O Dau Nanuma Beka ni Sega na Kemu Yaga?

VOLEKA ni nona bula kece o Lena, e valuta voli kina na nona nanuma ni sega na betena. E kaya: “Noqu a vakacacani niu se gone e vakayalolailaitaki au sara ga, au lai nanuma kina ni sa sega na kequ yaga.” Dua tale o Simone, ni vakasamataka lesu tiko na nona bula ni se gone, a kaya kina, “Au dau galili, qai noqu vakabauta kece ni sega na betequ.” Na vusolo ni yalo e vu mai na ituvaki ni rai vaka oqori e sa takalevu tu ena gauna oqo. E dua na tabana ni veivakasalataki me baleti ira na itabagone e dau caka ena talevoni, e kaya ni voleka ni veimama vei ira na dau qiri yani era tukuna ni “dau yacovi ira vakalevu na vakasama nira tamata tawayaga.”

Era kaya e so na vuniwai ni vakasama, ni dau votu na yalo ni nona beci koya e dua, kevaka e vakila nira beci koya na tamata era veimaliwai kaya. Ena rairai bucina na ituvaki ni vakasama oqori kevaka e dau vosataki, sivia nona vakalewai qai rukaki vakaca. Se mani cava e vakavuna, e macala ni na vakayalolailaitaki koya qai rawa sara mada ga ni vakaleqai kina. Ena dua na vakadidike vakavuniwai a caka wale ga oqo, e laurai ni o ira era nanuma ni sega na betedra era sega ni dau nuitaki ira vakataki ira, e sega tale ga nira nuitaki ira na tani. Macala ni oqo ena lai vakaleqa na nodra bula vakawati se vakacaraka na veitokani voleka era sa bau lai bukia. “E rawa gona ni tukuni,” e kaya na ripote ni vakadidike oqori, “nira ‘vakavuna’ ga na ka sara ga era cata, oya na kena tomani tiko na nodra nanuma ni sega na kedra yaga.”

O ira era dau beci ira ga, era vakila vakalevu na ka e kaya na iVolatabu, oya ni dau ‘leqa na lomadra.’ (Same 94:19) Era nanuma ni sa na sega tu ga na kedra yaga. Ni yaco gona e dua na ka ca, era na beitaki ira ga. Era na rairai vakacaucautaki ena vuku ni veika era sa rawata, ia ena beitaki ira tu ga na lomadra nira vakataka e dua e veidabui ena qai vakavotui ena dua na gauna wale ga oqo, se dua na gauna e muri. Nodra vakabauta gona e levu ni sega ni ganiti ira na bula marau, era sa qai muria sara kina e dua na ituvaki ni bula torosobu, ni sega vei ira na kaukaua mera vakadodonutaka. O Lena, na goneyalewa sa cavuti oti, e tini sara ga me sa dau cata kina na kana, e vu vakatabakidua oqo ena kena tarai koya vakaca na nona dau beci koya ga, e kaya, “E sega na noqu kaukaua meu cakava rawa kina e dua na ka.”

Sa nodra ivotavota beka ga o ira e ‘vakaleqai tu na lomadra’ mera na sotava tiko ga na ituvaki oqori ena nodra bula taucoko? E tiko beka na kena iwali? E volai tu ena iVolatabu na ivakavuvuli kei na ivakasala yaga e rawa ni vukea e vuqa mera valuta kina na leqa oqori. Na cava soti na ivakavuvuli oya, kei na sala cava era sa vukei tiko kina na sotava na leqa oqo mera kune marau? Ena qai vakamacalataki oqori ena ulutaga e tarava.