Na Cava na Matanitu ni Kalou?

E DUA na leqa vakaitamera a sotavi ni se qai tekivu ga na bula ni kawatamata! Dua na agilosi a vorata na nona veiliutaki na Dauveibuli ga a buli koya. Na dauveivorati oqo a temaki Ivi na imatai ni yalewa me kania na vuanikau vakatabui. E kaya na agilosi vei rau na veiwatini, o Atama kei Ivi: “Drau na sega dina ni mate: ni sa kila na Kalou e na siga drau na kana kina ena qai yadra dina na matamudrau; ia drau na vaka na Kalou, ni drau na kila na ka vinaka kei na ka ca.” (Vakatekivu 2:​16, 17; 3:​1-5) Yaco na agilosi dauveivorati oqo me vakatokai na Tevoro, se o Setani.​​—⁠Vakatakila 12:⁠9.

A vakabauta beka o Ivi na veika e tukuna o Setani? E kaya na iVolatabu: “Sa kunea na yalewa sa yaga na kau me kakana, a sa ka e via raica na matada, ka sa kau me da gadreva me da vuku kina, sa qai tauca na vuana, ka kania; ka solia talega vua na watina erau tiko kaya, a sa kania talega ko koya.” (Vakatekivu 3:⁠6) Io, o rau na imatai ni veiwatini, o Atama kei Ivi, rau a tomani Setani ena veivorati. Rau vakayalia gona na Parataisi, erau vakuai ira tale ga kina na nodrau kawa. A dodonu mera uasivi ra qai bula me tawamudu, ia oqo sa dewavi ira na ivalavala ca ena lai tini ena mate.​—Roma 5:​12.

Ni sotavi na ituvaki oqo, na cava e cakava na Kalou o Jiova, na Turaga Cecere ni lomalagi kei vuravura? E nakita sara me vakarautaka e dua na ituvatuva me na vosoti kina na ivalavala ca. (Roma 5:⁠8) E nakita tale ga me na vakaduria e dua na matanitu me na walia na leqa sa yaco oqori. Na matanitu oqo e vakatokai me “matanitu ni Kalou.” (Luke 21:31) Dina ga ni vakarorogo na Matanitu oqo ina veiliutaki cecere ni Kalou, ia e tiko na inaki bibi e vakaduri kina.

Na cava na inaki ni Matanitu ni Kalou? Cava soti e kilai tani kina ni vakatauvatani kei na veiliutaki ni tamata? A tekivu e naica na veiliutaki ni Matanitu ni Kalou? Na taro oqori ena qai veivosakitaki ena ulutaga e tarava.