara na ivakasala qo me tiki ni iVolatabu qai rawa nida mai wilika kece nikua. E bibi vei keda na Wase 3 ni ikarua ni ivola i Pita, ni vakabibitaki kina na “iotioti ni veisiga” me baleta na veika ni vuravura qo kei na kena vakarusai na lomalagi kei na vuravura vakaivakatakarakara. (2 Pita 3:3, 7, 10) Na ivakasala cava a vakarautaka vei keda o Pita? Ena yaga vakacava noda muria nona ivakasala me vakadonui keda kina o Jiova?
3, 4. (a) Na cava a tukuna o Pita, na cava a veivakasalataki kina? (b) Na cava e tolu na tikina eda na dikeva?
3 Ni oti ga nona cavuta o Pita ni na vakarusai na vuravura i Setani, a tukuna: “E dodonu moni yalosavasava, moni qarava tale ga na Kalou!” (2 Pita 3:11, 12) E kila o Pita ni o ira ga era cakava na inaki ni Kalou ra qai vakaraitaka na itovo e vakadonuya, era na vakabulai ena ‘siga ni veisausaumi’ sa roro tiko mai qo. (Aisea 61:2) E qai kuria gona kina na yapositolo: “O koya gona kemuni na wekaqu lomani, ni oni sa kila rawa qo, moni qarauna de oni vakasesei vata kei ira [na qasenivuli lasu] ena nodra veivakacalai na dau murilomadra, oni qai sega ni tudei.”—2 Pita 3:17.
4 Nona maliwai ira sa tiko rawa vei ira na “kila” o Pita, e kila ni na vinakati vei ira na lotu vaKarisito ena ivakataotioti ni veisiga mera qaqarauni me rawa nira yalodina tiko ga. E qai mai vakamacalataka emuri na vuna na yapositolo o Joni. A raivotutaka nona kolotaki mai lomalagi o Setani kei na nona ‘cudruvi ira vakalevu’ era “muria tiko na ivunau ni Kalou, era vakadinadinataki Jisu tale tiko ga.” (Vkta. 12:9, 12, 17) Era na qaqa kina nona dauveiqaravi yalodina lumuti na Kalou kei ira nodra itokani ‘so tale na sipi.’ (Joni 10:16) Ia vakacava o keda yadudua? Eda na yalodina tiko ga? Eda na vukei meda cakava qo ke da saga meda (1) bucina na itovo vakalou, (2) eda savasava tiko ga vakayago, vakayalo tale ga qai (3) donu noda rai me baleta na veivakatovolei. Meda dikeva mada na veitikina qo.
Bucina na iTovo vaKalou
5, 6. Na itovo cava meda saga meda bucina, na cava e vinakati kina meda “saga vagumatua”?
5 A vola o Pita ena itekitekivu ni nona ikarua ni vola: “Moni vakavinavinaka vua ena nomuni saga vagumatua me vakaikuritaki na nomuni vakabauta ena ivalavala vinaka, na nomuni ivalavala vinaka ena kilaka, na nomuni kilaka ena nomuni lewa vinaka, na nomuni lewa vinaka ena nomuni vosota, na nomuni vosota ena nomuni qarava na Kalou, na nomuni qarava na Kalou ena nomuni yalovata vakaveitacini, kei na nomuni yalovata vakaveitacini ena loloma. Ke oni vuabale ena ka kece qo, oni na sega ni vakasavuliga se tawavua ena nomuni kila na ka dina me baleta na noda Turaga o Jisu Karisito.”—2 Pita 1:5-8.
6 Ena vinakati dina ga meda “saga vagumatua” meda vakaitavi ena cakacaka e bucini kina na itovo vakalou. Me kena ivakaraitaki, e ka ni sasaga na noda tiko ena soqoni kece vaKarisito, na wili iVolatabu e veisiga, kei noda via dei ena dua na ituvatuva vinaka ni vuli vakataki keda. Me marautaki qai yaga na Sokalou Vakavuvale ena yakavi, ena vinakati kina na cakacaka vakaukaua qai dua tale ga na kena ituvatuva vinaka e dei. Ia ni sa dua noda ituvatuva vinaka, eda na matau sara kina—vakabibi ena gauna eda vakila kina na kena yaga.
7, 8. (a) Na cava era tukuna eso me baleta na Sokalou Vakavuvale ena yakavi? (b) E yaga tiko vakacava vei iko na sokalou vakavuvale?
