O Rawa ni Vakavotuya na Lagilagi ni Kalou?

“Eda . . . vakavotuya na lagilagi i Jiova me vaka na iloilo.”​—2 KORINICA 3:​18, NW.

1. Na cava e raica o Mosese, na cava e qai yaco tarava?

E RAIVOTU vakatubuqoroqoro duadua e se qai bau raica e dua na tamata. Ni tiko duadua ena Ulunivanua o Saineai, e vakadonui vei Mosese na ka dredre e kerea. E vakatarai me raica na lagilagi i Jiova, na ka e se sega ni bau raica e dua na tamata. Ia, e sega ni raici Jiova sara o Mosese. Ni rui totoka vakaoti na irairai ni Kalou, ena sega ni rawa ni bula e dua na tamata e raici koya. E tabonaki Mosese ga ena “ligana” o Jiova me yacova ni sa tabogo, ni vakayagataka e dua na nona italai agilosi. E qai vakatarai Mosese o Jiova me raica na rarama e ivakaraitaki ni nona lagilagi. E vosa tale ga o Jiova vei Mosese ena gusu ni agilosi. E vakamacalataka na iVolatabu na ka e qai yaco tarava: “Sa siro sobu ko Mosese mai na ulu-ni-vanua ko Saineai . . . sa serau na kuli ni matana ni rau sa veivosaki kaya ko Koya [Jiova].”​—Lako Yani 33:18–​34:​7, 29.

2. Na cava e vola na yapositolo o Paula me baleta na lagilagi era vakavotuya na lotu Vakarisito?

² Kaya mada ke o tiko kei Mosese ena ulunivanua oya. Sa na dua na ka na nomu marau ni o raica na lagilagi se serau ni Kalou Cecere Duadua kei na nomu rogoca tale ga na domona! Sa na dua dina na ka dokai na nomudrau siro sobu vata mai ena ulunivanua o Saineai kei Mosese, na dauveisorovaki ni veiyalayalati ni Lawa! Ia, o kila tiko beka ni o ira na lotu Vakarisito dina era na vakavotuya na lagilagi ni Kalou ena so na sala e uasivia na nona vakavotuya o Mosese na lagilagi ni Kalou? E tukuni na ka bibi oqo ena ivola e vola na yapositolo o Paula. E vola ni o ira na lotu Vakarisito lumuti era “vakavotuya na lagilagi i Jiova me vaka na iloilo.” (2 Korinica 3:​7, 8, 18, NW) E rawa ni kainaki tale ga ni o ira na lotu Vakarisito e nodra inuinui na bula e vuravura era vakavotuya tale ga na lagilagi ni Kalou.

Ra Vakavotuya na Lotu Vakarisito na Lagilagi ni Kalou

3. E levu cake vakacava na ka eda kila me baleti Jiova ni vakatauvatani kei Mosese?

³ E rawa vakacava meda vakavotuya na lagilagi ni Kalou? Eda sega ni se bau raici Jiova se rogoci koya me vakataki Mosese. Ia sa mai levu cake na ka eda kila me baleti Jiova ni vakatauvatani kei Mosese. E qai basika mai me vaka na Mesaia o Jisu ni sa oti e voleka ni 1,500 na yabaki nona mate o Mosese. Ena sega gona ni kila o Mosese na kena mai vakayacori na Lawa vei Jisu, o koya e sereki ira na tamata mai na nodra vakabobulataki tu ena ivalavala ca kei na mate. (Roma 5:​20, 21; Kalatia 3:​19) A vakaiyalayala ga na nona kila o Mosese na inaki i Jiova ena vakilai ena veiliutaki ni Matanitu nei koya na Mesaia, kei na Parataisi e vuravura ena kauta mai na matanitu oya. Eda sega ni raica na lagilagi i Jiova ena matada dina, ia ena matada ga ni vakabauta e yavutaki ena ivakavuvuli vakaivolatabu. Eda sega tale ga ni rogoca na domo i Jiova ena gusu ni agilosi, ia eda rogoca ga ena iVolatabu, vakauasivi ena ivola na Kosipeli, ni vakamacalataki vinaka kina na ivakavuvuli i Jisu kei na nona cakacaka vakavunau.

4. (a) Era vakavotuya vakacava na lotu Vakarisito lumuti na lagilagi ni Kalou? (b) Era vakavotuya vakacava na lagilagi ni Kalou o ira e nodra inuinui na bula e vuravura?

