“Turaga, Mo ni Vakavulici Keimami me Keimami Masu”

“Sa kaya vei koya e dua na nona tisaipeli, Kemuni na Turaga, mo ni vakavulici keimami me keimami masu.”​—LUKE 11:1.

1. Na cava a tarogi Jisu kina e dua nona tisaipeli me vakavulici ira ena ivakarau ni masu?

ENA dua na gauna ena 32 S.K., ni masu tiko o Jisu, a vakaraici koya toka e dua nona tisaipeli. A sega ni kila se cava e qaqanimasu i Jisu vei Tamana, ni a rairai masu lo tiko ga. Ia ni sa masu oti, a mani kaya sara na tisaipeli vei Jisu: “Turaga, mo ni vakavulici keimami me keimami masu.” (Luke 11:1) Na cava a vakavuna na kerekere oqo? Ni a nodra ivakarau ga ni bula kei na sokalou na Jiu na masu. E laurai oqo ena kena vutucoqa ena masu na iVolatabu Vakaiperiu, me vaka ena ivola ni Same kei na so tale na ivola. O koya gona, a sega ni kerea tiko na tisaipeli oqo me vakavulici ena ka e se sega ni bau kila se bau cakava vakadua. E sega ni vakabekataki ni vu ni nona taro na kena matata vinaka tu vua nodra ivalavala ni masu na iliuliu ni lotu Vakajiu. Ia ni raica na nona masu o Jisu, e siqema kina ni duidui vakalevu nodra masu vakarairai na rapai kei na ivakarau ni masu i Jisu.​—Maciu 6:5-8.

2. (a) Na cava e vakaraitaka ni sega ni nakita o Jisu me wiligusutaki na ivakarau ni masu a vakavulica ena ulunivanua? (b) Na cava eda via kila kina na ivakarau ni masu?

² Rauta ni 18 na vula yani e liu, ena iVunau ena Ulunivanua, a vakavulici iratou kina nona tisaipeli o Jisu ena ivakarau me ratou yavutaka kina nodratou masu. (Maciu 6:9-13) A rairai sega ni tiko na tisaipeli oqo ena gauna oya, mani tokaruataka kina vua o Jisu na veitikina bibi ni masu. E vakavure vakasama ni a sega ni cavuqaqataka o Jisu na qaqanimasu yadua oya, me vakaraitaka ni a sega ni nakita me wiligusutaki. (Luke 11:1-4) Me vaka ga na tisaipeli a taro oya, o keda tale ga eda via vakavulici meda kila na ivakarau ni masu meda veivolekati kina kei Jiova. O koya gona, eda na dikeva oqo na ivakarau ni masu a vakavulica o Jisu, me vaka e volatukutukutaka na yapositolo o Maciu. E vitu na ka e kerei kina, e tolu e vauca na inaki ni Kalou kei na kena vo e baleta na ka eda gadreva vakayago vaka kina vakayalo. Na ulutaga oqo, eda na dikeva kina na imatai ni tolu na ka e kerei.

Tama Dauloloma

3, 4. Na cava e vakaraitaka na noda vakatokai Jiova me ‘Tamada’?

³ Ena itekitekivu ni masu, e vakaraitaka kina o Jisu ni noda masu e dodonu me laurai kina na noda veivolekati kei Jiova ia me salavata kei na vakarokoroko. Ni vosa tiko me baleta na kena yaga, taumada vei iratou nona tisaipeli eratou dabe volekati koya tiko ena ulunivanua, e kaya o Jisu me ratou kacivi Jiova vaka oqo, “Tama i keimami mai lomalagi.” (Maciu 6:9) E kaya e dua na vuku, se mani vakayagataka o Jisu na vosa vakaiperiu se vakaaramea kilailevu, na vosa “Tama” e vakayagataka e vaka sara ga nona ‘cavuta na gone,’ na “Tamaqu.” Na noda vakatokai Jiova me ‘Tamada’ e vakaraitaka ni vinaka qai qaqaco tu na noda veiwekani kei koya.

