Vorati Setani, Ena Qai Dro Tani!

“Vakamalumalumutaki kemudou vua na Kalou. Vorata na Tevoro ena dro tani kina vei kemudou.”​—JEMESA 4:7.

1, 2. (a) Na itovo cava ni Tevoro e vakaraitaki ena veika e volai ena Aisea wase 14? (b) Na taro cava so eda na veivosakitaka?

E IVAKARAITAKI ca duadua ni viavialevu na Tevoro. E rawa ni vakatauvatani na nona dokadoka kei na veika e vola na parofita ni Kalou o Aisea. Ni vo e duanaudolu vakacaca na yabaki me qai lewai vuravura o Papiloni, era tukuna na tamata i Jiova vei “tui Papiloni”: “Ko a kaya e lomamu, Ka’u na cabe ki lomalagi, ka’u na vakaceceretaka na noqui tikotiko me cecere ka lolovira na kalokalo [o ira na tui ena iyatukawa i Tevita] . . . ka’u na tautauvata kaya sa Cecere sara.” (Aisea 14:​3, 4, 12-​15; Tiko Voli Mai na Lekutu 24:17) Na dokadoka oya ni “tui Papiloni” e vakatale ga na nona dokadoka o Setani, “na kalou ni vuravura oqo.” (2 Korinica 4:4) Ia ena qai vakarusai o Setani ena vuku ni nona viavialevu, me vaka ga na kena tini botoilevu na veiliutaki ni matanitu o Papiloni.

² Ia ena gauna e bula tiko kina na Tevoro, eda na rairai taroga tiko e so na taro me vaka: E dodonu beka meda rerevaki Setani? Na cava e uqeti ira tiko kina e so mera vakararawataki ira na lotu Vakarisito? Eda na tarova vakacava na nona saga me rawai keda na Tevoro?

E Dodonu Beka Meda Rerevaka na Tevoro?

3, 4. Na cava era sega ni rerevaka kina na Tevoro o ira na lotu Vakarisito lumuti kei ira na nodra itokani?

³ E veivakayaloqaqataki dina vei ira na lotu Vakarisito lumuti na vosa i Jisu Karisito oqo: “Kakua ni rerevaka e dua na ka ko na vosota: raica, na tevoro ena biuti kemudou eso ki na vale ni veivesu, mo dou vakatovolei kina; ia dou na vakararawataki ka bogi tini: dou gumatua mo dou yacova na mate, au na qai solia vei kemudou nai sala ni bula.” (Vakatakila 2:​10) Era sega ni rerevaka na Tevoro o ira na lumuti kei ira na nodra itokani e nodra inuinui na bula e vuravura. E sega ni vu na nodra sega ni rere oqo mai na yaloqaqa era sucukaya mai. E baleta ga nira rerevaka na Kalou ra qai dau ‘vakaruru ena ruku ni tabana.’​​—Same 34:9; 36:7.

⁴ O ira na tisaipeli taumada i Jisu Karisito era sega ni dau rere ra qai yalodina voli me yacova na mate, dina ga nira vakararawataki. Era sega ni rerevaka na ka ena cakava o Setani na Tevoro baleta nira kila ni o Jiova ena sega ni vakanadakui ira na yalodina vua. Nira vakararawataki tale ga ena gauna oqo na lotu Vakarisito lumuti kei ira na nodra itokani yalayala oti, era vakadeitaka nira na yalodina tiko ga vua na Kalou. Ia e vakaraitaka na yapositolo o Paula ni rawa ni vakavuna na mate na Tevoro. E sega li ni vakavuna oqo meda rere?

5. Na cava eda vulica ena Iperiu 2:​14, 15?

⁵ E tukuna o Paula ni mai vakalewe qai vakadra o Jisu “me rawa kina, e na vuku ni nona mate me vakamalumalumutaki koya sa lewa na mate, ko ya na tevoro; ka me sereki ira era sa bobula tu e na nodra bula taucoko e na vuku ni nodra rerevaka na mate.” (Iperiu 2:​14, 15, VV) Ni rawa ni “lewa na mate,” e vakamuai Jutasa Isikarioti, qai vakayagataki ira na nodra iliuliu na Jiu kei ira na kai Roma mera vakamatei Jisu. (Luke 22:3; Joni 13:​26, 27) Ena nona mate vakaisoro o Jisu, sa rawa kina me vagalalataki ira na tamata ivalavala ca e vesuki ira tu o Setani mera rawa kina ni bula tawamudu.​​—Joni 3:​16.

