Watchtower LAIBRI ENA INTERNET
Watchtower
LAIBRI ENA INTERNET
vakaViti
  • IVOLATABU
  • IVOLA
  • SOQONI
  • w03 12/15 t. 19-24
  • Tu Vakarau me Baleta na Siga i Jiova

Sega na kena vidio.

Vosota, sega ni laurai rawa na vidio.

  • Tu Vakarau me Baleta na Siga i Jiova
  • Na Vale ni Vakatawa Kacivaka na Matanitu i Jiova—2003
  • Ulutaga Lailai
  • iKuri ni Ulutaga
  • Me Kua na Yalowele
  • Valuta na Sosovu Vakayalo
  • Cata na iVakarau ni Bula e Veivakaleqai Vakayalo
  • Meda Saga Vakaukaua Meda Tu Vakarau
  • “Dou Yadra Tiko”—Sa Yaco Mai na Gauna ni Veilewai!
    Na Vale ni Vakatawa Kacivaka na Matanitu i Jiova—2005
  • “Ni Yadra Tiko!”
    Na Vale ni Vakatawa Kacivaka na Matanitu i Jiova—2003
  • Sa Qai Bibi ga Meda Yadra Tiko
    Na Vale ni Vakatawa Kacivaka na Matanitu i Jiova—2003
  • O sa Tu Vakarau ena Siga i Jiova?
    Na Vale ni Vakatawa Kacivaka na Matanitu i Jiova—2007
Raica Tale Eso
Na Vale ni Vakatawa Kacivaka na Matanitu i Jiova—2003
w03 12/15 t. 19-24

Tu Vakarau me Baleta na Siga i Jiova

“Mo dou tu vakarau tale ga, ni na yaco mai na Luve ni Tamata e na dua na gauna dou sega ni namaka.”​—MACIU 24:​44, VV.

1. Na cava meda kauaitaka kina na siga i Jiova?

NA SIGA rerevaki i Jiova e siga ni veiraravui kei na cudru, yaluma kei na rarawa, butobuto kei na veivakarusai. Na ‘siga levu ka rerevaki oqo’ ena yaco dina mai me vakarusa na ituvaki ca nikua, me vaka ga na rusa ni vuravura ca ena siga i Noa ena nodra luvuci ena Waluvu. Io ena yaco dina mai. Ia, “ko koya yadua sa na masuta na yaca i Jiova, ena bula.” (Joeli 2:​30-​32; Emosi 5:​18-​20) Na Kalou ena vakarusai ira nona meca qai vakabulai ira nona tamata. A sega ni lokuyara tale na parofita o Sefanaia ena nona kacivaka: “Sa voleka mai na siga i Jiova na siga ka uasivi, sa voleka mai, io sa kusa sara mai.” (Sefanaia 1:​14) Gauna cava beka ena yaco kina na veilewai ni Kalou oqo?

2, 3. Na cava e bibi kina meda vakarautaki keda ena siga i Jiova?

2 “Ia na siga ko ya kei na tiki-ni-siga ko ya sa sega e dua e kila, ko ira na agilose mai lomalagi era sega ni kila, se ko koya na Luvena, ko koya duaduaga na Tamaqu,” e kaya o Jisu. (Maciu 24:36) Nida sega ni kila na gauna ena yaco kina, e bibi meda muria na ka e tukuni ena noda tikinivolatabu ni yabaki 2004: “Mo dou yadra tiko . . . dou tu vakarau tale ga.”​—Maciu 24:​42, 44, VV.

3 E votu ena ka e kaya oqo o Jisu, ni na totolo ga na nodra na kumuni mera taqomaki o ira na tu vakarau, ia ena yasana kadua era na biu wale tu e so, a kaya: “Ena qai lewe rua na tagane erau na tiko e na were; ena kau tani e dua, ka biu e dua. Ena lewe rua na yalewa erau na qaqi sila, ena kau tani e dua, ka biu e dua.” (Maciu 24:​40, 41) Ena gauna leqataki oya, ena vakacava tu na keda ituvaki? Eda na tu vakarau beka, se na toboki keda vakidacala na siga oya? E vakatau vakalevu oya ena veika eda cakava ena gauna oqo. Meda tu vakarau gona me baleta na siga i Jiova, ena gadrevi meda qarauna me kua ni takavi keda e dua na ivakarau ni yalo e takalevu tu nikua, meda valuta e dua na ituvaki e leqataki vakayalo, kei na noda cata matua e so na ivakarau ni bula.

