O Dau Vakasaqarai Jiova Beka Vagumatua?

E GU e dua na turaga lotu Vakarisito me wasea na itukutuku vinaka mai na iVolatabu vei ira na dau vodo sitimanivanua. (Marika 13:10) Ia, e tarovi koya na rere. E soro beka kina? Sega, e masu vagumatua qai vulica na sala me tekivutaka rawa kina na veivosaki. E sauma na Kalou o Jiova na nona masu qai solia vua na kaukaua me vunau kina.

E bibi na sasaga vaka oya nida vakasaqarai Jiova kei na nona veivakalougatataki. E kaya kina na yapositolo o Paula: “O koya sa torova na Kalou e dodonu me vakabauta ni sa bula ko koya, ni sa saumi ira talega era sa dauvakasaqarai koya.” (Iperiu 11:6) Ia e sega ni yala wale ga ena noda vakasaqarai Jiova. Ni vakadewataki na “dauvakasaqarai” ena vosa vakirisi e kena ibalebale me sasagataki vakaukaua. Oqo e okati kina na lomada taucoko, noda nanuma, na yaloda kei na noda kaukaua kece. Kevaka eda gumatua na vakasaqarai Jiova eda na sega ni yalodredre se vucesa. Ia eda na vakaraitaka ga noda yalodina ena noda vakasaqarai koya.​—Cakacaka 15:17.

Era Vakasaqarai Jiova Vagumatua

E levu tu na ivakaraitaki ena iVolatabu me baleti ira era saga vagumatua mera vakasaqarai Jiova. Dua vei ira o Jekope, rau a veimulomulo kei na agilosi ni Kalou ena bogi taucoko. Na ka oqo e soli kina vei Jekope na yaca Isireli (Kaukaua vua na Kalou) ni kaukaua, se sega ni soro, yavala, qai sasaga. E qai vakalougatataka na agilosi na nona sasaga vagumatua.​—Vakatekivu 32:​24-​30.

E dua na marama ni Kalili e sega ni cavuti na yacana, e sa 12 na yabaki na nona turidrabalavu tiko, e rarawa kina vakalevu. Na mate oya e vakatabui kina me veitaratara kei na dua tale na tamata. Ia, a doudou me lai sotavi Jisu. E kaya: “Kevaka ka’u na tara ga na nonai sulu, au na vakabulai.” Vakasamataka mada na nona saga vagumatua me lako yani ena kedra maliwa na lewevuqa era vakamuri Jisu ra qai veidrigiti. Gauna ga e tara kina na isulu i Jisu e vakila sara ni sa “mudu vakasauri nai davedave ni nona dra”​—e sa vakabulai! E qai rere na marama oqo ni sa taroga o Jisu, “O cei sa tara na noqui sulu?” Ia a qai tukuna vakayalololoma vua o Jisu: “Na luvequ-yalewa, sa vakabulai iko na nomu vakabauta; mo lako e na vakacegu, ka mo bula mai na nomu mate ca.” E vakalougatataki na nona sasaga.​—Marika 5:​24-​34; Vunau ni Soro 15:​25-27.

E dua tale ga na marama ni Kenani a gumatua ni cikevi Jisu me vakabula na luvena yalewa. A sauma o Jisu ni sega ni vinaka me soli vei ira na koli na kedra na gone. E vakaibalebaletaka o koya ni na sega ni kauaitaki ira na sega ni Isireli baleta nira tu na Jiu mera raici. Ni kila na marama oya na ibalebale ni vosa vakatautauvata, e kerea: “E dina ga, na Turaga: ia ko ira na koli era kania na meme ni kakana sa lutu mai na tepeli ni nodra turaga.” Na dei ni nona vakabauta kei na nona yalodina e uqeti Jisu me kaya: “Yalewa, sa levu na nomu vakabauta: me yaco vei iko me vaka na ka ko sa vinakata.”​—Maciu 15:​22-​28.