6, 7. E rawa vakacava vei Setani me lewa na mate?

⁶ E rawa vakacava vua na Tevoro me lewa na mate? Mai na gauna sara e tekivu cakava kina na veika ca o Setani, sa veivakamatei tiko mai na nona lasu kei na nona ivakasala cala. E laurai oqo ena nona valavala ca o Atama kei na nona vakadewa na mate vei keda. (Roma 5:​12) Kuria oqori na nodra dau vakararawataki ira na qaravi Jiova o ira na mata i Setani e vuravura. So na gauna era tini mate sara kina na qaravi Jiova tiko, me vaka e yaco vei Jisu Karisito.

⁷ Ia meda kua ni nanuma ni rawa vua na Tevoro me vakamatea e dua ga e via vakamatea. Na Kalou e dau taqomaki ira na nona tamata, ena sega ni vakatarai Setani me vakamatei ira kece na sokalou dina tiko e vuravura. (Roma 14:8) E vakatara o Jiova mera vakararawataki na nona tamata, qai rawa ni vakatara mera mate e so ni veivakararawataki na Tevoro. Ia, e yalataka tu na iVolatabu na inuinui totoka ni veivakaturi vei ira era volai e “nai vola ni veivakananumi” ni Kalou, ena sega vakadua ni tarova na veivakaturi oqori na Tevoro.​​—Malakai 3:​16; Joni 5:​28, 29; Cakacaka 24:15.

Cava e Veivakararawataki Kina o Setani?

8. Na cava e dau vakararawataki ira kina na tamata ni Kalou na Tevoro?

⁸ Ke da dauveiqaravi yalodina ni Kalou, e tiko e dua na vuna vinaka e vakararawataki keda tiko kina na Tevoro. E nona inaki me vakamalumalumutaka na noda vakabauta. E saga tiko o Setani me vakacacana na noda veiwekani vinaka kei na Tamada vakalomalagi. Ia meda kua ni kurabui kina. A parofisaitaka o Jiova mai Iteni ni rau na veimecaki na “yalewa” ivakatakarakara kei na “gata,” era na veimecaki tale ga na nodrau “kawa.” (Vakatekivu 3:​14, 15) E vakaraitaka na iVolatabu ni “gata makawa” oya na Tevoro, e tukuna tale ga ni cudru vakalevu ni sa lekaleka na nona gauna. (Vakatakila 12:​9, 12, VV) Ni toso tiko ga na nodrau veimecaki na “kawa” ruarua, era na namaka na qaravi Jiova tiko mera na vakacacani. (2 Timoci 3:​12, VV) O sa raica rawa na vu ni nona veivakararawataki o Setani?

9, 10. Na cava e vakalewa na Tevoro, e lai tara vakacava oqo na itovo ni tamata?

⁹ A vakalewa na Tevoro na nona liutaka na Kalou na lomalagi kei vuravura. Me ikuri ni vakalelewa oqori, e vakalewa tale ga na nona yalodina na tamata vua na nona Dauveibuli. Na cava e vakararawataka kina na tamata yalodina o Jope o Setani? Me tarova na nona yalodina vei Jiova o Jope. Eratou cakava na ka e vinakata na Tevoro ena gauna oya na wati Jope kei iratou na lewe tolu na ‘dauveivakacegui vakatuburarawa.’ E vakaraitaka na ivola na Jope ni a bolea na Kalou na Tevoro ena nona kaya nira na sega ni yalodina vua na Kalou na tamata ke vakatovolei ira o Setani. Ia e vakalasui Setani o Jope ni a yalodina tiko ga. (Jope 1:8–​2:9; 16:2; 27:5; 31:6) E vakararawataki ira tale tiko ga na iVakadinadina i Jiova ena gauna oqo na Tevoro ni sagai ira tiko mera kua ni yalodina me rawa kina ni dina na nona vosa.

