Na Masu ni Turaga—Kena iBalebale Vei Keda
NA MASU ni Turaga a vakavuvulitaka o Jisu Karisito ena iVunau ena Ulunivanua, e volatukutukutaki tu ena Maciu wase 6, tikina e 9 ina 13. Ni bera ni cavuta o Jisu na masu oqo, a kaya: “Ni dou sa masu, kakua ni vosa balabalavu walega, me vakataki ira na tawa lotu; ni ra sa nanuma era na rogoci ni ra sa vosa balabalavu.”—Maciu 6:7.
E matata e ke ni a sega ni nakita o Jisu me wiligusutaki na Masu ni Turaga. E dina, a tokaruataka o Jisu na masu vata ga oqo ena dua na gauna e muri, vua e dua na nona tisaipeli a rairai sega ni tiko ena imatai ni gauna e cavuti kina ena ulunivanua. (Luke 11:2-4) Ia, e duidui toka na qaqana erau volatukutukutaka na Kosipeli o Maciu kei Luke. Kuria oya, e laurai ena nodratou qaqanimasu e muri o Jisu kei iratou na nona tisaipeli, ni ratou a sega ni muria sara vakadodonu na qaqanimasu ena ivakarau ni masu a vakavulica o Jisu.
Na cava e volaitukutukutaki kina ena iVolatabu na Masu ni Turaga? Ena ivakarau ni masu oqo, e vakavulici keda kina o Jisu ena ivalavala ni masu e vakadonuya na Kalou. Eda kunea tale ga ena masu oqo na isaunitaro bibi e vauca na noda bula. O koya gona, meda dikeva yadua sara mada na veika e vauci ena Masu ni Turaga.
O Cei na Yaca ni Kalou?
“Tama i keimami mai lomalagi, me vakarokorokotaki na yacamuni.” (Maciu 6:9, VV) Na itekitekivu ni ivakarau ni masu oqo e vukei keda meda toro voleka vua na Kalou nida vakatokai koya me “Tama i keimami.” Me vaka ga na gone e rawarawa nona torova na itubutubu dauloloma qai veikauaitaki, e rawa gona nida torova na Tamada vakalomalagi nida vakadeitaka ni na vinakata me rogoci keda. “Oi kemuni sa daurogoca na masu,” e lagata o Tui Tevita, “ena toro mai vei kemuni na tamata kecega.”—Same 65:2.
A vakaroti keda o Jisu meda masulaka me vakarokorokotaki se vakatabui na yaca ni Kalou. Ia o cei na yacana? Na iVolatabu e sauma: “Ni sai kemuni na yacamuni ga ko JIOVA, sa Cecere sara duaduaga e vuravura taucoko.” (Same 83:18) O sa bau wilika beka na yaca i Jiova ena iVolatabu?
Na yaca ni Kalou o Jiova e kunei vaka7,000 vakacaca ena ilavelave makawa ni iVolatabu. Ia, e so sara mada ga na dauvakadewa era kauta laivi na yaca oqo mai na nodra ivakadewa ni iVolatabu. Oya na vuna sa dodonu vinaka kina meda masuta na noda Dauveibuli me vakarokorokotaki, se me vakatabui na yacana. (Isikeli 36:23) Dua gona na sala eda na vakaraitaka kina nida duavata kei na masu oqo, oya na noda cavuta na yaca i Jiova nida masu vua.
E dua na marama, o Patricia, e susu ena lotu Katolika, e kila vinaka na Masu ni Turaga. Ia, na cava a yacovi koya ni dusia vua na yaca ni Kalou ena iVolatabu e dua na iVakadinadina i Jiova? “Au sega ni vakabauta!” e kaya o Patricia. “Au via vakadinata sara ga ena noqu iVolatabu, ia niu cereka, e tauvata sara ga na ka e kaya. E dusia tale vei au o koya na Maciu 6:9, 10 qai vakamacalataka ni semati na yaca ni Kalou kei na Masu ni Turaga. Au sega ni kinoca rawa na levu ni noqu marau, au mani kerea vua me vakavulici au ena iVolatabu.”
Me Caka na Loma ni Kalou e Vuravura
“Me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.” (Maciu 6:10, VV) Ena vakayacori vakacava na qaqanimasu oqo i Jisu? E vuqa era raitayaloyalotaka na lomalagi me vanua vakanomodi qai kune kina na vakacegu. Ia na iVolatabu e dusia na lomalagi me “[i]tikotiko tabu sa vakaiukuuku” i Jiova. (Aisea 63:15) Sa rauta meda masuta me caka na loma ni Kalou e vuravura, “me vaka sa caka tiko mai lomalagi”! Ia, ena yaco beka?