⁴ Na noda cavuta “keimami,” e dusia nida okati ira kece tiko na vuvale tagane kei na yalewa era ciqomi Jiova me nodra Dausolibula. (Aisea 64:8; Cakacaka 17:24, 28) O ira na lotu Vakarisito era vakatuburi ena yalo tabu mera “luve ni Kalou,” e rawa nira “kaci kina, Apa, Tamada.” (Roma 8:14, 15) Vica na milioni era sa mai nodra itokani yalodina. O ira oqo sa ra yalataka nodra bula vei Jiova ra qai cakava oya ena nodra papitaiso. E rawa tale ga nira torovi Jiova na ‘so tani tale’ na sipi oqo ena yaca i Jisu ra qai kacivi koya “Tama i keimami.” (Joni 10:16; 14:6) E rawa nida torova vakawasoma na Tamada vakalomalagi meda vakacaucautaki koya, meda vakavinavinakataka vua na veika vinaka e cakava vei keda, meda biuta vua na veika eda lomaocaocataka, da qai nuidei ni na nanumi keda.​—Filipai 4:6, 7; 1 Pita 5:6, 7.

Lomana na Yaca i Jiova

5. Na cava na imatai ni ka e masuti ena ivakarau ni masu a vakavulica o Jisu, ia na cava e bibi kina?

⁵ Na imatai ni ka e masuti e vakaliuci kina na ka e dodonu ga me liu. E kaya: “Me vakarokorokotaki na yacamuni.” (Maciu 6:9) Io, e bibi duadua vei keda na vakarokorokotaki ni yaca i Jiova baleta nida lomani koya da qai cata na sala sa vakarogorogocataki tu kina na yacana. Na nona veivorati o Setani kei na nona vakamuai rau na vuda me rau talaidredre vua na Kalou o Jiova, e beci kina na yacana qai vakatitiqataki kina nona veiliutaki cecere. (Vakatekivu 3:1-6) Kena ikuri, me tekivu mai na veivorati oya, o ira sara ga era vakacavutaka voli nira matataki Jiova, sa ra dau qai vakarogorogocataka tale na yacana ena nodra ivakavuvuli kei na veika veivakamaduataki era cakava.

6. Na cava eda na sega ni cakava ke da masuta me vakarokorokotaki na yaca i Jiova?

⁶ Na noda masulaka me vakarokorokotaki na yaca i Jiova, e vakaraitaka na yasana eda to kina, oya nida tokona na dodonu i Jiova me liutaka na vuravura kei na lomalagi. E vinakata o Jiova mera tawana na lomalagi kei na vuravura o ira na nona ibulibuli vuku, era tu vakarau ra qai reki tale ga ni vakamalumalumutaki ira ina nona veiliutaki dodonu, nira lomani koya kei na veika kece e vauca na yacana. (1 Veigauna 29:10-13; Same 8:1; 148:13) Na noda lomana na yaca i Jiova ena vukea meda kua ni cakava na veika ena vosavakacacataka na yacana tabu. (Isikeli 36:20, 21; Roma 2:21-24) Ena vakatau na bula vakacegu e lomalagi kei vuravura vaka kina o ira era lewena, ena vakarokorokotaki ni yaca tabu i Jiova kei na noda vakamalumalumu ena nona veiliutaki. O koya gona, na noda masulaka “me vakarokorokotaki na yacamuni” e ivakaraitaki nida nuidei ni na vakayacori na inaki i Jiova me vakacaucautaki kina.​—Isikeli 38:23.

Na Matanitu Eda Masulaka

7, 8. (a) Na Matanitu cava e vakavulica o Jisu meda masulaka? (b) Na cava eda vulica me baleta na Matanitu oqo ena ivola na Taniela kei na Vakatakila?

⁷ Na ikarua ni ka e kerei ena ivakarau ni masu a vakavulica o Jisu e kaya: “Me yaco mai na nomuni matanitu.” (Maciu 6:10, VV) Na kerekere oqo e lakolako vata sara ga na kena imatai. Ni oqo na ka ena vakayagataka o Jiova, nona Matanitu vakalomalagi e liutaka na Mesaia, na Luvena, o Jisu Karisito, me vakarokorokotaki kina na yacana tabu. (Same 2:1-9) Na parofisai i Taniela e kaya ni Matanitu e liutaka na Mesaia e vaka “na vatu” e kavida mai ena “ulu-ni-vanua.” (Taniela 2:34, 35, 44, 45) Na ulunivanua e vakatayaloyalotaka na veiliutaki cecere i Jiova, ia na vatu e vakatayaloyalotaka na Matanitu, e dua na ituvatuvanaki vou ni veiliutaki cecere i Jiova. E tukuni ena parofisai oya ni qai yaco na vatu, “me ulu-ni-vanua levu, ka roboti vuravura taucoko,” e dusia ga ni Matanitu e liutaka na Mesaia ena matataka na veiliutaki cecere ni Kalou e vuravura.