¹⁰ Na noda kila ni vakararawataki keda tiko na Tevoro baleta ni vinakata meda kua ni yalodina vua na Kalou ena vukei keda meda kaukaua da qai qaqa. (Vakarua 31:6) Na noda Kalou e Turaga Cecere ni Lomalagi kei Vuravura, ena vukei keda meda yalodina tiko ga. Meda saga tiko mada ga meda vakamarautaka na loma i Jiova ena noda yalodina tiko ga me rawa kina vua me sauma na nona veibeitaki o Setani na Tevoro.​​—Vosa Vakaibalebale 27:11.

“Vakabulai Keimami Mai Vua na Vunica”

11. Na cava na ibalebale ni kerekere, “Ni kakua ni kauti keimami ki na vere”?

¹¹ E sega ni ka rawarawa meda yalodina; e vinakati meda masulaka vakaukaua. Ena vukei keda vakalevu na qaqa ni masu ivakaraitaki i Jisu. E kaya o koya ena dua na tiki ni masu oya: “Ni kakua ni kauti keimami ki na vere; mo ni vakabulai keimami mai vua na vunica.” (Maciu 6:​13, NW) E sega ni dau veretaki keda meda valavala ca o Jiova. (Jemesa 1:​13) So na gauna e dau vakaraitaka na iVolatabu ni o Jiova e dau cakava se vakavuna e so na ka, ia e dau vakatara ga. (Ruci 1:​20, 21) O koya gona, nida vakayagataka na qaqanimasu e vakaraitaka o Jisu, eda sa kerei Jiova tiko me kua ni vakatara meda rawai ena veivakatovolei. Ena rogoca na noda masu o koya, baleta ni vakadeitaka na iVolatabu: “Sa yalo dina na Kalou, ka na sega ni laiva me sivia na nomuni kaukauwa na ka ko ni vakatovolei kina; e na solia ko koya e na gauna ni veivakatovolei na sala mo ni dro bula rawa kina kei na kaukauwa mo ni vosota kina.”​​—1 Korinica 10:​13, VV.

12. Na cava meda masuta kina, “Ni vakabulai keimami mai vua na vunica”?

¹² Ni cavuta oti na veivakatovolei se na vere ena masu ivakaraitaki oya, e qai kaya o Jisu: “Ni vakabulai keimami mai vua na vunica.” So na ivakadewa me vaka na iVolatabu Vakaviti era kaya: “Vakabulai keimami mai na ca.” Ia, ena iVolatabu, na vosa ‘vakabulai mai’ e dau vakayagataki vakalevu ga vua na tamata, e tukuni koya tale ga na Tevoro na Kosipeli i Maciu me o “koya na dauvere,” e dua na ka bula. (Maciu 4:​3, 11) E bibi gona meda masuta meda vakabulai “mai vua na vunica,” o Setani na Tevoro baleta ni dau veretaki keda meda valavala ca vua na Kalou. (1 Cesalonaika 3:5) Nida kerea me ‘vakabulai keda mai vua na vunica,’ eda sa kerea tiko na Tamada vakalomalagi me vukei keda me kua ni rawai keda na Tevoro.

Me Kua ni Rawai Iko na Tevoro

13, 14. Na cava e gadrevi kina vei ira mai Korinica mera veisautaka na ivakarau ni nodra raica e dua na tagane ena ivavakoso a dukadukali taumada na nona ivakarau?

¹³ Ni uqeti ira na lotu Vakarisito mai Korinica o Paula mera dau veivosoti, e vola: “Ni ko ni sa vosota e dua na tamata, au na vosoti koya tale ga. Ni’u sa vosota e dua na tamata, au sa vosoti koya dina; au vakayacora oqo e na vukumuni e na mata i Karisito. Eda sa kila na vei i vadi ca nei Setani, ia me da kua sara ni laivi koya me rawai keda.” (2 Korinica 2:​10, 11, VV) E levu na sala e rawa ni rawai keda kina na Tevoro, ia na cava e tukuna kina o Paula na veivosa oqori?

