Na Sala Mo Vakaceguya Kina Nomu Gagadre Vakayalo

E KAYA na U.S.News & World Report: “E volitaki vakalevu ena loma ni tini na yabaki sa sivi e 300 vakacaca na ivola, era cuqena na yaga ni bula vakayalo ena vanua ni cakacaka—dua oqo na Jesus CEO, dua tale na The Tao of Leadership.” E dusia tiko oqo ni levu sara ena veivanua era rawati ira vakailavo era sa vakila mai nira gadreva na veika vakayalo ena nodra bula. E vosa ena tikina oqo na ivola ni bisinisi na Training & Development, e kaya: “Noda bula ena gauna oqo sa lewai tu vakalevu ena veika vovou e bulia na tamata, ia eda se vaqara ga na ibalebale kei na inaki dina ni bula, eda dui gadreva tale ga na vakacegu ni yalo.”

O na kunea beka e vei na veidusimaki vakayalo e veivakacegui dina? E liu, era dau rai ga ina lotu na tamata mera vakacegui kina “ena ibalebale kei na inaki dina ni bula.” Ia nikua, e levu era sa vakanadakuya na veilotu lelevu. E kaya na Training & Development ena dua na vakadidike e caka vei ira e 90 na manidia kei ira na vakaitutu e cake, e kune “ni dau vakaduiduitaki na lotu mai na bula vakayalo.” O ira na vakatarogi era kaya ni lotu “e dau vakavuveisei, dau vakavuca tale ga,” ia ena yasana adua, na bula vakayalo e raici me “yaga cake, e ciqomi raraba tale ga.”

Levu na tamata gone ena veivanua torocake me vakataki Ositerelia, Niusiladi, Peritania, kei Urope era vakaduiduitaka tale ga na lotu kei na bula vakayalo. E kaya o Parofesa Ruth Webber, e volavola ena Youth Studies Australia: “E levu vei ira na itabagone era vakabauta na Kalou se dua na kaukaua vuni, ia era sega ni raica na lotu me dua na ka e bibi se me yaga ena nodra gagadre vakayalo.”

E Vakaliuca na Veika Vakayalo na Lotu Dina

Sa rauta me vaka tu oqori na rai me baleta na lotu. Ni vuqa na lotu era dau vakaitavi vakalevu ena buturara ni veika vakapolitiki kei na itovo ca, ra qai lubetu tale ga ena kedra dra na sega ni cala era mate ena levu sara na veivaluvaluti vakalotu. Na nodra cata gona e so na isoqosoqo ni lotu era sa lomoci tu ena veivakaisini kei na veidabui, sa ra lai tini cata tale ga kina na iVolatabu nira nanuma ni vakatarai tu kina na ivakarau ca vaka oya.

Ia ke raici dina, na iVolatabu e vakacala sara ga na veivakaisini kei na itovo ca. A tukuna o Jisu vei ira na liuliu ni lotu ni gauna oya: “E ca vei kemudou na vu-ni-vola kei na Farisi, na dauveivakaisini! ni dou sa vaka na veivale ni bulubulu sa boro vulavula, ka sa rairai vinaka etaudaku, ia eloma sa sinai e na sui ni mate, kei na ka kecega sa velavela. Sa vaka talega kina koi kemudou, dou sa rairai etaudaku vei ira na tamata me tamata dodonu, ia eloma dou sa sinai e na dauveivakaisini kei na ka e sega ni dodonu.”​—Maciu 23:27, 28.

Na iVolatabu e uqeti ira na lotu Vakarisito mera tawaveitovaki ena veika vakapolitiki. E sega ni uqeti ira na tamata mera veivakamatei, ia e vakaraitaka ga ni dodonu mera bole mate ena vukudra na tacida. (Joni 15:12, 13; 18:36; 1 Joni 3:10-12) Na lotu dina e yavutaki ena iVolatabu, ena “ciqomi raraba,” e sega ni “dau vakavuveisei qai dau vakavuca.” E kaya kina na yapositolo o Pita: “Ni sega ni dau vakaduiduitaka na tamata na Kalou. Ia sa dau vinakati ira kece ga era dau vakarokorokotaki koya ka dau cakava na ka e dodonu, veitalia ga se mataqali kawa tamata cava era lewena.”​—Cakacaka 10:34, 35, VV.

