Mo Rawata na Icovi, Lewai Iko Vinaka!

“Sa dau lewai koya vakavinaka sara na daucici yadua e na veika kece ga.”​—1 Korinica 9:​25, VV.

1. Me salavata kei na Efeso 4:​22-​24, sa ra vakaio vakacava vei Jiova e vica vata na milioni?

KE O papitaiso mo iVakadinadina i Jiova, e kena ibalebale ni o sa vakaraitaka e matanalevu na nomu ciqoma mo vakaitavi ena veisisivi e kena icovi na bula tawamudu. O sa vakaiotaka mo cakava na loma ni Kalou. Ni bera nida yalataki keda vei Jiova, levu na veisau eda cakava me rawa ni dina kina na noda yalayala qai vakadonuya na Kalou. Eda muria na ivakasala ni yapositolo i Paula vei ira na lotu Vakarisito: “Mo dou biuta tani kina na tamata makawa, o koya sa ca mai e na vuku ni gagadre ca sa veivakaisini . . . Mo dou vakaisulu e na tamata vou, o koya sa caka me vaka na Kalou e na yalododonu kei na yalosavasava ni dina.” (Efeso 4:​22-​24) Se, dua tale na kena itukutukuni, ni bera nida yalataki keda vua na Kalou, eda a vakuakua ena ivakarau ni bula e sega ni dodonu eda dau cakava tu.

2, 3. E vakaraitaka vakacava na 1 Korinica 6:​9-​12 ni vinakati e rua na mataqali veisau me rawati kina na veivakadonui ni Kalou?

² Vei ira era vinakata mera yaco mera iVakadinadina i Jiova, e so na itovo makawa e dodonu mera biuta, e sega tale ga ni wereubiubi na Vosa ni Kalou ni vakacala. A vola e so o Paula ena nona ivola vei ira mai Korinica, ni kaya: “O ira na daudara, kei ira na dausoro ki na matakau, kei ira na dauyalewa, kei ira na viavia vaka na yalewa, kei ira na veimoceri vakatagane, kei ira na daubutako, kei ira na daukocokoco, kei ira na daumateni, kei ira na dauveivakasewasewani, kei ira na daukovekove, era na sega ni rawata na matanitu ni Kalou.” E qai kaya ni o ira na lotu Vakarisito ena imatai ni senitiuri era veisautaka nodra itovo, ni kuria: “Ia dou sa vakakina eliu.” Dikeva ni tukuni, e liu, e kena ibalebale nira sa veisau.​—1 Korinica 6:​9-​11.

³ A vakatura o Paula ni na yaga sara e so tale na veisau, ni tomana: “Sa tara vei au na ka kecega, ia ka sa sega ni yaga na ka kecega.” (1 Korinica 6:12) Koya gona, e vuqa nikua era gadreva mera iVakadinadina i Jiova era kila ni dodonu mera vakuakua mai na levu na ka e tara meda cakava, ia era sega ni yaga. Ni veika oqo e rawa ni kania na gauna, e rawa tale ga ni vakamuai ira tani mai na nodra qara na veika yaga cake.

4. Na cava era duavata kina kei Paula na lotu Vakarisito yalayala oti?

⁴ Na yalayala vua na Kalou e vu mai lomada, e sega ni caka ena voraki, me vaka beka ni colati kina e dua na icolacola levu. O ira gona na lotu Vakarisito yalayala oti era duavata kei Paula, ena nona kaya ni sa yaco me dua na imuri i Karisito: “Au sa biuta tani na ka kece ga e na vukuna [vuku i Jisu]; au sa okati ira kece ga me ra de ni manumanu, me noqu kina na Karisito.” (Filipai 3:​8, VV) E vakuakua o Paula ena veika e sega ni yaga me rawa ni dina tiko ga kina ina nona a vakaio vua na Kalou.

