“Era Marau o Ira na Kauaitaka Nodra Bula Vakayalo”

NI DAU yadra ena matakalailai na manumanu vuka, e vakalevu me dau tagi mada ni bera ni vuka me lai vaqara kena. Ena yakavi, ni lesu mai ina nona iroro, e dau mai tagitagi tale ni bera ni qai moce. So na gauna era vakalutuyaloka ra qai susuga na luvedra. E via tautauvata na veika era cakava na veimanumanu tale e so.

Eda duidui na tamata. Dina nida dau kana, moce, da qai vakatubukawa tale ga, ia e levu vei keda e sega ni yaco ga e kea na ka eda cakava. Eda via kila na vuna eda bula tiko kina. Eda via kila na inaki ni noda bula. Eda gadreva tale ga me dua na noda inuinui. Na gagadre oqo e tiko ga vua na tamata, oya na nona kauaitaka na veika vakayalo.

Buli Meda iTovo Vata kei na Kalou

E vakamacalataka na iVola Tabu na vu ni noda kauaitaka na veika vakayalo. E kaya: “Sa bulia na tamata na Kalou mei tovo vata kei koya; e nai tovo ni Kalou sa buli koya ko koya; na tagane kei na yalewa sa buli rau ko koya.” (Vakatekivu 1:​27) Nida buli meda ‘itovo vata kei na Kalou,’ e se rawa tiko ga meda vakatotomuria e so na itovo ni Kalou dina ga ni sa takavi keda na ivalavala ca. (Roma 5:​12) Me kena ivakaraitaki, e rawa nida maqosa ena ka eda cakava. E tu tale ga vei keda na vuku kei na lewadodonu, e rawa tale ga nida vakuai keda ena noda veilomani. Kuria, e rawa tale ga nida raica lesu na veika sa oti da qai lalawataka na veika eda na cakava ena gauna e se bera mai.​—Vosa Vakaibalebale 4:7; Dauvunau 3:​1, 11; Maika 6:8; Joni 13:34; 1 Joni 4:8.

Noda kauaitaka na veika vakayalo e ivakaraitaki ni noda taleitaka na qarava na Kalou. Kevaka e sega ni vinaka na noda veiwekani kei na Dauveibuli, eda na sega ni kunea na marau dina e dei. E kaya o Jisu: “Era marau o ira na kauaitaka nodra bula vakayalo.” (Maciu 5:​3, NW) Ia, meda qarauna meda vakaceguya na gagadre oqori ena veika dina vakayalo, oya na veika dina me baleta na Kalou, na nona ivakatagedegede, kei na nona inaki vua na kawatamata. Eda na kunea e vei na veika dina vakayalo oqori? Ena iVolatabu.

“Sa Dina na Nomuni Vosa”

E vola na yapositolo o Paula: “Sai koya na Kalou sa vakavuna nai Vola Tabu kecega, a sa yaga oqo mei vakavuvuli, me vunauca na ca, me ia kina na vakadodonutaki, me ia kina na vakatavuvuli e na ka e dodonu.” (2 Timoci 3:​16) Na vosa i Paula e duavata kei na vosa i Jisu, ni a kaya ena nona masu vua na Kalou: “Sa dina na nomuni vosa.” Na Vosa oqori na iVolatabu, e ka vakayalomatua kina meda dikeva se salavata kaya se sega na veika eda vakabauta.​—Joni 17:​17, VV.

Nida veidutaitaka na veika eda vakabauta kei na Vosa ni Kalou, eda na vakatotomuri ira tiko na kai Peria makawa era via vakadinadinataka ni salavata kei na iVolatabu na ivakavuvuli i Paula. A sega ni vakalewai ira na kai Peria o Luke, e vakavinavinakataka ga na ka era cakava. E vola o Luke: “Era taleitaka vakalevu na vakarogoca na vosa, ka ra sa dau vakasaqaqara e na i Vola Tabu e na veisiga me ra raica kina se sa dina na veika era rogoca se sega.” (Cakacaka 17:​11, VV) Nira dau veicoqacoqa ena gauna oqo na ivakavuvuli vakalotu kei na ivakavuvuli me baleta na itovo, e dodonu meda vakatotomuria na nodra ivakaraitaki vinaka na kai Peria.

E dua tale na sala e kilai kina na ka dina oya nida raica ni sa veisautaki ira na tamata. (Maciu 7:​17) Me kena ivakaraitaki, ni bulataki na ka dina e vakavuvulitaka na iVolatabu, e dodonu me veisautaka e dua me tagane vakawati vinaka cake, tama vinaka cake, yalewa vakawati vinaka cake, se tina vinaka cake, me rawa kina mera mamarau cake ra qai lomavakacegu kina na vuvale. “Era sa kalougata cake ga [“marau,” NW] ko ira era rogoca na vosa ni Kalou ka muria,” e kaya o Jisu.​—Luke 11:​28, VV.