A tukuna tu mai o Taniela na parofita i Jiova: “Ena qai vakatura na Kalou ni lomalagi e dua na matanitu, ena sega sara ni vakarusai rawa: ia na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu [e vuravura] . . . , ka na tu ga ka sega ni mudu.” (Taniela 2:44) Sega ni dede, ena yavala na Matanitu vakalomalagi oqo me kauta mai e vuravura taucoko na bula sautu ena ruku ni veiliutaki dodonu.—2 Pita 3:13.
Noda masulaka gona me yaco mai na Matanitu ni Kalou kei na kena yaco tale ga na lomana e vuravura, e ivakaraitaki ni vakabauta e sega ni na tini ena vakanuinuikara. A vola na yapositolo lotu Vakarisito o Joni: “Ka’u a rogoca e dua na domo levu mai lomaIagi, sa kaya, Raica, a vale ni Kalou sa tu vei ira na tamata, ia ena tiko vata kei ira ko koya, ia era na nona tamata, ia ko koya na Kalou ena tiko vata kei ira, me nodra Kalou. Ia na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.” A qai tomana: “Sa qai vosa ko koya sa tiko e nai tiko-tiko-vakaturaga, . . . Vola mada: ni sa vosa mana oqo ka dina.”—Vakatakila 21:3-5.
Masuta na Veika e Vinakati Meda Bula Kina
Ena ivakarau ni masu e vakavuvulitaka o Jisu, e vakaraitaka ni dodonu me bibi duadua ena noda masu na yaca ni Kalou kei na caka ni lomana. Ia, e cavuti tale ga ena ivakarau ni masu oqo na noda kerea vei Jiova na veika e vinakati meda bula kina.
Na kena imatai: “Ni solia mai vei keimami e na siga oqo na kakana e rauti keimami.” (Maciu 6:11, VV) Eda sega ni kerea tiko meda vutuniyau. A uqeti keda o Jisu meda masuta me solia mai ‘e veisiga na kakana e rauti keda.’ (Luke 11:3, VV) Me salavata kei na Masu ni Turaga, e rawa nida masuta ena vakabauta ni Kalou ena solia vei keda na veika eda gadreva e veisiga, kevaka eda lomani koya da qai talairawarawa tale ga vua.
Noda lomaocaocataka na leqa ni bula vakailavo ena rawa ni vakavuna na noda vakawaletaka na noda veika vakayalo, da qai sega ni cakava kina na ka e namaka vei keda na Kalou. Ia kevaka eda vakaliuca ena noda bula na qaravi Kalou, eda na vakadeitaka ni veika vakayago eda kerea ena masu ena rogoci, me vaka na kakana kei na isulu. A kaya o Jisu: “Dou vakasaqara taumada na matanitu ni Kalou, kei na nona yalododonu: ia ena soli me kenai kuri vei kemudou na ka kecega oqo.” (Maciu 6:26-33) E ka ni bolebole toka na kena vakasaqarai na yalododonu ni Kalou, nida tamata ivalavala ca kece da qai gadreva meda vosoti. (Roma 5:12) Na tikina oqori e okati tale ga ena Masu ni Turaga.
Noda Masu ni Kere Veivosoti
“Ni bokoca mada na neimami i valavala ca me vaka keimami sa bokoca oti na nodra era sa i valavala ca vei keimami.” (Maciu 6:12, VV; Luke 11:4) Ena bokoca beka na Kalou o Jiova na noda ivalavala ca?
A valavala ca bibi o Tui Tevita e Isireli makawa, ia a veivutuni. Ena nuidei a masuta: “I Jiova, oni sa vinaka ka dau tu vakarau me veivosoti; sa levu tale ga na nomuni yalovinaka vei ira era kaci yani vei kemuni.” (Same 86:5, NW) E vakasama veivakacegui dina! Na Tamada vakalomalagi e ‘tu vakarau me vosoti’ ira era masuti koya ena veivutuni dina. E rawa ni vosota o Jiova na noda ivalavala ca kece.
Ia, a cavuta o Jisu e dua na ka ena vakatau kina: Me vosoti keda na Kalou, ena dodonu meda vosoti ira na tani. (Maciu 6:14, 15) Eratou a vosa vakacacataki Jope, na turaga yalododonu, e tolu na nona itokani, ia a vosoti iratou o koya qai masulaki iratou sara mada ga. (Jope 42:10) Kevaka gona eda vosoti ira era ivalavala ca vei keda, eda na vakamarautaka na Kalou qai rawa tale ga ni vakaraitaka nona yalololoma vei keda.
Me uqeti keda mada ga na nona tu vakarau na Kalou me rogoca na noda kerekere meda qara kina na nona veivakadonui. E rawa nida cakava oqori dina nida sega ni tamata uasivi. (Maciu 26:41) Ena ituvaki oqo, e rawa ni vukei keda tale ga kina o Jiova, me vaka ga e vakaraitaka o Jisu ena nona tinia na ivakarau ni masu oqo ena dua na kerekere bibi.