5. Na veitaucici cava e vakacavara vinaka o Paula, eda na rawata tale ga vakacava?

⁵ E lewai koya vinaka o Paula ni cici ena veitaucici vakayalo, e rawa kina vua me kaya: “Au sa vala oti e nai valu vinaka, au sa ciciva oti na cere, au sa taura matua na vakabauta: emuri, sa maroroi me noqu nai sala vakaturaga ni valavala dodonu, o koya ena solia mai vei au na Turaga, o koya na turaga-ni-lewa dodonu, e na siga ko ya; ia ena sega vei au duaduaga, vei ira kece talega era sa vinakata na nona rairai mai.” (2 Timoci 4:​7, 8) E rawa nida na kaya tale beka ga oya? E rawa ga ke da lewai keda vinaka nida cici tiko ena vakabauta, da qai sega ni soro ena veitaucici vakarisito me yacova ni cava.

Lewai Keda Vinaka Meda Rawa Kina ni Caka Vinaka

6. Na cava na lewa vinaka, kei na cava e rua na sala eda na vakaraitaka kina?

⁶ Na vosa vakaiperiu kei na vosa vakirisi e vakadewataki ena iVolatabu me ‘lewa vinaka’ e kena ibalebale, ni tu vua e dua na kaukaua me lewai koya rawa kina. E dau vakawasoma me dusia nona vakuai koya e dua mai na veika ca. Ia e macala ni gadrevi tale ga meda lewai keda vinaka me rawa kina nida cakava na veika vinaka. E dau noda ivalavala ga na kawatamata sega ni uasivi meda caka ca, o koya gona, e rua na ka eda na cakacaka kina vakaukaua. (Dauvunau 7:​29; 8:​11) Oya na noda tarovi keda meda kua ni cakava na veika ca, da qai sasaga tale ga meda cakava na veika vinaka. Ia, ena dua tale na basoga ni vakasama, na noda lewa na yagoda meda caka vinaka e itatarovi sara ga vei keda, meda kua kina ni cakava na veika ca.

7. (a) Na cava meda masulaka me vakataki Tevita ga? (b) Noda vakasamataka na cava ena vukei keda meda lewai keda vinaka cake?

⁷ Macala, ni na gadrevi meda lewai keda vinaka meda dei tiko ga kina ena noda yalayala vua na Kalou. E dodonu meda masu me vakataki Tevita: “Kemuni na Kalou, mo ni bulia e lomaqu na yalo e savasava; ka vakavouya e lomaqu na yalo sa dei tiko.” (Same 51:10) E rawa nida vakasamataka na yaga ni kena sega ni vakayacori na veika cala se veika e rawa ni vakaleqa na yago. Vakasamataka mada na veika ca e rawa ni kauta mai: na tauvimate bibi, ca ni veimaliwai, kei na matedole. Ena yasana kadua, vakasamataka na levu ni veika vinaka ena sotavi ni muri na ivakarau ni bula e vakarota o Jiova. Ia e dodonu meda kila tiko ni lomada e dau veivakaisini. (Jeremaia 17:9) Meda dei ni vorata na sasaga ni lomada me vakalailaina na bibi ni kena tutaki na ivakatagedegede i Jiova.

8. Na cava e rawa nida vakadinata mai na veika eda sotava? Tukuna na kena ivakaraitaki.

⁸ Levu vei keda eda kila mai na veika eda sotava ni dau tovolea na yagoda me kinoca na yalo ni noda soli keda. Me kena ivakaraitaki, na cakacaka vakavunau. E marautaka o Jiova nodra lomasoli na tamata mera vakaitavi ena cakacaka ni veivakabulai. (Same 110:3; Maciu 24:14) Levu vei keda, e sega ni ka rawarawa noda vulica meda vunau e matanalevu. E gadrevi kina​—qai gadrevi tiko ga​—meda lewa na yagoda, meda “vakamalumalumutaka” da qai “vakabobulataka,” me kua ga nida vakalaiva me rawai keda, me latia na noda vunau.​—1 Korinica 9:​16, 27; 1 Cesalonaika 2:2.

“E na Veika Kece Ga”?

9, 10. Na cava e okati ena noda ‘lewai keda vinaka ena ka kece ga’?