⁴ Dina nira sega ni vakavotuya na lagilagi ni Kalou ena rarama e cila mai matadra na lotu Vakarisito, ia e rarama ga na matadra nira kacivaka na itovo lagilagi i Jiova kei na nona inaki. Me baleta na noda gauna, e parofisaitaka o Aisea nira na ‘tukuna na lagilagi i Jiova ina veivanua’ na tamata ni Kalou. (Aisea 66:​19, NW) Eda wilika tale ga ena 2 Korinica 4:​1, 2 (VV): “Sa solia vei keitou na Kalou na i tavi oqo . . . , keitou sa biuta tani na vei i tovo ni butobuto ka vakamadua, keitou sa sega ni cakacaka vaka i lawaki se vakatanitaka na vosa ni Kalou. Ia na neitou tusanaka vakadodonu na ka dina, keitou sa vakaraitaki keitou yani kina vaka i keitou ki na nodra lewa e loma e na mata ni Kalou.” O Paula a tukuni ira tiko vakabibi na lotu Vakarisito lumuti, o ira na ‘italatala ni veiyalayalati vou.’ (2 Korinica 3:6) Ia na nodra cakacaka vakaitalatala oqo era oka tale ga kina na lewe levu era sega ni wiliki rawa e nodra inuinui na bula tawamudu e vuravura. Na nodra cakacaka vakaitalatala na ilawalawa ruarua oqo e okati kina na nodra vakavotuya na lagilagi i Jiova ena veika era vakavuvulitaka, vaka kina ena ivakarau ni nodra bula. E noda itavi qai ka dokai tale ga meda vakavotuya na lagilagi ni Kalou Cecere Duadua!

5. Na cava e vakadinadinataka na noda sautu vakayalo?

⁵  Me vaka a parofisaitaka o Jisu, sa vunautaki tiko ena veiyasa i vuravura ena gauna oqo na itukutuku vinaka ni Matanitu ni Kalou. (Maciu 24:14) Era sa vakabauta na itukutuku vinaka ra qai veisautaka na nodra bula mera cakava na loma ni Kalou na tamata mai na veimatanitu, kei na veimataqali era duivosavosa. (Roma 12:2; Vakatakila 7:9) Me vakataki ira na lotu Vakarisito taumada, e dredre mera sega ni tukuna na veika era raica ka rogoca. (Cakacaka 4:​20) E se qai vakadua ena nona bula na kawatamata me sivia e ononamilioni era vakavotuya tiko na lagilagi ni Kalou ena dua na gauna. O bau dua vei ira? Na sautu vakayalo era vakila tiko na tamata ni Kalou e ivakadinadina ni nona vakalougatataki ira qai taqomaki ira tiko o Jiova. E vakilai levu na kena vukei keda tiko na yalo i Jiova baleta ni saqati keda tiko e so na igu kaukaua. Meda raica mada se vukei keda tiko vakacava na yalo i Jiova.

Sega ni Vagalui na Tamata ni Kalou

6. Na cava e vinakati kina na vakabauta kei na yaloqaqa nida vakadinadinataki Jiova?

⁶ Kaya mada ke o kacivi mo lai vakadinadinataka nona cala e dua na daubasulawa e dau veivakalolomataki. O kila ni daubasulawa oqo e tiko nona isoqosoqo kaukaua, ena saga sara ga vakaukaua mo kua ni vakavotuya na veika e baleti koya. Ena vinakati mo yaloqaqa o qai nuitaka tale ga ni na taqomaki iko na lawa mo qai rawa kina ni vakadinadinataka nona cala na daubasulawa oya. E vaka kina o keda. Nida vakadinadinataki Jiova kei na veika e nakita me vakayacora, eda na vakalasui Setani na Tevoro, ni o koya e dauveivakamatei, e lasulasu qai vakaisina tiko na vuravura taucoko. (Joni 8:​44; Vakatakila 12:​9, VV) E vinakati me kaukaua na noda vakabauta da qai yaloqaqa me rawa kina nida vakadinadinataki Jiova da qai vakalasuya na Tevoro.