Me Kua na Yalowele

4. Na ivakarau ni rai cava a tu vei ira na tamata ena siga i Noa?

4 Vakasamataka mada na siga i Noa. E kaya na iVolatabu: “Ni sa vakabauta sa rere kina ko Noa, ni sa vakasalataka oti na Kalou e na vuku ni veika sa bera ni rairai mai, a sa taya e dua na waqa ko koya me vakabulai ira kina na nona lewe-ni-vale.” (Iperiu 11:7) Macala ni na dreta na mata na waqa, ni oqo e dua na ka vou, qai laurai levu na kena vakaitamera. Kena ikuri, o Noa e “dauvunautaka nai valavala dodonu.” (2 Pita 2:5) Ia, a sega ni veisautaki ira na tamata ena gauna oya na nodra raica na nona taya na waqa o Noa se na nona vunau. Baleta? Nira a “kana na tamata, ka gunu, ka vakawati ka veimusumusukitaki me ra vakawati.” Vei ira na tamata a vunau kina o Noa, era wele nira sa rui osooso ena veika ni nodra bula e veisiga kei na lasa, ra qai “sega mada ni kila eliu, a sa qai yaco dina na waluvu, ka kauti ira kece yani.”​—Maciu 24:​38, 39.

5. Na ivakarau ni rai cava a tu tale ga vei ira na lewe i Sotoma ena gauna i Loti?

5 A vakatale ga oya ena gauna i Loti. E kaya na iVolatabu: “Era kana tiko, era gunu, era veivoli, era teitei, era tara vale; ia e na siga ka lako tani kina ko Loti e Sotoma, sa qai tau mai lomalagi na buka waqa kei na sulifure, ka vakamatei ira kecega.” (Luke 17:​28, 29) Ni rau vakasalataki Loti oti na agilosi me baleta na veivakarusai sa voleka, sa qai vakasavuya vei rau na vugona o Loti na ka sa vakarau yaco. Ia erau raici koya me “vaka e dua na dauveivakalialiai.”​—Vakatekivu 19:14.

6. Na ivakarau ni yalo cava meda qarauna?

6 Me vaka ena siga i Noa kei Loti, “ena vaka tale ga kina na nona tiko tawarairai na Luve ni tamata,” e kaya o Jisu. (Maciu 24:​39, NW; Luke 17:30) Io, e dua na ivakarau ni yalo e takalevu vei ira e levu nikua oya na yalowele. E dodonu meda qarauna meda kua ni vakamuai ena ivakarau ni yalo vaka oqo. E sega ni ca na kana se gunu vakarauta. Na vakamau sara tale ga e ituvatuva ni Kalou. Ia, kevaka eda sa vakaliuca ena noda bula na veika vaka oqo qai biu vakatikitiki na veika vakayalo, e vakaraitaka beka oya nida sa tu vakarau me baleta na siga rerevaki i Jiova?

7. Na taro bibi cava meda taroga ni bera nida lalawataka e dua na sasaga, na cava na vuna?

7 “Sa vakalekalekataki na gauna sa vo,” e kaya na yapositolo o Paula. “Ia oqo me ra vakataki ira era sa sega ni vakawati ko ira na tagane sa vakawati.” (1 Korinica 7:​29-​31) Sa lekaleka sara na gauna sa vo meda vakacavara kina na noda ilesilesi vakalou ni cakacaka vakavunau. (Maciu 24:14) Vei ira mada ga na vakawati, e kaya o Paula me kua ni sivia na nodra kauaitaka ga na kedra isa me sa lai ikarua kina ni ka ena nodra bula na veika e vauca na Matanitu ni Kalou. E matata e ke ni a vakatura tiko o Paula na ivakarau ni bula e veibasai sara kei na yalowele. A kaya o Jisu: “Dou vakasaqara taumada na matanitu ni Kalou, kei na nona yalododonu.” (Maciu 6:​33) Ni bera nida lalawataka e dua na sasaga se da vakatulewa, na taro bibi meda taroga, ‘Ena tara vakacava oqo na noqu vakaliuca na Matanitu ni Kalou?’

