Taro na Dauwiliwili

A tawayalodina vua na Kalou o Tui Solomoni e Isireli makawa ena gauna sa kena turaga kina, sa kena ibalebale beka oya ni na sega ni vakaturi?​—1 Tui 11:3-9.

E volai tu ena iVolatabu na yacadra e so na turaga kei na marama vakabauta era na vakaturi, ia e sega ga ni tukuna vakamatata nira na vakaturi o ira yadua e kune na yacadra ena iVolatabu. (Iperiu 11:​1-​40) Me baleti Solomoni, e rawa nida kila na vakataulewa ni Kalou ena noda vakatauvatana na ka e yacovi koya ni sa mate kei na ka e yacovi ira e so na tamata yalodina nira sa mate.

E rua ga na ituvaki e kaya na iVolatabu ena yaco vei ira na mate​​—⁠oya nodra yali tu vakalekaleka se ra yali tawamudu. O ira era lewai ni sega ni ganiti ira mera vakaturi, era kolotaki i “Qiena,” se “na drano buka waqa.” (Maciu 5:​22, NW; Marika 9:​47, 48, NW; Vakatakila 20:14) Erau okati e ke na imatai ni veiwatini o Atama kei Ivi, o Jutasa Isikarioti na dau veidabui, kei ira era mate ena vakataulewa i Jiova me vakataki ira na tamata ena gauna i Noa kei ira na lewe i Sotoma kei Komora.a Ni sa mate na tamata, o ira e ganita mera na vakaturi era na tu ena ibulubulu​​—⁠e vakatokai me o Seoli, se Etesi ena vosa a volai taumada kina na iVolatabu. E kaya na iVolatabu me baleti ira era na vakaturi: “Ia na wasawasa sa soli ira na mate era sa tiko kina, o mate talega kei bulu erau sa soli ira na mate era sa tiko kina; a sa lewai ko ira na tamata yadua me vaka na nodrai valavala.”​​—⁠Vakatakila 20:⁠13.

O ira gona na tamata yalodina e tukuni ena Iperiu wase 11, era wawa tu e Seoli se na ibulubulu mera na vakaturi. E maliwai ira oqo o Eparama, Mosese, kei Tevita, e so na dauveiqaravi yalodina ni Kalou. Ia dikeva mada na cava e kaya na iVolatabu me baleta na nodra mate. “Ia ko iko,” e kaya o Jiova vei Eparama, “ko na lako e na vakacegu vei ira na tamamu; ko na buluti ni ko sa qase sara mai.” (Vakatekivu 15:15) Vei Mosese e kaya o Jiova: “Raica, ko na moce vata kei ira na nomu qase.” (Vakarua 31:16) E kaya tale ga na iVolatabu me baleti Tevita na tama i Solomoni: “A sa moce vata kei ira na nona qase ko Tevita, a sa bulu e na koro i Tevita.” (1 Tui 2:​10) Koya gona, na vosa ‘moce kei ira na nona qase,’ e vakaibalebaletaka ni o koya e mate sa lako i Seoli se na ibulubulu.

Na cava e yaco vei Solomoni ni sa mate? E sauma na iVolatabu: “Na gauna ka lewa kina ko Solomoni mai Jerusalemi, vei ira kecega na Isireli, sa vasagavulu na yabaki. A sa moce vata kei ira na nona qase ko Solomoni, a sa bulu e na koro i Tevita na tamana.” (1 Tui 11:​42, 43) Kena irairai gona ni rawa nida kaya ni wawa tu o Solomoni me na vakaturi mai Seoli se Etesi.

Na kena tukuni ni rairai na vakaturi o Solomoni, sa kena ibalebale ni rawa tale beka ga nira na vakaturi e so e kaya na iVolatabu nira ‘moce tu kei ira na nodra qase.’ Levu sara mada ga na tui era veiliutaki ni sa mate o Solomoni, dina nira sega ni yalodina, e tukuni ira vaka oqori na iVolatabu. Sega ni dredre na ciqoma na vakasama oqo, vakauasivi “ni ra na tu cake tale mai na mate ko ira na yalododonu kei ira na sega ni yalododonu.” (Cakacaka 24:​15, VV) Ia, e matata nida na qai kila ga se o cei e vakaturi, ena gauna sa ra na vakaturi oti kina “ko ira kecega e nai bulubulu.” (Joni 5:​28, 29) Me kua gona nida via lai vakadeitaka sara na nona na vakaturi, se sega, e dua na tamata ena gauna makawa, meda wawa ga, ena noda nuitaka na lewadodonu i Jiova.

[iVakamacala e ra]