Mo ‘Lako Tiko Ga ena Yalo Tabu’

“Dou lako voli e na Yalo Tabu, ka dou na sega ni cakava kina na gagadre ca ni tovo vakayago.”​—KALATIA 5:​16.

1. Rawa ni wali vakacava na noda nuiqawaqawataka se eda a beca na yalo tabu se sega?

E TIKO e dua na sala meda kua ni nuiqawaqawataka kina se eda a beca na yalo tabu i Jiova se sega. Oya noda muria na ka e tukuna na yapositolo o Paula: “Dou lako voli e na Yalo Tabu, ka dou na sega ni cakava kina na gagadre ca ni tovo vakayago.” (Kalatia 5:​16) Kevaka eda vakalaiva me liutaki keda na yalo ni Kalou, eda na sega ni rawai ena gagadre ca vakayago.​—Roma 8:​2-​10.

2, 3. Ena tarai keda vakacava noda lako tiko ga ena yalo tabu?

² Nida “lako voli e na Yalo Tabu,” ena uqeti keda na igu kaukaua ni Kalou meda talairawarawa vei Jiova. Eda na bulataka na itovo vakalou ena cakacaka vakavunau, ena ivavakoso, e vale, kei na veivanua tale e so. Ena laurai votu ni uqeti keda tiko na yalo tabu ena noda veimaliwai kei na watida, na luveda, o ira eda vakabauta vata, kei ira tale e so.

³ Ni salavata noda bula kei na “yalo e vu mai vua na Kalou” ena vukei keda meda kua ni cakava na ca. (1 Pita 4:​1-6, NW) Ke uqeti keda tiko na yalo tabu, eda na sega sara ga ni cakava na ivalavala ca e sega ni vosoti rawa. Ia, na sala cava tale ena yaga kina ina noda bula na noda lako tiko ga ena yalo tabu?

Toro Voleka Tiko ga Vua na Kalou kei Karisito

4, 5. Ena vakacava noda raici Jisu nida lako voli ena yalo tabu?

⁴ Nida lako voli ena yalo tabu, eda vaqaqacotaka kina noda veiwekani kei na Kalou kei Luvena. Ni vakamacalataka tiko na isolisoli vakayalo, e kaya o Paula vei ira nona itokani vakabauta mai Korinica: “O koya oqo ka’u sa vakatakila kina vei kemudou [o ira na dau qaravi matakau tu e liu], ni sa sega e dua na tamata sa vosa e na Yalo ni Kalou, me sa vosavakacacataki Jisu: a sa sega e dua sa kaya rawa ni sa Turaga ko Jisu, ke sega ni vuna na Yalo Tabu.” (1 Korinica 12:​1-3) E vu mai vei Setani na Tevoro na yalo e uqeti ira na tamata mera vosa vakacacataki Jisu. Ia, nida lako voli na lotu Vakarisito ena yalo tabu, eda kila deivaki ni o Jiova e vakaturi Jisu mai na mate qai vakalevulevui koya mai na veika kece a bulia. (Filipai 2:​5-​11) Eda vakabauta na isoro ni veivoli i Karisito, da qai ciqomi Jisu me Turaga e lesia na Kalou me liutaki keda.

⁵ E so era kaya nira lotu Vakarisito ena imatai ni senitiuri S.K. era sega ni vakatusa ni a liatamata o Jisu. (2 Joni 7-​11) Nodra ciqoma na rai cala oqo, e vakavuna vei ira e so mera cakitaka na ivakavuvuli dina me baleti Jisu, na Mesaia. (Marika 1:​9-​11; Joni 1:​1, 14) Noda lako voli ena yalo tabu ena vukei keda meda kua ni rawai ena vukitani vaka oqo. Ia, nida vulica na ivakavuvuli dina kei na rai ni Kalou e kune ena iVolatabu, eda na vakila tiko ga na yalololoma i Jiova, qai vukei keda meda “muria tiko ga na dina.” (3 Joni 3, 4, VV) O koya gona, meda saga dei meda vorata na vukitani me rawa ni kaukaua tiko ga kina noda veiwekani kei na Tamada vakalomalagi.