7. E kaukaua vakacava o Setani, na cava e saga me cakava?

⁷ O Jiova e Cecere Duadua. E kaukaua cake sara vei Setani. Meda nuidei gona ni o Jiova e vinakata sara ga me taqomaki keda nida qaravi koya ena yalodina. (2 Veigauna 16:9) Ia, o Setani e nodra iliuliu na timoni kei ira na tamata era yawaka na Kalou. (Maciu 12:​24, 26; Joni 14:30) Ni sa tiko sara ga e vuravura qai “cudru vakalevu,” sa qai kaukaua ga na nona saqati ira na tamata i Jiova o Setani ena nona saga me vagalui ira ena nodra vunautaka na itukutuku vinaka ni vakayagataka na vuravura e lewa tiko. (Vakatakila 12:​7-9, 12, 17) E cakava vakacava oqo? Oqo e tolu mada ga na sala.

8, 9. E vakayagataka tiko vakacava o Setani na loloma e cala? Na cava meda digitaki ira vinaka kina o ira eda dau veimaliwai?

⁸  E dua na sala e vagolei keda tani tiko kina o Setani oya na noda vakaogai keda ena bula ni veisiga. O ira na tamata ena gauna oqo era dau vinakata vakalevu na ilavo, era lomani ira ga, ra qai dau lomana na marau. Era sega ni lomana na Kalou. (2 Timoci 3:​1-4) Nira vakaogai ira vakalevu ena bula ni veisiga, e levu era ‘sega ni kauaitaka’ na itukutuku vinaka eda kauta vei ira. Era sega sara ga ni taleitaka mera vulica na ka dina ena iVolatabu. (Maciu 24:​37-​39, NW) E rawa ni tarai keda na ivakarau ni rai oya, me vakavuna meda malumalumu vakayalo. Ke da lomana tale ga vakalevu na veika vakayago kei na marau, ena batabata na noda lomana na Kalou.​—Maciu 24:12.

⁹ Oya na vuna e dodonu kina vei keda na lotu Vakarisito meda digitaki ira vinaka o ira eda dau veimaliwai. “Ena vuku mai ko koya sa malele vata kei ira na vuku,” e vola o Tui Solomoni, “ia ko koya era veitokani vata kei na lialia ena rusa.” (Vosa Vakaibalebale 13:20) Meda malele vata tiko mada ga kei ira na vakavotuya tiko na lagilagi ni Kalou. Sa na bau dua dina na ka totoka oqori! Nida veimaliwai kei ira na tacida vakayalo ena gauna ni soqoni kei na veigauna tale e so, eda na vakauqeti dina ena nodra dau loloma, ena nodra vakabauta, nodra marau, kei na nodra vuku. Ena vakaukauataki keda meda tomana tiko ga na noda cakacaka vakavunau na veimaliwai vinaka vaka oqori.

10. E vakalialiai ira vakacava na vakavotuya tiko na lagilagi ni Kalou o Setani?

¹⁰ Na ikarua ni sala e saga tiko kina o Setani me tarovi ira na lotu Vakarisito kece mera kua ni vakavotuya na lagilagi ni Kalou, oya na nona veivakalialiai. Eda sega ni kurabuitaka na ivadi oqo. A vakalialiai tale ga o Jisu ena nona cakacaka vakavunau e vuravura, e dredrevaki, kaseti, veiwalitaki, vakaisini ra qai kasiviti koya tale ga. (Marika 5:​40; Luke 16:14; 18:32) Era vakalialiai tale ga na lotu Vakarisito taumada. (Cakacaka 2:​13; 17:32) Era vakalialiai tale ga na tamata i Jiova ena gauna oqo. E kaya na yapositolo o Pita nira rawa ni vakatokai mera “parofita vakailasu.” Me baleta na gauna ni ivakataotioti, e parofisaitaka o Pita nira “na lako mai e so na tamata era dau muria na gagadre ca ni yagodra e na gauna e muri. Era na vakalialiai kemuni, ka ra kaya tiko, ‘Sa evei na vosa ni yalayala me baleta na nona lako mai?  . . . era sa yaco tiko ga na veika kece me vaka era a yaco tiko mai na i vakatekivu kei vuravura.’ ” (2 Pita 3:​3, 4, VV) Era dau vakalialiai na tamata ni Kalou baleta nira sega ni lakovata tiko kei na gauna oqo. E kainaki ni sega ni veiganiti kei na gauna oqo na ivakatagedegede ni itovo e vakaivolatabu. E levu era kaya ni ka lialia na itukutuku eda vunautaka tiko. (1 Korinica 1:​18, 19) E rawa nida vakalialiai na lotu Vakarisito e koronivuli, vanua ni cakacaka, so na gauna ena loma sara ga ni vuvale. Ia eda na sega ni soro ena noda vakavotuya tiko na lagilagi ni Kalou ena noda cakacaka vakavunau baleta me vakataki Jisu eda kila ni dina na Vosa ni Kalou.​—Joni 17:17.