¹⁴ A vunauci ira na lotu Vakarisito e Korinica o Paula baleta nira vakatara tiko e dua e dukadukali nona ivakarau me lewe tiko ga ni ivavakoso. Oqo e vakamarautaki Setani baleta ni a rogorogo ca na ivavakoso ni a vakatara tiko na veibutakoci se “dauyalewa ka sega mada ga ni kune ena kedra maliwa na tawa lotu.” E qai vakasivoi o koya e valavala ca oya. (1 Korinica 5:​1-5, 11-​13, VV) E qai veivutuni na tagane oya. Ke ra sega ni vosoti koya qai vakacurumi koya lesu na ivavakoso, ke a rawai na ivavakoso ena dua tale na sala e vakayagataka na Tevoro. Ena rawai vakacava? Era na sega ni dauloloma me vakataki Setani. Ke a “bikai e na rarawa bibi sara” me sa sega ni via qarava na Kalou o koya e veivutuni oya, era na saumitaro vua na Kalou yalololoma o Jiova o ira na qase ni ivavakoso oya. (2 Korinica 2:7; Jemesa 2:​13; 3:1) Ia ena sega ni dua na lotu Vakarisito dina ena vakatotomuri Setani me yaloca, voravora, qai sega ni yalololoma.

Taqomaki ena iYaragi e Solia na Kalou

15. Na vala vakacava eda vakayacora, ia e vakatau ena cava na noda qaqa?

¹⁵ Me rawa nida tusaqata na Tevoro, eda na vala vakayalo kei ira na ilala yalo ca. Noda qaqa vei ira na ilala yalo ca oqori ena vakatau ena noda vakayagataka “nai yaragi kecega ni Kalou.” (Efeso 6:​11-​18) E okati ena iyaragi oqo na ‘isasabai ni lomasereda na ivalavala dodonu.’ (Efeso 6:​14) A sega ni talairawarawa vua na Kalou o Tui Saula e Isireli makawa, mani sega ni vukei koya kina na yalo tabu. (1 Samuela 15:​22, 23) Ia kevaka eda ivalavala dodonu da qai vakayagataka na iyaragi vakayalo kece, ena taqomaki keda na yalo tabu ni Kalou mai vei Setani kei ira na nona agilosi ca, o ira na timoni.​​—Vosa Vakaibalebale 18:10.

16. Ena rawa vakacava meda taqomaki tiko ga mai vei ira na ilala yalo ca?

¹⁶ Me rawa nida taqomaki tiko ga mai vei ira na ilala yalo ca, ena vinakati tale ga meda dau wilika da qai vulica wasoma na Vosa ni Kalou, meda vakayagataka vinaka tale ga na ivola e vakarautaka na “dauniyau yalo dina ka vuku.” (Luke 12:​42, VV) Ena sinai kina na noda vakasama ena veika vakayalo e yaga vei keda, me vaka e kaya o Paula: “Kemuni na wekaqu, ni tugana e na nomuni vakasama na veika kece ga e vinaka ka dodonu me vakacaucautaki; ko ya na veika e dina, na veika e vakaturaga, na veika e dodonu, na veika e savasava, na veika e totoka ka dau dokai.”​​—Filipai 4:​8, VV.

17. Na cava e vukei keda meda kacivaka vinaka na itukutuku vinaka?

¹⁷ E vakarawarawataka o Jiova me ‘vakaivava na yavada ena cakacaka ni itukutuku vinaka ni veivinakati.’ (Efeso 6:​15) Noda dau tiko da qai vakaitavi wasoma ena soqoni vakarisito ena vukei keda ena noda vunautaka na itukutuku vinaka ni Matanitu ni Kalou. Eda marautaka dina na noda dau vukei ira e so tale mera vulica na veika dina me baleta na Kalou ra qai sereki vakayalo tale ga. (Joni 8:​32) “Nai seleiwau ni Yalo Tabu, oqori na vosa ni Kalou,” e taqomaki keda mai na ivakavuvuli lasu qai “talaraki kina na bai ni valu kaukauwa.” (Efeso 6:​17; 2 Korinica 10:​4, 5) Noda vakayagataka vakavuku na Vosa ni Kalou, na iVolatabu, e vukei keda meda vakavuvulitaka na ka dina qai taqomaki keda tale ga mai na nona saga na Tevoro me rawai keda.