⁹ Na ivakaro ni iVolatabu meda ‘lewai keda vinaka ena veika kece ga’ e vakaraitaka ni levu na ka e vauci, e sega ni noda lewa wale ga noda cudru kei na noda sega ni cakava na veika vakasisila. Eda na rairai nanuma nida sa lewai keda rawa ena tikina oqo, ke vaka kina, e dodonu meda marau. Ia, vakacava ena so tale na basoga ni bula e sega ni vakaraitaki votu kina na noda lewai keda vinaka tiko se sega? Kena ivakaraitaki, kaya mada ke da bula ena vanua vutuniyau qai toka sara e cake na ivakatagedegede ni bula. Ena sega beka ni ka vakavuku meda vulica na vakuakua ena voli vakayauyau ni veika e sega na betedra? E vinaka vei ira na itubutubu mera vakavulici luvedra mera kua ni volia na veika kece e tao kina na matadra baleta ga ni tu vakarawarawa, e veidreti, se rawa nira sauma. Me rawa gona ni mana na ivakasala vaka oqo, mera ivakaraitaki sara ga na itubutubu.​—Luke 10:​38-​42.

¹⁰ Na noda vulica meda yalana na ka eda taukena sa na qai vaqaqacotaka ga na noda lewa rawa na yaloda. Eda na lomavakacegu tale ga ena veika eda taukena da qai nanumi ira e sega ni tu vei ira na ka, sega ena nodra digidigi ga, ia nira sega ni rawata. Io, na ivakarau ni bula rawarawa e veibasai sara ga kei na itovo ni rai sa takalevu tu, oya meda “cakava ga na ka e vinaka vei keda,” se “e ganiti keda na ka vinaka duadua.” Sa qai tu tale na vuravura ni veivoli e vakabulabulataka na gagadre ni noda vakacegui vakatotolo, ia me kua ni guilecavi, e cakava oqo me rawailavo vakalevu kina. Na veika oqo e rawa ni tarova noda sasaga meda lewai keda vinaka. Se qai volai wale ga oqo ena dua na ivola mai na dua na vanua vutuniyau mai Urope: “Ke gadrevi vei ira na bula dravudravua mera saga vakaukaua mera lewa vakavuku nodra volivoli, sa na qai vakacava li na kena gadrevi vei ira na vakailavo era bula ena vanua vutuniyau nikua!”

11. Na cava e yaga kina meda yalana na ka eda taukena, ia na cava e dredre kina oqo?

¹¹ Kevaka e dredre meda vakaduiduitaka na veika eda vinakata mai na veika eda gadreva dina, ena rairai yaga meda yalomatuataka na noda ikalawa. Kena ivakaraitaki, ke da via muduka noda dau vakasabusabu ilavo, de vinaka meda nakita meda kua ni dinau se nida lai volivoli, me vakarauta ga na ilavo eda kauta. Nanuma ni kaya o Paula ni “sai yau levu na lotu kei na lomavinaka.” Na vuna: “Ni sa sega na ka eda sa kauta mai ki vuravura, a sa dina sara ni sa sega na ka eda na kauta tani rawa. Ia kevaka sa tu vei keda na kakana kei nai sulu, me da lomavinaka kina.” (1 Timoci 6:6-8) E dina beka vei keda oya? Na noda vulica me rawarawa ga noda bula, me kua nida vakaosoosotaki ena veika tawayaga eda binia ena noda via vakamamautaka ga na yaloda​—okati e ke na ka kece e rawa ni garova na yaloda​—e macala ni gadrevi ga kina meda lewai keda vinaka. E dodonu sara ga me vulici.

12, 13. (a) Ena sala cava soti e vauci kina na noda lewai keda vinaka ena soqoni vakarisito? (b) Na cava e so tale na basoga ni bula meda lewai keda vinaka kina?

¹² Na noda tiko ena soqoni vakarisito, soqo ni tabacakacaka, se ena soqo ni tikina e gadrevi sara tale ga kina meda lewai keda vinaka. Kena ivakaraitaki, e gadrevi vakabibi na itovo oqo me kua ni ciriyawa kina noda vakanananu ena gauna e vakacagau tiko kina na porokaramu. (Vosa Vakaibalebale 1:5) Ena gadrevi tale ga meda lewai keda vinaka me kua kina nida vakasolokakana vei ira eda dabe veitikivi, ni oqo ena veivakasosataki da qai sega tale ga ni vakarorogo vinaka vua e vunau. Na noda veiveisautaka noda ituvatuva meda yaco totolo yani e vanua ni soqo e gadrevi tale ga kina meda lewai keda vinaka. Kuria, ena gadrevi tale ga meda lewai keda vinaka meda vakatikitikitaka na gauna meda vakavakarau ena soqoni da qai vakaitavi kina.