7 A vola e dua na tacida yalewa me baleta na ituvatuva ni sokalou vakavuvale: “Keitou vulica kina e levu na ulutaga.” E tukuna tale e dua: “Meu tukuna na ka dina, au a sega ni vinakata me oti na vulivola, ni qo na soqoni au taleitaka duadua. Ia qo ni keitou dau Sokalou Vakavuvale ena yakavi, au liaca kina ni o Jiova e kila na ka eda gadreva kei na gauna eda gadreva kina.” E tukuna e dua na ulunivuvale: “E yaga sara ga vakalevu vei keitou na sokalou vakavuvale. E ka vinaka dina ni vakayacori e dua na soqoni va qo me veiganiti ena veika keirau gadreva vakaveiwatini! Keirau vakila ni sa vinaka sara tiko na neirau dau vakaraitaka na itovo e umani ena vua ni yalo tabu, qai keirau marautaka tiko vakalevu na neirau cakacaka vakaitalatala.” E tukuna tale e dua na ulunivuvale: “Eratou sa dau cakava ga na gone na nodratou dui vakekeli qai ratou vulica e levu na ka—eratou marautaka tale ga. Keitou qai nuidei ga vakalevu ena ituvatuva qo ni o Jiova e kila na ka keitou kauai kina qai rogoca na neitou masu.” E va qo tale ga nomu rai me baleta na isolisoli totoka vakayalo e vakarautaka mai na Kalou?
8 Kua ni vakalaiva eso na ka lalai me vakalatilati ena sokalou vakavuvale. E tukuna e dua na veiwatini, “Ena bogi kece ni Lotulevu me tekivu mai na va na macawa sa oti, a dua na ka a yaco ena neitou vuvale e voleka sara ni mai mudu kina na neitou vuli, ia keitou sega ni vakalaiva qo me mai vakalatilati.” E sega ni vakabekataki ni na tiko ga na gauna ena vinakati kina mo veisautaka nomu ituvatuva. Ia mo vakadeitaka tiko ga me kua ni daro na nomudou Sokalou Vakavuvale ena yakavi—me kua mada ga ni dua na macawa!
9. A vakaukauataki Jeremaia vakacava o Jiova, na cava eda vulica ena nona ivakaraitaki?
9 E ivakaraitaki vinaka dina vei keda na parofita o Jeremaia. A gadreva dina na kakana vakayalo a vakarautaka vua o Jiova qai taleitaka dina. Na kakana vakayalo qo a rawa kina vua me vosota nona lai vunau vei ira era sega ni tataleitaki. E tukuna kina: ‘Na vosa i Jiova . . . e vaka na bukawaqa, sa sogo tu ena suiqu.’ (Jere. 20:8, 9) A uqeti koya tale ga qo me vosota kina na gauna dredre a qai mai tinimaki ena kena vakarusai o Jerusalemi. Nikua, e tu vei keda na veivosa volai taucoko ni Vosa ni Kalou. Nida vulica vagumatua qai tiko vei keda na rai i Jiova, me vakataki Jeremaia ga, eda na vosota kina ena marau na cakacaka vakaitalatala, eda na yalodina tiko ga ena gauna ni veivakatovolei, da qai savasava tiko ga vakayago, vakayalo tale ga.—Jeme. 5:10.
Dei Tiko ga ni “Oni Sega ni Tauvi Duka Oni Sega ni Vakamelei Rawa”
10, 11. Na cava meda saga sara kina meda “sega ni tauvi duka” da qai “sega ni vakamelei rawa,” na cava e vinakati kina vei keda?
10 Nida lotu vaKarisito eda kila nida sa bula tu qo ena iotioti ni veisiga. O koya gona, eda sega ni kurabuitaka na kena kauaitaki tu vakalevu e vuravura na veika e cata o Jiova, me vaka na kocokoco, na veiyacovi tawakilikili, kei na itovo kaukaua. Na lalawa i Setani e rawa ni tukuni ga va qo: ‘Ke ra sega ni vakarerei rawa na dauveiqaravi ni Kalou, de rairai era rawa ni vakadukadukalitaki.’ (Vkta. 2:13, 14) O koya gona, meda vakasamataka vakabibi na ivakasala yalololoma i Pita: “Ni saga sara me raici kemuni [na Kalou] ni oni sega ni tauvi duka, oni sega ni vakamelei rawa, oni bula veiyaloni tale ga.”—2 Pita 3:14.