⁸ Era na duavata tale ga kei Karisito ena Matanitu oqo o ira na le 144,000, ‘era voli mai vei ira na tamata’ mera veiliutaki kei koya mera tui ra qai bete. (Vakatakila 5:9, 10; 14:1-4; 20:6) O Taniela e tukuni ira mera “yalosavasava i Koya sa Cecere sara,” e soli vei ira kei Karisito na nodra iLiuliu, ‘na matanitu kei na lewa, kei na kena levu ni veimatanitu e ruku i lomalagi taucoko, a nodra matanitu sa matanitu e sega ni mudu, ia o ira na turaga kece ga era na qaravi ira ka talairawarawa vei ira.’ (Taniela 7:13, 14, 18, 27) Oqo na Matanitu vakalomalagi a vakavulica o Karisito vei ira nona imuri mera masulaka.

Na Cava me Masuti Tiko ga Kina?

9. Na cava e veiganiti kina meda masuta me yaco mai na Matanitu ni Kalou?

⁹ Ena ivakarau ni masu a vakavulica o Karisito, e vakavulici keda meda masulaka me yaco mai na Matanitu ni Kalou. Na vakayacori ni parofisai ena iVolatabu e dusia ni tekivu veiliutaki mai lomalagi na Matanitu e liutaka na Mesaia ena 1914.a Koya gona, se veiganiti tiko beka ga meda masuta me “yaco” mai na Matanitu oya? Io, se veiganiti tiko ga. Baleta ena parofisai i Taniela, na vatu e vakatayaloyalotaka na Matanitu e liutaka na Mesaia, ena sota mamaca sara ga kei na veimatanitu vakapolitiki, era vakatayaloyalotaki ena matakau levu. Na vatu oqo ena qai vorolaka na matakau me dravusa. E kaya na parofisai i Taniela: “Na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu oqori, ka na tu ga ka sega ni mudu.”​—Taniela 2:44.

10. Na cava eda diva kina me yaco mai na Matanitu ni Kalou?

¹⁰ Eda diva meda raica na Matanitu ni Kalou me vakarusa na vuravura ca i Setani, baleta ena qai yaco me vakarokorokotaki kina na yaca tabu i Jiova, nira na kau laivi kina o ira kece era vorata na veiliutaki cecere ni Kalou. Eda masuta gona vagumatua: “Me yaco mai na nomuni matanitu,” da qai kaya vata kei na yapositolo o Joni: “Emeni. Ni lako mai, Turaga Jisu.” (Vakatakila 22:20) Io, me lako mada ga mai o Jisu me vakarokorokotaki kina na yaca i Jiova qai vakacerecerea tale ga nona veiliutaki cecere, me rawa ni dina kina na vosa ni daunisame: “Me ra kila ko ira na tamata ni sai kemuni na yacamuni ga ko Jiova, sa Cecere sara duaduaga e vuravura taucoko.”​—Same 83:18.

“Me Caka na Lomamuni”

11, 12. (a) Na cava eda kerea tiko nida masulaka me yaco na loma ni Kalou “e vuravura, me vaka sa caka tiko mai lomalagi”? (b) Na cava tale e vakaraitaka noda masulaka me yaco na loma ni Kalou?

¹¹ E tarava na nona sa qai vakavulici iratou nona tisaipeli o Jisu me ratou masuta: “Me caka na lomamuni e vuravura, me vaka sa caka tiko mai lomalagi.” (Maciu 6:10, VV) A buli na lomalagi kei na vuravura baleta ni a loma i Jiova. Era kailavaka na veika bula kaukaua ni lomalagi: “Kemuni na neitou Turaga kei na neitou Kalou, sa dodonu me ia vei kemuni na vakarokoroko kei na veidokadokai, kei na kaukauwa: ni sai kemuni ka bulia na ka kecega, era sa buli ga ka tu dei talega e na nomuni lewa.” (Vakatakila 4:11) E tiko na inaki i Jiova me baleta “na veika mai lomalagi, kei na veika e vuravura.” (Efeso 1:8-10) Ni masulaki gona me caka na loma ni Kalou, eda sa kerei Jiova tiko kina me vakayacora nona inaki. Eda vakaraitaka tale ga kina nida diva meda raica na vakayacori ni loma ni Kalou e lomalagi kei vuravura.