¹³ Na noda lewai keda vinaka ena veika lalai ena vakarautaki keda tale ga meda lewai keda vinaka ena veika lelevu. (Luke 16:10) Koya gona, e rui bibi meda vakavulici keda meda wilika vakawasoma na iVolatabu kei na ivola yavutaki ena iVolatabu, meda vulica da qai vakasamataka! E ka vakavuku meda vakavulici keda meda qaqarauni me baleta na cakacaka saumi, itokani, itovo, kei na ivakarau ni bula e sega ni veiganiti, se meda vakavulici keda meda vakuakua mai na veika tawayaga ena butakoca noda gauna ni qaravi Kalou! Na noda ogaoga tiko ena cakacaka i Jiova e itataqomaki mai na veika e rawa ni vakamuai keda tani mai na parataisi vakayalo ni ivavakoso i Jiova e vuravura raraba.

Dou Tamatabula ena Lewa Vinaka

14. (a) Mera na vulica vakacava na gone mera lewai ira vinaka? (b) Na cava na kena yaga nira vakavulici taudonu na gone ena itovo vaka oqo?

¹⁴ Na gone e se qai sucu e sega ni rawa ni lewai koya vinaka. Ena dua na nodra tikidua na kenadau ena nodra itovo na gone, era kaya kina: “E sega ni basika vakidacala na lewa vinaka. Ena vinakati e ke nodra veidusimaki kei na veitokoni nodra itubutubu me rawa kina vei ira na gone kei na gonedramidrami mera vulica mera lewai ira vinaka. . . . Nira veidusimaki tiko na itubutubu, sa na qai toso cake tiko ga nodra lewai ira vinaka ena gauna ni vuli.” Ena dua na vakadidike e vauci ira na gone yabaki va, e vakaraitaka ni o ira era sa bau vulica toka mera lewai ira vinaka era “tubucake mera itabagone yalorawarawa, mera taleitaki, ra yaloqaqa, yalodei ra qai nuitaki.” Vei ira na gone era se sega ni bau vulica mera lewai ira vinaka, e laurai nira tubucake mera itabagone “dau galili, yalolekaleka ra qai drecala. Era datuvutaka tale ga na colaitavi, ra qai dau levea na ka dredre kece.” Koya gona, me kua ni yaco me tamata veilecayaki e dua ni sa uabula, me vulica ni se gone me lewai koya vinaka.

15. Na cava e vakaraitaka ke da sega ni lewai keda vinaka, e veibasai kei na isausau cava e kotori ena iVolatabu?

¹⁵ E vakatale ga oya kevaka meda tamatabula vakarisito, meda vulica meda lewai keda vinaka. Kevaka e sega, ena vakaraitaka nida se gone vakayalo. E vakauqeti keda na iVolatabu meda ‘tamatabula ena vuku.’ (1 Korinica 14:20) Na noda isausau “me da yaco sara koi keda kecega me da lomavata e na vakabauta, ka kila sara na Luve ni Kalou, me da tautauvata kei nai vakarau ni tamata dina, era sa sinai sara kei Karisito.” Na vuna? “Me da kakua [kina] ni vagonegonea tiko, ka veitosoyaki ka veikauyaki e na cagi kecega ni vakavuvuli, e nai lawaki ca ni tamata, ena dauveivaqaseni sa nakiti kina na veivakacalai.” (Efeso 4:​13, 14) Macala gona ni noda vulica meda lewai keda vinaka e yaga ena noda bula vakayalo.