11. E vakayagataka vakacava o Setani na veivakararawataki ena nona tovolea me vagalui ira na lotu Vakarisito?

¹¹ Na ikatolu ni ivadi e vakayagataka tiko na Tevoro me vagalui keda kina oya na veitusaqati kei na veivakararawataki. A kaya o Jisu vei ira nona imuri: “Era na soli kemudou yani na tamata ki na veivakararawataki ka ra na vakamatei kemudou, dou na cati mai na veivanua e na vuku ni yacaqu.” (Maciu 24:​9, VV) Io, eda vakararawataki vakalevu na iVakadinadina i Jiova ena levu na yasa i vuravura. Eda kila ni sa parofisaitaka makawa tu mai o Jiova nira na veimecaki o ira na qarava na Kalou kei ira na qaravi Setani na Tevoro. (Vakatekivu 3:​15) Eda kila tale ga ni kevaka eda yalodina tiko nida vakatovolei, eda sa vakadinadinataka na dodonu i Jiova me liutaki lomalagi kei vuravura. Noda kila na veika oqori ena vakaukauataki keda meda vosota na veivakatovolei dredre. Kevaka eda vakadeitaka nida na vakavotuya tiko ga na lagilagi ni Kalou, ena sega ni dua na veivakararawataki ena vagalui keda vakadua.

12. Na cava meda marau kina nida yalodina tiko ni saqati keda o Setani?

¹² O vorata rawa beka na veitemaki ni vuravura o qai yalodina tiko ga ni o vakalialiai se tusaqati? E dodonu mo marau. A vakadeitaka o Jisu vei ira na qai muri koya: “Dou sa kalougata ni dou sa vakasewasewani ka vakacacani ka vosa vakacacataki vakailasu e na ka kece ga e ca e na vukuqu. Dou reki ka marau vakalevu, ni sa levu na kemudou i sau mai lomalagi, ni sa vaka oqo na nodra vakacacani na parofita era a bula e liu vei kemudou.” (Maciu 5:​11, 12, VV) Na nomu yalodina e vakadeitaka na kena sa sobuti iko na yalo tabu kaukaua i Jiova, ni vakaukauataki iko mo vakavotuya na nona lagilagi.​—2 Korinica 12:9.

Vukei Keda o Jiova Meda Vosota

13. Na cava e vu levu ni noda vosota tiko na noda vunau?

¹³ Na noda lomani Jiova kei na noda marautaka noda vakavotuya na nona lagilagi e vu levu ni noda vosota tiko na cakacaka vakavunau. Eda dau vakatotomuri koya eda lomana da qai doka tale ga. E sega tale ni dua e uasivia na Kalou o Jiova meda vakatotomuria. Ena levu ni nona loloma, e tala mai kina na Luvena e vuravura me mai tukuna na ka dina qai vakabulai ira tale ga na tamata talairawarawa. (Joni 3:​16; 18:37) Eda gadreva vata kei na Kalou mera veivutuni ra qai rawata na bula na tamata kece ga; oya na vuna eda vunau tiko kina vei ira. (2 Pita 3:9) Na gagadre oqo kei na noda saga meda vakatotomuria na Kalou, e uqeti keda meda vosota tiko na noda vakavotuya na nona lagilagi ena noda vunau tiko ga.

14. E vakaukauataki keda vakacava o Jiova meda vosota tiko na cakacaka vakavunau?

¹⁴ Ia e macala ni o Jiova ga e dau vakaukauataki keda meda vosota tiko noda cakacaka vakavunau. E vakaukauataki keda ena nona vakayagataka na yalona, nona isoqosoqo, kei na nona Vosa, na iVolatabu. E “i vurevure ni vosota” o Jiova vei ira na vinakata mera vakavotuya na nona lagilagi. E rogoca na noda masu qai solia vei keda na vuku meda vosota rawa kina na veivakatovolei. (Roma 15:​5, VV; Jemesa 1:5) E sega tale ga ni vakatara o Jiova na veivakatovolei e sivia na ka eda rawa ni vosota. Ke da nuitaki Jiova, ena vakaraitaka vei keda na sala meda dro bula kina me rawa nida vakavotuya tiko ga na nona lagilagi.​—1 Korinica 10:13.