Na iVolatabu —E Yaga ina Bula Vakayalo

E tukuna vei keda na iVolatabu ni buli na tamata me ucuya na Kalou. (Vakatekivu 1:26, 27) E sega ni kena ibalebale oqo me tautauvata sara na kedrau irairai, e rawa ga vua na tamata me muria na itovo ni Kalou, okati kina na guti ni veika vakayalo.

Ke sa vaka tu oqori, e dodonu gona meda vakabauta ni na vakarautaka na Kalou na veika meda vakaceguya kina na noda gagadre vakayalo, kei na ivakasala dodonu meda kila kina na ka e yaga kei na veika e ca vakayalo vei keda. Na Kalou e bulia na yagoda kei na kena itataqomaki me valuta na tauvimate qai vukea tale ga meda bulabula tiko ga kina, e vakarautaka tale ga vei keda na Kalou na lewaeloma, oqo e vaka e dua na domo lailai ena vukea na noda vakatulewa dodonu, meda qarauna tale ga kina na veika ena rawa ni vakatubuleqa vakayago, vakayalo tale ga. (Roma 2:14, 15) Me cakacaka vinaka na itataqomaki ni yagoda ena vinakati me vakani vakavinaka. E vaka tale ga kina na noda lewaeloma, me cakacaka vinaka ena gadrevi me vakani ena kakana vinaka vakayalo.

Na digi vinaka ni kakana ena vukea meda bulabula tiko ga kina vakayalo, e kaya kina o Jisu: “Ena sega ni bula na tamata e na madrai duaduaga, sa bula ga e na vosa kecega sa lako mai na gusu ni Kalou.” (Maciu 4:4) Na vosa i Jiova e tu ena nona Vosa na iVolatabu, e yaga “mei vakavuvuli, me vunauca na ca, me ia kina na vakadodonutaki.” (2 Timoci 3:16) Ia e sa na vakatau yadudua ga vei keda na noda vakani keda vakayalo. Eda na kila vinaka kina na iVolatabu da qai saga tale ga meda muria na kena ivakavuvuli, me rawa ni qai yaga kina vei keda vakayalo, vakayago tale ga.​—Aisea 48:17, 18.

E Yaga Dina Beka na Sasaga?

Sa macala ni taura na gauna meda vakavinakataka kina na noda bula vakayalo ena kena vulici na iVolatabu; qai vaka me sa kunekunei dredre ga na gauna. Ia, ena yaga vakalevu ke da saga! Rogoca mada na ka era tukuna e so na tamata cakacaka vinaka era dau osooso, me baleta na bibi ni nodra tikica na gauna mera dau qarava kina na nodra veika vakayalo.

O Marina e vuniwai, e kaya: “Au sega ni dau kauaitaka na veika vakayalo me yacova na gauna au sa cakacaka kina e valenibula, au sa tekivu vakila kina na nodra rarawa na tani. Au liaca ni dodonu meu vakadinata qai vakaceguya na noqu gagadre vakayalo meu rawa ni kunea kina na marau kei na lomavakacegu, ni rawa ni vakavu leqa ena cakacaka oqo na ivakarau ni bula kei na nodra qaravi tiko na tauvimate.

