Taro na Dauwiliwili
Ena Vakatekivu 44:5 e vaka e tukuni kina ni a vakayagataka o Josefa, na dauveiqaravi yalodina i Jiova, e dua na bilo siliva me kila kina na ka vuni, e dina beka oya?
E sega na vuna me vakabauti kina ni a daurairai o Josefa.
Na iVolatabu e vakaraitaka ni kila vinaka o koya na kena dau vakayagataki na ilawaki vakatevoro me kilai kina na veika e se bera ni yaco. Dua na gauna e liu ni kerei o Josefa me vakamacalataka na ibalebale ni tadra i Fero, e tukuna vakavica o koya ni Kalou ga ena rawa ni “vosa” me baleta na veika ena vakarau yaco. Mani vakabauta o Fero ni Kalou e qarava o Josefa—na Kalou dina, sega ni nodra kaukaua na daurairai—e vakavuna me kila kina o Josefa na matailalai ni veika ena yaco ena gauna se bera mai. (Vakatekivu 41:16, 25, 28, 32, 39) Ena Lawa a soli e muri vei Mosese, e vakatabuya kina o Jiova na daucakaiba se na daurairai, e vakadeitaka tale ga ni o koya duadua ga e dau tukuna na veika ena yaco mai muri.—Vakarua 18:10-12.
Ia na cava e kaya kina o Josefa vua nona dauveiqaravi ni a vakayagataka na bilo siliva me ‘kila kina na ka’ vuni?a (Vakatekivu 44:5) Ena vinaka meda kila na ituvaki a sotavi, koya e vakavuna me cavuti kina na itukutuku oqori.
Ena vuku ni dua na dausiga levu, eratou lai kau kakana kina mai Ijipita na tuaka i Josefa. O iratou na tuakana oqo eratou a volitaki koya me bobula ena dua na gauna e liu. Ia oqo, ni ratou sega ni kila, eratou sa kere veivuke tiko vei tacidratou, o koya sa yaco me lewa na kakana kece e Ijipita. Sega ni vakatakilai koya o Josefa. Ia, e nanuma me vakatovolei iratou. E vinakata me kila se ratou sa veivutuni dina. E via kila tale ga se vakacava sara mada na levu ni nodratou lomani Penijamini na tacidratou kei na tamadratou o Jekope, e dau taleitaki Penijamini vakalevu. O koya gona, e mani bucina o Josefa e dua na ivadi.—Vakatekivu 41:55–44:3.
E vakarota e dua na nona dauveiqaravi me vakatawana na nodratou taga na tuakana ena ivakarau kakana, me biuta na nodratou ilavo ina nodratou dui taga, qai tawana ena taga i Penijamini na bilo siliva i Josefa. Na ka kece e yaco oqo, e vakaraitaki koya tiko ga o Josefa me vaka e dua e vakaitutu levu ena vanua lotu butobuto. E moica na nona itovo, kei na nona vosa me vaka e dua na iliuliu levu, me kua ni ratou kilai koya kina na tuakana.
Gauna e sotavi iratou kina na tuakana o Josefa, e tomana tiko ga nona ivadi ena nona taroga: ‘Dou sa lecava beka ni sa rawarawa sara ina tamata sa vakataki au meu kila na ka vuni?’ (Vakatekivu 44:15) O koya gona, na bilo siliva e dua ga na ivadi a vakayagataka o Josefa. A sega ni dina na kena tukuni ni a vakayagataka o Josefa na bilo me wilika kina na itukutuku ni veika e se bera ni yaco, me vaka ga ni a sega ni butakoca dina na bilo o Penijamini.
[iVakamacala e ra]
a Ni vakamacalataka na ivalavala makawa oqo, e kaya kina na Holy Bible, With an Explanatory and Critical Commentary, e vakarautaka o F. C. Cook: “E dau kena ivalavala me vakalutumi na koula, siliva, se na vatu talei e so e lomaniwai, qai dau dikevi na kedra irairai; se na kena raici na lomaniwai me vaka na iloilo.” O Christopher Wordsworth, e dauvakamacala ena iVolatabu, e kaya: “So na gauna e dau tawa na wai ena bilo, me kilai kina na ka vuni ena iyaloyalo e delaniwai ni ciliva na siga.”