15. Na cava e vukei keda meda vosota tiko?

¹⁵ Nida vosota na noda cakacaka vakavunau, e vakadinadinataka oya ni sobuti keda tiko na yalo tabu ni Kalou. Me kena ivakaraitaki: Kaya mada ke dua e kerei iko mo veisoliyaka wale e dua na mataqali madrai e veivale. O vakaroti mo vakayagataka ga na nomu iyau kei na nomu gauna galala ena nomu veisoliyaka. Ia o qai vakila nira lewe vica ga era vinakata na nomu madrai; so era na saqata tale ga na nomu veisoliyaka. O na tomana tiko beka na cakacaka oqori ena veivula, kei na veiyabaki kece? Rairai na sega. Ia oqo o sa gumatua tiko ni kacivaka na itukutuku vinaka ena nomu gauna galala o qai vakayagataka tiko na nomu iyau ena vica na yabaki, se sagavulu sara na yabaki. Na cava e vuna? E sega li ni vuna ni o lomani Jiova kei na nona vakalougatataka tiko na nomu saga tiko mo vosota? E vaka dina kina!

Cakacaka me Kua ni Guilecavi

16. Na cava ena yacovi keda kei ira era rogoci keda nida vosota na noda cakacaka vakavunau?

¹⁶ E sega ni vakatauvatani rawa na isolisoli ni veicakacaka e baleta na veiyalayalati vou. (2 Korinica 4:7) E iyau uasivi tale ga na cakacaka vakavunau era vakayacora tiko e veiyasa i vuravura na lotu Vakarisito era so tani tale na sipi. Ni o vosota tiko ga na nomu cakacaka vakavunau, me vaka e vola o Paula vei Timoci, ena rawa mo “vakabulai iko, kei ira talega era sa rogoci iko.” (1 Timoci 4:​16) Vakasamataka mada na kena ibalebale oya. Ena rawa mera bula tawamudu e so ena vuku ni itukutuku vinaka eda vunautaka. Ena qaqaco vinaka kina na noda veikilai kei ira eda vukei ira vakayalo. Vakasamataka mada na noda marau nida sa na bula tawamudu ena Parataisi kei ira eda vukea mera kila na Kalou! Era na sega vakadua ni guilecava na noda vukei ira. Sa tu tu na marau kei na lomavakacegu!

17. Na cava e duatani kina na gauna eda bula tiko kina oqo?

¹⁷ E duatani mai na veitabagauna sa oti na gauna eda bula tiko kina oqo. Sa na sega tale ni vunautaki na itukutuku vinaka ena dua na vuravura e yawaka na Kalou. A bula o Noa ena dua na vuravura vaka oqori, e raica tale ga na kena takali. A marautaka dina na nona kila ni a yalodina tiko ena nona cakava na loma ni Kalou ena nona taya na waqa, baleta ni a vakabulai vata kei na nona vuvale! (Iperiu 11:7) E rawa tale ga mo marau vaka oya. Vakasamataka mada na nomu sa lai tu ena vuravura vou o qai raica lesu na nomu cakacaka ena gauna ni ivakataotioti oqo, ena nomu kila ni o solia nomu vinaka taucoko ena vakatetei ni itukutuku ni Matanitu ni Kalou.

18. Na veivakadeitaki kei na veiuqeti cava e cakava o Jiova vei ira nona tamata?

¹⁸ Meda tomana tiko ga na noda vakavotuya na lagilagi ni Kalou. Eda na sega ni guilecava vakadua na noda cakava vaka kina. E nanuma tale ga o Jiova na veika eda cakava. E uqeti keda na iVolatabu: “Ni sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana ni dou a qaravi ira era sa lotu, ia dou sa qarava tikoga. Ia keitou sa vinakata mo dou dui gugumatua vakakina, mo dou vakanuinui matua sara kina ka me yacova nai vakataotioti: mo dou kakua ni vucesa, mo dou muri ira ga era sa qai taukei ni veika ka yalataki ni ra a vakabauta ka vosota vakadede.”​—Iperiu 6:​10-​12.

Vakamacalataka Mada

• Era vakavotuya vakacava na lotu Vakarisito na lagilagi ni Kalou?

• Cava e so na ivadi e vakayagataka tiko o Setani me vagalui ira kina na tamata ni Kalou?

• Na cava na ivakadinadina ni kena sobuti keda na yalo tabu ni Kalou?

[iYaloyalo ena tabana e 15]

Laurai ena mata i Mosese na lagilagi

[iYaloyalo ena tabana e 16]

Eda vakavotuya na lagilagi ni Kalou nida vunau