18. E rawa vakacava meda “tu dei rawa ka vorata nai lawaki ni tevoro”?

¹⁸ E dolava na veivosaki ni noda iyaragi vakayalo o Paula ena nona kaya: “Dou kaukauwa tiko e na Turaga, kei na kena levu ni nona kaukauwa. Dou vakaiyaragi e nai yaragi kecega ni Kalou mo dou tu dei rawa ka vorata nai lawaki ni tevoro.” (Efeso 6:​10, 11) Na vosa vakirisi e vakadewataki tiko oqo me “dou tu dei” e dau vakayagataki vua e dua na sotia e yadra tiko. Eda tudei tale ga ena noda vala tiko vakayalo, dina ga ni saga tiko o Setani me lawakitaki keda ena nona via vakacacana na noda duavata, tarova na noda veivakavulici, qai vakaleqa na noda yalodina vua na Kalou. Me yacova oqo e vodi nona sasaga na Tevoro, ena sega ga ni rawata na ka e saga tiko.a

Vorata na Tevoro, ena Dro Tani

19. Na cava e dua na sala eda saqata kina na Tevoro?

¹⁹ E rawa nida qaqa ena noda vala vakayalo kei na Tevoro kei ira na nona ilala yalo ca. E sega ni dodonu meda rerevaki Setani, ni vola na tisaipeli o Jemesa: “Dou vakamalumalumutaki kemudou vua na Kalou. Vorata na tevoro, ena dro tani kina vei kemudou ko koya.” (Jemesa 4:7) E dua na sala eda saqati Setani kina kei ira na nona ilala yalo ca oya na noda vakayawaki keda mai vei ira na dauvakatevoro kei na daucakaiba. E vakaraitaka vakamatata na iVolatabu ni sega ni dodonu vei ira na qaravi Jiova mera dau lai raici ira na dau parofisai ena gata, na daurai mata ni kalokalo, dau cakaisausau, kei ira na dau vakatevoro. Kevaka eda ogaoga tiko ga ena cakacaka vakarisito da qai kaukaua vakayalo, eda na sega ni rerevaka na nona via sagai keda e dua na dauvakatevoro.​​—Tiko Voli Mai na Lekutu 23:23; Vakarua 18:​10-​12; Aisea 47:​12-​15; Cakacaka 19:​18-​20.

20. Eda na vorata vakacava na Tevoro?

²⁰ Eda “vorata na tevoro” nida muria na ivakatagedegede kei na ka dina vakaivolatabu da qai tusaqati koya tale ga. E muri Setani na vuravura baleta ni kena kalou. (2 Korinica 4:4) Eda na sega kina ni muria na ka e kilai tani kina o vuravura, na veika me vaka na dokadoka, dau nanumi keda ga, ivalavala vakasisila, itovo voravora, kei na domodomoiyau. Eda kila ni a dro na Tevoro ni saqati koya o Jisu ni vakayagataka na iVolatabu ena gauna e vakatovolei koya kina ena vanualiwa na Tevoro. (Maciu 4:​4, 7, 10, 11) Ena ‘dro tani vei keda’ o Setani kevaka eda vakarorogo tiko ga vei Jiova da qai vakanuinui tiko ga vua ena noda dau masu vua. (Efeso 6:​18) Ni rau tokoni keda na Kalou o Jiova kei na Luvena lomani, ena sega sara ga ni dua me vakaleqai keda, okati kina o koya na Tevoro!​​—Same 91:​9-​11.

[iVakamacala e ra]

Vakamacalataka Mada

• E dodonu beka meda rerevaki Setani na Tevoro?

• Na cava e vakararawataki ira kina na lotu Vakarisito o Setani?

• Na cava meda masuta kina meda vakabulai mai vua “na vunica”?

• Eda na qaqa vakacava ena noda vala vakayalo?

[iYaloyalo ena tabana e 26]

Era yalodina me yacova nira mate na imuri taumada i Karisito nira sega ni rere

[iYaloyalo ena tabana e 27]

E sega ni tarova rawa na Tevoro na nodra vakaturi o ira e nanumi ira o Jiova

[iYaloyalo ena tabana e 28]

O dau masulaka mo vakabulai mai vua “na vunica”?

[iYaloyalo ena tabana e 29]

O sa vakayagataka tiko “nai yaragi kecega ni Kalou”?