11 Ni tukuni “ni saga sara” e tautauvata ga kei na vakamamasu eliu i Pita meda “saga vagumatua.” E matata ni o Jiova—o koya a uqeti Pita me vakaraitaka na rai ya—e kila ni vinakati vei keda meda saga vakaukaua meda “sega ni tauvi duka” meda “sega ni vakamelei rawa,” da qai savasava mai na vuravura dukadukali i Setani. Noda sasaga qo e wili kina noda taqomaka na lomada mai na gagadre ca. (Wilika Vosa Vakaibalebale 4:23; Jemesa 1:14, 15.) E wili tale ga eke noda dei ena noda bula vaKarisito, dina ni so era dau lomatarotarotaka ra qai “vosavakacacataki [keda]” kina.—1 Pita 4:4.
12. Na cava e vakadeitaki ena Luke 11:13?
12 Me vaka nida sega ni uasivi, ena ka ni sasaga meda dau cakava na ka e donu. (Roma 7:21-25) Eda na rawa ga nida cakava qori ke da torovi Jiova, ni lomasoli me solia na yalo tabu vei ira era kerei koya dina mai vu ni lomadra. (Luke 11:13) Na yalo tabu qo ena bucina e lomada na itovo e vakadonuya na Kalou, ena sega wale ga ni vukei keda nida temaki, ia eda na vosota kina na veivakatovolei e levu tiko ga ni sa roro voleka mai na siga i Jiova.
Me Vakaukauataki Iko na Veivakatovolei
13. Nida vakatovolei na cava ena uqeti keda meda vosota?
13 Nida bula tu ena ituvaki makawa qo, eda na sotava na veimataqali veivakatovolei. Mai na nomu yalolailai, vakacava mo raica na veivakatovolei me sala o vakadeitaka kina nomu lomana na Kalou, o qai vakavinakataka nomu vakabauti koya kei na nona Vosa? E vola na yapositolo o Jemesa: “Moni marau o kemuni na taciqu ena gauna oni sotava kina na veimataqali veivakatovolei, oni kila ni vakatubura na vosota na vakatovolei ni nomuni vakabauta ena sala qo.” (Jeme. 1:2-4) Mo nanuma tale ga ni “macala ena ka kece qo ni kila o Jiova na sala me vakabulai ira kina era qarava na Kalou nira vakatovolei.”—2 Pita 2:9.
14. E uqeti iko vakacava na ivakaraitaki i Josefa?
14 Vakasamataka mada na ivakaraitaki i Josefa na luvei Jekope, ena nodratou volitaki koya na tuakana me bobula. (Vkte. 37:23-28; 42:21) A luluqa beka na vakabauta i Josefa ena veivakalolomataki lolovira a caka vua? A cudruva na Kalou ni vakalaiva me yaco vua na ka lolovira ya? E sauma vakamatata sara ga na Vosa ni Kalou, sega! Ia a sega ni veivakatovolei ga qori a sotava o Josefa. Emuri a bilitaki ni a kucu qai bala e valeniveivesu. Ia a dua tu ga nona ivakarau ni sokalou. (Vkte. 39:9-21) A vakalaiva me vakaukauataki koya na veivakatovolei va qo, a qai vakalougatataki kina vakalevu.
15. Na cava eda vulica ena ivakaraitaki i Neomai?
15 E sega ni vakabekataki ni veivakatovolei e rawa dina ni vakararawataki keda se vakayalolailaitaki keda. De rairai a va tale ga ya ena so na gauna o Josefa. Era sotava tale ga qo eso na dauveiqaravi yalodina ni Kalou. Vakasamataki Neomai mada, e sa mate o watina kei rau na luvena tagane. “Dou kakua ni vakatokai au ko Neomai [Marau],” e tukuna. “Dou vakatokai au ga ko Mara [Rarawa]: ni sa cakacaka vakararawa vei au ko Koya na kaukauwa.” (Ruci 1:20, 21) E macala ga ni na va qo nona rai o Neomai. Me vakataki Josefa ga, a sega ni luluqa nona veika vakayalo qai yalodina tiko ga. O Jiova a qai vakalougatataka na marama qo. (Ruci 4:13-17, 22) Me ikuri ni ka ena cakava o Jiova ni sa Parataisi na vuravura qo, ena vakaotia tale ga na veika kece e vakavuna tiko o Setani kei nona vuravura ca qo. “Ena sega ni nanumi na ka eliu, ena sega ni curu tale ki na lomamudou.”—Aisea 65:17.