Ena vosa i Jisu oqo eda lai nanuma sara kina na vosa i Tamana vakalomalagi, ena nona kaya vei ira na Isireli makawa: “Koi au ko Jiova na nomu Kalou, ka’u sa vakavulici iko mo vinaka kina, ka’u sa tuberi iko e na sala mo lakova. De ko a vakarorogo ki na noqu vunau! sa na qai vaka na uciwai na nomu vakacegu, ka vaka na ua ni wasawasa na nomu cakacaka dodonu.” (Aisea 48:​17, 18) O ira kece na vinakata na yalololoma kei na cakacaka dodonu era na rogoca na vakamamasu oya!

So Era Vinakata me “Qasikanunu na Daligadra”

A vakamamasu vaka oya na Kalou vei ira na Isireli baleta nira a vakacalai ena ivakavuvuli ni lotu lasu. (Same 106:​35-40) Meda qarauni keda tale ga vaka kina mai na ivakavuvuli lasu. E vola o Paula me baleti ira na kaya wale tu ga nira lotu Vakarisito: “Ni na yaco na gauna era na sega ni vosota kina nai vakavuvuli dodonu; ia ena vaka na nodra gagadre ca, era na vakalewevuqataki ira kina na nodrai vakavuvuli, ni sa qasikanunu na daligadra; a ra na vagolea tani na daligadra mai na ka dina, ka lesu ki nai tukutuku wale.”​—2 Timoci 4:​3, 4.

Era vaqasikanunutaka na daligadra na tamata o ira na iliuliu ni lotu ena nodra vakadonuya na ivalavala e vakavuna na gagadre ca, me vaka na veiyacovi ena taudaku ni vakawati, veimoceri vakatagane se vakayalewa, kei na daumateni. E tukuna vakamatata na iVolatabu ni o ira na vakadonuya kei ira na cakava sara tiko ga na ivalavala vaka oya “era na sega ni rawata na matanitu ni Kalou.”​—1 Korinica 6:​9, 10, VV; Roma 1:​24-32.

Io, e gadrevi dina na yaloqaqa ena kena bulataki na ivakatagedegede vakaivolatabu, ia e rawa ga ni muri na veivakatagedegede oqori dina nida na vakadiloi kina. So vei ira na iVakadinadina i Jiova era dau vakayagataka tu e liu na wainimate gaga, ra daumateni, veidauci, ra dauvakacaca, daubutako, ra dau lasu tale ga. Ia, nira mai vakabauta na Vosa ni Kalou qai vukei ira tale ga na yalo tabu, era sa veisautaka na nodra ivalavala mera “cakava rawa kina na i valavala e kilikili kei na Turaga [o Jiova].” (Kolosa 1:​9, 10, VV; 1 Korinica 6:​11) Nira sa veisaututaki rawa kei na Kalou, era sa mai lomavakacegu tale ga. Me vaka eda vakarau raica oqo, sa mai dua tale ga na nodra inuinui.

iNuinui ni Matanitu ni Kalou

E vakaraitaka na iVolatabu ni na kauta mai na Matanitu ni Kalou na inuinui ni bula vakacegu e tawamudu vei ira na tamata talairawarawa. A kaya o Jisu ena masu a vakavulica: “Me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.” (Maciu 6:​10, VV) Io, na Matanitu ni Kalou duadua ga ena qai vakavuna me caka na loma ni Kalou e vuravura. Baleta ni Matanitu vakalomalagi oqo e veiliutaki kina o Jisu Karisito, ena vakayagataka na Kalou me vakaraitaka kina na dodonu e tiko vua me lewa na vuravura.​—Same 2:​7-​12; Taniela 7:​13, 14.

Ni Tui ni Matanitu vakalomalagi oya o Jisu Karisito, ena sereki ira na tamata talairawarawa mai na nodra vesuki tu ena veimataqali veivakabobulataki kece ga, okati kina na ivalavala ca i Atama e kabiti ira tu kei na we ni ivalavala ca oya, na tauvimate kei na mate. E kaya na Vakatakila 21:​3, 4 (VV): “Raica, sa tiko na vale ni Kalou, sa tiko vei ira na tamata . . . E na tavoya tani na wai ni mata kece ga mai na matadra ko koya [na Kalou o Jiova] ka sa na sega tale na mate; sa na sega tale ga na rarawa se na tagi se na vutugu, ni ra sa takali tani na veika makawa.”

Ena vakilai tale ga na bula veisaututaki ena veiyasa i vuravura. Eda kila vakacava? E vakadeitaki ena Aisea 11:9 ni o ira na vakarurugi ena Matanitu ni Kalou: “Era na sega ni ia na veivakacaca se na veivakamatei e na noqu ulu-ni-vanua tabu kecega: ni na roboti ko vuravura e na veikilai kei Jiova, me vaka sa ubia na wasa titobu na wai.” Io, era na qai kila vinaka na Kalou, ra talairawarawa tale ga vua na tamata kece era tiko e vuravura ena gauna oya. O marautaka beka na veika oqori? Ke vaka kina, oqo sara ga na gauna mo sa ‘veikilai kina kei Jiova.’