¹² Na masu tale ga oqo eda vakaraitaka kina nida via veisautaka noda bula me salasalavata kei na loma i Jiova. A kaya o Jisu: “A qau kakana me’u kitaka na loma i koya sa talai au mai; ka me’u vakaotia na nona cakacaka.” (Joni 4:34) Me vakataki Jisu, nida lotu Vakarisito yalayala oti, eda marau ni cakava na loma ni Kalou. Na noda lomani Jiova kei Luvena e uqeti keda meda solia vakalevu noda bula, sega ena “gagadre ca ni tamata . . . [ia] me vaka ga na loma ni Kalou.” (1 Pita 4:1, 2; 2 Korinica 5:14, 15) Eda saga meda kua ni cakava na veika eda kila e veicoqacoqa kei na loma i Jiova. (1 Cesalonaika 4:3-5) Na noda volia na gauna meda wili iVolatabu kina kei na noda vuli vakataki keda, eda sa “vaqara [tiko kina] na ka e vinakata na Turaga,” e okati tale ga kina noda vunautaka “na i Tukutuku Vinaka ni matanitu.”​—Efeso 5:15-17, VV; Maciu 24:14, VV.

Loma i Jiova e Lomalagi

13. A vakayacori vakacava na loma ni Kalou ni se bera sara na veivorati i Setani?

¹³ A vakayacori na loma i Jiova e lomalagi ni se bera sara nona veivorati e dua na luvena vakayalo qai yaco me o Setani. Na ivola na Vosa Vakaibalebale e tukuni koya na Luve ulumatua ni Kalou me vatuka ni vuku. E vakamacalataka ni sivia e vica vata na bilioni na yabaki, na Luvena duabau a vakatubura na Kalou e dau “marau tiko e matana,” qai dau reki ni cakava na loma i Tamana. Mani yaco me “matai daucakacaka” i Jiova ena buli ni veika kece ga “[e]ra tu mai lomalagi, se ra tu e vuravura, se ra rairai se ra sega ni rairai.” (Vosa Vakaibalebale 8:22-31; Kolosa 1:15-17) O Jiova a vakayagataki Jisu me nona Vosa, se Matanivanua.​—Joni 1:1-3.

14. Na cava eda vulica mai na Same 103 me baleta na ivakarau ni nodra cakava na loma i Jiova na agilosi e lomalagi?

¹⁴ E vakaraitaka na daunisame ni veiliutaki cecere i Jiova e uasivia na veika kece ga e buli ra qai vakarorogo ena nona ivakasala kei na nona ivakaro e udolu vakaudolu na agilosi. Eda wilika: “Sa vakataudeitaka ko Jiova na nonai tikotiko vakaturaga mai lomalagi; ka sa lewa na ka kecega na nona matanitu. Dou vakavinavinaka vei Jiova koi kemudou na nona agilose; sa uasivi e na kaukauwa, ka sa cakava na nonai vakaro, ni dou sa vakarorogo tiko ki na nona vosa. Dou vakavinavinaka vei Jiova, koi kemudou na nona ka lewe vuqa; oi kemudou na nonai talatala, ka kitaka tiko na ka sa vinaka vua. Dou vakavinavinaka vei Jiova, na nona cakacaka kecega, e na veiyasana kecega sa lewa [se, veiliutaki cecere] kina ko koya: mo vakavinavinaka vei Jiova, na yaloqu.”​—Same 103:19-22.

15. E cakayaco vakacava na vakayacori ni loma ni Kalou e lomalagi ni sa taura o Jisu na lewa ni Matanitu ni Kalou?

¹⁵ Ni oti nona veivorati, se dau lesu tale tiko i lomalagi o Setani, me vaka e tukuna na ivola i Jope. (Jope 1:6-12; 2:1-7) Ia, na Vakatakila e parofisaitaka na gauna a kolotaki kina mai lomalagi o Setani kei ira nona timoni. A yaco oya ena gauna a taura kina na lewa ni Matanitu ni Kalou o Jisu Karisito ena 1914. Me tekivu mai oya, sa sega tale ni dua nodra tikina na dauveivorati oqo mai lomalagi. Sa ra mai tu ga e vuravura. (Vakatakila 12:7-12) Sa sega tale ni rogoci e lomalagi na domona e dua e saqata na veiliutaki cecere i Jiova, na domo ga ni vakavinavinaka vua na “Lami” o Karisito Jisu, kei na nodra vakamalumalumu vei Jiova. (Vakatakila 4:9-11) Sa vakayacori dina na loma i Jiova e lomalagi.

Loma i Jiova me Baleta na Vuravura

16. E vakacala vakacava na ivakarau ni masu a vakavulica o Jisu na ivakavuvuli ni lotu ni Veivanua Vakarisito me baleta na inuinui ni kawatamata?