16. Na cava me noda rai me baleta na masu, cava na vuna?
16 Na veivakatovolei cava ga eda sotava, ena vakaukauataki keda tu ga na loloma ni Kalou. (Wilika Roma 8:35-39.) O Setani ena sega ni cegu me vakayalolailaitaki keda, ia ena guce ke da “yalomatua” da qai ‘yadra tiko ena noda gumatua ena masu.’ (1 Pita 4:7) E tukuna o Jisu: “O koya gona, mo dou yadra tiko, mo dou masu tiko ga mo dou drotaka kina na ka kece ena yaco, mo dou tu tale ga ena mata i koya na Luve ni tamata.” (Luke 21:36) Raica nona vakayagataka o Jisu na vosa “masu tiko ga,” qo e dua dina na mataqali masu bibi. Nona tukuna vei keda o Jisu meda masu tiko ga, e vakabibitaka tiko ni qo e gauna meda raica kina vakabibi noda veiwekani kei koya vata kei Tamana. O ira ga era yacova na ivakatagedegede mera vakadonui, era na nuitaka mera bula ena siga i Jiova.
Gumatua Tiko ga ena Veiqaravi Vei Jiova
17. Ke dredre mo dau vunau ena nomu yalava, ena yaga vakacava vei iko na nodra ivakaraitaki vinaka na parofita ena gauna eliu?
17 Noda vakaitavi ena cakacaka vakayalo ena vakacegui keda. Eda nanuma lesu kina na veivosa i Pita: “E dodonu moni yalosavasava, moni qarava tale ga na Kalou!” (2 Pita 3:11) E bibi duadua ena veitavi ya na kacivaki ni itukutuku vinaka. (Maciu 24:14) E dau dredre dina ena so na yalava na vunau, qo e rairai vakavuna na veitusaqati se na sega ni veikauaitaki, ni levu era osooso ena veika ni bula e veisiga. Era sotava tale ga na ituvaki va qo ena gauna eliu na dauveiqaravi i Jiova. Ia era sega ni datuvu, era dau lesu tiko ga nira “sou e na mataka” kei na nodra itukutuku soli vakalou. (Wilika 2 Veigauna 36:15, 16; Jere. 7:24-26) Era a vosota vakacava? Ni tiko vei ira na rai i Jiova me baleta nodra ilesilesi, sega ni rai vakavuravura. Kuria qo, era raica ni ka dokai nodra vakayacani ena yaca ni Kalou.—Jere. 15:16.
18. Ena vakalagilagi vakacava na yaca ni Kalou ena gauna se bera mai na cakacaka vakavunau?
18 E ka dokai tale ga vei keda na noda kacivaka tiko na yaca i Jiova kei na nona inaki. Vakasamataka mada qo: Ena gauna ena lewai ira kina nona meca na Kalou, era na sega ni soli ulubale ni a sega ni tukuni vei ira na ka me baleti koya se nona inaki. Ia me vakataki Fero ena gauna eliu, era na kila ni o Jiova ga era saqata tiko. (Lako 8:1, 20; 14:25) Ena gauna vata qori, o Jiova ena dokai ira nona dauveiqaravi yalodina ena nona vakaraitaka vakamatata, ni o ira qo era nona mata dina.—Wilika Isikeli 2:5; 33:33.
19. Eda na vakaraitaka vakacava nida gadreva dina meda vakayagataka vinaka na nona dau vosota vakadede o Jiova?
19 Ni voleka ni cava na ikarua ni ivola i Pita, a vola vei ira na nona itokani ena vakabauta: “Moni okata na nona dauvosota na noda Turaga me sala eda vakabulai kina.” (2 Pita 3:15) Io, meda vakayagataka vinaka mada ga nona dau vosota vakadede o Jiova. E rawa vakacava qo? Qo noda bucina na itovo ena vakamarautaki koya, noda “sega ni tauvi duka” da qai “sega ni vakamelei rawa,” me donu noda rai me baleta na veivakatovolei, kei na noda ogaoga tiko ena veiqaravi me baleta na Matanitu ni Kalou. Nida cakava qo, eda na vakalougatataki kina me sega ni mudu, qo e salavata mai na “lomalagi vou kei na vuravura vou.”—2 Pita 3:13.
O se Nanuma Tiko?
• E rawa vakacava nida bucina na itovo vakalou?
• E rawa vakacava meda “sega ni tauvi duka” da qai “sega ni vakamelei rawa”?
• Na cava eda vulica vei Josefa kei Neomai?
• Na cava e ka dokai dina kina na noda vakaitavi ena cakacaka vakavunau?
[iYaloyalo ena tabana e 9]
Na cava ena uqeti kemuni na tagane vakawati moni bucina na itovo vakalou kei na nomuni vuvale?
[iYaloyalo ena tabana e 10]
Na cava eda vulica ena nona vosota o Josefa na veivakatovolei?