Me Vakatataki Cake na iVavakoso

“Sa qai cegu nai soqosoqo lewe ni lotu [“ivavakoso,” NW] . . . a ra sa vakatataki cake.”​—CAKACAKA 9:​31.

1. Na cava e rawa ni tarogi me baleta na “ivavakoso ni Kalou”?

E VAKADONUI ira na tisaipeli i Karisito o Jiova mera dua na matanitu vou, mera “Isireli ni Kalou,” ena siga ni Penitiko 33 S.K. (Kalatia 6:​16) O ira na lotu Vakarisito era lumuti ena yalo tabu oqo era yaco tale ga mera “[i]soqosoqo lewe ni lotu [“ivavakoso,” NW] ni Kalou.” (1 Korinica 11:22) Na cava e vinakati vua e via lewe ni ivavakoso? E cokonaki vakacava na “ivavakoso ni Kalou”? Ena cicivaki vakacava e veiyasa i vuravura, na vanua era tiko kina na lewena? E tara vakacava na noda bula kei na noda marau?

2, 3. E vakaraitaka vakacava o Jisu nira na veirogoci na lewe ni ivavakoso?

² E vakaraitaki ena ulutaga sa oti ni a parofisaitaka o Jisu na kena tiko na ivavakoso era lewena na nona imuri lumuti, ni tukuna vua na yapositolo o Pita: “E dela ni vatu oqo (Jisu Karisito) ka’u na tara kina na noqui soqosoqo lewe ni lotu [“ivavakoso,” NW]; ia ena sega ni rawata na matamata-ni-koro ni etesi.” (Maciu 16:18) Ni se tu vata kei iratou na nona yapositolo, sa vakaraitaka tale ga o Jisu na ivakarau ni kena cicivaki kei na kena cokonaki na ivavakoso ena vakarau tauyavutaki oya.

³ E vakaraitaka o Jisu ni na so ga na lewe ni ivavakoso era na liutaka na ivavakoso. Era na qaravi ira na lewe ni ivavakoso. E kaya o Karisito: “Dou kila ni ko ira era veiliutaki vei ira na veimatanitu tani era lewai ira sara tu ga na nodra tamata, ia ko ira na nodra turaga lelevu era dau vakacolasau vei ira. Ia me kakua ni vaka kina vei kemudou. Ko koya e vinakata me veiliutaki vei kemudou me nomudou dauveiqaravi, kei koya vei kemudou e via turaga, me nomudou bobula.” (Marika 10:​42-​44, VV) E macala ni o ira na lewe ni “ivavakoso ni Kalou” era na sega ni dui lewai ira ga, mera sega ni veirogoci. Sega, ena tiko e dua na ituvatuva ra qai dau veitaratara tale ga.

4, 5. Eda kila vakacava ni na vinakati mera vakavulici ena veika vakayalo na lewe ni ivavakoso?

⁴ E vakaraitaka na Ulu ni “ivavakoso ni Kalou” ni o ira na nona yapositolo kei ira tale ga na vuli vua ena tiko na nodra itavi vei ira na lewe ni ivavakoso. Na cava ena nodra itavi? E nodra itavi taumada mera vakavuvulitaka na veika vakayalo vei ira na lewe ni ivavakoso. Nanuma ni a tukuna vei Pita o Jisu ena gauna sa vakaturi kina nira vakarorogo tu e so na nona yapositolo: “Saimoni, na luve i Joni, ko sa lomani au?” E sauma o Pita: “Io, na Turaga; ko ni sa kila ni’u sa lomani kemuni.” E tukuna o Jisu vua: “Vakani ira na noqu lami. . . . Vakatawana na noqu sipi. . . . Vakani ira na noqu sipi.” (Joni 21:​15-​17) Oqo e dua dina na itavi bibi!

⁵ Eda raica ena vosa i Jisu ni o ira era na mai lewe ni ivavakoso era vakatauvatani kei ira na sipi era tu ena lomanibai. Ena vinakati vei ira na sipi oqo, o ira na lotu Vakarisito tagane, yalewa, kei na gone, mera vakani vakayalo ra qai vakatawani vinaka tale ga. Ni vakarota tale ga o Jisu vei ira na nona imuri mera veivakatisaipelitaki, ena vinakati mera vakavulici na tisaipeli vou mera cakava na ivakaro vakalou oqo.​—Maciu 28:​19, 20, VV.