O na Rogoca na iTukutuku ni Matanitu ni Kalou?

Ena vakayagataka na Kalou na Matanitu oqo me vaqeavutaka na cakacaka kece i Setani. Ena vakavulici ira tale ga na tamata mera kila na Nona sala uasivi. Oya na vuna a vakaliuca kina o Jisu na itukutuku ni Matanitu ni Kalou me usutu ni nona veivakavulici. “Sa dodonu me’u lako me’u tukuna nai tukutuku-vinaka ni matanitu ni Kalou,” e kaya o Jisu, “ni sa ka oqo ka’u sa talai mai kina.” (Luke 4:​43) A vakaroti ira tale ga na nona imuri o Karisito mera vakaraitaka na itukutuku oqo vei ira tale e so. (Maciu 28:​19, 20) E parofisaitaka tale ga: “Ka na vunautaki mada na i Tukutuku Vinaka ni matanitu ki na vuravura taucoko, me i vakadinadina ki na veivanua kece ga, sa na qai yaco mai na i vakataotioti.” (Maciu 24:​14, VV) Sa roro mai na ivakataotioti oya. E rui bibi kina mera rogoca na tamata na itukutuku vinaka e veivakabulai oqo!

O Albert, e vakamacalataki ena imatai ni ulutaga, e qai rogoca na itukutuku ni Matanitu ni Kalou ena gauna erau vuli iVolatabu tiko kina kei ira na iVakadinadina i Jiova o watina kei luvenatagane. A vakatitiqa taumada o Albert. E lai kerei nona italatala sara me sikovi watina kei luvena me mai vakacalai ira na iVakadinadina. Ia e sega ni via lako mai o na italatala. E mani vakarorogo ena dua na vuli iVolatabu o Albert me rawa kina ni vakacala na nodra ivakavuvuli na iVakadinadina. Ni oti ga na vuli oya, sa vinakata me vuli tale ga. E qai vakamacalataka e muri na vu ni kena veisau na nona rai. E kaya: “Oqo sara ga na ka au vaqara voli.”

Sa qai kauaitaka na nona bula vakayalo o Albert, e sega tale ni suka i muri. E vakaraitaka vua na iVolatabu na ka e vaqaqa voli mai vakadede, oya na vuna e sotava voli kina na tamata na lewa e tawadodonu kei na veidabui, kei na inuinui me baleta na gauna e se bera mai. E lomavakacegu sara ga ena nona kila na ka dina mai na iVolatabu. O sa kauaitaka tiko beka na nomu bula vakayalo? Vakacava mo wilika mada na taro era tiko ena kato ena tabana e 6? Ke o via taroga e so tale na ka, era na marau na iVakadinadina i Jiova mera vukei iko.

[Kato/iYaloyalo ena tabana e 6]

SA VAKACEGUI TIKO BEKA NOMU BULA VAKAYALO?

O lomavakacegu beka ena kakana vakayalo o kania tiko? Keitou sureti iko mo wilika na taro e koto oqo e ra qai toqa na taro o rawa ni sauma donu.

□ O cei na Kalou dina, o cei na yacana?

□ O cei o Jisu Karisito? Na cava e mate kina? E yaga vakacava vei iko na nona mate?

□ E tiko beka na Tevoro? E vu mai vei o koya?

□ Na cava e yacovi keda nida mate?

□ Na cava na inaki ni Kalou me baleta na vuravura kei na kawatamata?

□ Na cava na Matanitu ni Kalou?

□ Na cava na ivakatagedegede ni itovo e vinakata na Kalou?

□ Na itavi cava e lesia na Kalou vei tama kei tina ena dua na vuvale? Na cava e so na ivakavuvuli vakaivolatabu e kuria na marau ni vuvale?

Ke sega ni matata vei iko e so na isaunitaro oqo, qai kerea e dua na ilavelave ni brochure Na Cava e Loma ni Kalou Vei Keda? Tabaka na iVakadinadina i Jiova ena volekata na 300 na vosa, na brochure oqo e vakamacalataka e 16 na ivakavuvuli vakaivolatabu qai sauma tale ga mai na iVolatabu na isau ni veitaro e cake.

[iYaloyalo ena tabana e 4]

Eda sega ni vakataki ira na manumanu baleta nida kauaitaka na noda bula vakayalo

[iYaloyalo ena tabana e 5]

“Era na vakalewevuqataki ira kina na nodrai vakavuvuli, ni sa qasikanunu na daligadra.”​—2 Timoci 4:3

[iYaloyalo ena tabana e 7]

Ena kauta mai na Matanitu ni Kalou na bula vakacegu e tawamudu