¹⁶ Na lotu ni Veivanua Vakarisito kece era sega ni okata na vuravura me na caka kina na inaki ni Kalou, nira kaya ni tamata vinaka kece era na lako i lomalagi. Ia a vakavulici keda o Jisu meda masulaka: “Me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.” (Maciu 6:10, VV) E rawa beka ni tukuni ni sa vakayacori tiko na loma i Jiova ena vuravura e sivia tu kina na itovo kaukaua, sega na lewadodonu, tauvimate, kei na mate? Dravusakulukulu! E dodonu gona meda masuta vagumatua me vakayacori na loma ni Kalou e vuravura, me salavata kei na yalayala a volatukutukutaka na yapositolo o Pita: “Me vaka na nona vosa ni yalayala, eda sa waraka na lomalagi vou [na Matanitu e liutaka na Mesaia] kei na vuravura vou [na kawatamata ivalavala dodonu], sa tiko kina nai valavala dodonu.”​—2 Pita 3:13.

17. Na cava na inaki i Jiova me baleta na vuravura?

¹⁷ E tiko na inaki a bulia kina na vuravura o Jiova. A uqeta na parofita o Aisea me vola: “Ni sa kaya vakaoqo ko Jiova, ko koya ka bulia na lomalagi; na Kalou, ko koya ka bulia na vuravura ka cakava; sa vakataudeitaka ko koya, a sa sega ni cakava me lala, sa bulia ga me tawa: Koi au ko Jiova; ka sa sega e dua tale.” (Aisea 45:18) A biuti rau na imatai ni tamata na Kalou ena were parataisi qai vakarota: “Drau vakaluveni, ka tubu me lewe vuqa, ka vakatawai vuravura, ka vakamalumalumutaka.” (Vakatekivu 1:27, 28; 2:15) E macala gona ni nona inaki o koya a buli keda, mera tawana na vuravura na tamata yalododonu era marau ni vakamalumalumutaki ira ena veiliutaki cecere i Jiova ra qai bula tawamudu ena Parataisi e yalataka o Karisito.​—Same 37:11, 29; Luke 23:43.

18, 19. (a) Na cava me na caka taumada ni bera ni vakayacori kece na loma ni Kalou e vuravura? (b) Na tiki cava tale ni ivakarau ni masu a vakavulica o Jisu ena dikevi ena ulutaga e tarava?

¹⁸ E sega ni rawa ni vakayacori na loma i Jiova e vuravura ke ra se tiko ga kina na tagane kei na yalewa era cata nona veiliutaki cecere. Na nona vakayagataka na Kalou na mataivalu vakayalo kaukaua ena veiliutaki i Karisito, ena “vakawabokotaki ira era sa vakawabokotaki vuravura.” Na vuravura ca i Setani, vata kei na kena lotu lasu, daunipolitiki veivakaisini, daunibisinisi kocokoco qai lawakica, kei ira na mataivalu dauveivakamatei era na vakarusai vakadua. (Vakatakila 11:18; 18:21; 19:1, 2, 11-18) Ena vakacerecerei na veiliutaki cecere i Jiova qai vakarokorokotaki na yacana. E ologi kece toka na vakasama oqo nida masulaka: “Tama i keimami mai lomalagi, me vakarokorokotaki na yacamuni, me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.”​—Maciu 6:9, 10, VV.

¹⁹ Ia ena ivakarau ni masu a vakavulica o Jisu, a vakaraitaka ni rawa nida masulaka tale ga na veika e baleti keda yadua. Na nona ivakaro ena tikina oqo ena dikevi ena ulutaga e tarava.

[iVakamacala e ra]

Railesuvi

• Na cava e veiganiti kina meda kacivi Jiova me ‘Tamada’?

• Na cava e bibi duadua kina meda masulaka me vakarokorokotaki na yaca i Jiova?

• Na cava meda masulaka kina me yaco mai na Matanitu ni Kalou?

• Na cava e vakaraitaka nida masulaka me vakayacori na loma ni Kalou e vuravura me vaka sa caka tiko mai lomalagi?

[iYaloyalo ena tabana e 9]

A duidui vakalevu na masu i Jisu kei na nodra masu vakarairai na Farisi

[iYaloyalo ena tabana e 10]

Era masuta na lotu Vakarisito me yaco mai na Matanitu ni Kalou, me vakarokorokotaki na yacana, qai caka na lomana