6. Na cava soti e tuvalaki ena “ivavakoso ni Kalou” e se qai tauyavutaki vou?

⁶ Ni sa tauyavutaki na “ivavakoso ni Kalou,” ena vinakati mera vakavulici ra qai uqeti wasoma na lewena: “A ra sa soli ira vakatabakidua ki na nodratou veivakatavulici na i apositolo, na tiko vakaveitokani, na dovi madrai kei na masumasu.” (Cakacaka 2:​42, 46, 47, VV) E laurai tale ga ena itukutuku oqo nira lesi e so mera qarava e so na veika yaga e gadrevi. Era sega ni lesi ena vuku ni nodra vuli vinaka se kila vakacakacaka. Ia era tagane era “sinai e na Yalo Tabu kei na vuku.” E dua vei ira o Sitiveni, e tukuni ena kena itukutuku ni o koya e “sinai tu e na vakabauta kei na Yalo Tabu.” E vakilai sara na yaga ni veika e tuvalaki ena ivavakoso baleta ni “tete tiko ga na vosa ni Kalou. Sa tubu cake vakalevu tiko ga na kedra i wiliwili na tisaipeli e Jerusalemi.”​—Cakacaka 6:​1-7, VV.

Tagane e Vakayagataki Ira na Kalou

7, 8. (a) Era veiqaravi mera cava na yapositolo kei ira na qase ni ivavakoso e Jerusalemi ena imatai ni senitiuri? (b) Na cava e qai yaco ni vakau na nodra itukutuku ina veivavakoso?

⁷ Era liutaka sara ga na yapositolo na veika e caka ena ivavakoso taumada, ia era sega ni cakava kece na cakacaka e gadrevi me caka. Ni rau lesu i Anitioki e Siria o Paula kei na nona itokani, e kaya na Cakacaka 14:27: “Ni rau sa yaco kina, ka vakasoqoni ira vata nai soqosoqo lewe ni lotu [“ivavakoso,” NW], erau sa tukuna na ka kecega sa cakava na Kalou ni sa veivuke kei rau.” Ni rau se tiko ga ena ivavakoso oya, e tarogi kina se e dodonu vei ira na kai Matanitu Tani vakabauta mera cilivi se sega. Me saumi na taro oqori, rau talai o Paula kei Panapasa me rau lako vei ira na ‘yapositolo kei ira na qase e Jerusalemi,’ era veiqaravi tiko vakailawalawa dauvakatulewa.​—Cakacaka 15:​1-3.

⁸ Nira ‘soqoni vata na yapositolo kei ira na qase,’ e liutaka na bose oqo na qase ni ivavakoso lotu Vakarisito o Jemesa, na taci Jisu vakacabecabe, ia e sega ni yapositolo o koya. (Cakacaka 15:6) Ni cava na bose oya e vukei ira kina na yalo tabu, era tauca e dua na vakatulewa e tokona na iVolatabu. E qai volai na vakatulewa oqo ina veivavakoso. (Cakacaka 15:​22-​32) Era marau ni ciqoma na itukutuku oqo na veivavakoso. Na cava e qai yaco? E uqeti ira qai vakaukauataki ira na mataveitacini. E kaya na iVolatabu: “Era sa mani tubu me ra kaukauwa e na vakabauta ko ira na veisoqosoqo lewenilotu [“veivavakoso,” NW], ka sa tubu tale tiko ga na kedra i wiliwili e na veisiga.”​—Cakacaka 16:​5, VV.