Da Vukei me Dodonu Tiko ga na Noda iLakolako
“Ni kakua ni kauti keimami ki na vere; ka mo ni vakabulai keimami mai na ca.” (Maciu 6:13, VV) E sega ni dau biuti keda tu ga o Jiova meda sotava na veivakatovolei, se me vakavuna noda rawai ena ivalavala ca. Ni kaya na nona Vosa: “Sa sega ni dauveretaki rawa na Kalou ki na ka ca, a sa sega ni dauveretaka e dua na tamata ko koya.” (Jemesa 1:13) E vakatara na Kalou meda vakatovolei, ia ena rawa ni vakabulai keda o koya mai vua na Dauveiveretaki Levu—“na [vuni]ca” e vakatokai me o Setani na Tevoro.
Na yapositolo o Pita a uqeti ira na nona itokani lotu Vakarisito: “Dou yalomatua, dou vakatawa: sa veilakoyaki voli na nomudou meca na tevoro, me vaka na laioni sa tagi, a sa vakasaqara eso me tiloma.” (1 Pita 5:8) O Setani a temaka sara mada ga na turaga uasivi o Jisu Karisito! Cava a saga na Tevoro? Me vagolei Jisu tani mai na sokalou savasava vua na Kalou o Jiova. (Maciu 4:1-11) Ke o saga tiko mo qarava na Kalou, ena vinakata tale ga o Setani me vagolei iko tani!
Ena vuravura e lewa tu oqo na Tevoro, ena rairai bacani keda o koya meda cakava na ivalavala e cata na Kalou. (1 Joni 5:19) E bibi gona meda kerea wasoma na veivuke ni Kalou, vakauasivi ke da sotava tiko e dua na veivakatovolei e sega ni oti rawa. Ia kevaka eda sokaloutaki Jiova tiko me vaka na kena ivalavala e tukuni ena nona Vosa uqeti, na iVolatabu, ena vakabulai keda ena nona vukei keda meda vorata na Tevoro. “Sa yalodina na Kalou,” e kaya vei keda na iVolatabu, “ena sega ni laivi kemudou mo dou dauveretaki vakalevu cake, me vaka ga na nomudou kaukauwa.”—1 Korinica 10:13.
Bibi Meda Vakabauta na Kalou
E veivakauqeti dina nida kila ni dau kauaitaki keda yadudua na Tamada vakalomalagi! A bau vakayagataki Luvena sara mada ga, o Jisu Karisito, me vakavulica vei keda na masu. Oqori sara ga na vuna eda via vakamarautaka kina na Kalou o Jiova. Eda na cakava vakacava oya?
Na iVolatabu e tukuna: “Kevaka sa sega na vakabauta sa ka dredre sara me da vinaka vua na Kalou ni ko ira kece ga era via torova na Kalou e dodonu me ra vakabauta ni sa bula tiko ko koya, ka ni sa dau saumi ira tale ga era vakasaqarai koya.” (Iperiu 11:6, VV) E rawati vakacava na vakabauta vaka oqori? E kaya na iVolatabu: “Sa rawa na vakabauta e na vakarorogo.” (Roma 10:17) Era marautaka na iVakadinadina i Jiova na veivosakitaka na veika vakaivolatabu vei ira kece era gadreva mera qarava na Kalou ena yavu ni vakabauta dina.
Ena ivakamacala ni Masu ni Turaga oqo, e nuitaki ni o na kila vinaka kina na kena ibalebale. Nomu vakalevutaka nomu kilaka me baleti Jiova kei na icovi e vakarautaka vei ira “era sa vakasaqarai koya,” ena vakaukauataka nomu vakabauta na Kalou. Oni uqeti gona mo ni vulica e levu tale na ka me baleta na Kalou kei na nona inaki, me rawa ni oni na marautaka tawamudu kina e dua na veiwekani voleka kei na Tamada vakalomalagi.—Joni 17:3.
[iYaloyalo ena tabana e 5]
“Tama i keimami mai lomalagi, me vakarokorokotaki na yacamuni, me yaco mai na nomuni matanitu, me caka na lomamuni e vuravura, me vaka sa caka tiko mai lomalagi. Ni solia mai vei keimami e na siga oqo na kakana e rauti keimami. Ni bokoca mada na neimami i valavala ca me vaka keimami sa bokoca oti na nodra era sa i valavala ca vei keimami. Ni kakua ni kauti keimami ki na vere; ka mo ni vakabulai keimami mai na ca.”—Maciu 6:9-13, VV
[iYaloyalo ena tabana e 7]
O Jiova ena solia vei ira era lomani koya na veika e vinakati mera bula kina
[iYaloyalo ena tabana e 7]
E dau vukei keda na Kalou meda vorata na Tevoro
[iYaloyalo ena tabana e 7]
Kevaka eda vosoti ira era ivalavala ca vei keda, me vakataki Jope, ena qai rawa ni yalololoma vei keda na Kalou