Nona Dokai na Tamata Yadua Vaka me sa Guilecavi

“Na veika kece a caka ena keba e kena inaki me veivakamadualaki qai veivakalolovirataki.”​—MAGDALENA KUSSEROW REUTER, A BULATA NA KEBA NI VEIVAKARARAWATAKI I ITALA.

A TOROSOBU dina na veivakalolomataki a sotavi ena keba ni veivakararawataki i Itala ena iKarua ni iValu Levu. Ia, a sega ni tekivu e kea na vakacaraki ni nona dokai na tamata yadua, e sega tale ga ni a tini e kea. Se da mani railesu ena veigauna sa oti se da rai ina noda gauna oqo, e dua na ka e matata: Sa dua na gauna balavu e sotavi voli mai kina na “veivakamadualaki” kei na “veivakalolovirataki.”

Ia, na veivakalolovirataki e sega ni yalani wale ga ena itovo kaukaua e veivakalolomataki e yaco yarayara tu mai ena veitabagauna ni bula ni kawatamata. E tiko tale ga na kena mataqali e sega ni laurai levu. Vakasamataka mada e dua na gone e dau vakalialiai ni vakaleqai tu na ituvaki ni yagona. Se nona vakalialiai e dua na vulagi ni duatani nona itovo vakavanua. Na nona vakaduiduitaki e dua ni duatani na roka ni kuliniyagona se na matatamata e cavutu mai kina. Ra na raica beka na dauveivakalialiai me ka ni lasa, ia e sega ni lasa vei ira era vakalialiai nira vakila kina na rarawa kei na madua.​​—⁠Vosa Vakaibalebale 26:​18, 19.

Na Cava na iBalebale ni Nona Dokai na Tamata Yadua?

E dua na ivolavosa e vakamacalataka na nona dokai na tamata yadua, me ‘nona vakila e dua ni rokovi, qoroi, se tiko na kena yaga.’ O koya gona, na nona dokai na tamata yadua e sega wale ga ni vauci kina na ivakarau ni noda raici keda, e okata tale ga na sala ni nodra veitaratara kei keda na tani. E levu sara na ka e rawa ni lewa na sala eda raici keda kina, ia na nodra rai na tani me baleti keda se na ka era cakava vei keda, e dau lewa vakalevu na noda vakabauta ni tiko na keda yaga ena bula e veisiga, me kua kina nida nanuma ni sega na beteda.

Ena noda bula kece vakaitikotiko, ena tiko ga e dua na iwase era dravudravua, vakaloloma, se ra biu wale tu. Ia, e sega ni kena ibalebale mera sa beci kina. Na nodra rai na tani kei na ka era cakava e dau vakavuna na vakasama oqo, oya meda beci keda. E ka ni rarawa ni o ira sara ga era tu ena ituvaki vakaloloma era dau beci se vakalolovirataki. Vakavuqa, eda dau rogoca na vosa me vaka na “sega na betemu,” “sega na kemu yaga,” se “lialia” mera rukaki kina na itabaqase, na dravudravua, se o ira era vakaleqai na nodra vakasama se yagodra!

Na cava e ivalavala kina ni tamata na veivakamadualaki? Ena kauaitaki beka ena dua na gauna na dodonu ni nona dokai na tamata yadua? Na ulutaga e tarava ena vakamacalataka vinaka na kena isau mai na Vosa ni Kalou, na iVolatabu.