8. Ke da sa vakaliuca tiko na veika ni bula e veisiga, na cava meda cakava?

8 Vakacava ke o vakila ni sa rui vakaosoosotaki iko vakalevu na veika ni bula e veisiga me sa lai vakatikitikitaki kina na veika vakayalo? Oya me sega sara ga ni duidui na ivakarau ni noda bula kei ira eda tiko veitikivi era sega ni kila na ka dina ena iVolatabu, ra qai sega ni dautukutuku ni Matanitu ni Kalou. Ke vaka oya na keda ituvaki, e dodonu meda masulaka. O Jiova e rawa ni veivuke me tiko vei keda na itovo ni rai dodonu. (Roma 15:5; Filipai 3:​15, VV) E rawa tale ga ni vukei keda meda vakaliuca na veika e vauca na Matanitu ni Kalou, meda cakava na ka dodonu, da qai vakayacora sara noda itavi vua.​—Roma 12:2; 2 Korinica 13:7.

Valuta na Sosovu Vakayalo

9. Me vaka e cavuti ena Vakatakila 16:​14-​16, na cava e bibi kina meda valuta na sosovu vakayalo?

9 Na parofisai vata ga e cavuti kina na roro mai ni “i valu e na siga bibi koya, na siga ni Kalou Kaukauwa,” na Amaketoni, e vakarota tale ga ni so era na sega ni yadra tiko. “Raica, au sa lako yani me vaka na daubutako!” e kaya na Turaga o Jisu Karisito. “Sa kalougata ko koya sa yadra tiko, ka maroroya tiko na nona i sulu, me kakua kina ni veilakoyaki luvawale voli ka vakamaduataki e na matana levu.” (Vakatakila 16:​14-​16, VV) Na isulu e cavuti e ke, oya na veika e vakatakilakilataki keda meda lotu Vakarisito iVakadinadina i Jiova. Oqo e okati kina noda cakacaka ni dau kacivaka na Matanitu ni Kalou kei na noda itovo vakarisito. Ke da sosovu vakayalo, ena luvati tani vei keda na ivakatakilakila vakarisito oya. Macala ni oqo ena ka vakamadua dina qai vakarerevaki. Meda qarauna gona meda kua ni sosovu vakayalo se vucesa. Eda na valuta vakacava na itovo oqo?

10. Ena vukei keda vakacava na wili iVolatabu e veisiga meda yadra tiko ga vakayalo?

10 Na iVolatabu e vakadreta vakavica vata na bibi ni noda yadra tiko kei na noda yalomatua. Me kena ivakaraitaki ena Kosipeli, e kune kina na veivakadreti oqo: “O koya gona mo dou yadra tiko” (Maciu 24:​42, VV; 25:13; Marika 13:​35, 37); “dou tu vakarau” (Maciu 24:​44, VV); “dou qarauni kemudou vinaka; dou yadra tiko” (Marika 13:​33, VV); “dou vakarau tu” (Luke 12:40). Ni oti nona tukuna na yapositolo o Paula na lako vakidacala mai ni siga i Jiova, sa qai vakauqeti ira na nona itokani ena vakabauta: “Me da sa kakua gona ni moce tiko me vakataki ira na tani; ia me da yadra tiko ga ka yalo matua.” (1 Cesalonaika 5:​6, VV) Ena iotioti ni ivola ena iVolatabu, e vakabibitaka o Jisu Karisito e sa vakalagilagi oti ni na totolo na nona lako mai, e kaya: “Ka’u na lako vakatotolo yani.” (Vakatakila 3:​11; 22:​7, 12, 20) Levu tale ga na parofita ni Iperiu era vakamacalataka ra qai veivakasalataki tale ga ena siga levu ni veilewai i Jiova. (Aisea 2:​12, 17; Jeremaia 30:7; Joeli 2:​11; Sefanaia 3:8) Nida wilika gona e veisiga na Vosa ni Kalou na iVolatabu, kei na noda vakasamataka na veika eda wilika, ena vukei keda meda yadra tiko ga vakayalo.