9. Na itavi cava e vakaraitaka na iVolatabu era lesi kina na tagane lotu Vakarisito era rawata na ivakatagedegede?

⁹ Ia era cicivaki vakacava na veivavakoso? Taura mada me kena ivakaraitaki na veivavakoso era tiko ena yanuyanu o Kiriti. Dina ni ca na kedra irogorogo e levu na kai Kiriti, ia e so era veisautaka na nodra ivakarau ni bula mera lotu Vakarisito dina. (Taito 1:​10-​12; 2:​2, 3) Era vakaitikotiko ena duidui siti, ra qai yawa sara mai na ilawalawa dauvakatulewa e Jerusalemi. Ia e sega ni dua na kena leqa oya baleta nira tu “na qase” era lesi ena veivavakoso e Kiriti, me vaka ga ena veivanua tale e so. O ira na tagane oqori era sauva na ivakatagedegede e volai tu ena iVolatabu. Era lesi o ira oqori mera qase, se ivakatawa, mera “vakarota nai vakavuvuli sa vinaka, ka vunauci ira talega era sa vosa vakatani.” (Taito 1:​5-9; 1 Timoci 3:​1-7) E so tale na tagane era sauva na ivakatagedegede era lesi mera dauveiqaravi ni ivavakoso.​—1 Timoci 3:​8-​10, 12, 13.

10. Me vaka e vakaraitaka na Maciu 18:​15-​17, ena wali vakacava e so na leqa bibi?

¹⁰ A vakaraitaka o Jisu ni na tiko na ituvatuva vaka oqori. Nanuma ni vakaraitaka na Maciu 18:​15-​17 (VV), ni rawa ni tubu na leqa ena kedrau maliwa e rua na tamata ni Kalou, me dua e valavala ca vua na nona itokani. A vinakati vua e vakaleqai me lako vua e veivakaleqai me lai “vunauca” ni rau tiko taurua ga. Ke sega ni wali na leqa, me kacivi e le dua se rau lewe rua erau kila na leqa me rau mai veivuke. Vakacava ke sega ga ni wali? A kaya o Jisu: “Kevaka e bese ni rogoci iratou, tukuna ki na i soqosoqo ni lotu [“ivavakoso,” NW]; ia kevaka e bese tale ga ni rogoci ira na i soqosoqo ni lotu [“ivavakoso”], mo sa okata me vaka e dua na kai tani se dau kumuni i vakacavacava.” Ni cavuta na vosa oqori o Jisu, e vakaibalebaletaka taumada vei ira na Jiu baleta nira se okati tiko mera “ivavakoso ni Kalou.” a Ia, ni sa tauyavu na ivavakoso vakarisito, sa na vakayagataki kina na ivakaro i Jisu oya. E vakaraitaka tale oqo ni tiko e dua na ituvatuva ena loma ni ivavakoso mera vakaukauataki kina ra qai dusimaki tale ga kina na lotu Vakarisito yadua.

11. Era vakaitavi vakacava na qase ni ivavakoso ena kena wali na leqa?

¹¹ E veiganiti kina vei ira na qase ni ivavakoso, se ivakatawa, mera matataka na ivavakoso mera walia na leqa se rogoca na kisi ni ivalavala ca. Oqo e salavata kei na ivakatagedegede ni qase e tukuni ena Taito 1:9. Era tamata ivalavala ca tale ga na qase, me vakataki Taito, e tala o Paula me lai “vakadodonutaka na veika sa vo.” (Taito 1:​4, 5) O ira na vakasamataki mera qase ena gauna oqo e dodonu mera sa vakadinadinataka ena loma ni dua na gauna na nodra yalodina kei na kaukaua ni nodra vakabauta. Oqo ena rawa kina vei ira na lewe ni ivavakoso mera nuitaka na veidusimaki kei na kena liutaki na ituvatuva oqo.

12. Na cava e nodra itavi na qase ni ivavakoso?

¹² E kaya o Paula vei ira na qase ni ivavakoso mai Efeso: “Dou vakaraici kemudou, kei ira kecega na qele-ni-sipi, sa lesi kemudou kina na Yalo Tabu mo dou nodrai vakatawa, mo dou vakania nai soqosoqo lewe ni lotu [“ivavakoso,” NW] ni Kalou; ko ira sa volia ko koya, e na nona dra ga.” (Cakacaka 20:28) O ira na ivakatawa ni ivavakoso nikua era lesi tale ga mera “vakatawa na qele ni sipi ni Kalou.” Era na cakava na nodra itavi ena loloma ra qai sega ni viavia turaga vei ira na qelenisipi. (1 Pita 5:​2, 3, VV) Ia mera vakatataki ira cake ga ra qai vukea ‘na qelenisipi kece.’