6. Na itovo cava e bucina na yalo ni Kalou vei ira na lako ena yalo tabu?

⁶ E okata o Paula na qaravi matakau kei na veisei vakalotu me “cakacaka ni tovo vakayago” me vaka na veibutakoci kei na ivalavala vakasisila. Ia e qai kaya: “Ko ira era nei Karisito era sa vakota ki na kauveilatai nai tovo vakayago kei na kena dodomo ca kei na kena gagadre ca. Kevaka eda sa bula e na Yalo Tabu, tou lako voli talega e na Yalo Tabu.” (Kalatia 5:​19-​21, 24, 25) Na itovo cava e bucina na igu kaukaua ni Kalou vei ira na bula qai lako vata kei na yalo tabu? “Na vua ni Yalo Tabu,” e vola o Paula, “na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, nai valavala malua.” (Kalatia 5:​22, 23) Meda dikeva mada na vua ni yalo tabu oqo.

‘Meda Veilomani Tiko Ga’

7. Na cava na loloma, cava e so na ka e kilai tani kina?

⁷ Dua na vua ni yalo tabu na loloma​—dau okati kina na noda veidredreti kei ira e so, salavata kei na noda volekati ira. E kaya na iVolatabu ni “sa loloma na Kalou” baleta ni ivakaraitaki uasivi o koya ena itovo oqo. Na loloma levu ni Kalou kei na Luvena vei keda na kawatamata e laurai ena isoro ni veivoli i Jisu Karisito. (1 Joni 4:8; Joni 3:​16; 15:13; Roma 5:8) Nida imuri i Jisu, eda kilai tani ena noda dau veilomani. (Joni 13:​34, 35) Eda vakaroti sara mada ga meda dau “veilomani.” (1 Joni 3:​23) A kaya tale ga o Paula ni loloma e dau vosota vakadede qai yalovinaka. E sega ni vuvu, e sega ni vosa doudou, e sega ni viavialevu, e sega ni cakava na ka e tawakilikili, se me qara na ka me nona ga. Na loloma e sega ni cudrucudru se dau lomaca. E dau rekitaka na ka dina, e sega ni rekitaka na ca. Na loloma e ubia, e vakabauta, e nuitaka, qai vosota na ka kece ga. Kena ikuri, e sega ni mudu na loloma.​—1 Korinica 13:​4-8.

8. Na cava meda lomani ira kina eda vakabauta vata?

⁸ Kevaka eda vakalaiva me cakacaka vei keda na yalo tabu me rawa nida vuataka na loloma, ena qai votu mai na itovo oqo ena noda veiwekani kei Jiova, kei ira tale e so. (Maciu 22:​37-​39) “O koya sa sega ni lomana na wekana sa tiko ga e na mate,” a vola na yapositolo o Joni. “Na daulaba ko koya yadua sa cata na wekana: ia dou sa kila ni sa sega sara ni tiko e lomana na daulaba na bula tawa mudu.” (1 Joni 3:​14, 15) E Isireli makawa, e rawa ni taqomaki ena koro ni idrodro e dua e veivakamatei kevaka ga e sega ni cati koya e vakamatea. (Vakarua 19:​4, 11-​13) Kevaka e cakacaka tiko vei keda na yalo tabu, eda na lomana na Kalou, ira eda vakabauta vata, kei ira tale e so.

“Ni sa Vu ni Nomuni Kaukauwa me Marautaki Jiova”

9, 10. Na cava na ibalebale ni reki, cava e so na vuna meda reki kina?

⁹ Na reki​—oya na ituvaki e vakilai kina na marau levu. O Jiova na “Kalou mamarau.” (1 Timoci 1:​11, NW; Same 104:31) E reki na Luvena me vakayacora na loma i Tamana. (Same 40:8; Iperiu 10:​7-9) Qai ‘vu ni noda kaukaua na marautaki Jiova.’​—Niemaia 8:​10.

¹⁰ Na reki e solia na Kalou e vakavuna meda lomavakacegu ena noda cakava na lomana, eda lomavakacegu tale ga nida sotava na dredre, na rarawa, kei na veivakacacani. E ka marautaki dina na noda mai ‘kila na Kalou’! (Vosa Vakaibalebale 2:​1-5) Na noda veiwekani marautaki kei na Kalou e yavutaki ena kilaka dodonu, kei na noda vakabauti koya kei na isoro ni veivoli i Jisu. (1 Joni 2:​1, 2) Dua tale ga na ka e vakavu marau oya nida lewena na vuvale vakayalo e roboti vuravura. (Sefanaia 3:9; Akeai 2:7) Eda rekitaka noda inuinui meda bula ena ruku ni Matanitu ni Kalou kei na noda vunautaka na itukutuku vinaka. (Maciu 6:​9, 10; 24:14) Eda rekitaka tale ga na inuinui ni bula tawamudu. (Joni 17:3) Nida vakasamataka gona na inuinui totoka oqo, sa dodonu ga meda “reki vakaidina kina.”​—Vakarua 16:15.