11. Na cava e bibi kina na noda vulica vakataki keda na iVolatabu meda yadra tiko ga kina vakayalo?

11 Io, e dua dina na ivukevuke yaga meda yadra tiko ga kina vakayalo oya na noda gumatua na vulica vakataki keda na iVolatabu, nida vakayagataka na ivolatabaki era yavutaki ena iVolatabu e vakarautaka mai na “dauveiqaravi yalo dina ka vuku”! (Maciu 24:​45-​47, VV) Ia, me yaga noda vuli vakataki keda, ena vinakati me dua na kena ituvatuva dei qai caka wasoma. (Iperiu 5:14–​6:3) E dodonu meda kania wasoma na kakana vakayalo. Macala ni ka ni bolebole toka ena gauna oqo me kunei na gauna me caka kina. (Efeso 5:​15, 16) Ia me nanumi tiko, ni sega ni rauta ke da wilika na iVolatabu kei na ivola era yavutaki vakaivolatabu ena gauna ga eda qai galala kina. Io, e bibi me wasoma na noda vuli vakataki keda, meda “dei tiko kina e na vakabauta” da qai yadra tiko.​—Taito 1:​13, VV.

12. E veivuke vakacava na soqoni vakarisito, soqo ni tabacakacaka, kei na soqo ni tikina meda kua ni sosovu vakayalo?

12 Na soqoni vakarisito, soqo ni tabacakacaka, kei na soqo ni tikina ena veivuke tale ga ena valuti ni sosovu vakayalo. Ena vukei keda vakacava oqo? Ena vuku ni veivakadreti eda rogoca kina. Ena sosoqoni vata vaka oqo e vakananumi vakawasoma kina vei keda ni sa voleka na siga i Jiova. Na soqoni vakarisito e veimacawa e dolava tale ga na sala meda “veivakatakatai me dauloloma kai valavala vinaka.” Na veivakatakatai se veivakayaloqaqataki vaka oqo ena vukei keda meda yadra tiko vakayalo. Sa rauta meda vakaroti meda sosoqoni wasoma nida raica ni “sa toro voleka mai na siga.”​—Iperiu 10:​24, 25.

13. E vukei keda vakacava na cakacaka vakaitalatala vakarisito meda yadra tiko ga kina vakayalo?

13 Ena vukei keda tale ga meda yadra tiko ga, ke vu mai lomada noda vakaitavi ena cakacaka vakaitalatala vakarisito. Ni sala uasivi duadua me makare tiko kina ena noda vakasama na ivakatakilakila ni gauna kei na kedra ibalebale, oya na noda lai vakasavuya yani vei ira tale na so. Kuria, nida raica na nodra toso vakayalo na noda vuli iVolatabu ra qai tekivu bulataka na veika era vulica, ena vakavuna oqo meda sa qai yadra vinaka ga, meda kua ni wele. E kaya na yapositolo o Pita: “Me qai yadra tiko kina na nomuni vakasama, ka mo ni yalomatua.” (1 Pita 1:​13, VV) O koya gona, e dua na sala vinaka ena vukei keda meda kua kina ni sosovu vakayalo oya na noda ‘ogaoga tiko ga ena cakacaka ni Turaga.’​—1 Korinica 15:​58, VV.

Cata na iVakarau ni Bula e Veivakaleqai Vakayalo

14. Me vaka e cavuti ena Luke 21:​34-​36, na ivakarau ni bula cava e veivakasalataki kina o Jisu me qarauni?

14 Ena nona parofisai vakasakiti o Jisu me baleta na ivakatakilakila ni nona tiko tawarairai, e cavuta tale kina o koya e dua na ivakasala. E kaya: “Ia dou qarauni kemudou vinaka, de dua na siga sa bibi kina na yalomudou e na daukana, kei na daumateni, kei na lomaocaoca e na veika ni bula oqo, ka yaco vakidacala kina vei kemudou na siga ko ya. Ni na vaka ga nai cori ni sa yaco vei ira kecega era sa tiko e dela i vuravura taucoko. O koya mo dou qai vakatawa, ka daumasu tikoga, mo dou vakabau kina mo dou yaga me bula mai na ka kecega oqo ena yaco mai ka tu e na mata ni Luve ni tamata.” (Luke 21:​34-​36) E tukuna vakamatata e ke o Jisu na ivakarau ni bula era na guta na tamata: na daukana, na daumateni, kei na ivakarau ni bula e vakavuna na lomaocaoca.