Kabita Dei na iVavakoso

13. Na cava e rawa ni yaco ena loma ni ivavakoso, ena vuku ni cava?

¹³ Nira tamata ivalavala ca kece na qase kei ira kece na lewe ni ivavakoso, ena vakilai e so na rai cala kei na leqa ena ivavakoso, me vaka ga e yaco ena imatai ni senitiuri nira se bula tiko e so na yapositolo. (Filipai 4:​2, 3) E rawa vua e dua na ivakatawa ni ivavakoso se dua ga e lewena me tukuna e dua na ka e veibeci, tawaloloma, se sega soti sara ni dina. Se eda rairai nanuma ni vakayacori tiko e dua na ka e sega ni vakaivolatabu, era rairai kila tiko na qase, ia era sega ni bau vakadodonutaka. De dua sa dikevi tiko na leqa oqori ena kena icakacaka e vakaraitaka na iVolatabu da qai sega ni kila na veika dina me baleta na leqa oya. Ia ke mani yaco tiko e dua na ka e sega ni vakaivolatabu, vakasamataka mada oqo: A vakayacori tiko ena ivavakoso o Korinica e dua na ivalavala ca bibi ena loma ni dua na gauna, oqo e dua na ivavakoso e kauaitaka tiko o Jiova. Ia e qai raica o koya me dikevi na cala bibi oya, qai vakadodonutaki. (1 Korinica 5:​1, 5, 9-​11) Meda tarogi keda mada, ‘Keu a tiko mai Korinica ena gauna oya, na cava au na cakava ni yaco tiko na leqa oya?’

14, 15. Na cava era sega tale ni muri Jisu kina e so, na cava eda vulica kina?

¹⁴ Vakasamataka mada e dua tale na ka e rawa ni yaco ena ivavakoso. Kaya mada ni dredre vua e dua me vakabauta e dua na ivakavuvuli vakaivolatabu. Sa rairai vakadikeva na iVolatabu kei na ivola vakaivolatabu e tu ena ivavakoso qai kere veivuke tale ga vei ira na nona itokani lotu Vakarisito matua, okati kina o ira na qase. Ia, e se dredre tiko ga ni vakabauta na tikina oya. Na cava e rawa ni vakayacora o koya? A dua na ka vata vaka oqori e yaco ni vo e dua na yabaki me mate o Jisu. A vakatauvatani koya o Jisu me “madrai ni bula,” ia kevaka e dua e via bula tawamudu ena vinakati vua me “kania na lewe ni Luve ni tamata, ka gunuva na nona dra.” Era kudruvaka e so na nona tisaipeli na vosa oya. Nira sega ni bau vakasaqara na ibalebale ni vosa oya se waraka me qai vakamacalataki, e vakavuna ga mera “sega tale ni lako vata kaya” e levu na tisaipeli. (Joni 6:​35, 41-​66) Kevaka eda tiko e kea, na cava eda na cakava?

¹⁵ E so ena gauna oqo era sa biuta na ivavakoso era lewena baleta nira nanuma ni rawa nira qaravi Jiova ga vakataki ira. Era na kaya beka ni a vakararawataki na lomadra, se e sega ni vakadodonutaki tiko e dua na cala e yaco tiko, se era sega ni vakabauta e so na ivakavuvuli. E ka vakayalomatua beka na ka era cakava oya? Dina ni dodonu meda dui veiwekani vinaka kei na Kalou o keda na lotu Vakarisito yadudua, ia e sega ni rawa meda vakalasuya ni vakayagataka tiko na Kalou e dua na ivavakoso e kovuta na vuravura raraba me vaka ena nodra gauna na yapositolo. A vakayagataka qai vakalougatataka tale ga o Jiova na veivavakoso ena imatai ni senitiuri ena nona lesi ira na qase kei na dauveiqaravi ni ivavakoso me yaga ina ivavakoso. E vakatale ga kina nikua.

