O Dau Kauaitaki Ira Beka na iTabaqase ena iVavakoso?
ERA vakaroti na Isireli era veiyalayalati kei na Kalou mera: “Tucake e matadra sa sika na uluna, ka doka na matadra na tamata qase, ka rerevaka na nomudou Kalou.” (Vunau ni Soro 19:32) Noda vakaraitaka noda yalomalumalumu vua na Kalou e via vaka tale ga na noda dokai ira na itabaqase. Dina ga nira sa sega ni vauci na lotu Vakarisito nikua ena Lawa a soli vei Mosese, ia e dusia ga vei keda ni o Jiova e dau kauaitaki ira na itabaqase era qaravi koya tiko. (Vosa Vakaibalebale 16:31; Iperiu 7:18) E vaka beka oya noda rai? Eda dau kauaitaki ira beka na tacida lotu Vakarisito era sa qase?
E Kauaitaka Nona iTokani Qase
E dua na ivakaraitaki vakaivolatabu me baleta na nodra kauaitaki na itabaqase e kune ena iKarua ni Tui. E vakamacalataki kina na nona sosomitaki parofita Ilaija na parofita gone o Ilaisa. Dikeva mada na ka a yaco ena iotioti ni siga ni nona cakava na cakacaka ni parofita o Ilaija ena yavusa e tini kei Isireli.
Ena siga oya, a tukuna o Jiova vua na parofita qase o Ilaija me biuti Kilikali me gole i Peceli, qai dewa sara i Jeriko me lai tini ina uciwai na Joritani. (2 Tui 2:1, 2, 4, 6) Rauta ni 50 na kilomita na ilakolako oya qai vakamasuti Ilaisa kina vakatolu o Ilaija me kua ni muri koya tiko. Ena vica na senitiuri ni se bera oya, a cakava tale ga o Ruci na ka vata oya ni a sega ni via biuti Neomai, e vaka kina o Ilaisa nona sega ni via biuti koya na parofita qase o Ilaija. (Ruci 1:16, 17) A kaya vakatolu o Ilaisa: “Me vaka sa bula ko Jiova, ka sa bula na yalomu, ka’u na sega ni laivi iko.” (2 Tui 2:2, 4, 6) Ia, ena gauna mada ga oya, e sa ono na yabaki nona dau vukei Ilaija tu mai o Ilaisa. Ia, e vinakata tiko ga o Ilaisa me levu na gauna me rau veiqaravi vata kina kei Ilaija. E kaya na kena itukutuku: “Ni rau sa lako tiko, ka veivosaki, raica . . . sa lako cake . . . ko Ilaija.” (Tikina e 11) Rau a veitalanoa tiko o Ilaija kei Ilaisa me yacova sara na iotioti ni nona cakacaka ni veiqaravi e Isireli o Ilaija. E saga na parofita gone oqo me vulica e levu na ivakasala yaga kei na veiuqeti mai vua na parofita matua o Ilaija. E laurai sara ga e ke ni kauaitaka o Ilaisa na nona itokani qase.
‘Mera Vaka na Tamamu kei na Tinamu’
E rawarawa gona noda raica na vuna e lomani Ilaija kina me vaka ga e nona itokani o Ilaisa—me vaka sara ga e tamana vakayalo. (2 Tui 2:12) Ni bera ni mai cava na nona itavi o Ilaija e Isireli, e kaya vei Ilaisa: “Kerea mada na ka me’u cakava vei iko, ni’u sa bera ni kau tani mai vei iko.” (Tikina e 9) Me yacova sara na gauna e kau kina, e vakaraitaka o Ilaija nona kauaitaka na veika vakayalo i koya e veisosomitaki, kei na kena tomani tiko ga na cakacaka ni Kalou.
E veivakauqeti dina nikua na nodra veikauaitaki me vaka na tama kei na tina o ira na itabaqase ena ivavakoso vakarisito nira wasea na ka era kila kei na nodra vuku vei ira na itabagone. Kena ivakaraitaki, o ira na sa dede tu na nodra veiqaravi ena valenivolavola ni tabana ni iVakadinadina i Jiova, era soli ira ena nodra vukei na lewe i Peceli vou mera vulica na cakacaka ena gadrevi mera vakaitavitaki kina. E vaka tale ga kina o ira na ivakatawa dauveilakoyaki kei na watidra, sa vica vata na yabaki nodra dau sikova na veivavakoso, era marau ni wasea na ka era kila vei ira era vakarautaki tiko mera qarava tale ga na itavi oya. Kuria oya, na ivavakoso ni iVakadinadina i Jiova e vuravura raraba era tiko tale ga kina na mataveitacini itabaqase era qaravi Jiova voli mai ena yalodina me vica vata na yabaki, era marau ni vakasavuya vei ira na ka vou na veika era kila.—Vosa Vakaibalebale 2:7; Filipai 3:17; Taito 2:3-5.
Nodra dau veinanumi na tacida itabaqase lotu Vakarisito oqo ena marautaki kina na noda dau dokai ira. Meda muria mada ga na ivakaraitaki i Ilaisa ena noda kauaitaki ira dina na itabaqase eda vakabauta vata. Me vaka e vakananuma vei keda na yapositolo o Paula, meda raici ira tiko ga na ‘qase mera vaka na tamada’ kei ira na ‘yalewa qase, mera vaka na tinada.’ (1 Timoci 5:1, 2) Nida cakava vaka kina eda sa vukea tiko vakalevu na cicivaki kei na toso ni ivavakoso vakarisito e vuravura raraba.
[iYaloyalo ena tabana e 30]
E vinakata o Ilaisa me levu na gauna erau veiqaravi vata kina kei Ilaija
[iYaloyalo ena tabana e 31]
E levu sara na ka era vulica na itabagone mai vei ira na lotu Vakarisito era sa qase