15. Na cava meda levea kina na kana kei na gunu vakasivia?

15 Na kana vakasivia kei na gunu vakasivia e sega ni salavata kei na ivakavuvuli ena iVolatabu, e dodonu meda cata. E kaya na iVolatabu: “Mo kakua ni tiko kei ira era daugunu waini, kei ira era daukusikusima.” (Vosa Vakaibalebale 23:20) Ia me kua ni nanumi, ke yacova sara na ivakatagedegede ni kana kei na gunu vaka oya sa na qai veivakaleqai. Ni se bera sara oya, e rawa mada ga ni vakavuna na sosovu kei na vucesa. E kaya na Vosa Vakaibalebale: “Sa garogaro na lomana na vucesa, ka sega na ka e rawata.” (Vosa Vakaibalebale 13:4) De na via cakava beka na loma ni Kalou na tamata vaka oqo, ia ena sega ga ni cakava rawa ni sega ni rawata.

16. Na cava meda cakava me kua kina nida lomaocaocataka na bula ni noda vuvale?

16 Na lomaocaoca cava soti e veivakasalataki kina o Jisu? E okati kina na noda qarava na veika me baleti keda ga, qaravi ni bula ni vuvale, kei na veika vaka oya. E sega ni ka vakayalomatua meda laiva na veika vaka oqo me vakabibitaki keda! “Ia ko cei vei kemudou, ni sa lomaocaoca, sa rawata me vakuria vakalailai ga na siga ni nona bula?” a taroga o Jisu. A vakasalataki ira gona na vakarorogo: “O koya mo dou qai kakua ni lomaocaoca, ka kaya, A cava eda na kania? se, A cava eda na gunuva? se, A cava eda na vakaisulu kina? ni sa dauvakasaqara na ka kecega oqo ko ira na lewe ni veivanua: ni sa kila na Tamamudou vakalomalagi sa yaga vei kemudou na ka kecega oqo.” Na noda vakaliuca ena noda bula na veika e vauca na Matanitu ni Kalou kei na noda nuidei ni o Jiova ena vakarautaka na ka meda bula kina, ena vukei keda meda kua ni lomaocaoca qai vukei keda tale ga meda yadra tiko ga.​—Maciu 6:​25-​34.

17. E rawa ni vakavuna vakacava na lomaocaoca na qarai ni iyau?

17 E rawa ni vakavuna tale ga na lomaocaoca na qarai ni iyau. Me kena ivakaraitaki, e so era vakadredretaka nodra bula nira muria na ivakarau ni bula era sega ni ceguva rawa vakailavo. E so tale era bacani ena ituvatuva ni rawailavo totolo se na nodra vakailavotaka e dua na bisinisi e sega ni macala ena rawatubu se sega. Vei ira tale e so, na vuli me rawati kina na tu vinaka vakailavo e yaco me dua na icori. Macala ni na bau vinakati e dua na ivakatagedegede ni vuli me rawati kina e dua na cakacaka. Ia, na kena dina ni so era tini vakaleqai kina vakayalo baleta e kania vakalevu na nodra gauna na nodra sasagataka na vuli torocake. Dua na ituvaki vakarerevaki oqo meda tu kina ni sa voleka na siga i Jiova! E vakarota na iVolatabu: “Ia ko ira era sa gadreva me ra vutuniyau, era sa bale ki na dauvere kei nai cori, kei na gagadre ca e vuqa, ka lialia, ka dauveivakacacani, oqori sa luluvuraki ira na tamata e na mate kei na rusa.”​—1 Timoci 6:9.

18. Meda kua ni coriti ena domodomoiyau, na cava meda bucina?

18 E dua na sala bibi meda kua ni coriti kina ena domodomoiyau, oya na noda bucina meda vakaduiduitaka rawa na veika vinaka mai na veika ca nida vakatulewa. E rawa ni bucini na ivalavala oqo ke da kania wasoma na ‘kakana dina vakayalo sa ganiti ira sa qase’ kei na noda ‘vakavulica na lomada.’ (Iperiu 5:​13, 14, VV) Ke da kila vinaka gona na “veika sa vinaka sara” nida navuca na ka meda vakaliuca ena noda bula, ena taqomaki keda mai na noda digidigi cala.​—Filipai 1:​10.