16. Ke dua e via biuta na ivavakoso, na cava me vakasamataka vinaka?

¹⁶ Ke dua na lotu Vakarisito e nanuma ni vinakati wale ga na veiwekani vinaka kei na Kalou, e kena ibalebale ni sa beca tiko na ituvatuva ni Kalou, oya nona tauyavutaka na ivavakoso e kovuta na vuravura raraba vaka kina na veivavakoso eda dui lewena. De nanuma beka e dua ni rawa ni sokalou ga vakataki koya se kei ira na vica tale, ia sa na qai caka vakacava na ituvatuva ni nodra veivukei na qase kei na dauveiqaravi ni ivavakoso? Ni volavola o Paula ina ivavakoso e Kolosa qai vakarota me wiliki tale ga na ivola oya e Leotisea, e tukuna tiko na nodra “tauyavutaki ka tara cake vua [Karisito].” Ena yaga ga oqo vei ira na lewena na ivavakoso, ena sega ni yaga vei ira na sega ni via okati kei na ivavakoso.​—Kolosa 2:​6, 7; 4:​16.

Duru kei na Bai ni iVakavuvuli Dina

17. Na cava e vakaraitaka na 1 Timoci 3:​15 me baleta na ivavakoso?

¹⁷ E vakaraitaka na yapositolo o Paula vua na qase ni ivavakoso o Timoci ena imatai ni nona ivola vua, na ivakatagedegede e vinakati vei ira na qase kei na dauveiqaravi ni ivavakoso eda lewena. Oti ga oya e cavuta sara o Paula “na i soqosoqo lewe ni lotu [“ivavakoso,” NW] ni Kalou bula,” e vakatoka me “duru kei na bai ni i vakavuvuli dina.” (1 Timoci 3:​15, VV) E vaka na duru ena imatai ni senitiuri na ivavakoso era lewena na lotu Vakarisito lumuti. E sega tale ni veibataki ni a rawa ga nira kila na ka dina na lotu Vakarisito yadudua mai na ivavakoso era dui lewena. Oya na vanua era rawa ni rogoca kina qai vakadinadinataki kina na ka dina, na vanua tale ga era vakaukauataki kina.

18. Na cava e bibi kina na veisoqoni ni ivavakoso?

¹⁸ E vaka kina na ivavakoso lotu Vakarisito e robota na vuravura, e ‘duru qai bai tale ga ni ivakavuvuli dina.’ Noda tiko wasoma kei na noda vakaitavi ena veisoqoni ni ivavakoso eda lewena e sala uasivi ni noda vakatataki cake ena noda veiwekani kei na Kalou. Eda na vakarautaki vinaka tale ga kina ena noda cakava na lomana. Ni volavola ina ivavakoso e Korinica, e vakabibitaka kina o Paula na veika e tukuni ena veisoqoni oqori. E vola o koya me dau sagai me vakamatatataki na veika e tukuni ena veisoqoni oqori me rawa kina nira “vakatataki” o ira na tiko kina. (1 Korinica 14:​12, 17-​19) E rawa tale ga meda vakatataki cake nikua kevaka eda vakabauta nona vakadonuya na Kalou o Jiova na noda ivavakoso e tokona tiko.

19. Na cava meda vakavinavinakataka kina na ivavakoso eda lewena?

¹⁹ Io, kevaka eda vinakata na lotu Vakarisito meda vakatataki cake, e dodonu meda lewe tiko ga ni ivavakoso. Sa dede na kena taqomaki keda voli mai ena veivakavuvuli lasu, e vakayagataka tale tiko ga na Kalou ena kena vunautaki e veiyasa i vuravura na itukutuku vinaka ni nona Matanitu ena veiliutaki kina na Mesaia. Io, sa levu dina na ka e cakava na Kalou ni vakayagataka na ivavakoso vakarisito.​—Efeso 3:​9, 10.

[iVakamacala e ra]

O se Nanuma?

• Na cava eda namaka kina nona vakayagataka na Kalou na veivavakoso e vuravura?

• Na cava era cakava na qase me baleta na ivavakoso dina ga nira tamata ivalavala ca?

• O vakatataki cake vakacava ena ivavakoso o lewena?

[iYaloyalo ena tabana e 26]

Era lewe ni ilawalawa dauvakatulewa na yapositolo kei na qase ni ivavakoso e Jerusalemi

[iYaloyalo ena tabana e 28]

Era vakavulici tiko na qase kei na dauveiqaravi ni ivavakoso

me rawa kina nira cakava na nodra itavi ena ivavakoso