Dou Veivakacegui Qai Vosota Vakadede

11, 12. (a) O na vakamacalataka vakacava na vakacegu? (b) E tarai keda vakacava na vakacegu soli vakalou?

¹¹ Dua tale na vua ni yalo tabu na vakacegu​—oqo na nona vakila e dua na yalodei, qai sega ni lomaocaoca. Na Tamada vakalomalagi e Kalou ni vakacegu, qai vakadeitaka vei keda na nona Vosa na tikina oqo: “Ena vakalougatataka na nona tamata ko Jiova ni sa vakacegui ira.” (Same 29:11; 1 Korinica 14:33) E kaya o Jisu vei ira na nona tisaipeli: “Au sa laiva vei kemudou na vakacegu, au sa solia vei kemudou na noqu vakacegu.” (Joni 14:27) Ena vukei ratou vakacava na nona tisaipeli na vosa oqo?

¹² Na vakacegu e solia o Jisu vei ratou nona tisaipeli e vakaceguya na lomadratou kei na nodratou vakasama, ratou qai sega ni nuiqawaqawa vakalevu. Ratou vakila na vakacegu oqo ni sa soli vei ratou na yalo tabu a yalataki tu. (Joni 14:26) Ena gauna oqo, ni dusimaki keda na yalo tabu salavata kei na noda masu, eda na marautaka na “vakacegu ni Kalou,” oqo e lai vakavuna na vakacegu ni lomada kei na vakasama. (Filipai 4:​6, 7) Kena ikuri, na yalo tabu i Jiova e vukei keda meda tiko veiyaloni kei ira eda vakabauta vata, kei ira tale e so.​—Roma 12:18; 1 Cesalonaika 5:​13.

13, 14. Na cava na yalovosovoso, na cava na vuna meda vakaitovotaka kina?

¹³ Na vosota vakadede e veisemati kei na vakacegu. Oya na noda yalovosovoso ni caka vei keda na ka ca e veivakacudrui da qai nuitaka ni na veisau na ituvaki. Na Kalou e dau vosota vakadede. (Roma 9:​22-​24) E laurai tale ga vei Jisu. E yaga sara mada ga vei keda nona vosota vakadede o Jisu, ni vola o Paula: “E na vuku ga ni ka oqo ka’u a lomani kina, me vakaraitaka ko Jisu Karisito vei au ka uasivi cake na vosota vakalevu sara, me’ui vakarau vei ira era na vakabauti koya emuri me ra bula tawa mudu kina.”​—1 Timoci 1:​16.

¹⁴ E vukei keda na yalovosovoso meda vosota na ka ca era tukuna se ra cakava vei keda na tani. E uqeti ira na tacina lotu Vakarisito o Paula: “Dauvosoti ira kecega na tamata.” (1 Cesalonaika 5:​14) Nida tamata ivalavala ca kece, sega ni vakabekataki nida vinakati ira na tani mera vosoti keda, mera yalovosovoso tale ga nida cala vei ira. O koya gona, meda saga vagumatua meda “vosota vakadede e na marau.”​—Kolosa 1:​9-​12.

Vakaraitaka na Yalololoma kei na Caka Vinaka

15. Tukuna na ibalebale ni yalololoma, qai vakamacalataka e so na kena ivakaraitaki.

¹⁵ E vakavotui na yalololoma nida kauaitaki ira na tani ena vosa veivakauqeti eda tauca se na ka vinaka eda cakava vei ira.a O Jiova e dau yalololoma, vaka kina o Luvena. (Roma 2:4; 2 Korinica 10:1) E namaki mera yalololoma na dauveiqaravi ni Kalou kei Karisito. (Maika 6:8; Kolosa 3:​12) So mada ga era sega ni veiwekani vakavoleka kei na Kalou era vakaraitaka na ‘loloma levu.’ (Cakacaka 27:3; 28:2) Sa qai rawarawa sara nida vakaraitaka na yalololoma kevaka eda ‘lako tiko ga ena yalo tabu.’

16. iTuvaki cava soti eda rawa ni vakaraitaka kina na yalololoma?