19. Kevaka eda siqema ni lailai noda gauna me baleta na veika vakayalo, na cava meda cakava?

19 E rawa ni vakamatabokotaki keda na domodomoiyau, me lailai se sega kina na gauna me qarai kina na veika vakayalo. E rawa vakacava nida dikevi keda meda kua ni coriti ena ivakarau ni bula vaka oqo? E dodonu meda masulaka da vakasamataka na sala cava soti eda rawa ni vakarawarawataka kina noda bula. A kaya o Tui Solomoni e Isireli makawa: “Sa vinaka na nona moce na tamata daucakacaka se kana vakalailai se kana vakalevu: ia na nonai yau levu na vutuniyau sa dredre kina vua me moce.” (Dauvunau 5:​12) E kania beka e levu na noda gauna da qai vakayagataka vakalevu kina na noda igu na maroroi ni iyau e sega soti ni yaga? Na levu ga ni ka eda taukena, na levu tale ga ni ka eda na vakavinakataka, sauma, da qai taqomaka. Ena yaga beka vei keda meda vakarawarawataka noda bula nida biuta laivi e so na veika eda taukena?

Meda Saga Vakaukaua Meda Tu Vakarau

20, 21. (a) Na cava e vakadeitaka na yapositolo o Pita me baleta na siga i Jiova? (b) Na ivalavala cava meda tomana tiko ga nida tu vakarau me baleta na siga i Jiova?

20 A vakarusai na ivakarau ni veika ena siga i Noa, ena vakatale ga oya na ivakarau ni veika nikua. E vakadeitaka vei keda na yapositolo o Pita: “Na siga ni Turaga [o Jiova] ena lako mai me vaka na daubutako e na bogi, ena lako tani kina ko lomalagi e na rorogo tatamosamosa, ena waicala talega na veivu ni ka ni sa vakamai, ena kamayavu talega ko vuravura kei na ka kecega sa tu kina.” Na lomalagi vakaivakatakarakara​—na veimatanitu ca​—se na vuravura ivakatakarakara​—na kawatamata e tawase mai vua na Kalou​—ena sega ni bulata na cudru katakata ni Kalou. Ni tukuna tiko se rawa vakacava nida vakarau ena siga oya, e kaya kina o Pita: “Ia ni na takali yani na ka kecega oqo, a cava nai valavala sa kilikili kei kemudou, e nai valavala savasava kei na daulotu, ni dou sa dauwaraka ka daugadreva sara na kena yaco mai na siga ni Kalou [o Jiova].”​—2 Pita 3:​10-​12.

21 Na noda tiko wasoma ena soqoni vakarisito kei na noda vakaitavi ena kacivaki ni itukutuku vinaka e okati ena ivalavala savasava kei na daulotu. Meda cakava mada ga oya ena noda qarava na Kalou ena lomada taucoko nida waraka na siga levu i Jiova. Meda ‘gumatua mada ga me kunei keda na Kalou ena vakacegu nida sa sega ni tauvi duka da qai sega ni cala.’​—2 Pita 3:​14.

O se Nanuma Tiko?

• Na cava meda tu vakarau kina me baleta na siga i Jiova?

• Ke da sa vakaliuca tiko na veika ni bula e veisiga, na cava meda cakava?

• Na cava ena vukei keda meda valuta na sosovu vakayalo?

• Na ivakarau ni bula veivakaleqai cava meda cata, eda na vakaraitaka vakacava?

[iYaloyalo ena tabana e 20, 21]

Era sega ni kauaitaka na tamata ena siga i Noa na veivakarusai sa voleka​—vakacava o iko?

[iYaloyalo ena tabana e 23]

O rawa beka ni vakarawarawataka nomu bula me levu kina nomu gauna me baleta na veika vakayalo?

    iVola vakaViti (1982-2026)
    Sogota
    Dolava
    • vakaViti
    • Vakauta
    • Digia
    • Copyright © 2025 Watch Tower Bible and Tract Society of Pennsylvania
    • iVakavakayagataki
    • Kemu iTukutuku
    • Privacy Settings
    • JW.ORG
    • Dolava
    Vakauta