“Au sa vuli iVolatabu tiko kei ira na iVakadinadina i Jiova. Na vuli oqo e vukei au meu dikeva kina na noqu itovo kei na inaki ni lomaqu, e vakavulica tale ga na noqu vakasama me dau vakananuma na veika vinaka me vinaka tiko ga kina na noqu bula. Au marautaka tale ga kina na noqu cakacaka. Ia na noqu vuli iVolatabu e vakavinakataka na lomaqu, e kauta laivi na noqu dau rai cala, vakalailaitaka noqu cudru, qai vukei au tale ga meu dau vosovoso qai veinanumi. Noqu muria na ivakavuvuli vakaivolatabu e vakavinakataka tale ga na noqu bula vakawati. Ia e bibi duadua na noqu sa mai kilai Jiova kei na noqu vakila na veivuke ni yalona tabu, na ka oqo e vakainaki sara ga kina na noqu bula.”

O Nicholas e daunipeleni, e kaya: “Ni bera niu vulica na iVolatabu kei ira na iVakadinadina i Jiova, au sega ni dau kauai tu ena veika vakayalo. Na noqu isausau ga meu gumatua ena cakacaka oqo. Ia au vulica ena noqu vuli iVolatabu ni tu tale na ka yaga, me vaka na vakayacori ni loma i Jiova e kauta mai na marau dina.

“Au vakila na lomavakacegu ena cakacaka oqo, ia na iVolatabu ga e vakavulici au me rawarawa ga na noqu bula ena noqu vakaliuca tiko na veika vakayalo. Keirau sega kina ni sotava kei watiqu na lomaocaoca e vu mai na domodomoiyau ni bula oqo. Keirau sa kunea tale ga na neirau itokani dina, oqo o ira e tautauvata na neimami rai vakayalo me baleta na bula.”

O Vincent e loya, e kaya: “Na cakacaka vinaka e rawa ni marautaki. Ia, au raica rawa ni gadrevi tale e so na ka me rawati kina na marau kei na lomavakacegu. Ni bera niu mai kila na ivakavuvuli vakaivolatabu me baleta na marau kei na lomavakacegu, au kidacala noqu raica na tawayaga ni bula—sucu ga na tamata, tubucake sara, vakawati, cakacaka me qaravi kina nodra bula na gone, vakavulici ira mera vakatotomuria nomu ivakarau ni bula, tini sara ena qase kei na mate.

“Au qai kunea na isau ni noqu taro me baleta na bula ena gauna au sa vulica kina na iVolatabu kei ira na iVakadinadina i Jiova. E vukei au na noqu vulica na iVolatabu meu kilai Jiova vakavinaka kei na noqu bucina tale ga na noqu lomani koya dina. Oqo e vukea me vinaka tiko ga na noqu rai vakayalo niu saga me salavata kei na inaki ni Kalou na noqu bula. Ena gauna oqo, keirau lomavakacegu vakaveiwatini ni keirau kila ni sa qai vakainaki na neirau bula.”

E rawa tale ga ni vakainaki qai yaga na nomu bula ena nomu vulica na iVolatabu. Era na marau na iVakadinadina i Jiova mera vukei iko. Me vakataki Marina, Nicholas, kei Vincent, e rawa tale ga ni o lomavakacegu ena nomu vulica na veika me baleti Jiova, kei na nona inaki me baleta na kawatamata wili kina o iko. O na sega wale ga ni marau ena nomu vakaceguya na nomu gagadre vakayalo ena gauna oqo, o na rawata tale ga na bulabula vakayago me tawamudu—oqo era na rawata ga o ira era “kauaitaka na nodra gagadre vakayalo.”​—Maciu 5:3, NW.

Na masu e dua na sala ena tarai cake kina noda bula vakayalo. E solia kina na nona gauna o Jisu me vakavulici iratou na nona tisaipeli ena masu, e dau kilai tu me Masu ni Turaga. Cava na ibalebale ni masu vei iko nikua? Ena yaga vakacava vei iko? Na kena isau e tiko ena rua na ulutaga e tarava.

[iYaloyalo ena tabana e 6]

Marina

[iYaloyalo ena tabana e 7]

Nicholas

[iYaloyalo ena tabana e 7]

Vincent