¹⁶ Eda rawa ni vakaraitaka na yalololoma ena gauna mada ga eda cudruvaka kina nona tauca vei keda na vosa mosimosi e dua se cakava na ka e vakatuburarawa. “Ni dou sa cudru, kakua ni dou cala kina,” e kaya o Paula. “Me kakua ni dromu na mata-ni-siga ni dou sa cudru tiko: kakua talega ni vakarawarawataki kemudou vua na tevoro. . . . Dou veilomani vakai kemudou, dou lomavinaka, dou kakua ni veicudruvi, me vaka sa sega talega ni cudruvi kemudou na Kalou e na vuku i Karisito.” (Efeso 4:​26, 27, 32) Vakauasivi meda vakaraitaka na yalololoma vei ira na sotava tiko na ituvaki dredre. Ia, ena sega ni ivakaraitaki ni yalololoma na qase ni ivavakoso e sega ni vakadodonutaka vakaivolatabu e dua e laurai ni na biuta na “valavala vinaka kecega kei nai valavala dodonu kei na ka dina,” baleta ga ni sega ni via vakamosia na yalona.​—Efeso 5:9.

17, 18. Na cava na ibalebale ni caka vinaka, cava e bibi kina meda vakaitovotaka?

¹⁷ Na caka vinaka e itovo daumaka, itovo savasava, se na yalo vinaka. Na Kalou e vinaka vakaoti. (Same 25:8; Sakaraia 9:​17) O Jisu e vakaraitaka na itovo daumaka kei na itovo savasava. Ia, a sega ni vinakata me cavuti vua na vosa “Vakavuvuli vinaka.” (Marika 10:​17, 18) E kaya oqo baleta ni kila ni Kalou ga na ivakaraitaki uasivi duadua ni vinaka.

¹⁸ Na ivalavala ca eda sucukaya mai e vakalatilati ena noda caka vinaka. (Roma 5:​12) Ia, eda rawa ni vakaraitaka na itovo oqo kevaka eda masuta na Kalou me ‘vakavulici keda ena lewa vinaka.’ (Same 119:66) E kaya o Paula vei ira nona itokani vakabauta mai Roma: ‘Kemuni na wekaqu, o yau tale ga, au sa vakabauta ni oni sa sinai tu ena yalo vinaka [se “caka vinaka,” NW], kei na kilaka.’ (Roma 15:​14, VV) E gadrevi vua na qase ni ivavakoso me “dau vinakata na ka kece ga e vinaka.” (Taito 1:​7, 8, VV) Kevaka e dusimaki keda tiko na yalo tabu ni Kalou, eda na kilai nida tamata vinaka, o Jiova ena qai ‘nanumi keda ena vinaka eda kitaka.’​—Niemaia 5:​19; 13:31.

“Na Vakabauta Tawa Vakailasu”

19. Na cava na ibalebale ni vakabauta ni dikevi vata kei na Iperiu 11:1?

¹⁹ Dua tale ga na vua ni yalo tabu na vakabauta​—“sa i koya na noda vakadinata ni na yaco na veika eda nuitaka, na noda kila ni ra tu dina na veika eda sega ni raica.” (Iperiu 11:​1, VV) Kevaka e tu vei keda na vakabauta, eda sega ni vakataratututaka ni na yaco na veika kece e yalataka tu o Jiova. Na kaukaua ni noda vakadinata ni na yaco na veika eda se bera ni raica e tautauvata kei na vakabauta. Me kena ivakaraitaki, na veika bula e tu wavoliti keda eda vakadinata kina ni tiko na Dauveibuli. Oqo na mataqali vakabauta eda na vakaraitaka nida lako vata kei na yalo tabu.

20. Na cava na “valavala ca eda sa tao rawarawa kina”? Eda na levea vakacava, vaka kina na itovo vakayago?

²⁰ Na lailai ni noda vakabauta e “valavala ca eda sa tao rawarawa kina.” (Iperiu 12:1) E gadrevi meda nuitaka na yalo tabu ni Kalou meda levea rawa kina na itovo vakayago, na domodomoiyau, kei na ivakavuvuli lasu e rawa ni vakaleqa na noda vakabauta. (Kolosa 2:8; 1 Timoci 6:​9, 10; 2 Timoci 4:​3-5) Na yalo tabu e vukei ira na dauveiqaravi ni Kalou nikua mera vuataka na vakabauta, oqo na mataqali vakabauta a kune tale ga vei ira na dauveiqaravi ni Kalou ena gauna vakaivolatabu. (Iperiu 11:​2-​40) Eda rawa ni vakaukauataka nodra vakabauta e so tale nida vakaraitaka na “vakabauta tawa vakailasu.”​—1 Timoci 1:5; Iperiu 13:7.

Vakaraitaka na Yalomalumalumu kei na Lewa Matau

21, 22. Na cava na ibalebale ni yalomalumalumu, na cava na vuna meda bulataka kina?

