Taro na Dauwiliwili
Na cava e kerei Ilaija kina o Ilaisa me ‘vakaruataka’ na ivotavota ni yalo e solia vua?
Ni bera ni vakaotia nona ilesilesi vakaparofita e Isireli o Ilaija, a kerea vua na parofita gone o Ilaisa: “Me vakaruataki mada vei au nai votavota ni yalo sa tu vei iko.” (2 Tui 2:9) Ena rai vakayalo a vinakata tiko o Ilaisa me vakaruataki na ivotavota e soli vua me vaka ga na ivakarau ni iyau e dau votai vei ira na ulumatua tagane. (Vakarua 21:17) Ena qai vakamatatataki na tikina oqo nida raica vakalekaleka na ka a yaco, meda qai vuli tale ga kina.
Me salavata kei na veidusimaki i Jiova, a lumuti Ilaisa na parofita o Ilaija me sosomitaki koya. (1 Tui 19:19-21) E rauta ni ono na yabaki nona dauveiqaravi voli ena yalodina vei Ilaija o Ilaisa qai vakadeitaka ni na yalodina tiko ga ena nona itavi ena veigauna kece. Ena iotioti mada ga ni siga a cakacaka tiko kina vakaparofita o Ilaija e Isireli, a tiko ga e yasa i nona ivakavuvuli o Ilaisa. E dina ni a uqeti koya o Ilaija me kua ni vakamuri koya tiko, ia e qai kaya vakatolu vua na parofita gone o Ilaisa: “Ka’u na sega ni laivi iko.” (2 Tui 2:2, 4, 6; 3:11) O Ilaisa e wiliki koya na parofita qase me tamana vakayalo.—2 Tui 2:12.
Ia, a sega ni luvei Ilaija duadua ga vakayalo o Ilaisa. E tiko tale ga kei rau e so na tagane era kilai nira “luvedra na parofita.” (2 Tui 2:3) E tukuni ena iKarua ni Tui ni o ira na “luvedra na parofita” oqo era veivolekati tale ga kei na tamadra vakayalo o Ilaija. (2 Tui 2:3, 5, 7, 15-17) Ia, me vaka ni a lumuti o Ilaisa me sosomitaki Ilaija, a liu taudua vei ira na luvena vakayalo—vaka sara ga me nona ulumatua. E dau vakaruataki na ivotavota era solia na tama vei luvedra tagane ulumatua e Isireli makawa, ra qai yadua ga na vo ni luvedra tagane. O koya gona, a kerea o Ilaisa me vakaruataki vua na ivotavota ni yalo tabu i Ilaija.
Na cava sara mada e kerea kina o Ilaisa na ka oqori ena gauna oya? Baleta ni sa vakarau qarava tiko e dua na ilesilesi levu—nona sa na sosomitaki Ilaija me parofita e Isireli. E kila o Ilaisa ni sega vua na kaukaua vakatamata me qarava kina na itavi e vakacolati vua ena ilesilesi levu oqo, e gadreva gona kina na kaukaua vakayalo e rawa ni solia duadua ga o Jiova. Ena vinakati vua me yaloqaqa vakataki Ilaija. (2 Tui 1:3, 4, 15, 16) Oya na vuna e kerea kina me vakaruataki vua na yalo i Ilaija, me doudou qai “yalokatakata vakalevu e na vuku i Jiova”—na itovo talei e vuataka na yalo tabu ni Kalou. (1 Tui 19:10, 14) E sauma vakacava o Ilaija?
E kila vakamatata o Ilaija ni ka e kerea o Ilaisa e sega ni nona, ia e nei Jiova. E sauma vakamalua kina o Ilaija: “Sa ka dredre na ka ko sa kerea: ia kevaka ko na raici au ni’u sa kau tani tiko mai vei iko, ena yaco vakakina vei iko.” (2 Tui 2:10) Io, a qai cakava o Jiova me raica o Ilaisa ni sa lako cake i lomalagi o Ilaija ena covulaca. (2 Tui 2:11, 12) A vakadonui na nona kerekere o Ilaisa. E solia vua o Jiova na yalo tabu e gadreva me tekivutaka kina na ilesilesi vou oqo vaka kina na veika dredre ena sotava.
E rawa tale ga nira uqeti ena ivakaraitaki vakaivolatabu oqo na lotu Vakarisito lumuti (era dau vakatokai tale ga ena so na gauna mera ilawalawa era vakataki Ilaisa) vaka kina o ira kece na dauveiqaravi ni Kalou. Eda dau yalolailai ena so na gauna se da nanuma ni sega ni ganiti keda e dua na ilesilesi vou, se sa malumu na yalo ni vunautaka na Matanitu ni Kalou ni sa rui levu era sega ni vakarorogo da qai tusaqati ena noda yalava. Ia kevaka eda kerea nona veivukei o Jiova, ena solia na yalona tabu meda rawa kina ni vosota na veika dredre se ni veisau na keda ituvaki. (Luke 11:13; 2 Korinica 4:7; Filipai 4:13) Io, a vakaukauataki Ilaisa o Jiova me qarava kina na nona ilesilesi levu, ena vukei keda tale ga se da gone se qase meda vakayacora vinaka na noda cakacaka vakaitalatala.—2 Timoci 4:5.