Saga Meda Lewai Keda Vinaka

16. E vakarautaka vakacava o Jiova na veivuke?

¹⁶ Me rawa nida lewai keda vinaka, eda gadreva na veivuke ni Kalou, sa vakarautaka sara tale tu ga o koya. Na Vosa ni Kalou e vaka na iloilo makare vinaka, e vakaraitaka na vanua meda vakavinakataka, qai dusimaki keda ena sala me vakayacori kina. (Jemesa 1:​22-​25) O ira tale ga na mataveitacini dauloloma era tu vakarau mera veivuke. Era veivuke vaka kina na qase ni ivavakoso vakarisito. O Jiova mada ga e solia vakarawarawa na yalo tabu kevaka eda kerea. (Luke 11:13; Roma 8:​26) Koya gona, meda vakayagataka vinaka na isolisoli oqo. Ena veivuke na veika e vakaturi ena tabana e 21.

17. Na cava e vakayaloqaqataki keda kina na Vosa Vakaibalebale 24:16?

¹⁷ E veivakacegui dina meda kila ni kauaitaka o Jiova noda sasaga meda vakamarautaki koya! Dodonu me uqeti keda oqo meda lewai keda vinaka sara kina. Ke da mani malumalumu da qai coriti, meda kua ni soro koso ena noda sasaga. “Ni sa bale vakavitu na tamata yalododonu, ia sa na tu cake tale.” (Vosa Vakaibalebale 24:​16) Na gauna kece eda vakamarautaki Jiova kina, e dodonu meda marau tale ga. Eda kila deivaki tale ga ni marautaki keda o Jiova. E kaya e dua na iVakadinadina, ni bera ni qai mai yalataka nona bula vei Jiova, ni gauna kece e tarovi koya rawa kina me kua ni vakatavako ena loma ni dua na macawa, e dau vakaicovitaki koya ni volia e dua na ka yaga mai na ilavo e vakabula ena vuku ni nona lewai koya vinaka.

18. (a) Na cava e vauci ena noda saga meda lewai keda vinaka? (b) Na cava e vakadeitaka o Jiova?

¹⁸ Kena ilutua, meda nanuma ni noda lewai keda vinaka e vauci kina noda vakasama kei na lomada. E rawa nida raica oqo ena vosa nei Jisu: “O koya yadua ena raica na yalewa me dodomo kina, sa dauyalewa oti kaya e lomana.” (Maciu 5:​28; Jemesa 1:​14, 15) O koya e vulica me lewa nona vakasama kei na lomana ena rawarawa sara ni lewa na yagona. Meda vakadeitaka mada ga e lomada, meda kua ni cakava na veika ca, da qai kua sara tale mada ga ni vakasamataka. Ke vure mai ena noda vakanananu na vakasama cala, tagutuva totolo sara. E rawa tale ga nida dro mai na veitemaki ke da masuta me coba matua tiko na matada vei Jisu. (1 Timoci 6:​11; 2 Timoci 2:​22; Iperiu 4:​15, 16) Nida solia kece noda vinaka, eda na muria kina na ivakasala ena Same 55:22: “Mo biuta vei Jiova na nomui colacola bibi, ena tokoni iko ko koya: ena sega ni laivi ira na yalododonu me ra vakayavalataki e na dua na gauna.”

O se Nanuma Tiko?

• Na cava e rua na sala eda na lewai keda vinaka kina?

• Na cava na kena ibalebale meda ‘lewai keda vinaka ena ka kece ga’?

• Na vakatutu yaga cava mai na noda vuli meda lewai keda vinaka, e uqeti iko vakalevu?

• E vu e vei na noda lewai keda vinaka?

[Kato/iYaloyalo ena tabana e 21]

Sala Meda Lewai Keda Vinaka Kina

• Lewai keda vinaka ena veika lalai

• Vakasamataka na kena yaga nikua kei na veigauna mai muri

• Sosomitaka na veika e vakatabuya na Kalou ena veika e vakauqeta

• Tagutuva totolo na vakasama cala

• Vakasamataka na veika e veitaraicake vakayalo

• Ciqoma nodra veivuke na tacida lotu Vakarisito matua

• Dro mai na veitemaki

• Masuta na veivuke ni Kalou ena gauna o temaki kina

[iYaloyalo ena tabana e 19]

Noda lewai keda vinaka ena vukei keda meda caka vinaka