Cava ena yacovi rau ke rau sega ni gumatua ena nodrau sasaga? Erau na vakalougatataki beka ke rau soro ena imatai ga ni gauna erau drigiti kina se sega ni ciqomi? Sega! Na ivakaraitaki oqo e vakabibitaka kina o Jisu na tikina e vakavulica, oya ni ‘cikecike,’ e bibi ena nona vakasaqarai o Jiova.​—Luke 11:​5-​13.

Me Vaka ga na Lomana

Vei ira na sa vakabulai vakacakamana oqori e vinakati beka ga mera sasaga vagumatua? Sega, na nodra kerekere me salavata kei na loma ni Kalou. A soli vei Jisu na kaukaua ni cakamana me vakatakila kina ni Luve ni Kalou, na Mesaia yalataki. (Joni 6:​14; 9:​33; Cakacaka 2:​22) Kuria oya, na cakamana a cakava o Jisu e dusia na veivakalougatataki ena cakava e vuravura o Jiova vei ira na kawatamata ena duanaudolu na yabaki ni veiliutaki i Karisito.​—Vakatakila 21:4; 22:2.

E sa sega ni inaki ni Kalou ena gauna oqo vei ira na lotu dina me tu vei ira na kaukaua ni cakamana, me vaka na veivakabulai kei na duivosavosa. (1 Korinica 13:​8, 13) E okati ena nona inaki ena gauna oqo na kena vunautaki ena vuravura taucoko na itukutuku vinaka ni Matanitu ni Kalou, ‘me rawa vei ira na tamata kece ga mera mai kila na ivakavuvuli dina.’ (1 Timoci 2:4; Maciu 24:14; 28:​19, 20) E rawa nira nuitaka na dauveiqaravi ni Kalou ni na rogoci na nodra masu vagumatua ke ra saga me salavata kei na lomana.

E so beka era na vakataroga, ‘Cava meda gumatua kina, ni veika e nakita na Kalou ena yaco dina ga?’ E dina ni o Jiova ena vakayacora ga na veika e nakita se ra mani vakaitavi kina na tamata se sega, ia e marautaka ga mera okati ena kena vakayacori na lomana. O Jiova e vaka e dua na dau taravale. Na dau taravale e tiko vua na peleni ni vale, qai vakayagataka ga na iyaya ni taravale era tu e kea. E vaka tale ga oya o Jiova, e tiko na ka me na vakayacora ena gauna oqo, e marau gona ni vakayagataki ira na nona dauveiqaravi era soli ira vakarawarawa.​—Same 110:3; 1 Korinica 9:​16, 17.

Dikeva mada na ivakaraitaki ni dua na gone o Toshio. Ni se qai curu vou ena dua na koronivuli torocake, e vinakata me soli ivakadinadina ena kena levu e rawata ena yalava oya. E dau tu vakarawarawa vua na iVolatabu qai dau saga vagumatua me ivakaraitaki vinaka ni lotu Vakarisito. Voleka ni mai cava na imatai ni yabaki ni vuli, a soli vua na galala me vakamacala kina ena kalasi. A kerea na veivuke i Jiova ena masu o Toshio, qai kurabuitaka nira vakarorogo vinaka na lewenikalasi ena nona ulutaga “Noqu iSausau na Cakacaka Vakapainia.” E vakamacalataka ni vinakata me cakacaka vakaitalatala vakatabakidua ni iVakadinadina i Jiova. Na ka oqo e taleitaka kina e dua na gonevuli me vulica na iVolatabu yaco sara me papitaiso. Na gumatua ni sasaga i Toshio salavata kei na masu e vakalougatataki kina.

E Vakacava Nomu Sasaga?