²¹ Ni dua e yalomalumalumu, e laurai ni maloku nona ivakarau kei na nona ivalavala. Dua na itovo e kilai kina na Kalou oya ni dau yalomalumalumu. Eda kila oqo baleta ni dau yalomalumalumu o Jisu, e vakatayaloyalotaka vinaka na itovo i Jiova. (Maciu 11:​28-​30; Joni 1:​18; 5:​19) Na cava gona e gadrevi vei keda na dauveiqaravi ni Kalou?

²² Nida lotu Vakarisito, e gadrevi meda “yalolokomi sara vei ira kecega na tamata.” (Taito 3:2) Eda vakaraitaka na yalomalumalumu ena cakacaka vakavunau. Era vakasalataki o ira na matua vakayalo mera vakadodonutaka “e na yalo malumalumu” na lotu Vakarisito e cala. (Kalatia 6:1) Eda rawa kece ni sasagataka meda duavata qai tiko veiyaloni kei ira na tacida ena noda bulataka na ‘yalomalumalumu kei na yalomalua.’ (Efeso 4:​1-3) Eda na vakaraitaka na yalomalumalumu kevaka eda lako vata tiko ga kei na yalo tabu, da qai valavala malua se meda lewai keda vakamatau.

23, 24. Na cava na lewa matau, sala cava e vukei keda kina?

²³ Na lewa matau e vukei keda meda qarauna na ka eda vakasamataka, noda vosa, kei na ka eda cakava. O Jiova e ‘tarovi’ koya ena gauna era a vakarusa kina na koro o Jerusalemi na kai Papiloni. (Aisea 42:14) A ‘laiva vei keda’ na Luvena e dua ‘na ivakarau’ ni a lewai koya vakamatau ena gauna e vakararawataki kina. A vakasalataki ira tale ga na nona itokani lotu Vakarisito na yapositolo o Pita mera ‘vakaikuritaka na nodra vuku ena ivalavala malua [se, “lewa matau,” NW].’​—1 Pita 2:​21-​23; 2 Pita 1:​5-8.

²⁴ E namaki vei ira na qase ni ivavakoso lotu Vakarisito mera lewa matau. (Taito 1:​7, 8, VV) Io, o ira kece era lako voli ena yalo tabu e rawa nira lewai ira vinaka, era levea kina na ivalavala tawakilikili, na vosavosa ca, se na ka cava ga e vakacudrui Jiova. Kevaka eda vakalaiva na yalo tabu ni Kalou me vukei keda meda lewa matau, ena laurai votu ena noda vosa kei na noda ivalavala vakalou.

Lako Tiko ga ena Yalo Tabu

25, 26. Na sala cava e tara kina noda veimaliwai ena gauna oqo, kei na noda bula ena veigauna mai muri na noda lako voli ena yalo tabu?

²⁵ Kevaka eda lako tiko ga ena yalo tabu, eda na gumatua na kacivaka na itukutuku ni Matanitu ni Kalou. (Cakacaka 18:​24-​26) Ena taleitaki na veimaliwai kei keda, vakauasivi nira na marau na tacida vakayalo na maliwai keda. Ni dusimaki keda tiko na yalo tabu, eda na ivurevure ni veivakayaloqaqataki vei ira na tacida vakayalo. (Filipai 2:​1-4) Sega li nida vinakata na lotu Vakarisito kece meda vaka oqo?

²⁶ Nida bula tiko oqo ena vuravura e lewa o Setani, ena macala ga ni na sega ni rawarawa meda lako voli ena yalo tabu. (1 Joni 5:​19) Ia, e vica na milioni ena gauna oqo era sa lako voli tiko ena yalo tabu. Kevaka eda vakararavi vei Jiova mai vu ni yaloda, eda na marautaka na bula ena gauna oqo, eda na qai lako tiko ga me tawamudu ena sala dodonu ni Kalou, o koya e vakarautaka na yalo tabu.​—Same 128:1; Vosa Vakaibalebale 3:​5, 6.

[iVakamacala e ra]

Vakamacalataka Mada

• E tara vakacava noda veiwekani kei na Kalou kei Luvena na noda “lako voli e na Yalo Tabu”?

• Na itovo cava soti era vua ni yalo tabu?

• Na sala cava soti eda rawa ni vakaraitaka kina na vua ni yalo tabu ni Kalou?

• E tara vakacava na noda bula ena gauna oqo kei na veigauna e se bera mai na noda lako voli ena yalo tabu?

[iYaloyalo ena tabana e 23]

Na yalo tabu i Jiova e uqeti keda meda lomani ira na tacida vakayalo

[iYaloyalo ena tabana e 24]

O vakaraitaka na yalololoma ni o caka vinaka kei na nomu tauca na vosa veivakauqeti