E levu na sala o rawa ni vakaraitaka kina nomu sasaga vagumatua ni vakasaqarai Jiova kei na nona veivakalougatataki. Na imatai sara ga ni ka o rawa ni cakava oya na nomu vakavakarau vinaka ina soqoni vakarisito. Na nomu ivakamacala e vakarautaki vinaka, vunau e veiuqeti, kei na cakayaco ni nomu vakatasuasua, o sa vakaraitaka tiko kina na nomu gumatua ni vakasaqarai Jiova. E rawa tale ga ni o vakaraitaka na nomu sasaga ena nomu vakavinakataka na nomu cakacaka vakaitalatala. Vakacava mo saga mo dau matadredredre ena nomu torova yani e dua na matanivale, qai vakayagataka e dua na iucu ni vosa e ganita na yalava oya? (Kolosa 3:​23) Ke cakacaka mai vu ni lomana e dua na tagane lotu Vakarisito, e rawa ni ciqoma na ilesilesi ena ivavakoso me dauveiqaravi vakaitalatala se qase ni ivavakoso. (1 Timoci 3:​1, 2, 12, 13) Ke o soli iko vakarawarawa o rawa ni vakila na marau ni soli ka. E rawa ni o kerea mo veiqaravi ena tabana ni taravale ena valenitabana se ena valenivolavola ni tabana ni iVakadinadina i Jiova. Ke o tagane dawai qai matua vakayalo, e rawa ni o lai vuli ena Koronivuli ni Vuli Veiqaravi Vakaitalatala, e vakarautaki ira na tagane vakayalo mera ivakatawa vinaka. Ke o vakawati, na cakacaka vakaulotu e dua na sala o rawa ni vakaraitaka kina na nomu gumatua ni qaravi Jiova. Na nomu toki ena dua na vanua e gadrevi vakalevu kina na dau vunautaka na Matanitu ni Kalou e rawa ni yaga tale ga vei iko.​—1 Korinica 16:9.

Na ka ga e bibi na yalo o na vakayacora kina na nomu veiqaravi. Na itavi cava ga e soli vei iko, gumatua ni vakayacora, qai “yalo dina” kina. (Cakacaka 2:​46; Roma 12:8) E dodonu mo raica na nomu ilesilesi me dua na sala o vakaraitaka kina na nomu gumatua ni vakacaucautaki Jiova. Kerea wasoma na veivuke i Jiova ena masu, qai cakava na nomu itavi ena nomu vinaka taucoko. Ena nomu kina na veivakalougatataki.

Vakalougatataki na Dau Gugumatua

O se nanuma tiko na turaga lotu Vakarisito a masu me kau laivi na nona rere me rawa ni vunau kina vei ira na dau vodo sitimanivanua? A vakalougatataka dina o Jiova na nona sasaga. E saga e levu na sala vinaka me vosa kina vei ira na tamata, qai digia e levu na ulutaga me veivosaki kina. E rawa kina vua me vakayagataka vinaka na iVolatabu me vunau vua e dua na turaga e kauai vakalevu ena leqa ni veiwekani vakatamata. Nona dau vunau vua ena veigauna kece rau sota kina ena sitimanivanua, yaco sara kina me rau vuli iVolatabu. A vakalougatataka dina o Jiova na nona sasaga!

E rawa ni vaka tale ga oya na ka o rawata ke o gumatua tiko ga ena nomu vakasaqarai Jiova. Ke o yalomalumalumu ni sasaga vagumatua qai cakava mai vu ni lomamu na cakacaka o cakava tiko, ena vakayagataki iko o Jiova ena veika e salavata kei na nona inaki qai vakalougatataki iko tale ga.

[iYaloyalo ena tabana e 26]

Cava beka ena yacovi koya na marama oqo ke sega ni sasaga vagumatua?

[iYaloyalo ena tabana e 27]

O dau gumatua beka ni kerea vei Jiova na nona veivakalougatataki?

[iYaloyalo ena tabana e 28]

Sala cava o rawa ni vakaraitaka kina na nomu gumatua ni vakasaqarai Jiova?